Modumedigotee yo a Rategago:

Bjalo ka ge o tseba, Beibele e bolela gantši ka batho. Bontši bja banna le basadi bao ba botegago ba ile ba lebeletšana le ditlhohlo tšeo di swanago le tša rena. Ba be ba na le “maikwelo a swanago le a rena.” (Jakobo 5:17) Ba bangwe ba be ba imetšwe ke mathata le dipelaelo. Ba bangwe ba be ba kgopišitšwe ke ditho tša lapa goba barapedigotee. Le gona ba mmalwa ba be ba ipona molato ka baka la diphošo tšeo ba di dirilego.

Na re ka re batho ba bjalo ba ka se sa boela go Jehofa? Aowa. Ba bantši ba bona ba swana le mopsalme yo a rapetšego ka gore: “Ke ile ka ralala bjalo ka nku e timetšego. Hle ntsome nna mohlanka wa gago, gobane ga se ka lebala ditaelo tša gago.” (Psalme 119:176) Na le wena o ikwa ka tsela e swanago?

Le ka mohla Jehofa ga a lebale barapedi ba gagwe bao ba tlogelago mohlape. Eupša o dira sohle go ba thuša—gantši a diriša badumedigotee le bona. Ka mohlala, ela hloko kamoo Jehofa a thušitšego mohlanka wa gagwe Jobo, yo a ilego a welwa ke mathata a mantši—go akaretša mathata a tša ditšhelete, go hwelwa ke bao a ba ratago le bolwetši bjo bohloko. Le gona Jobo o ile a kgotlelela ge a be a hlabja ka mantšu ke bao ba bego ba swanetše go mo kgothatša. Eupša ga se a ka a tlogela Jehofa, le ge ka nakwana a ile a ba le dikgopolo tše di fošagetšego. (Jobo 1:22; 2:10) Jehofa o ile a matlafatša Jobo ka tsela efe?

Tsela e nngwe yeo Jehofa a ilego a thuša Jobo ka yona ke ka go diriša modu- medigotee yo a bitšwago Elihu. Ge Jobo a be a ntšha sa mafahleng, Elihu o ile a theetša gomme a ikwa a tutueletšega go bolela. O ile a re’ng? Na o ile a swaya Jobo diphošo, a mo latofatša goba go mo goboša? Na Elihu o be a ipona a phagametše Jobo? Ga go bjalo le gatee! Elihu o ile a bolela a šušumeditšwe ke moya wa Modimo gore: “Go Modimo wa therešo ke fo ba seo o lego sona; le nna ke bopilwe ka letsopa.” Ke moka o ile a kgonthišetša Jobo ka gore: “Go boifiša ga ka go se ke gwa go tšhoša, le gona kgatelelo yeo ke e tlišago e ka se go imele.” (Jobo 33:6, 7) Go e na le go imetša Jobo le go feta, Elihu o ile a mo eletša ka lerato le go mo nea kgothatšo yeo a bego a e hloka.

Hle tseba gore re le Sehlopha se Bušago re ngwadile poroutšha ye ka maikwelo a swanago. Sa mathomo re ile ra theetša seo bao ba tlogetšego phuthego ba se bolelago le go hlahloba ka kelohloko maemo a bona. (Diema 18:13) Ke moka re ile ra lebelela seo se lego ka Mangwalong, ra rapela le go hlahloba dipego tšeo go tšona Jehofa a thušitšego bahlanka ba gagwe nakong e fetilego bao ba bilego le maemo a swanago. Mafelelong, re ile ra bapetša dipego tšeo di tšwago ka Mangwalong le seo se diregago mehleng ya rena gore re kgone go tšweletša poroutšha ye. Re kgopela gore o bale poroutšha ye. Hle kgodišega gore re go rata kudu.

Sehlopha se Bušago sa Dihlatse tša Jehofa