1-4. Petro o lebeletšana le boemo bofe bjo thata, gona wena o be o tla ikwa bjang ge nkabe o be o le boemong bja gagwe?

 PETRO o tswalelelwa ka gare ga mejako e megolo yeo e dirago lešata leo le thibago ditsebe. O išwa seleng ya gagwe a tlemilwe gare ga bahlabani ba babedi ba Baroma. Ke moka o kgotlelela diiriiri, mohlomongwe le matšatši, a letetše go bona seo se tlago go mo diragalela. Ga go na selo seo a ka se lebelelago ka ntle le maboto a kgolego le mejako ya yona ya tšhipi, diketane tša gagwe le bahlapetši ba gagwe.

² Ditaba tšeo Petro a di amogelago ga di kgahliše. Kgoši Heroda Agaripa wa Pele o nyaka go bona Petro a hwile. a Ge e le gabotse, Petro o be a tlo tšweletšwa bathong ka morago ga Paseka, le gona lehu la gagwe le be le tla ba bjalo ka mpho yeo e reretšwego go kgahliša mašaba. Se e be e se tšhošetšo feela. Yo mongwe wa baapostolagotee le Petro e lego Jakobo, o be a sa tšwa go bolawa ke yena mmuši yo.

³ Ke bošego bja pele ga go ahlolwa ga gagwe. Ke’ng seo Petro a se naganago ka seleng ya gagwe ya leswiswi? Na a ka ba a nagana ka gore mengwageng e fetilego, Jesu o ile a utolla gore ka letšatši le lengwe Petro o be a tla tlengwa gomme a išwa mo a sa go ratego, e lego lehung la gagwe? (Joh. 21:18, 19) Mohlomongwe Petro o ipotšiša ge e ba nako yeo e fihlile.

⁴ Ge nkabe o be o le boemong bja Petro, o be o tla ikwa bjang? Ba bantši ba be ba tla nyama, ba nagana gore ga go sa na kholofelo. Lega go le bjalo, go molatedi wa makgonthe wa Jesu Kriste, na ruri boemo le ge e le bofe ga bo na kholofelo? Re ka ithuta’ng tseleng yeo Petro le Bakristegotee le yena ba ilego ba lebeletšana le tlaišo yeo e ilego ya ba wela? Anke re boneng.

5, 6. (a) Ke ka baka la’ng Kgoši Heroda Agaripa wa Pele a ile a hlasela phuthego ya Bokriste, gona o ile a dira seo bjang? (b) Ke ka baka la’ng lehu la Jakobo e be e le teko go phuthego?

⁵ Go etša ge re ithutile kgaolong e fetilego ya kgatišo ye, go sokologa ga Koronelio wa moditšhaba le ba lapa la gagwe e bile tiragalo e kgahlišago kudu  phuthegong ya Bokriste. Eupša Bajuda bao e bego e se badumedi ba swanetše go ba ba ile ba kgopišega kudu ge ba tsebile gore Bakriste ba bantši ba Bajuda ga bjale ba rapela ka bolokologi le batho bao e sego Bajuda.

⁶ Heroda, e lego radipolitiki wa mahlajana o ile a bona se e le sebaka sa gore a kwane le Bajuda bao, ka gona o ile a thoma go tlaiša Bakriste. Ga go pelaelo gore o ile a kwa gore moapostola Jakobo o be a batamelane kudu le Jesu Kriste. Ka go re’alo, Heroda o ile “a bolaya Jakobo ngwanabo Johane ka tšhoša.” (Dit. 12:2) A teko e kgolo gakaakaang bakeng sa phuthego! Jakobo e be e le yo mongwe wa ba bararo bao ba ilego ba bona Jesu a fetoga ponagalo le go bona mehlolo e mengwe yeo baapostola ba bangwe ba sa kago ba e bona. (Mat. 17:1, 2; Mar. 5:37-42) Jesu o ile a rea Jakobo le ngwanabo e lego Johane leina a re ke “barwa ba modumo” ka baka la go fišega kudu ga bona. (Mar. 3:17) Ka gona phuthego e be e lahlegetšwe ke hlatse e sebete le e botegago gotee le moapostola yo a rategago.

7, 8. Phuthego e ile ya dira’ng ge Petro a be a golegilwe?

