1. Ke dilo dife tšeo Bakriste ba lekgolong la pele la nywaga ba swanago ka tšona le Dihlatse tša Jehofa lehono?

 BA NEILE bohlatse ka phišego. Dipelo tša bona di ile tša ba tutueletša go amogela thušo le tlhahlo ya moya o mokgethwa. Tlaišo ga se ya ka ya ba tswalela melomo. Le gona Modimo o ile a ba šegofatša kudu. Dilo tše ka moka di diragaletše Bakriste ba lekgolong la pele la nywaga, go etša ge di diragalela Dihlatse tša Jehofa lehono.

2, 3. Ke’ng seo e lego sa moswananoši ka puku ya Ditiro?

² Ga go pelaelo gore o kgothaditšwe ke dipego tše di tiišago tumelo tšeo di hwetšwago ka pukung ya Beibele yeo e tletšego ditiragalo ya Ditiro tša Baapostola! Puku ye ke ya moswananoši, ka gobane ke yona feela pego e buduletšwego ke Modimo ya histori ya Bokriste bja lekgolong la pele la nywaga.

³ Puku ya Ditiro e bolela ka maina a batho ba 95 go tšwa dinageng tše 32, metseng e 54 le dihlakahlakeng tše 9. Ke pego e kgahlišago ya mabapi le batho, e lego batho ba tlwaelegilego, badumedi ba borapedi bja maaka bao ba nago le boikgantšho, boradipolitiki ba baikgogomoši le batlaiši ba šoro. Eupša go feta tšohle, e mabapi le bana beno le dikgaetšedi ba lekgolong la pele la nywaga, bao ba sego ba lebeletšana feela le mathata a tlwaelegilego a bophelo eupša gape ba ilego ba bolela ditaba tše dibotse ka phišego.

4. Ke ka baka la’ng re thabela tswalano e kgethegilego le batho ba bjalo ka moapostola Paulo, Thabitha le dihlatse tše dingwe tše di botegago tša kgale?

⁴ Ga bjale go šetše go fetile nywaga e ka bago e 2 000 ga e sa le go tloga ka nako ya baapostola ba fišegago e lego Petro le Paulo, Luka ngaka e rategago, Baranaba yo a nago le moya wa go nea ka seatla se se bulegilego, Stefano yo a nago le sebete, Thabitha wa pelo e botho, Lidia wa go ba le moya wa go amogela baeng le dihlatse tše dingwe tše dintši tšeo di botegago. Lega go le bjalo, re thabela tswalano e kgethegilego le bona. Ka baka la’ng? Ka gobane re na le modiro o swanago wa go dira barutiwa. (Mat. 28:19, 20) Ruri re na le tokelo e kgolo ya go tšea karolo go wona!

5. Balatedi ba Jesu ba pele ba ile ba thoma go dira modiro wa bona kae?

⁵ Anke o naganišiše ka modiro woo Jesu a o neilego balatedi ba gagwe. O itše: “Le tla amogela matla ge moya o mokgethwa o fihla godimo ga lena gomme le tla ba dihlatse tša ka Jerusalema, Judea ka moka le Samaria le go fihla karolong ya kgole ya lefase.” (Dit. 1:8) Sa pele, moya o mokgethwa o ile wa matlafatša barutiwa  gore ba nee bohlatse “Jerusalema.” (Dit. 1:1–8:3) Ka morago ga moo, ka tlhahlo ya moya ba ile ba nea bohlatse “Judea ka moka le Samaria.” (Dit. 8:4–13:3) Ke moka ba ile ba thoma go iša ditaba tše dibotse “go fihla karolong ya kgole ya lefase.”—Dit. 13:4–28:31.

6, 7. Ge re dira bodiredi bja rena, ke’ng seo re nago le sona seo badumedigotee le rena ba lekgolong la pele la nywaga ba bego ba se na sona?

⁶ Badumedigotee le wena ba lekgolong la pele la nywaga ba be ba se na Beibele e feletšego gore ba ka e diriša modirong wa bona wa go nea bohlatse. Ebangedi ya Mateo e be e se gona go fihlela mohlomongwe ka 41 C.E. A mangwe a mangwalo a Paulo a ngwadilwe pele ga ge puku ya Ditiro e ka fela, mo e ka bago ka 61 C.E. Eupša Bakriste ba lekgolong la pele la nywaga ba be ba se na dikopi tša bona tša Mangwalo a Makgethwa ao a feletšego goba dikgatišo tše di fapafapanego tšeo ba bego ba tla di nea batho bao ba thabelago. Pele e ka ba barutiwa ba Jesu, Bakriste ba Bajuda ba be ba kile ba kwa Mangwalo a Seheberu a balwa ka sinagogeng. (2 Bakor. 3:14-16) Eupša le bona ba be ba swanetše go ba diithuti tše mafolofolo, ka ge mohlomongwe ba be ba swanetše go tsopola ditemana tšeo ba di swerego ka hlogo.

