LESOGANA le o le bonago mo le na le moapostola Paulo ke Timotheo. O be a dula le ba lapa labo Lisitara. Mmagwe e be e le Yunise gomme makgolo’agwe e le Loisa.

Le e be e le lekga la boraro Paulo a etetše mo Lisitara. Mo e ka bago ngwaga goba go feta moo, Paulo le Baranaba ba be ba tlile mo ba le leetong la bona la pele la go bolela ditaba tše dibotse. Ga bjale Paulo o be a boile le Silase mogwera wa gagwe.

Na o a tseba gore mo Paulo o botša Timotheo eng? O re go yena: ‘Na o ka rata go sepela le nna le Silase? Re tla thabela thušo ya gago ge re bolela ditaba tše dibotse bathong ba dinageng tša kgole.’

Timotheo o re: ‘Ee, ke tla rata go sepela le lena.’ Gateetee ka morago ga mo Timotheo a tlogela ba lapa labo gomme a sepela le Paulo le Silase. Eupša pele ga ge re ka ithuta ka tša leeto la bona, anke re bone seo se bego se dutše se diragalela Paulo. Go be go šetše go fetile nywaga e ka bago e 17 ga e sa le Jesu a iponagaditše go yena tseleng e yago Damaseko.

Gopola gore Paulo o be a tlile Damaseko go tlo tlaiša barutiwa ba Jesu, eupša gona bjale yena ka boyena e šetše e le morutiwa. Ka morago manaba a gagwe a ile a kwana gore a mmolaye ka gobane a be a sa rate ge a ruta ka Jesu. Eupša barutiwa ba bangwe ba mo thuša go tšhaba. Ba mo tsentšha ka sešegong ke moka ba mo theošetša ka ntle ga morako wa motse.

Ka morago ga moo, Paulo o ile a yo bolela ditaba tše dibotse Antiokia. Mo ke gona moo balatedi ba Jesu ba thomilego go bitšwa Bakriste. Ke moka go tloga Antiokia, Paulo le Baranaba ba ile ba romelwa leetong la go bolela ditaba tše dibotse dinageng tša kgole. O mongwe wa metse yeo ba ilego ba e etela e bile Lisitara ga gabo Timotheo.

Ga bjale mo e ka bago ka morago ga ngwaga, Paulo o boetše Lisitara leetong la gagwe la bobedi la go bolela ditaba tše dibotse. Na o a tseba gore ge Timotheo a tloga le Paulo le Silase ba ile ba ya kae? A re lebelele mmapa wo gomme re bone tše dingwe tša dinaga tšeo ba ilego ba ya go tšona.

Ba thomile ka go ya motseng wa kgauswi le Lisitara wa Ikonia ke moka ba ya motseng wa bobedi wo o bitšwago Antiokia. Ka morago ga moo ba ya Teroa, Filipi, Thesalonika le Berea. Na o bona moo motse wa Athene o lego gona mo mmapeng? Paulo o ile a bolela ditaba tše dibotse le gona moo. Ka morago ga moo, ba fetša ngwaga le seripa ba bolela ditaba tše dibotse Korinthe. Mafelelong ba dula Efeso ka nakwana. Ke moka ba boela Kesarea ka sekepe gomme ba rotogela Antiokia moo Paulo a bego a dula gona.

Ka gona Timotheo o sepetše dikhilomithara tše dintšintši a thuša Paulo go bolela “ditaba tše dibotse” le go thoma diphuthego tše dintši tša Bokriste. Na le wena ge o godile o tla ba mohlanka yo a botegago wa Modimo go swana le Timotheo?

Ditiro 9:19-30; 11:19-26; dikgaolo 13 go ya go 17; 18:1-22.

1. Roma; 2. Melite; 3. Berea; 4. Thesalonika; 5. Korinthe; 6. Filipi; 7. Athene; 8. Kereta; 9. Teroa; 10. Efeso; 11. Mileto; 12. Kolose; 13. Antokia; 14. Ikonia; 15. Lisitara; 16. Tsipero; 17. Antokia; 18. Kesarea; 19. Jopa; 20. Damaseko; 21. Jerusalema; 22. Lewatle le Legolo (Mediterranean)