KGAOLO 1
“Eyang le Dire . . . Barutiwa”
Kakaretšo ya Ditiro tša Baapostola le kamoo di tswalanago le mehla ya rena
1-6. Anega diphihlelo tšeo di bontšhago gore Dihlatse tša Jehofa di bolela ditaba tše dibotse ka tlase ga maemo a go se swane.
REBECCA, e lego mofsa yo e lego yo mongwe wa Dihlatse tša Jehofa kua Ghana, o be a lebelela sekolo seo a bego a tsena go sona e le tšhemo yeo a dirago modiro wa boboledi go yona. Ka mehla o be a swara dikgatišo tšeo di theilwego Beibeleng ka mokotleng wa gagwe wa dipuku. Ka nako ya go khutša, o be a tsoma dibaka tša go nea bohlatse go barutwanagotee le yena. Rebecca o ile a thoma dithuto tša Beibele le batho ba mmalwa bao a tsenago le bona ka klaseng.
2 Kua sehlakahlakeng sa Madagascar, kgauswi le lebopo la ka Bohlabela bja Afrika, babulamadibogo ba babedi ba ka mehla ba be ba sepela dikhilomithara tše e ka bago tše 25 lefelong leo le fišago kudu gore ba ye motseng wo o lego kgole. Ba be ba swara dithuto tše mmalwa tša Beibele le batho bao ba thabelago moo.
3 E le go fihlelela batho bao ba dulago nokeng ya Paraguay le ya Paraná, Dihlatse tša kua Paraguay gotee le baithaopi bao ba tšwago dinageng tše dingwe tše 15 ba ile ba šoma gotee gore ba age sekepe. Sekepe seo sa ditone tše 45 se ka kgona go nametša batho ba 12. Ka sekepe se, bagoeledi ba fišegago ba Mmušo ba ile ba botša batho ditaba tše dibotse dikarolong tšeo mohlomongwe di bego di ka se fihlelelege.
4 Ka Leboa la Kgole, Dihlatse tša kua Alaska di ile tša diriša sebaka sa moswananoši go bolela ditaba tše dibotse ka selemo, e lego sehla seo batho ba etelago gore ba tlo bogela naga. Ge boemo bja leratadima bjo bo ruthetšego bo be bo dira gore go tle dikepe tša go tšea maeto tšeo di tletšego ka baeng ba merafo e fapafapanego, Dihlatse tša lefelong leo di be di ema boemakepeng di swere dikgatišo tša Beibele tšeo di gogelago ka maleme a mantši. Yona tikologong yeo, sefofane se ile sa thuša kudu gore go fihlelelwe metse yeo e lego lekatana, ka go re’alo ditaba tše dibotse tša bolelwa bathong bao ba bolelago Sealeut, Seathabasca, Setsimishiane le Setlingit.
5 Larry yo a dulago Texas, U.S.A., o be a na le tšhemo ya gagwe e kgethegilego, e lego lefelo la go hlokomela batšofadi le batho bao ba babjago kudu leo a bego a dula go lona. Gaešita le ge a be a sepela ka setulo sa digole ka baka la ge a ile a gobala, o be a dula a šoma ka mafolofolo. O be a abelana le ba bangwe molaetša wa Mmušo, go akaretša le kholofelo yeo a nago le yona yeo e theilwego Beibeleng ya gore ka tlase ga Mmušo wa Modimo ka letšatši le lengwe o tla buša a sepela.—Jes. 35:5, 6.
6 E le gore sehlopha sa Dihlatse se be gona kopanong ka leboa la Myanmar, se ile sa tšea leeto la matšatši a mararo ka sekepe go tšwa Mandalay. Dihlatse tšeo di fagahletše go bolela ditaba tše dibotse, di ile tša sepela le dikgatišo tša tšona tša Beibele tšeo di ilego tša di sepedišetša batho bao di bego di nametše le bona ka sekepeng. Nako e nngwe le e nngwe ge sekepe se ema toropong goba motseng o itšego, bagoeledi bao ba fišegago ba be ba fologa kapejana gomme ba tsena motseng ba sepediša dikgatišo. Ge ba dutše ba dira bjalo, go be go namela batho ba bangwe ka sekepeng, ke moka ba fetoga seo re ka rego ke tšhemo e mpsha ya bagoeledi ba Mmušo bao ba tlago go namela gape.
