Kgaolo 30: Sehlare Seo se Tukago Mollo
MOSHE o be a sepetše leeto le letelele go tla thabeng ya Horebe gore a tle a fudiše dinku tša gagwe. Ge a le mo, o ile a bona sehlare se tuka mollo eupša se sa fse!
Moshe o ile a re: ‘Se se a makatša! E re ke batamele gomme ke bone gabotse.’ Ge a batametše, o ile a kwa lentšu le etšwa go sona le re: ‘O se ke wa batamela mo. Rola diramphašane tša gago ka gobane o eme lefelong le lekgethwa.’ Modimo o be a bolela le yena a diriša morongwa, ka gona Moshe o ile a uta sefahlego sa gagwe.
Ke moka Modimo a re: ‘Ke bone mohlako wa batho ba ka kua Egipita. Bjale ke yo ba lokolla gomme ke roma wena gore o yo ntšha batho ba ka Egipita.’ Jehofa o be a tlo iša batho ba gagwe nageng e botse ya Kanana.
Eupša Moshe a re: ‘Nna ke fo ba motho feela. Nka dira seo bjang? Eupša ge nka ya go Baisiraele gomme ba mpotšiša gore ke romilwe ke mang, ke tla re’ng?’
Modimo a araba a re: ‘Se ke seo o tlago go ba botša sona.’ O fihle o re go bona: ‘JEHOFA Modimo wa Aborahama, Modimo wa Isaka le Modimo wa Jakobo o nthomile go lena.’ Jehofa a oketša ka gore: “Le ke lona leina la ka go iša mehleng ya neng le neng.”
Moshe a re: ‘Eupša bjale a re re ga ba nkgolwe ge ke re ke romilwe ke wena.’
Modimo a mmotšiša a re: “Ke eng se o se swerego ka seatleng sa gago?”
Moshe a re: “Ke lepara.”
Modimo a re: “Le lahlele fase.” Ka gona ge Moshe a le lahletše fase, la fetoga noga. Ka morago Jehofa o ile a bontšha Moshe mohlolo o mongwe. O ile a re go yena: “Tsenya seatla sa gago momenong wa sehubeng wa seaparo sa gago.” Moshe o ile a dira bjalo gomme ge a se ntšha e be e le se sešweu go swana le kapoko! Seatla sa gagwe se be se le bjalo ka ge eka se tšwile lephera, e lego bolwetši bjo bošoro. Ka morago ga moo, Jehofa o ile a nea Moshe matla a go dira mohlolo wa boraro. Mafelelong Jehofa o ile a re go yena: ‘Ge o dira mehlolo ye, Baisiraele ba tla kgolwa gore ke go romile.’
Ka morago ga moo, Moshe a boela gae gomme a fihla a re go Jethero: ‘Hle, e re ke boele go metswalo ya ka kua Egipita ke yo bona kamoo e phelago ka gona.’ Ka gona Jethero a laelana le Moshe ke moka Moshe a thoma leeto la gagwe la go boela Egipita.
Ekisodo 3:1-22; 4:1-20.
Dipotšišo
- Leina la thaba yeo e lego mo seswantšhong ke eng?
- Hlalosa selo se se makatšago seo Moshe a ilego a se bona ge a be a rotogetše thabeng ye le dinku tša gagwe.
- Lentšu leo le ilego la tšwa sehlareng se le ile la re’ng, gona e be e le lentšu la mang?
- Moshe o ile a re’ng ge Modimo a be a mmotša gore o tla etelela batho ba gagwe pele go ba ntšha Egipita?
- Ke’ng seo Modimo a ilego a re Moshe a se botše batho ba gagwe ge e ba ba ka mmotšiša gore o romilwe ke mang?
- Moshe o be a tla kgona bjang go ba kgodiša gore o romilwe ke Modimo?
Dipotšišo tša tlaleletšo
- Bala Ekisodo 3:1-22.
Phihlelo ya Moshe e re kgonthišetša bjang gore Jehofa o tla re thekga gaešita le ge re ikwa re sa swanelege go phethagatša mediro e itšego ka phuthegong? (Ek. 3:11, 13; 2 Bakor. 3:5, 6)
- Bala Ekisodo 4:1-20.
Boemo bja Moshe bja kgopolo bo ile bja fetoga bjang nywageng e 40 yeo a e feditšego a dula Midiane, gona ke thuto efe yeo bao ba katanelago go fihlelela ditokelo ka phuthegong ba ka ithutago yona go se? (Ek. 2:11, 12; 4:10, 13; Mika 6:8; 1 Tim. 3:1, 6, 10)
Gaešita le ge Jehofa a re laya a diriša mokgatlo wa gagwe, mohlala wa Moshe o ka re nea kgodišego efe? (Ek. 4:12-14; Ps. 103:14; Baheb. 12:4-11)