⁷ Go bolawa ga Jakobo go ile gwa thabiša Bajuda, go etša ge Agaripa a be a nyaka gore go be bjalo. A matlafaditšwe ke karabelo yeo, o ile a nyaka go bolaya Petro. Go etša ge go hlalositšwe mathomong a kgaolo ye, o ile a golega Petro. Lega go le bjalo, go bonagala Agaripa a ile a gopola gore nakong e fetilego baapostola ba ile ba lokollwa kgolegong ka mohlolo, bjalo ka ge go bontšhitšwe go Kgaolo 5 ya puku ye. E le go kgonthišetša gore Petro a ka se tšhabe, Heroda o ile a dira gore Petro a tlengwe gare ga bahlabani ba babedi ka diketane gomme go be go na le bahlabani ba 16 bao ba bego ba mo leta ka go šiedišana bošego le mosegare go kgonthišetša gore moapostola yo ga a tšhabe. Ge a be a ka tšhaba, bahlabani bao ba be ba tla lebanwa ke kahlolo yeo Petro a bego a tla ahlolwa ka yona. Maemong a bjalo a šoro, ke’ng seo Bakristegotee le Petro ba bego ba ka se dira?

 ⁸ Phuthego e be e tseba gabotse seo e bego e swanetše go se dira. Ditiro 12:5 e balega ka gore: “Petro o be a hlapeditšwe kgolegong; eupša phuthego e be e mo rapelela ka matla go Modimo.” Ee, dithapelo tšeo ba bego ba di rapelela ngwanabo bona yo a rategago di be di le matla, e le ditopo tše di tšwago pelong. Lehu la Jakobo le be le se la ba nola moko; le gona ga se la ka la dira gore ba lebelele thapelo e se ya bohlokwa. Dithapelo ke tša bohlokwa go Jehofa. Ge e ba di dumelelana le thato ya gagwe, o tla di araba. (Baheb. 13:18, 19; Jak. 5:16) Ye ke thuto ya bohlokwa go Bakriste lehono.

9. Re ka ithuta’ng mohlaleng wo o beilwego ke Bakristegotee le Petro tabeng ya thapelo?

⁹ Na o tseba bana babo rena bao ba lebeletšanego le diteko? Ba ka ba ba kgotleletše tlaišo, dithibelo tša mmušo goba dikotsi tša tlhago. Ke ka baka la’ng o sa ba rapelele ka go tšwa pelong? Le gona o ka ba o tseba ba bangwe bao ba lebeletšanego le mathata a itšego a sa bonagalego, a bjalo ka mathata a lapa, go nyama goba teko e itšego ya tumelo ya bona. Ge e ba o naganišiša pele o rapela, o ka gopola batho ba mmalwa bao o ka ba bolelago ka maina ge o dutše o bolela le Jehofa, yena “Mokwi wa thapelo.” (Ps. 65:2) Go ba gona, le wena o nyaka gore ge o ka lebeletšana le dinako tše thata bana beno le dikgaetšedi ba go rapelele.

10, 11. Hlalosa tsela yeo ka yona morongwa wa Jehofa a ilego a lokolla Petro kgolegong.

¹⁰ Na Petro o be a tšhošitšwe ke kotsi yeo a bego a lebeletšane le yona? Ga re kgonthišege ka seo, eupša bošegong bjoo bja gagwe bja mafelelo a le kgolegong, o be a ile ka boroko gare ga bahlapetši ba gagwe ba babedi bao ba bego ba phafogile. Ruri monna yo wa tumelo o be a tseba gore selo le ge e le sefe seo se bego se tla mo diregalela mesong e latelago, o be a šireletšegile ka ge a be a botile Jehofa. (Baroma 14:7, 8) Lega go le bjalo, mohlomongwe Petro o be a se a letela ditiragalo tše di makatšago tšeo di bego di tla tloga di direga. Gateetee seetša seo se phadimago se ile sa bonega ka seleng ya gagwe. Morongwa o ile a ema moo gomme  go molaleng gore bahlapetši bao ba be ba sa mmone, ke moka a tsoša Petro ka go akgofa. Le gona diketane tšeo ba bego ba mo tlemile diatla ka tšona—tšeo di bego di bonagala di ka se tsoge di kgaogile—di ile tša fo wa!

