Legodimo le lefase di tšwa kae? Letšatši, ngwedi le dinaledi gotee le dilo tše dintši mo lefaseng di bile gona bjang? Beibele e nea karabo ya therešo ge e re di bopilwe ke Modimo. Ka gona puku ye ya rena e thoma ka ditaba tša Beibele tša tlholo.

Re ithuta gore dibopiwa tša pele tša Modimo e bile batho ba moya bao ba swanago le yena. E be e le barongwa. Eupša lefase le be le bopetšwe batho bao ba swanago le rena. Ka gona, Modimo o ile a bopa monna le mosadi e lego Adama le Efa ke moka a ba bea serapeng se sebotse. Lega go le bjalo, ba ile ba se kwe Modimo gomme ba se sa swanelwa ke go phela.

Nywaga ka moka ya go tloga go bopšeng ga Adama go fihla Meetsefuleng a magolo e bile e 1 656. Nakong yeo go be go phela batho ba bantši ba babe. Legodimong go be go na le batho ba moya bao ba sa bonagalego, e lego Sathane le barongwa ba gagwe ba babe. Lefaseng go be go na le Kaine le batho ba bangwe ba bantši ba babe, go akaretša le banna ba bangwe ba dinatla. Eupša go be go bile go na le batho ba go loka lefaseng ba bjalo ka Abele, Henoge le Noa. Karolong ye ya PELE re tla bala ka batho ba ka moka le dilo tšeo di ilego tša diragala.