Kgaolo 7: Monna yo a Nago le Sebete
GE BATHO ba be ba thoma go ata lefaseng, ba bantši ba bona ba ile ba dira dilo tše mpe go swana le Kaine. Eupša monna yo mongwe o be a sa swane le bona. Ke monna yo yo a bitšwago Henoge. E be e le monna yo a nago le sebete. Batho ka moka bao a bego a phela le bona ba be ba dira dilo tše mpe kudu, eupša Henoge o ile a tšwela pele a hlankela Modimo.
Na o a tseba gore ke ka baka la’ng batho ba mehleng yeo ba be ba dira dilo tše dintši gakaakaa tše mpe? Anke o nagane ka se: Ke mang yo a ilego a dira gore Adama le Efa ba se ke ba kwa Modimo gomme ba je dienywa tšeo Modimo a bego a ba boditše gore ba se ke ba di ja? Ee, e be e le morongwa yo mobe. Beibele e mmitša Sathane. O leka go dira gore batho ka moka e be ba babe.
Ka letšatši le lengwe, Jehofa Modimo o ile a laela Henoge gore a botše batho selo se itšego seo ba bego ba sa rate go se kwa. Selo seo e be e le gore: ‘Ka letšatši le lengwe Modimo o tlo fediša batho ba babe ka moka.’ Ga go pelaelo gore batho bao ba ile ba galefa kudu ge ba ekwa se. Mohlomongwe ba ile ba ba ba leka go bolaya Henoge. Ka gona Henoge o ile a swanelwa ke gore a be le sebete kudu e le gore a botše batho bao seo Modimo a bego a tlo se dira.
Modimo ga se a ka a dumelela gore Henoge a phele nako e telele gare ga batho bao ba babe. Henoge o phetše nywaga e 365 feela. Ke ka baka la’ng re re “nywaga e 365 feela”? Ke ka gobane batho ba mehleng yeo ba be ba phetše gabotse mmeleng go phala ba mehleng yeno e bile ba be ba phela nako e telele. Ka mohlala, Methusela e lego morwa wa Henoge o phetše nywaga e 969.
Ka morago ga ge Henoge a hwile, batho ba ile ba tšwela pele ba dira dilo tše mpe le go feta. Beibele e re ‘sohle seo ba bego ba se nagana e be e le se sebe ka dinako tšohle,’ e bile e re ‘lefase le be le tletše bošoro.’
Na o tseba le lengwe la mabaka ao a bego a dira gore go be le mathata a mantši kudu gakaakaa lefaseng mehleng yeo? Ke ka gobane Sathane o be a na le tsela e mpsha ya go dira gore batho ba dire dilo tše mpe. Re tla ithuta ka yona letlakaleng le le latelago.
Genesi 5:21-24, 27; 6:5, 11-13; Baheberu 11:5; Juda 14, 15.
Dipotšišo
- Henoge o be a sa swane le batho ba bangwe ka tsela efe?
- Ke ka baka la’ng batho ba mehleng ya Henoge ba ile ba dira dilo tše dintši gakaakaa tše mpe?
- Ke dilo dife tše mpe tšeo batho bao ba bego ba di dira? (Lebelela seswantšho.)
- Ke ka baka la’ng Henoge a ile a swanelwa ke go ba le sebete?
- Batho ba mehleng yeo ba be ba phela nako e kaaka’ng, eupša Henoge yena o ile a phela nako e kaaka’ng?
- Go ile gwa direga’ng ka morago ga ge Henoge a hwile?
Dipotšišo tša tlaleletšo
- Bala Genesi 5:21-24, 27.
Henoge o be a na le tswalano ya mohuta ofe le Jehofa? (Gen. 5:24)
Go ya ka Beibele, motho yo a phetšego nako e telele go re feta ka moka ke mang, gona o be a na le nywaga e mekae ge a be a ehwa? (Gen. 5:27)
- Bala Genesi 6:5.
Maemo a ile a mpefala gakaaka’ng mo lefaseng ka morago ga lehu la Henoge, gona maemo ao a bjang ge a bapetšwa le a mehleng ya rena? (2 Tim. 3:13)
- Bala Baheberu 11:5.
Ke seka sefe sa Henoge seo se ilego sa ‘kgahliša Modimo gabotse,’ gomme ka mafelelo afe? (Gen. 5:22)
- Bala Juda 14, 15.
Lehono Bakriste ba ka ekiša bjang sebete sa Henoge ge ba lemoša batho ka ntwa yeo e tlago ya Haramagedone? (2 Tim. 4:2; Baheb. 13:6)