¹¹ Morongwa yoo o ile a nea Petro tatelano ya ditaelo tše tše di kopana: “Tsoga ka go akgofa! . . . Itokiše o bofe diramphašane tša gago. . . . Apara seaparo sa gago sa ka ntle.” Petro o ile a dira bjalo ka go se dikadike. Mafelelong, morongwa o ile a re: “Ntatele,” ke moka Petro a dira bjalo. Ba ile ba tšwa ka seleng, ba feta gona moo go emego sehlopha sa bahlapetši ba ka ntle gomme ka setu ba leba kgorong e kgolo ya tšhipi. Ba tla feta bjang go yona? Ge e ba Petro a be a ipotšiša seo, ga se gwa ka gwa tšea nako gore a hwetše karabo. Ge ba batamela kgoro, yona e ile ya fo “ipulegela.” Pele ga ge Petro a ka lemoga seo, ke ge ba šetše ba fetile kgorong yeo gomme ba le mokgotheng, ke moka morongwa a nyamalala. Petro o be a tlogetšwe moo, ya ba gona a lemogago gore seo se diragetše e le ka kgonthe. Se e be e se toro. O be a lokolotšwe!—Dit. 12:7-11.

12. Ke ka baka la’ng re ka hwetša e le mo go kgothatšago go naganišiša ka taba ya gore Jehofa o ile a hlakodiša Petro?

¹² Na ga se mo go kgothatšago go naganišiša ka matla a sa lekanywego a Jehofa a go hlakodiša bahlanka ba gagwe? Petro o be a golegilwe ke kgoši yeo e bego e thekgwa ke mmušo o matla kudu woo lefase le kilego la o bona. Lega go le bjalo, Petro o ile a tšwa kgolegong a itshepelela feela! Ke therešo gore Jehofa ga a direle bahlanka ba gagwe ka moka mehlolo e bjalo. Ga se a ka a direla Jakobo mohlolo; le gona ga se A ka a o direla Petro ge mafelelong mantšu ao Jesu a a boletšego mabapi le moapostola yo a be a phethagala. Bakriste lehono ga ba letele go hlakodišwa ka mohlolo. Lega go le bjalo, re dule re gopola gore Jehofa ga se a fetoga. (Mal. 3:6) Le gona kgauswinyane o tla diriša Morwa wa gagwe go lokolla batho ba dimilionemilione kgolegong e šorošoro, e lego lehu. (Joh. 5:28, 29) Dikholofetšo tše bjalo di ka re kgothatša kudu ge re lebeletšane le diteko lehono.

13-15. (a) Ditho tša phuthego tšeo di bego di le ka ntlong ya Maria di ile tša arabela bjang ge Petro a be a fihla? (b) Puku ya Ditiro e thoma go bolela ka’ng, eupša ke tutuetšo efe yeo Petro a ilego a tšwela pele a na le yona go bana babo le dikgaetšedi ba moya?

¹³ Petro o be a eme mokgotheng wa leswiswi, a nagana gore bjale a lebe kae. Ke moka o ile a tseba moo a swanetšego go leba gona. Kgauswi le mo a bego a le gona go be go dula mosadi yo e bego e le Mokriste yo a bitšwago Maria. Ka ge go bonagala e be e le mohlologadi yo a bego a na le sa gagwe, Maria o be a na le ntlo e kgolo ka mo go lekanego gore phuthego e ka kopanela go yona. E be e le mmago Johane Mareka, yoo pego ya puku ya Ditiro e bolelago ka yena la mathomo gona mo, gape e le yoo mafelelong a ilego a ba bjalo ka morwa wa Petro. (1 Pet. 5:13) Go sa šetšwe gore e be e le bošego, ba bantši ba phuthegong yeo ba be ba le ntlong ya Maria, ba rapela ka go tšwa pelong. Ga go pelaelo gore ba be ba rapelela gore Petro a lokollwe—eupša ba be ba sa letela gore Jehofa a ka ba araba!

