Kgaolo 22: Josefa o Lahletšwe Kgolegong
JOSEFA o be a na le nywaga e 17 feela ge a be a išwa Egipita. Ge a le moo, o ile a rekišetšwa monna yo a bitšwago Potifara. Potifara o be a hlankela kgoši ya Egipita yeo e bitšwago Farao.
Josefa o ile a hlankela mong wa gagwe Potifara ka mafolofolo. Ka gona ge Josefa a godile, Potifara o ile a mmea gore a okamele ntlo ya gagwe ka moka. Bjale ke ka baka la’ng mo seswantšhong Josefa a le kgolegong? Ke ka baka la mosadi wa Potifara.
Josefa o ile a gola a ba lesogana le lebotse kudu gomme mosadi wa Potifara a nyaka gore a robale le yena. Eupša Josefa o be a tseba gore seo se fošagetše, ka gona a gana go se dira. Mosadi wa Potifara a galefa kudu. Eitše ge monna wa gagwe a boile gae, a mmotša maaka a re: ‘Josefa yoo wa go se loke o lekile go robala le nna!’ Potifara o ile a kgolwa mosadi wa gagwe gomme a galefela Josefa kudu. Ka gona a mo lahlela kgolegong.
Go se go ye kae, monna yo a bego a okametše kgolego o ile a lemoga gore Josefa ke motho wa go loka. Ka gona a mo dira gore a laole bagolegwa ba bangwe ka moka. Ka morago, Farao o ile a galefela motšheladino wa gagwe le moapei wa dinkgwa gomme a ba lahlela kgolegong. Bošegong bjo bongwe ba ile ba lora ditoro, eupša ba se ke ba tseba tlhathollo ya tšona. Letšatšing le le latelago, Josefa a re go bona: ‘Mpotšeng ditoro tša lena.’ Ke moka ge ba mmoditše tšona, Josefa a kgona go di hlatholla ka thušo ya Modimo.
Josefa o ile a re go motšheladino: ‘O tlo lokollwa kgolegong ka morago ga matšatši a mararo gomme wa boela wa ba motšheladino wa Farao.’ Josefa o ile a oketša ka gore: ‘Ge o lokolotšwe, hle o botše Farao ka nna gomme o nthuše gore ke tšwe lefelong le.’ Eupša Josefa o ile a botša moapei wa dinkgwa a re: ‘Ka morago ga matšatši a mararo, Farao o tlo go kgaola hlogo.’
Ka morago ga matšatši a mararo, seo Josefa a bego a se boletše se ile sa direga. Farao o ile a kgaola hlogo ya moapei wa dinkgwa. Eupša motšheladino yena o ile a lokollwa kgolegong gomme a thoma go hlankela kgoši gape. Lega go le bjalo, motšheladino yo o ile a lebala Josefa! Ga se a ka a botša Farao ka yena, ka gona Josefa o ile a swanelwa ke go dula kgolegong.
Genesi 39:1-23; 40:1-23.
Dipotšišo
- Josefa o be a na le nywaga e mekae ge a be a išwa Egipita, gomme go ile gwa direga’ng ge a fihla moo?
- Go tlile bjang gore Josefa a feleletše a le kgolegong?
- Josefa o ile a newa boikarabelo bofe ge a be a le kgolegong?
- Ke’ng seo Josefa a ilego a se direla motšheladino wa Farao le moapei wa gagwe wa dinkgwa ge a be a le moo kgolegong?
- Go ile gwa direga’ng ka morago ga ge motšheladino wa Farao a lokolotšwe kgolegong?
Dipotšišo tša tlaleletšo
- Bala Genesi 39:1-23.
Ka ge mehleng ya Josefa go be go se na molao o ngwadilwego wa Modimo wo o bego o ganetša thobalano pele ga lenyalo, ke eng seo se ilego sa mo dira gore a gane go robala le mosadi wa Potifara? (Gen. 2:24; 20:3; 39:9)
- Bala Genesi 40:1-23.
Hlalosa ka boripana toro ya motšheladino le tlhathollo yeo Jehofa a ilego a e nea Josefa. (Gen. 40:9-13)
Moapei wa dinkgwa yena o bile le toro efe, gona e be e bolela’ng? (Gen. 40:16-19)
Lehono mohlanka yo a botegago le wa temogo o ekišitše bjang boemo bja Josefa bja kgopolo? (Gen. 40:8; Ps. 36:9; Joh. 17:17; Dit. 17:2, 3)
Genesi 40:20 e re thuša bjang go ba le pono ya Bakriste mabapi le go keteka matšatši a matswalo? (Mmo. 7:1; Mar. 6:21-28)
You May Also Like
DIKARATA TŠA BATHO BA KA BEIBELENG
Karata ya Beibele ya Potifara
Taonelouta karata ye ya motho wa ka Beibeleng gomme o ithute ka mo go oketšegilego ka Potifara, e lego mong wa Josefa wa kua Egipita.
