POTŠIŠO 5
Nka Dira Eng ge ke Tlaišwa ke Bomphenyašilo Sekolong?
O BE O TLA DIRA ENG?
Bona ka leihlo la kgopolo tiragalo ye: Thomas ga a sa nyaka go ya sekolong. Se se thomile dikgweding tše tharo tša go feta, ge bao a tsenago le bona sekolo ba be ba mmolela gampe e bile ba mmitša ka maina a dikwero. Ka dinako tše dingwe, morutwana yo mongwe o be a fo thula Thomas ka boomo gore a wiše dipuku tša gagwe ke moka a itire e ka o mo thutše ka phošo. Goba motho yo mongwe yo a lego sehlopheng seo se lego ka morago ga gagwe o be a tla mo kgorometša, gomme e tla re ge Thomas a lebelela morago a se bone gore ke mang. Maabane, taba ye e ile ya ba e kgolo le go feta ge Thomas a hwetša molaetša wa go mo tšhošetša Inthaneteng . . .
Ge o be o le Thomas, o be o tla dira’ng?
EMA GOMME O NAGANE!
Ga se gore o ka se dire selo! Ge e le gabotse, o ka itšhireletša go motho yo a go tlaišago ntle le go lwa le yena. Bjang?
-
IKHOMOLELE. Beibele e re: “Setlaela se ntšha bogale bja sona ka moka, eupša yo bohlale o thekga ditho go fihla mafelelong.” (Diema 29:11) Ge o ka bontšha gore ga se wa kwata ge o tlaišwa, seo se ka dira gore bao ba go tlaišago ba felelwe ke matla.
-
O SE KE WA ITEFELETŠA. Beibele e re: “Le se ke la bušetša bobe ka bobe go motho.” (Baroma 12:17) Go itefeletša go ka dira gore o tlaišwe le go feta.
-
O SE KE WA ITSENYA MATHATENG. Beibele e re: “Yo bohlale ke yo a bonego kotsi a ikuta.” (Diema 22:3) Ge e ba go kgonega, phema go ba gare ga batho bao ba ka tsošago mathata goba go ba lefelong leo go ka tsogago dintwa.
-
LEKA GO ARABA KA TSELA E BOLETA. Beibele e re: “Karabo ge e le boleta e phohliša pefelo.” (Diema 15:1) O ka leka le go dira metlae. Ka mohlala, ge motho yo a go tlaišago a re o yo mokoto, o ka re go yena: “O a tseba ke swanetše go thoma go tšima!”
-
ITSHEPELELE. Nora yo a nago le mengwaga e 19 o re: “Ge motho a nyaka go go tlaiša, gomme wena wa itshepelela, seo se bontšha gore o gotše e bile o na le matla a go feta a gagwe. Le gona seo se bontšha gore o kgona go itshwara e lego selo seo motho yoo a sa kgonego go se dira.”
—2 Timotheo 2:24. -
ITHUTE GO ITSHEPA. Gantši batho bao ba tlaišago ba bangwe ba kgona go bona batho bao ba sa itshepego ka ge gantši ba sa itwele. Eupša batho ba ge ba bona gore o a ikholofela e bile ga o ba tšhabe, ba ka se go tlaiše.
-
BOTŠA MOTHO YO MONGWE. Motho yo e kilego ya ba morutiši o re: “Ke kgothaletša motho yo mongwe le yo mongwe yo a tlaišwago gore a se homolele taba yeo, a bolele ka gobane seo se ka dira gore motho yo mongwe ka moso a se tlaišwe.”
Go itshepa go tla go nea matla ao batho bao ba go tlaišago ba se nago wona
You May Also Like
GO HLALOSA TABA KA GO THALA DISWANTŠHO
O ka Fenya Bomphenyašilo Ntle le go lwa
Ithute lebaka leo ba bangwe ba itirago bomphenyašilo le gore o ka ba phema bjang.
BAFSA BA A BOTŠIŠA
O ka Dira’ng ge o Tlaišwa ke Bomphenyašilo?
Ba ba bantši bao ba tlaišwago ke bomphenyašilo ga ba tsebe gore ba dire eng. Sehlogo se se hlalosa seo se ka dirwago go kaonefatša boemo.
PHAFOGA!
Kamoo o ka Fenyago Kgateletšo ya Dithaka
Kgateletšo ya dithaka e ka dira gore batho ba lokilego ba dire dilo tše mpe. Ke’ng seo o swanetšego go se tseba ka yona, le gona o ka lebeletšana bjang le yona?