7. Barapedi ba Jehofa ba diriša mekgwa efe go nea bohlatse ka Mmušo wa Modimo, gomme morero wa bona ke ofe?
7 Ka ge mehlala ye e sego kae ya bana babo rena le dikgaetšedi e bontšhitše, barapedi ba mafolofolo ba Jehofa lefaseng ka moka ba “nea bohlatse bjo bo tletšego mabapi le Mmušo wa Modimo.” (Dit. 28:23) Ba ya ka ntlo le ntlo, ba bolela le batho seterateng, ba ba ngwalela mangwalo le go ba founela. Go sa šetšwe gore ba nametše pese, ba sepela phakeng goba ke nako ya bona ya go khutša mošomong wa bona wa boiphedišo, ka phišego ba tsoma sebaka se sengwe le se sengwe sa go nea bohlatse ka Mmušo wa Modimo. Mekgwa yeo ba e dirišago e ka ba e le e fapafapanego, eupša morero wa bona ke o swanago—go bolela ditaba tše dibotse le ge e le kae moo batho ba ka hwetšwago gona.—Mat. 10:11.
8, 9. (a) Ke ka baka la’ng kgolo ya modiro wa go bolela ka Mmušo e le mohlolo? (b) Go rotoga potšišo efe e kgahlišago, gomme re swanetše go dira’ng e le gore re hwetše karabo?
8 Wena mmadi yo a rategago, na o gare ga mašabašaba a bagoeledi ba Mmušo bao ga bjale ba lego mafolofolo dinageng tša ka godimo ga tše 235? Ge e ba go le bjalo, o kgatha tema kgolong e kgahlišago ya modiro wa go bolela ka Mmušo! Seo se fihleletšwego tšhemong ya lefaseng ka bophara ruri ke mohlolo. Go sa šetšwe mathata le ditlhohlo—gaešita le go thibelwa ke mmušo gotee le go tlaišwa ka go lebanya—Dihlatse tša Jehofa di nea bohlatse bjo bo tletšego ka Mmušo wa Modimo bathong ba ditšhaba ka moka.
9 Potšišo e kgahlišago yeo re ka e ahlaahlago ke ya gore: Ke ka baka la’ng go se na lepheko, gaešita le kganetšo e tšwago go Sathane, tšeo di kgonnego go thibela go tšwela pele ga modiro wa go bolela ka Mmušo? E le go araba potšišo yeo, re swanetše go lebelela morago kua lekgolong la pele la mengwaga C.E. Go ba gona, rena Dihlatse tša Jehofa tša mehleng yeno re tšwetša pele modiro wo o thomilego morago nakong yeo.
Modiro o Mogolo Kudu
10. Jesu o be a ineetše go eng, le gona ke’ng seo a bego a se tseba mabapi le modiro wo?
10 Mothomi wa phuthego ya Bokriste e lego Jesu Kriste, o ile a ineela go boleleng ditaba tše dibotse tša Mmušo wa Modimo. E be e le bophelo bja gagwe. O ile a hlalosa gore: “Ke swanetše go bolela ditaba tše dibotse tša Mmušo wa Modimo, gobane ke sona se ke se rometšwego.” (Luka 4:43) Jesu o be a tseba gore o be a thoma modiro woo a bego a ka se o phethe a nnoši. Pejana ga lehu la gagwe, o ile a bolela e sa le pele gore molaetša wa Mmušo o tla bolelwa “ditšhabeng ka moka.” (Mar. 13:10) Lega go le bjalo, seo se be se tla dirwa bjang le gona ke bomang?
“Eyang le dire batho ba ditšhaba ka moka barutiwa.”—Mateo 28:19
11. Ke kabelo efe ya bohlokwa yeo Jesu a e neilego barutiwa ba gagwe, gomme ba be tla hwetša thekgo efe e le gore ba e phethe?