¹⁴ Petro o ile a kokota mojakong wa kgoro, woo o bego o eya lapeng la ka pele la ntlo. Ngwanenyana yo e bego e le mohlanka yo leina la gagwe e bego e le Roda,  e lego leina le le tlwaelegilego la Segerika leo le bolelago gore “letšoba la Rose,” o ile a tla mojakong. Ga se a ka a kgolwa ditsebe tša gagwe. E be e le lentšu la Petro! Go e na le gore a bule kgoro, ngwanenyana yo yo a bego a thabile o ile a tlogela Petro gona moo mokgotheng, a kitimela ka ntlong ke moka a leka go kgodiša phuthego gore Petro o gona. Ba ile ba re o a gafa, eupša seo ga se sa ka sa mo fetša matla. O ile a tšwela pele a gatelela gore seo ke therešo. E le ge ba dumela gore a ka ba a kwele selo se itšego, ba bangwe ba ile ba šišinya gore go ka direga gore ke morongwa yo a bego a emela Petro. (Dit. 12:12-15) Nakong yeo ka moka, Petro o ile a dulela go kokota go fihlela mafelelong ba eya kgorong ke moka ba e bula.

¹⁵ Ge ba le moo kgorong, ba ile “ba mmona gomme ba makala”! (Dit. 12:16) Petro o ile a swanelwa ke go homotša lešata la bona la ge ba be ba thabile e le gore a ba anegele seo se diragetšego, gomme a ba laela gore ba begele morutiwa Jakobo le bana babo ba bangwe ke moka a tloga pele ga ge madira a Heroda a ka mo hwetša. Petro o ile a tloga e le gore a yo tšwetša pele tirelo ya gagwe ka potego lefelong le lengwe leo le bego le bolokegile. Ka ntle le go tsenya ga gagwe letsogo go rarolleng taba ya lebollo go etša ge go begilwe go Ditiro kgaolo 15, ga go sa bolelwa ka yena pegong ye. Puku ya Ditiro bjale e thoma go bolela ka modiro wa moapostola Paulo le maeto a gagwe. Lega go le bjalo, re ka kgodišega gore Petro o ile a matlafatša tumelo ya bana babo le dikgaetšedi kae le kae mo a ilego a ya gona. Ge a be a tlogela sehlopha sa batho bao ba bego ba le ka ntlong ya Maria, ruri ba be ba le boemong bjo bo thabišago e le ka kgonthe.

16. Ke ka baka la’ng re kgodišegile gore bokamoso bo tla re tlišetša dinako tše dintši tša go thaba?

¹⁶ Ka dinako tše dingwe Jehofa o nea bahlanka ba gagwe dilo tšeo ba tlogago ba se ba di letela, a ba tlogele ba thabile kudu moo ba bilego ba sa kgolwe. Ye ke tsela yeo bana babo Petro le dikgaetšedi ba moya ba ilego ba ikwa ka yona bošegong bjoo. Ke tsela yeo re ka ikwago ka yona ka dinako tše dingwe ge lehono re bona ditšhegofatšo tše dintši tša Jehofa. (Die. 10:22) Nakong e tlago, re tla bona dikholofetšo ka moka tša Jehofa di phethagala ka tekanyo e kgolo. Dilo tše di kgahlišago tšeo re tlago go di bona di tla feta kgole selo le ge e le sefe seo re ka se naganago lehono. Ka gona ge feela re dula re botega, re ka fagahlela dinako tše di thabišago tšeo di letšego ka pele.

17, 18. Ke’ng seo se ilego sa dira gore Heroda a retwe?

¹⁷ Heroda o ile a makatšwa ke kamoo Petro a ilego a hlakodišwa ka gona—eupša seo e be e se mohlolo woo o mo thabišitšego. Kapejana Heroda o ile a laela gore Petro a nyakwe ka mo go tseneletšego, ke moka a sekiša bahlapetši ba Petro. Ba ile ba “otlwa,” mohlomongwe ba bolawa. (Dit. 12:19) Heroda Agaripa o be a se na kwelobohloko goba kgaugelo. Na monna yo yo sehlogo o ile a otlwa?

