Dira nyakišišo dilong tšeo di ka botwago. Ka mehla thekga seo o se rutago ka Lentšu la Modimo, gomme ge go kgonega, o le bale ka go lebanya. Eupša ge e ba o tlo botša batheetši ka dilo tša saense, dilo tšeo o di kwelego ditabeng, tiragalo e itšego, goba ditaba tše dingwe, kgonthišetša pele gore dilo tšeo o dirilego nyakišišo go tšona di a tshepagala le gore ga se tša fetwa ke nako.

Diriša gabotse dilo tšeo o dirago nyakišišo go tšona. Pele o hlalosa temana, kwešiša pele gore Modimo o nyaka go re ruta eng ka yona, e bile o e hlalose ka go dumelelana le ditemana tše dingwe tša ka Beibeleng le ka go dumelelana le dikgatišo tšeo re di newago ke “mohlanka yo a botegago le wa temogo.” (Mat. 24:45) Ge o tsopola taba dikgatišong tša lefase, o se ke wa fetoša selo, goba wa bolela dilo tšeo mongwadi a sego a di bolela.

Thuša batheetši go kwešiša bohlatse bjo o bo hweditšego. Ka morago ga gore o bale lengwalo goba o bolele ka taba yeo e tšwago kgatišong ya lefase, etla ka dipotšišo tšeo di tlago go thuša batheetši go iponela ntlha, goba o diriše papišo.