11 Ka morago ga lehu la gagwe le go tsošwa, Jesu o ile a iponagatša go barutiwa ba gagwe gomme a ba nea kabelo ye ya bohlokwa, a re: “Ka gona, eyang le dire batho ba ditšhaba ka moka barutiwa, le ba kolobetša leineng la Tate le la Morwa le la moya o mokgethwa, le ba ruta go boloka dilo tšohle tšeo ke le laetšego tšona. Tsebang gore ke na le lena matšatši ka moka go fihla bofelong bja tshepedišo ya dilo.” (Mat. 28:19, 20) Mantšu a rego “ke na le lena” a be a bontšha gore o be a tla thekga barutiwa ba gagwe modirong wa boboledi le wa go dira barutiwa. Ba be ba tla hloka thekgo e bjalo, ka gobane Jesu o be a boletše e sa le pele gore e be e tla ba “ba ba hloilwego ke ditšhaba tšohle.” (Mat. 24:9) Barutiwa ba be ba tla hwetša thekgo go tšwa mothopong o mongwe gape. Pejana ga ge a ka rotogela legodimong, Jesu o ile a ba botša gore ba be ba tla newa matla ke moya o mokgethwa gore e be dihlatse tša gagwe “go fihla karolong ya kgole ya lefase.”—Dit. 1:8.
12. Ke dipotšišo dife tša bohlokwa tšeo di rotogago, le gona ke ka baka la’ng e le gabohlokwa gore re tsebe dikarabo?
12 Bjale go rotoga dipotšišo tše dingwe tša bohlokwa tšeo di rego: Na baapostola ba Jesu gotee le barutiwa ba bangwe ba lekgolong la pele la mengwaga ba ile ba tšea kabelo ya bona e le ya bohlokwa? Na sehlopha se se senyenyane sa banna le basadi ba Bakriste se ile sa nea bohlatse bjo bo tletšego ka Mmušo wa Modimo gaešita le ge se be se lebeletšane le tlaišo e šoro? Na ruri se ile sa hwetša thekgo e tšwago legodimong gotee le thekgo ya moya o mokgethwa wa Jehofa modirong wa sona wa go dira barutiwa? Dipotšišo tše gotee le tše dingwe tšeo di sepedišanago le tšona di arabja ka pukung ya Beibele ya Ditiro. Ke gabohlokwa gore re tsebe dikarabo. Ka baka la’ng? Jesu o holofeditše gore modiro wo a itšego o dirwe o tla tšwela pele “go fihla bofelong bja tshepedišo ya dilo.” Ka gona taelo ye e šoma go Bakriste ka moka ba therešo, go akaretša le rena bao re phelago mo nakong ye ya bofelo. Ka gona re na le kgahlego e kgolo ka pego ya histori yeo e lego ka pukung ya Ditiro.
Kakaretšo ya Puku ya Ditiro
13, 14. (a) Ke mang yo a ngwadilego puku ya Ditiro, gomme mongwadi wa yona o hweditše bjang tsebišo ya gagwe? (b) Puku ya Ditiro e hupere’ng?
13 Ke mang yo a ngwadilego puku ya Ditiro? Puku ye ka boyona ga e bolele leina la mongwadi wa yona, eupša mantšu ao a thomago puku ye a bontšha gabotse gore mongwadi wa puku ya Ditiro ke yena a ngwadilego Ebangedi ya Luka. (Luka 1:1-4; Dit. 1:1, 2) Ka gona, go tloga mathomong, go be go tšewa gore Luka e lego “ngaka e rategago” e bile e le radihistori yo a nago le šedi, ke yena mongwadi wa puku ya Ditiro. (Bakol. 4:14) Puku ye e akaretša nako ya mengwaga e ka bago e 28, go tloga nakong ya go rotogela ga Jesu legodimong ka 33 C.E. go fihla nakong ya go golegwa ga moapostola Paulo kua Roma mo e ka bago ka 61 C.E. Taba ya gore Luka kanegelong ya gagwe o diriša “ba” ke moka a fetoga a diriša “re” e bontšha gore o be a le gona ditiragalong tše dintši tšeo a bolelago ka tšona. (Dit. 16:8-10; 20:5; 27:1) Ka ge e be e le monyakišiši yo a nago le bokgoni, ka ntle le pelaelo Luka o swanetše go ba a ikhweleditše ditaba go tšwa go Paulo, Baranaba, Filipi le ba bangwe bao go boletšwego ka bona pegong ye.