¹⁸ Agaripa a ka ba ile a ikwa a nyatšega ka ge a ile a palelwa ke go bolaya Petro, eupša go se go ye kae o ile a boela a ba le boikgantšho gape. Go ile gwa ba le tiragalo ya tša bopolitiki yeo go yona manaba a gagwe a bego a nyaka go dira khutšo le yena, le gona ga go pelaelo gore o be a fagahletše go nea polelo ka pele ga batheetši ba bantši. Luka o bega gore “Heroda [o ile] a apara diaparo tša  bogoši” ge a be a itokišeletša tiragalo ye. Radihistori wa Mojuda e lego Josephus o ngwadile gore diaparo tša Heroda di be di dirilwe ka silifera, e le gore ge seetša se phadimela kgoši yeo, e bonagale eka e na le letago. Ke moka radipolitiki yo yo a ikgogomošago o ile a nea polelo. Lešaba le ile la goeletša ka go mo reta, la re: “Ke lentšu la modimo, e sego la motho!”—Dit. 12:20-22.

19, 20. (a) Ke ka baka la’ng Heroda a ile a otlwa ke Jehofa? (b) Ke khomotšo efe yeo re ka e hwetšago pegong ya mabapi le go wa kapejana ga Heroda Agaripa?

¹⁹ Letago le le bjalo ke la Modimo, gomme Modimo o be a lebeletše tiragalo yeo! Heroda o be a na le sebaka sa go phema kotsi. Nkabe a ile a kgalemela lešaba leo goba bonyenyane nkabe a ile a le ganetša ge le mo reta. Go e na le moo, o ile a ba mohlala o matla wa seema seo se rego: “Boikgantšho bo eta go wa pele.” (Die. 16:18) “Gateetee morongwa wa Jehofa a mo otla,” a dira gore monna yoo wa moithati le wa moikgantšhi a hwe lehu le le šišimišago le le sehlogo. Heroda o ile “a jewa ke diboko gomme a hwa.” (Dit. 12:23) Josephus le yena o begile gore Agaripa o ile a otlwa gateetee gomme a oketša ka gore kgoši yeo e ile ya phetha ka gore e hwa ka gobane e ile ya amogela go retwa ke lešaba. Josephus o ngwadile gore Agaripa o ile a tlaišwa ke bolwetši bjo matšatši a mahlano pele a ka hwa. b

²⁰ Ka dinako tše dingwe, go ka bonagala eka batho bao ba sa boifego Modimo ga ba otlwe bakeng sa ditiro tša bona tše mpe. Seo ga se sa swanela go re makatša, ka gobane “lefase ka moka le rapaletše matleng a yo kgopo.” (1 Joh. 5:19) Go sa šetšwe seo, ka dinako tše dingwe bahlanka ba botegago ba Modimo ba a tshwenyega ge go bonagala eka batho ba babe ga ba otlwe. Leo ke le lengwe la mabaka ao ka ona dipego tše bjalo ka ye e lego tše di homotšago. Ge e le gabotse, re bona Jehofa a gata mogato, a gopotša bahlanka ba gagwe ka moka gore o rata toka. (Ps. 33:5) Kgauswinyane, toka ya gagwe e tla fenya.

21. Ke thuto efe ya motheo yeo e lego go Ditiro kgaolo 12, gona ke ka baka la’ng e ka re kgothatša lehono?

²¹ Pego ye e phetha ka thuto ye yeo e kgothatšago le go feta: “Lentšu la Jehofa la tšwela pele le gola e bile le phatlalala.” (Dit. 12:24) Pego ye ya mabapi le go gola ga modiro wa boboledi e ka re gopotša ka tsela yeo Jehofa a šegofaditšego modiro o swanago mehleng ya rena. Go molaleng gore pego yeo e lego go Ditiro kgaolo 12 ga e fo bolela feela ka lehu la moapostola yo a itšego le ka go hlakodišwa ga yo mongwe. E bolela le ka Jehofa le kamoo a ilego a folodiša ka gona maiteko a Sathane a go fediša phuthego ya Bokriste gotee le go kgaotša modiro wa yona wa boboledi woo o bego o dirwa ka mafolofolo. Ditlhaselo tše bjalo di paletšwe, go etša ge maano a bjalo ka moka a swanetše go palelwa. (Jes. 54:17) Ka lehlakoreng le lengwe, bao ba emago le Jehofa le Jesu Kriste ke karolo ya modiro woo o ka se tsogego o paletšwe. Na ye ga se kgopolo e kgothatšago? A tokelo e kgolo gakaakaang yeo re nago le yona ya go thuša go phatlalatša “lentšu la Jehofa” lehono!