JOSEFA o ile a se sa kgona go itshwara. O ile a botša bahlanka ba gagwe ka moka gore ba tšwe ka ntlong. Ge Josefa a šetše le bana babo ka moo ntlong, a thoma go lla. Re ka akanya kamoo bana babo ba ilego ba makala ka gona ka ge ba be ba sa tsebe gore o llela eng. Mafelelong o ile a re go bona: “Ke nna Josefa. A tate o sa phela?”

Bana babo ba ile ba makala kudu moo ba ilego ba palelwa ke go bolela. Ba be ba tšhogile. Josefa a re: “Mpatameleng hle.” Ge ba mmatametše a re go bona: “Ke nna morwarrago lena Josefa yoo le mo rekišitšego a išwa Egipita.”

Josefa a bolela le bona gape ka botho a re: ‘Le se ke la ipona molato ge le nthekišitše. Ruri ke Modimo yo a nthometšego mo Egipita gore ke tle ke phološe maphelo a batho. Farao o ntirile mmuši wa naga ye ka moka. Bjale akgofang le boele go tate gomme le mmotše ditaba tše. Le mmotše le gore a tle a dule mo.’

Ke moka Josefa a gokarela bana babo ka moka gomme a ba atla. Ge Farao a ekwa gore bana babo Josefa ba tlile, a re go yena: ‘E re ba tšee dikariki ba ye go nametša tatago bona le malapa a bona gomme ba tle mo. Ke tla ba nea naga e di phalago tšohle mo Egipita.’

Ba ile ba dira sona seo. O ka kgona go bona Josefa mo seswantšhong a gahlanetša tatagwe ge a be a fihla Egipita le lapa la gagwe ka moka.

Lapa la Jakobo le be le godile kudu. E be e le ba 70 ge ba be ba hudugela Egipita go balwa Jakobo, bana ba gagwe le ditlogolo tša gagwe. Eupša lapeng leo go be go bile go na le basadi gomme mohlomongwe le bahlanka ba bantši. Ka moka ga bona ba ile ba dula Egipita. Ba ile ba bitšwa Baisiraele ka ge Modimo a ile a fetoša leina la Jakobo gore e be Isiraele. Baisiraele e ile ya ba setšhaba se se kgethegilego kudu go Modimo go etša ge re tla bona seo ka morago.

Genesi 45:1-28; 46:1-27.