14 Puku ya Ditiro e hupere’ng? Pejana ka Ebangeding ya gagwe, Luka o ngwadile mabapi le dilo tšeo Jesu a di boletšego le go di dira. Lega go le bjalo, ka pukung ya Ditiro, Luka o bega mabapi le seo balatedi ba Jesu ba se boletšego le go se dira. Ka gona, puku ya Ditiro e mabapi le batho bao ba ilego ba dira modiro o mogolo kudu, gaešita le ge ba bantši ba bona ba be ba lebelelwa ke batho ba ka ntle e le bao “ba sa rutegago le ba tlwaelegilego.” (Dit. 4:13) Ka boripana, pego ye e buduletšwego e re botša kamoo phuthego ya Bokriste e ilego ya thewa ka gona le kamoo e ilego ya gola ka gona. Puku ya Ditiro e bontšha kamoo Bakriste ba lekgolong la pele la mengwaga ba ilego ba dira modiro wa boboledi ka gona—mekgwa yeo ba ilego ba e diriša gotee le boemo bja bona bja kgopolo. (Dit. 4:31; 5:42) E hlalosa tema yeo e kgathilwego ke moya o mokgethwa go phatlalatšeng ditaba tše dibotse. (Dit. 8:29, 39, 40; 13:1-3; 16:6; 18:24, 25) Puku ya Ditiro e bolela ka sehlogo sa Beibele, seo se akaretšago go kgethagatšwa ga leina la Modimo a diriša Mmušo wa gagwe woo Kgoši ya wona e lego Kriste, le gona e bontšha go phatlalatšwa ga molaetša wa Mmušo ka katlego go sa šetšwe kganetšo e šoro.—Dit. 8:12; 19:8; 28:30, 31.
15. Re tla holega ka ditsela dife ka go ahlaahla puku ya Ditiro?
15 Ruri ke mo go kgahlišago le mo go matlafatšago tumelo go ahlaahla puku ya Beibele ya Ditiro! Ge re naganišiša ka mohlala wa go ba le sebete le mafolofolo wa balatedi ba pele ba Kriste, dipelo tša rena di tla kgomega. Re tla tutueletšega go ekiša tumelo ya bana babo rena le dikgaetšedi ba lekgolong la pele la mengwaga. Ka go re’alo re tla be re hlametšwe gakaone go phetha thomo ya rena ya gore, “eyang le dire . . . barutiwa.” Kgatišo ye o e balago ga bjale e reretšwe go go thuša gore o ithute puku ya Ditiro ka kelohloko.
Puku Yeo e Tlago go re Thuša go Ithuta Beibele
16. Ke dilo dife tše tharo tšeo e lego morero wa kgatišo ye?
16 Ka kakaretšo, morero wa kgatišo ye ke ofe? Morero wa puku ye ke go phetha dilo tše tše tharo, (1) go matlafatša kgodišego ya rena ya gore Jehofa o diriša moya wa gagwe o mokgethwa go thekga modiro wa go bolela ka Mmušo le go dira barutiwa, (2) go tsošološa phišego ya rena bodireding ka go ahlaahla mohlala wa balatedi ba Kriste ba lekgolong la pele la mengwaga, le (3) go dira gore tlhompho ya rena ya go hlompha mokgatlo wa Jehofa le bao ba etelelago pele modirong wa boboledi le go okameleng diphuthego e be e tseneletšego.
17, 18. Kgatišo ye e rulagantšwe bjang, gomme ke dibopego dife tšeo di tlago go go thuša thutong ya motho ka noši?
