BONA diketane tšeo Paulo a tlemilwego ka tšona gomme o bone le mohlabani wa Moroma yo a mo hlapeditšego. Paulo e be e le mogolegwa mo Roma. O be a letile kgolegong go fihlela ge Kesara wa Roma a nagana seo a ka mo dirago sona. Le ge a be a golegilwe, batho ba be ba dumeletšwe go mo etela.

Matšatši a mararo ka morago ga ge Paulo a fihlile Roma, o ile a romela molaetša wa gore go bitšwe baetapele ba Bajuda gore ba tle ba mmone. Ka baka leo, gwa tla Bajuda ba bantši ba Roma. Paulo a ba ruta ka Jesu le ka mmušo wa Modimo. Ba bangwe ba dumela gomme ya ba Bakriste, eupša ba bangwe ba se ke ba dumela.

Paulo o be a bile a botša bahlabani ba fapafapanego bao ba bego ba mo hlapetša ditaba tše dibotse. Nywaga e mebedi yeo a e feditšego e le mogolegwa mo, o be a bolela le motho yo mongwe le yo mongwe yoo a bego a ka kgona go bolela le yena ka ditaba tše dibotse. Ka baka leo, gaešita le batho ba ntlong ya Kesara ba ile ba kwa ditaba tše dibotse tša Mmušo wa Modimo gomme ba bangwe ba bona ya ba Bakriste.

Eupša moeng yo a ngwalelago mo tafoleng ke mang? Na o ka leka go bolela gore ke mang? Ee, ke Timotheo. Le yena o kile a ba kgolegong ka baka la go bolela ka Mmušo wa Modimo, eupša gona bjale o lokolotšwe. O tlile mo go tlo thuša Paulo. Na o a tseba gore o ngwala eng? Anke re bone.

Na o sa gopola motse wa Filipi le wa Efeso yeo go boletšwego ka yona go Kgaolo 110? Paulo o ile a thuša go thoma diphuthego tša Bokriste metseng yeo. Ka ge gona bjale a le kgolegong, o ngwalela Bakriste bao mangwalo. Mangwalo ao a ka Beibeleng gomme a bitšwa Baefeso le Bafilipi. Mo seswantšhong Paulo o be a botša Timotheo seo a swanetšego go se ngwalela bagwera ba bona ba Bakriste ba Filipi.

Bafilipi ba be ba swere Paulo gabotse kudu. Ba ile ba mo romela dimpho ge a le mo kgolegong, ka gona o be a ba ngwalela lengwalo la go ba leboga. Dimpho tšeo di ile tša tlišwa ke Epaforodito. Eupša Epaforodito a babja kudu moo a bego a le kgauswi le go hwa. Gona bjale o be a fodile gomme a loketše go boela gae. O be a tla sepela le lengwalo le la go tšwa go Paulo le Timotheo ge a boela Filipi.

Ge Paulo a le mo kgolegong, o ile a ngwala mangwalo a mangwe a mabedi ao le ona a lego ka Beibeleng. Le lengwe le be le eya go Bakriste ba motseng wa Kolose. Na o a tseba gore le bitšwa eng? Le bitšwa Bakolose. Le lengwe le be le eya go mogwera wa gagwe yo a bitšwago Filemone, yoo le yena a bego a dula Kolose. Le be le bolela ka Onesimo mohlanka wa Filemone.

Onesimo o ile a tšhabela Filemone gomme a tla mo Roma. Ka tsela e itšego, a kwa gore Paulo o kgolegong gona mo. A mo etela gomme Paulo a mmotša ditaba tše dibotse tša Mmušo wa Modimo. Go se go ye kae, Onesimo a fetoga Mokriste. Ke moka a itshola gore o be a tšhabetše mong wa gagwe. Bjale na o a tseba gore Paulo o ile a ngwala eng ka lengwalong leo le yago go Filemone?

Ka lengwalong leo, Paulo o kgopela Filemone gore a lebalele Onesimo. O re: ‘Ke mo gomišetša go wena. Eupša ga bjale ga e sa fo ba mohlanka wa gago. E bile ke ngwanabo rena yo a rategago wa Mokriste.’ Ge Onesimo a boela Kolose o ile a sepela le mangwalo ao a mabedi, le lengwe le eya go Bakolose gomme le lengwe le eya go Filemone. Re ka nagana kamoo Filemone a ilego a thaba ka gona ge a be a ekwa gore mohlanka wa gagwe o fetogile Mokriste.

Ge Paulo a be a ngwalela Bafilipi le Filemone, o be a ba swaretše ditaba tše dibotse e le ka kgonthe. O ile a botša Bafilipi gore: ‘Ke romela Timotheo go lena. Eupša le nna ke tla le etela kgauswinyane.’ Ke moka a ngwalela Filemone gore: ‘Ntokišetše bodulo moo.’

Ge Paulo a lokolotšwe kgolegong, o ile a etela bana babo le dikgaetšedi tša Bakriste mafelong a mantši. Eupša ka morago a ba mogolegwa gape gona mo Roma. Mo nakong ye o be a tseba gore o tlo bolawa. Ka gona a ngwalela Timotheo lengwalo gomme a mo kgopela gore a tle go yena kapejana. A re: ‘Ke botegetše Modimo gomme yena o tla nnea moputso.’ Nywaga e sego kae ka morago ga ge Paulo a bolailwe, Jerusalema e ile ya senywa gape gomme mo nakong ye ya senywa ke Baroma.

Eupša go sa na le ditaba tše dingwe tše dintši ka Beibeleng. Jehofa Modimo o ile a dira gore moapostola Johane a ngwale dipuku tša yona tša mafelelo, go akaretša le puku ya Kutollo. Puku ye ya Beibele e bolela ka dilo tša nakong e tlago. Anke gona bjale re ithute ka seo se tlago go direga nakong e tlago.

Ditiro 28:16-31; Bafilipi 1:13; 2:19-30; 4:18-23; Baheberu 13:23; Filemone 1-25; Bakolose 4:7-9; 2 Timotheo 4:7-9.