“Le swanetše go ba . . . barutiši.” (Baheb. 5:12) Anke o nagane feela! Jehofa, e lego Morutiši yo mogolo legodimong le lefaseng, o re kgopela gore re rute batho ba bangwe ka yena. Kabelo le ge e le efe ya go ruta ba bangwe therešo ka Jehofa, e ka ba ka lapeng, ka phuthegong goba tšhemong, ke tokelo e kgolo kudu le boikarabelo bjo bogolo. Re ka dira’ng gore re phethe kabelo ye gabotse?

Karabo ya potšišo ye e mantšung ao moapostola Paulo a a ngwaletšego Timotheo. Paulo o itše: “Tšwela pele o ikgafela go baleng phatlalatša, go eletšeng le go ruteng.” O okeditše ka gore: “Ka go dira se o tla iphološa wa ba wa phološa bao ba go theetšago.” (1 Tim. 4:13, 16) Jehofa o go neile molaetša wo o phološago maphelo. Ka baka leo, o swanetše go šoma ka thata gore o kaonefatše tsela yeo o balago ka yona le yeo o rutago ka yona. Poroutšha ye e tlo go thuša go dira sona seo. Anke re boneng tše dingwe tša dikarolo tša yona.

Jehofa ke ‘Mohlahli yo Mogolo.’ (Jes. 30:20) Le ge poroutšha ye e tlo go thuša go kaonefatša bokgoni bja gago bja go bala le go ruta, o se ke wa lebala gore molaetša wo re o rutago o tšwa go Jehofa le gore ke yena a gogelago batho go yena. (Joh. 6:44) Ka baka leo, dula o rapela Jehofa gore a go nee moya wa gagwe o mokgethwa. Ge o ruta, diriša Beibele ka botlalo. Ruta batho seo se tšwago go Jehofa, e sego dikgopolo tša gago. Lwela go thuša batheetši ba gago gore ba rate Jehofa go tšwa pelong.

Jehofa o go neile tokelo ya go ruta batho molaetša wa bohlokwa kudu. Re kgodišegile gore ge o dutše o “[ithekga] ka matla ao Modimo a a neago,” o tla atlega.—1 Pet. 4:11.

Barutišigotee le wena,

Sehlopha se Bušago sa Dihlatse tša Jehofa