⁷ Lehono ba bantši ba rena re na le kopi ya Beibele le dikgatišo tše dintši tšeo di theilwego Beibeleng. Re dira barutiwa ka go tsebatša ditaba tše dibotse dinageng tše ka godimo ga tše 240 le ka maleme a mantši.

8, 9. (a) Moya o mokgethwa o ile wa dira gore barutiwa ba Jesu ba kgone go dira’ng? (b) Mohlanka yo a botegago o tšweletša’ng ka thušo ya moya wa Modimo?

⁸ Ge Jesu a be a laela barutiwa ba gagwe gore e be dihlatse, o ile a ba botša gore: “Le tla amogela matla ge moya o mokgethwa o fihla godimo ga lena.” Ba hlahlwa ke moya wa Modimo, goba matla a šomago, mafelelong balatedi ba Jesu e be e tla ba dihlatse lefaseng ka moka. Ka thušo ya moya o mokgethwa, Petro le Paulo ba ile ba fodiša balwetši, ba leleka batemona gaešita le go tsoša bahu! Lega go le bjalo, matla ao a bego a hwetšwa ka moya o mokgethwa a be a na le morero wa bohlokwa le go feta. A ile a dira gore baapostola le barutiwa ba bangwe ba rute batho tsebo e nepagetšego yeo e bolelago bophelo bjo bo sa felego.—Joh. 17:3.

⁹ Ka letšatši la Pentekoste ya 33 C.E., barutiwa ba Jesu ba ile ba bolela “ka maleme a fapafapanego, go ya kamoo moya o bego o ba fa gore ba bolele ka gona.” Ka go re’alo ba ile ba nea bohlatse mabapi le “matete a Modimo.” (Dit. 2:1-4, 11) Lehono ga re bolele maleme a go fapafapana ka mohlolo. Eupša ka thušo ya moya wa Modimo, mohlanka yo a botegago o tšweletša dikgatišo tšeo di theilwego Beibeleng ka maleme a mantši. Ka mohlala, kgwedi e nngwe le e nngwe go gatišwa dikopi tše dimilione tša Morokami le Phafoga! Le gona wepesaeteng ya rena ya jw.org/nso go na le dikgatišo tšeo di theilwego Beibeleng le dibidio ka maleme a ka godimo ga 1 000. Dilo tše ka moka di dira gore re kgone go bolela “matete a Modimo” bathong ba ditšhaba tšohle, meloko yohle le maleme ohle.—Kut. 7:9.

10. Ga e sa le go tloga ka 1989, go be go dirwa’ng mabapi le go fetolelwa ga Beibele?

¹⁰ Ga e sa le go tloga ka 1989, mohlanka yo a botegago o be a dutše a gatelela gore Phetolelo ya Lefase le Lefsa ya Mangwalo a Makgethwa e hwetšagale ka  maleme a mantši. Beibele ye e šetše e fetoletšwe ka maleme a ka godimo ga 200. Le gona go šetše go gatišitšwe dikopi tša yona tše dimilione tše masome gomme go sa dutše go gatišwa tše dingwe tše dintši. Gore maiteko a a atlege, ke feela ka baka la Modimo le moya wa gagwe.

11. Ke’ng seo se dirwago mabapi le modiro wa go fetolelwa ga dikgatišo tša Dihlatse?

¹¹ Modiro wa bofetoledi o dirwa ke baithaopi ba Bakriste ba diketekete dinageng tša ka godimo ga tše 150. Se ga se sa swanela go re makatša, ka gobane ga go na mokgatlo o mongwe mo lefaseng wo o hlahlwago ke moya o mokgethwa bakeng sa “go nea bohlatse bjo bo tletšego” lefaseng ka bophara mabapi le Jehofa Modimo, Kgoši ya gagwe e lego Mesia le Mmušo o hlomilwego wa legodimong!—Dit. 28:23.

