GO DIREGILE selo se itšego se se šiišago. Johane Mokolobetši o sa tšwa go bolawa. Herodiase mosadi wa kgoši o be a sa mo rate. Ka gona, o ile a dira gore kgoši e laele gore Johane a kgaolwe hlogo.

Ge Jesu a ekwa se, a nyama kudu. A tloga a ya lefelong leo go se nago batho gore a be noši. Eupša batho ba mo šala morago. Eitše ge a bona batho bao ba bantši, a ba šokela. A bolela le bona ka mmušo wa Modimo gomme a fodiša balwetši ba bona.

Mantšiboeng ao barutiwa ba gagwe ba tla go yena ba re: ‘E šetše e le bošego, le gona lefelo le le ka thokwana. Lokolla batho ba e le gore ba yo ithekela dijo metsaneng ya kgauswi.’

Jesu a re go bona: ‘Ga go nyakege gore ba tloge. Lena ba neeng dijo.’ Jesu a botšiša Filipi a re: ‘Re ka reka kae dijo tše di lekanego tša go fepa batho ba ka moka?’

Filipi a mo araba a re: ‘Go tla nyakega tšhelete e ntši kudu go reka dijo tše di lekanego gore yo mongwe le yo mongwe a tle a hwetše mo gonyenyane.’ Andrea a re: ‘Mošemanyana yo yo a swerego dijo tša rena, o swere feela dinkgwa tše hlano le dihlapi tše pedi. Eupša di tloga di ka se lekane batho ba ka moka.’

Jesu a re: ‘Botšang batho ba gore ba dule bjanyeng.’ Ke moka a leboga Modimo bakeng sa dijo tšeo gomme a thoma go di ngwathaganya. Ka morago ga moo, barutiwa ba gagwe ba abela batho ba ka moka dinkgwa le dihlapi. Go be go na le banna ba 5 000 le basadi ba bantšintši le bana. Ka moka ga bona ba ja ba khora. Ge barutiwa ba gagwe ba topelela marathana ao a bego a šetše, gwa tlala diroto tše 12!

Bjale Jesu a laela barutiwa ba gagwe gore ba namele sekepe ba tshelele ka mošola wa Lewatle la Galilea. Bošegong bjoo gwa tšutla phefo e matla gomme maphoto a tšokotša sekepe seo. Barutiwa ba tšhoga kudu. Ke moka bošegogare ba bona motho yo mongwe a sepela godimo ga meetse a etla go bona. Ba goeletša ka poifo ka gobane ba be ba sa kgolwe seo ba se bonago.

Jesu a re go bona: ‘Le se ke la boifa. Ke nna!’ Ba be ba sa dutše ba sa kgolwe. Ka gona Petro a re go Jesu: ‘Morena, ge e ba e le wena, mpotše gore ke tle go wena ke sepela godimo ga meetse.’ Jesu a re: “Tlaa!” Ka go re’alo Petro a fologa sekepeng a ya go Jesu a sepela godimo ga meetse! Ke moka a tšhoga gomme a thoma go nwelela, eupša Jesu a mo phološa.

Lebakeng le lengwe gape, Jesu o ile a fepa batho ba bangwe ba bantši. Lona lebakeng leo, o ile a ba fepa ka dinkgwa tše šupago le dihlatswana tše sego kae. Le gona moo, go ile gwa ba le dijo tše dintši bakeng sa bohle. Na ga go kgahliše go bona kamoo Jesu a ilego a hlokomela batho ka gona? Nakong ya ge a tla be a buša e le kgoši ya mmušo wa Modimo, re ka se tshwenyege ka selo!

Mateo 14:1-32; 15:29-38; Johane 6:1-21.