GO IPONA molato go ka swana le morwalo o boima. Kgoši Dafida o ngwadile gore: “Melato ya ka e feta ka godimo ga hlogo ya ka; e nkimela kudu go etša morwalo o boima.” (Psalme 38:4) Bakriste ba bangwe ba ikhwetša ba nyamile kudu e bile ba kgodišegile gore Jehofa a ka se tsoge a ba lebaletše. (2 Bakorinthe 2:7) Na kgopolo yeo e nepagetše? Le ge o dirile dibe tše dikgolo, na ruri o arogane le Jehofa go fihla bokgoleng bja gore a ka se go lebalele? Ga go bjalo le gatee!

Jehofa ga a hlokomologe badiradibe bao ba itsholago. Ge e le gabotse, o ikemišeditše go ba thuša! Seswantšhong sa morwa wa lehlaswa, Jesu o ile a bapetša Jehofa le tate yo lerato yoo morwa wa gagwe a ilego a tlogela lapa labo ke moka a phela bophelo bjo bo gobogilego. Ge nako e dutše e eya, morwa o ile a pheta ka gore a boele gae. “Eitše ge [morwa] a sa le kgole tatagwe a mmona gomme a mo šokela, a mo kitimela a mo gokarela a mo atla ka lerato.” (Luka 15:11-20) Na o kganyoga go boela go Jehofa eupša o kwa eka o “sa le kgole” le yena? Go etša tate wa seswantšhong sa Jesu, Jehofa o a go šokela. O fagahletše go go amogela gape.

Eupša go thwe’ng ge e ba o nagana gore dibe tša gago ke tše dikgolo kudu goba ke tše dintši kudu gore Jehofa a ka go lebalela? Hle ela hloko taletšo ya Jehofa yeo e begilwego go Jesaya 1:18 e rego: “‘Etlang re lokišeng ditaba,’ o re’alo Jehofa. ‘Le ge dibe tša lena di ka hwibila go etša madi, di tla šweufala go etša kapoko.’” Ee, Jehofa a ka lebalela gaešita le dibe tšeo di ka bonagalago di hubetše go etša letsoku seaparong se sešweu.

Jehofa ga a nyake gore o tlaišwe ke letswalo le molato. O ka hwetša bjang tebalelo ya Jehofa le go ba le letswalo le le hlwekilego? Ela hloko megato e mebedi yeo Kgoši Dafida a ilego a e gata. Wa pele, o itše: “Ke tla ipobola dikarogo tša ka go Jehofa.” (Psalme 32:5) Gopola gore Jehofa o šetše a go laleditše gore o mo rapele le gore ‘o lokiše ditaba’ le yena. Amogela taletšo yeo. Ipobole dibe tša gago go Jehofa, gomme o mo tšhollele sa mafahleng. Dafida o ile a rapela a kgodišegile ka gore: “Ntlhwekiše le sebeng sa ka. . . . Pelo e robegilego le e setlegilego o ka se e nyatše, wena Modimo.”—Psalme 51:2, 17.

Wa bobedi, Dafida o ile a hwetša thušo e tšwago go moemedi wa Modimo, e lego moporofeta Nathane. (2 Samuele 12:13) Lehono, Jehofa o diriša bagolo ka phuthegong go thuša badiradibe bao ba itsholago gore ba tsošološe tswalano ya bona le Jehofa. Ge o eya go bagolo, ba tla go  thuša ka Mangwalo le go go thoba pelo ka go go rapelela, le go tloša maikwelo a molato e le gore o tsošološe tswalano ya gago le Modimo.—Jakobo 5:14-16.

Ke therešo gore o ka bona go le thata go ipobola go Jehofa le go ya go bagolo. Dafida le yena o ile a ikwa ka tsela e swanago. Ka nakwana o ile a ‘homola’ ka dibe tša gagwe. (Psalme 32:3) Ka morago ga moo, o ile a holwa ke go ipobola dibe tša gagwe le go lokiša ditsela tša gagwe.

Se bohlokwa kudu ke gore Dafida o ile a hwe- tša lethabo gape. O ngwadile gore: “Go thaba yo a swaretšwego molato wa gagwe, yoo sebe sa gagwe se khupeditšwego.” (Psalme 32:1) O rapetše gape ka gore: “Anke o bule melomo ye ya ka, hle Jehofa, gore molomo wa ka o go tumiše.” (Psalme 51:15) Dafida o ile a tutueletšega go botša ba bangwe ka Jehofa ka morago ga gore a ipobole sebe sa gagwe le go lebalelwa ke Jehofa.

Jehofa o nyaka gore o be le letswalo le le hlwekilego. Le gona o nyaka gore o botše ba bangwe ka yena le ka merero ya gagwe o thabile, o sa ipone molato. (Psalme 65:1-4) Gopola taletšo ya gagwe ya gore ‘dibe tša gago di phumolwe, gore mehla ya tapologo e tle e etšwa sefahlegong sa Jehofa.’—Ditiro 3:19.

Martha o ile a diragalelwa ke seo. O anega ka gore: “Morwa wa ka o be a dula a nthomela dimakasine tša Morokami le Phafoga! Ganyenyane-ganyenyane ke ile ka boela go Jehofa. Ge ke be ke boela go yena ke be ke thatafalelwa kudu ke go kgopela tebalelo ya dibe tšeo ke di dirilego. Eupša mafelelong, ke ile ka kgopela Modimo ka thapelo gore a ntebalele. Ga ke kgolwe gore go ntšere nywaga e 40 gore ke boele go Jehofa. Ke ithutile gore motho a ka kgona go hlankela Jehofa gape gotee le go mo rata le ge a ile a aroga ka nywaga e mentši.”