17 Kgatišo ye e rulagantšwe bjang? O tla lemoga gore e arogantšwe ka dikarolo tše seswai, e nngwe le e nngwe e akaretša karolo ya puku ya Ditiro. Morero wa dikgaolo tše di latelago ga se go ahlaahla puku ya Ditiro temana ka temana, eupša ke go ntšha dithuto ditiragalong tšeo di anegwago ka pukung yeo ya Beibele le go re thuša go bona kamoo re ka dirišago dintlha tšeo re ithutilego tšona. Mathomong a kgaolo e nngwe le e nngwe, go tla ba le karolo yeo e hlalosago ntlha e kgolo ya kgaolo yeo le Lengwalo leo le tlago go bontšha karolo ya puku ya Ditiro yeo e tla bego e ahlaahlwa.
18 Go na le dibopego tše dingwe tša kgatišo ye tšeo di tlago go go thuša thutong ya motho ka noši ya Beibele. Diswantšho tše dibotse tšeo di bontšhago ditiragalo tše di kgahlišago tša ka pukung ya Ditiro di tla go thuša go bona ka leihlo la kgopolo seo se bego se direga ge o dutše o naganišiša ka pego yeo ya Beibele. Dikgaolo tše dintši di na le mapokisi ao a neago tsebišo e thušago ya tlaleletšo. Mapokisi a mangwe a bolela ka boripana ka moanegwa wa ka Beibeleng yoo re swanetšego go ekiša tumelo ya gagwe. A mangwe a nea ditaba tše di oketšegilego mabapi le mafelo, ditiragalo, ditšo goba batho ba bangwe bao go bolelwago ka bona ka pukung ya Ditiro.
Šoma tšhemo yeo o e abetšwego ka mafolofolo
19. Ke go itlhahloba gofe moo re swanetšego go go dira nako le nako?
19 Kgatišo ye e ka go thuša go itlhahloba. Go sa šetšwe gore o be o dutše o le mogoeledi wa Mmušo ka nako e kae, ke mo gobotse gore nako le nako o eme ganyenyane gomme o hlahlobe dilo tšeo di tlago pele bophelong bja gago le tsela yeo o lebelelago bodiredi bja Bokriste ka yona. (2 Bakor. 13:5) Ipotšiše gore: ‘Na ke kgomaretše boemo bja kgopolo bja go akgofa bodireding bja ka? (1 Bakor. 7:29-31) Na ke bolela ditaba tše dibotse ka kgodišego le ka phišego? (1 Bathes. 1:5, 6) Na ke tšea karolo ka botlalo ka mo go ka kgonegago modirong wa boboledi le wa go dira barutiwa?’—Bakol. 3:23.
20, 21. Ke ka baka la’ng modiro wo re o neilwego e le o akgofilego gakaakaa, le gona boikemišetšo bja rena e swanetše go ba bofe?
20 Anke re duleng re gopola gore re laetšwe go dira modiro o bohlokwa—go bolela ditaba tše dibotse le go dira barutiwa. Letšatši le lengwe le le lengwe ge le feta, go akgofa ga modiro wa rena go a oketšega. Bofelo bja tshepedišo ye ya dilo bo batamela ka lebelo. Le ka mohla ga se gwa ka gwa ba le maphelo a mantši gakaakaa ao a lego kotsing. Ga re tsebe gore ke ba bakae bao ba nago le tshekamelo e swanetšego bao ba sa dutšego ba tla arabela molaetšeng wa rena. (Dit. 13:48) Eupša ke boikarabelo bja rena gore re thuše batho ba bjalo pele nako e fela.—1 Tim. 4:16.
21 Ka gona, ke gabohlokwa gore re ekiše mohlala wa bagoeledi ba mafolofolo ba Mmušo ba lekgolong la pele la mengwaga. Anke go ithuta ga gago ka kelohloko kgatišo ye go go tutueletše go bolela ditaba tše dibotse ka phišego le ka sebete ka mo go oketšegilego. Le gona eka boikemišetšo bja gago bja gore o tšwele pele o “nea bohlatse bjo bo tletšego mabapi le Mmušo wa Modimo,” bo ka matlafatšwa.—Dit. 28:23.
