Ge Baisiraele ba be ba le bothopša Babilona, tumelo ya bona e ile ya lekwa gantši. Shaderaka, Meshaka le Abedinego ba ile ba lahlelwa ka sebešong sa mollo o fišago, eupša Modimo a ba ntšha ka go sona ba sa phela. Ka morago ga ge Babilona e fentšwe ke Bamede le Baperesia, Daniele o ile a lahlelwa ka moleteng wa ditau, eupša le yena Modimo o ile a mo šireletša ka gore a tswalele melomo ya ditau.

Mafelelong, kgoši Korese wa Peresia o ile a lokolla Baisiraele bothopša. Ba boela nageng ya gabo bona ka morago ga nywaga e 70 ga e sa le ba išitšwe Babilona e le mathopša. Se sengwe sa dilo tša pele tšeo ba ilego ba di dira ge ba boetše Jerusalema e bile go aga tempele ya Jehofa. Lega go le bjalo, go se go ye kae manaba a bona a ile a emiša modiro wa bona. Ka gona, e bile ka morago ga nywaga e ka bago e 22 ba boetše Jerusalema moo mafelelong ba ilego ba fetša go aga tempele.

Le gona re tlo ithuta ka leeto la Esera la go boela Jerusalema go yo lokiša tempele. Se se ile sa direga nywaga e 47 ka morago ga ge tempele e fedile. Ke moka nywaga e 13 ka morago ga leeto la Esera, Nehemia o ile a thuša go aga lefsa merako ya Jerusalema yeo e bego e wele. Ditiragalo ka moka tša histori tšeo di lego Karolong ye ya BOHLANO di akaretša nywaga e 152.