JESU o ile a ema sedibeng sa Samaria gore a khutše. Barutiwa ba gagwe ba be ba ile motseng go yo reka dijo. Mosadi yo Jesu a bolelago le yena mo o be a tlile go ga meetse. Jesu a re go yena: “Mphe meetse ke nwe.”

Se se ile sa makatša mosadi yo kudu. Na o a tseba gore ke ka baka la’ng? Ke ka gobane Jesu e be e le Mojuda gomme mosadi yo e le Mosamaria. Bajuda ba bantši ba be ba sa rate Basamaria. E bile ba be ba sa ba bolediše! Eupša Jesu o be a rata batho ba mehuta ka moka. Ka gona a re go mosadi yo: ‘Ge nkabe o tsebile gore ke mang yo a go kgopelago meetse, o ka be o kgopetše yena gomme o be a tla go nea meetse ao a neago bophelo.’

Mosadi yo a re: ‘Morena, ga o na le kgamelo ya go ga meetse, le gona sediba se se a iša. O tla a hwetša kae meetse ao a neago bophelo?’

Jesu a re: ‘Ge o enwa meetse a sediba se, o tla buša wa nyorwa. Eupša meetse ao ke tlago go a nea motho a ka mo dira gore a phele ka mo go sa felego.’

Mosadi yo a re: ‘Morena, mphe meetse ao e le gore ke se hlwe ke nyorwa le gore ke se hlwe ke etla mo go tlo ga meetse.’

Mosadi yo o be a nagana gore Jesu o bolela ka meetse a kgonthe. Eupša o be a bolela ka therešo ya mabapi le Modimo le mmušo wa gagwe. Therešo ye e swana le meetse ao a neago bophelo. E ka nea motho bophelo bjo bo sa felego.

Bjale Jesu a re go mosadi yo: “Sepela o yo bitša monna wa gago le tle mo.”

Mosadi yo a re: “Ga ke na monna.”

Jesu a re: ‘O a rereša. Eupša o bile le banna ba bahlano gomme monna yo o dulago le yena gona bjale ga se wa gago.’

Mosadi yo a makala ka gobane ditaba tše ka moka e be e le therešo. Jesu o be a tsebile bjang ditaba tše ka moka? O di tsebile ka gobane ke Yena yo a Holofeditšwego yo a bego a romilwe ke Modimo gomme Modimo o be a mo tsebiša tšona. Mo nakong ye, barutiwa ba Jesu ba ile ba boa gomme ba makatšwa ke ge a bolela le mosadi wa Mosamaria.

Re ithuta’ng go se ka moka? Re ithuta gore Jesu o be a bontšha botho go batho ba merafo ka moka. Le rena re swanetše go dira bjalo. Ga se ra swanela go nagana gore batho ba bangwe ke ba babe feela ka gobane e le ba morafo o itšego. Jesu o nyaka gore batho ka moka ba tsebe therešo e išago bophelong bjo bo sa felego. Le rena re swanetše go nyaka go thuša batho gore ba ithute therešo yeo.

Johane 4:5-43; 17:3.