NGWANENYANA yo o mmonago mo o na le nywaga e 12. Jesu o mo swere ka seatla gomme mmagwe le tatagwe ba eme kgauswi le yena. Na o a tseba gore ke ka baka la’ng ba thabile gakaakaa? Anke re bone.

Tatago ngwanenyana yo e be e le monna wa maemo a phagamego yo a bitšwago Jairo. Ka letšatši le lengwe, morwedi wa gagwe o ile a babja gomme a robatšwa malaong. Eupša a se be kaone. A babja kudu le go feta. Jairo le mosadi wa gagwe ba ile ba tshwenyega kudu ka gobane go be go bonagala eka ngwanenyana wa bona o tlo hwa. E be e le morwedi wa bona a nnoši. Ka gona Jairo o ile a yo nyaka Jesu. O be a kwele ka mehlolo yeo Jesu a bego a e dira.

Ge Jairo a fihla go Jesu, a hwetša a kgobokanetšwe ke lešaba le legolo. Eupša Jairo a tsena moo gare ga lešaba gomme a wela dinaong tša Jesu. A re go yena: ‘Morwedi wa ka o babja kudu. Hle etla o tlo mo fodiša.’ Jesu a mmotša gore o tla tla.

Ge ba dutše ba sepela, lešaba le be le ba pitlaganya. Gateetee Jesu a ema gomme a re: “Ke mang yo a nkgwathilego?” Jesu o ile a tseba gore go na le motho yo a mo kgwathilego ka gobane a kwele matla a etšwa go yena. Eupša o be a kgwathilwe ke mang? O be a kgwathilwe ke mosadi yo a feditšego nywaga e 12 a babja kudu. Mosadi yoo o ile a tla a kgwatha diaparo tša Jesu gomme a fola!

Se se ile sa dira gore Jairo a thabe ka gobane o ile a bona kamoo go lego bonolo ka gona gore Jesu a fodiše motho. Eupša go ile gwa fihla moromiwa yo mongwe gomme a re go Jairo: ‘O se ke wa hlwa o sa tshwenya Jesu. Morwedi wa gago o hwile.’ Jesu a kwa seo ke moka a re go Jairo: ‘O se ke wa tshwenyega, morwedi wa gago o tla tsoga.’

Mafelelong ge ba fihla ntlong ya Jairo, ba hwetša batho ba lla ka ge ba kwele bohloko kudu. Lega go le bjalo Jesu a re go bona: ‘Lesang go lla. Ngwana yo ga se a hwa. O robetše.’ Eupša ba sega Jesu le go mo kwera ka gobane ba be ba tseba gore ngwana yo o hwile.

Ke moka Jesu a tšea tatago ngwanenyana yo le mmagwe gotee le baapostola ba gagwe ba bararo ba tsena ka phapošing yeo ngwana yo a bego a robetše ka go yona. A mo swara ka seatla gomme a re: “Ngwanenyana, tsoga!” Ke moka ngwanenyana yo a boela a phela bjalo ka ge o mmona mo seswantšhong. A tsoga gomme a sepelasepela! Ke ka baka leo mmagwe le tatagwe ba thabilego kudu ka tsela ye.

Yo e be e se motho wa pele yoo Jesu a bego a mo tsošitše bahung. Motho wa pele yoo Beibele e re botšago ka yena gore Jesu o ile a mo tsoša bahung e be e le morwa wa mohlologadi yo a bego a dula motseng wa Naini. Ka morago ga moo, Jesu o ile a tsoša le Latsaro kgaetšedi ya Maria le Mareta. Nakong ya ge Jesu a tla be a buša e le kgoši ya mmušo wa Modimo, o tla tsoša batho ba bantši kudu bao ba hwilego. Na seo ga se re thabiše?

Luka 8:40-56; 7:11-17; Johane 11:17-44.