Ke batho ba seswai feela bao ba ilego ba phologa Meetsefula, eupša ge nako e tšwela pele ba ile ba ata. Ke moka nywaga e 352 ka morago ga Meetsefula, Aborahama o ile a belegwa. Re tlo ithuta kamoo Modimo a ilego a boloka kholofetšo ya gagwe ka go nea Aborahama morwa yo a bitšwago Isaka. Bjale go barwa ba babedi ba Isaka, Modimo o ile a kgetha Jakobo.

Jakobo o ile a ba le lapa le legolo la barwa ba 12 le barwedi. Barwa ba Jakobo ba 10 ba be ba hloile ngwanabo bona yo monyenyane e lego Josefa gomme ba mo rekiša bokgobeng Egipita. Ka morago Josefa o ile a ba mmuši yo mogolo wa Egipita. Ge go be go wele tlala e kgolo, Josefa o ile a leka bana babo go bona ge e ba ba be ba fetošitše dipelo tša bona. Mafelelong lapa la Jakobo ka moka, e lego Baisiraele, le ile la hudugela Egipita. Se se diregile nywaga e 290 ka morago ga ge Aborahama a belegwe.

Baisiraele ba ile ba dula Egipita nywaga e mengwe e 215. Ka morago ga ge Josefa a hwile, ba ile ba fetoga makgoba moo. Ge nako e dutše e tšwela pele, Moshe o ile a belegwa gomme Modimo a mo diriša gore a lokolle Baisiraele Egipita. Ditiragalo tša histori tšeo di lego Karolong ye ya BOBEDI di akaretša nywaga e 857.