Kgaolo 31: Moshe le Arone ba ya go Farao
GE Moshe a boetše Egipita, o ile a botša Arone ngwanabo ditaba ka botlalo ka mehlolo yeo. Bjale ge Moshe le Arone ba bontšhitše Baisiraele mehlolo yeo, batho ka moka ba ile ba kgolwa gore Jehofa o be a na le bona.
Ke moka Moshe le Arone ba ile ba ya go Farao. Ba fihla ba re go yena: ‘Jehofa Modimo wa Isiraele o re: “Lesa batho ba ka ba tšee leeto la matšatši a mararo gore ba ye ba nthapele kua lešokeng.”’ Eupša Farao a araba a re: ‘Ga ke tsebe Jehofa. Le gona nka se ke ka lesa Baisiraele gore ba tloge.’
Farao o be a galefile kudu ka gobane batho ba be ba nyaka go lokollwa mošomong gore ba yo rapela Jehofa. Ka gona a ba gapeletša gore ba šome ka thata le go feta pele. Baisiraele ba ile ba sola Moshe ka baka la tsela e sehlogo yeo ba bego ba swerwe ka yona, ka baka leo Moshe a nyama kudu. Eupša Jehofa o ile a mmotša gore a se ke a tshwenyega. A re go yena: ‘Ke tla dira gore Farao a lese batho ba ka ba tloge.’
![Moshe le Arone ba ya go Farao](https://assetsnffrgf-a.akamaihd.net/assets/l/my/my_SE/31.jpg)
Moshe le Arone ba ile ba ya go Farao gape. Mo nakong ye ba ile ba dira mohlolo. Arone o ile a lahlela lepara la gagwe fase gomme la fetoga noga e kgolo. Lega go le bjalo, banna ba bohlale ba Farao le bona ba ile ba lahlela mapara a bona fase gomme a fetoga dinoga. Eupša bona! Noga ya Arone e ja dinoga tša banna bao ba bohlale. Lega go le bjalo, Farao o be a sa dutše a sa nyake go lesa Baisiraele gore ba sepele.
Bjale nako e ile ya fihla ya gore Jehofa a rute Farao thuto. Na o a tseba gore o ile a mo ruta yona bjang? O ile a mo ruta yona ka go tliša dikotlo tše 10 goba mathata a magolo Egipita.
Ka morago ga tše dintši tša dikotlo tšeo, Farao o be a laela gore Moshe a bitšwe gomme a re go yena: ‘Thibela kotlo ye, ke tla lesa Baisiraele ba tloga.’ Eupša e be e re ge kotlo e kgaotša, Farao a fetoše monagano. O be a sa lese Baisiraele ba tloga. Eupša mafelelong ka morago ga kotlo ya lesome, Farao o ile a lesa Baisiraele gore ba sepele.
Na o tseba kotlo e nngwe le e nngwe ya dikotlo tšeo tše 10? A re ithute ka tšona.
Ekisodo 4:27-31; 5:1-23; 6:1-13, 26-30; 7:1-13.
Dipotšišo
- Mehlolo yeo Moshe le Arone ba ilego ba e dira e bile le mafelelo afe go Baisiraele?
- Ke’ng seo Moshe le Arone ba ilego ba se botša Farao, gona karabo ya Farao e bile efe?
- Bjalo ka ge go bontšhitšwe mo seswantšhong, go ile gwa direga’ng ge Arone a be a lahlela lepara la gagwe fase?
- Jehofa o ile a ruta bjang Farao thuto, gomme Farao o ile a arabela bjang?
- Go ile gwa direga’ng ka morago ga kotlo ya lesome?
Dipotšišo tša tlaleletšo
- Bala Ekisodo 4:27-31 le 5:1-22.
Farao o be a era gore’ng ge a be a re: “Ga ke tsebe Jehofa le gatee”? (Ek. 5:2; 1 Sam. 2:12; Baroma 1:21)
- Bala Ekisodo 6:1-13, 26-30.
Ke ka kgopolo efe Jehofa a ilego a se itsebiše go Aborahama, Isaka le Jakobo? (Ek. 3:13, 14; 6:3; Gen. 12:8)
Go tseba gore Jehofa o ile a diriša Moshe gaešita le ge a be a ikwa a sa swanelege bakeng sa modiro wo a bego a o neilwe, go re dira gore re ikwe bjang? (Ek. 6:12, 30; Luka 21:13-15)
- Bala Ekisodo 7:1-13.
Ge Moshe le Arone ba be ba bolela dikahlolo tša Jehofa ka sebete go Farao, ke mohlala ofe wo ba o beetšego bahlanka ba Modimo lehono? (Ek. 7:2, 3, 6; Dit. 4:29-31)
Jehofa o ile a bontšha bjang gore o phagametše medimo ya Egipita? (Ek. 7:12; 1 Dikor. 29:12)