Tseba seo o nyakago go se fihlelela. Tseba ge e ba morero wa polelo ya gago e le go no ruta batheetši, go ba kgodiša goba go ba kgothaletša go dira selo se itšego, ke moka o e lokišetše ka go dumelelana le morero woo. Kgonthišetša gore dintlha tša gago ka moka tše dikgolo di go thuša go fihlelela morero woo wa gago.

Gatelela sehlogo sa polelo ya gago. Gopotša batheetši sehlogo sa polelo ya gago ka go fela o boeletša mantšu a motheo ao a lego sehlogong sa polelo, goba o diriše mahlalosetša-gotee.

Dira gore dintlha tše dikgolo di be molaleng. Diriša feela dintlha tše dikgolo tšeo di sepedišanago le sehlogo sa gago le tšeo o ka kgonago go di hlalosa ka nako yeo o e beetšwego. O se ke wa diriša dintlha tše dintši tše dikgolo, hlalosa ntlha e nngwe le e nngwe ka tsela e kwagalago. Pele o fetela ntlheng e latelago, khutša ganyenyane. Ge o fetela ntlheng e nngwe le e nngwe, kgonthišetša gore dintlha tšeo di tsenelana gabotse.