12. Paulo le Bakriste ba bangwe ba ile ba kgona bjang go dira modiro wa go nea bohlatse?

¹² Ge Paulo a be a nea bohlatse go Bajuda le ba ditšhaba kua Antiokia ya Pisidia, “bao ba nago le tshekamelo e swanetšego ka bophelo bjo bo sa felego ba [ile ba] fetoga badumedi.” (Dit. 13:48) Ge Luka a phetha puku ya Ditiro, Paulo o ‘bolela ka mmušo wa Modimo ka tokologo e kgolo kudu ya polelo, a se na tšhitišo.’ (Dit. 28:31) Moapostola yo o be a nea bohlatse kae? O be a bo nea Roma—mošate wa mmušo wa lefase! Go sa šetšwe gore ke ka go nea dipolelo goba ka go diriša mekgwa e mengwe, balatedi ba Jesu ba lekgolong la pele la nywaga ba ile ba dira modiro wa bona ka moka wa go nea bohlatse ba thušwa le go hlahlwa ke moya o mokgethwa.

13. Ke ka baka la’ng re swanetše go rapela ge re tlaišwa?

¹³ Ge barutiwa ba Jesu ba lekgolong la pele la nywaga ba be ba tlaišwa, ba ile ba lopa Jehofa gore a ba nee sebete. Mafelelo e bile afe? Ba ile ba tlala moya o mokgethwa gomme ba matlafaletšwa go bolela lentšu la Modimo ka sebete. (Dit. 4:18-31) Le rena re rapelela bohlale le matla a go dula re nea bohlatse go sa šetšwe tlaišo. (Jak. 1:2-8) Ka baka la ge re šegofatšwa ke Modimo e bile re thušwa ke moya wa gagwe, re tšwela pele tirelong ya Mmušo. Ga go na selo seo se kgaotšago modiro wa go nea bohlatse—e ka ba e le kganetšo e šoro goba tlaišo e sehlogo. Ge re tlaišwa, ruri re swanetše go rapelela moya o mokgethwa le bohlale gotee le sebete gore re bolele ditaba tše dibotse.—Luka 11:13.

14, 15. (a) Ke’ng seo se ilego sa direga ka baka la “tlaišego yeo e ilego ya wela Stefano”? (b) Mehleng ya rena, ke bjang batho ba bantši kua Siberia ba ilego ba ithuta therešo?

¹⁴ Stefano o ile a nea bohlatse ka sebete pele ga ge a ka bolawa ke manaba a gagwe. (Dit. 6:5; 7:54-60) ‘Tlaišong e kgolo’ yeo e ilego ya tsoga ka nako yeo, barutiwa ka moka ba ile ba gašanywa Judea le Samaria ka ntle le baapostola. Eupša seo ga se sa ka sa kgaotša modiro wa go nea bohlatse. Filipi o ile a ya Samaria ‘a bolela ka Kriste’ gomme a ba le mafelelo a mabotse kudu. (Dit. 8:1-8, 14, 15, 25) Go feta moo, re botšwa gore: “Bao ba gašantšwego ke tlaišego yeo e ilego ya wela Stefano, ba sepela go fihla Fenikia, Tsipero le Antiokia, eupša ba sa botše motho lentšu ge e se Bajuda feela. Lega go le bjalo, go bona go be go na le banna ba bangwe ba Tsipero le Kirene bao ba bego ba tlile Antiokia gomme ba bolela le batho bao ba bolelago  Segerika, ba tsebatša ditaba tše dibotse tša Morena Jesu.” (Dit. 11:19, 20) Ka nako yeo, tlaišo e ile ya dira gore molaetša wa Mmušo o phatlalale.

¹⁵ Mo mehleng ya rena, selo se se swanago se ile sa direga dinageng tšeo e bego e le tša Soviet Union. Dihlatse tša Jehofa tše dikete di ile tša išwa dikampeng tša tshwenyo Siberia, kudukudu ka bo-1950. Ka ge di be di gašantšwe mafelong a fapafapanego, ditaba tše dibotse di be di phatlalala ka go se kgaotše nageng yeo e kgolo. Ga go na kamoo Dihlatse tše dintši ka tsela ye di bego di ka hwetša tšhelete e nyakegago e le gore mohlomongwe di tšee leeto la dikhilomithara tše 10 000 go yo tsebatša ditaba tše dibotse! Lega go le bjalo, mmušo ka bowona o ile wa di romela go phatlalala le naga yeo. Ngwanabo rena yo mongwe o itše: “Kamoo go bilego ka gona, bahlankedi ba mmušo ke bona ba ilego ba dira gore batho ba Siberia ba dikete bao ba botegago ba tsebe therešo.”

16, 17. Puku ya Ditiro e re nea bohlatse bofe mabapi le go šegofatša ga Jehofa modiro wa go nea bohlatse?

¹⁶ Go be go le molaleng gore Jehofa o be a šegofatša Bakriste ba lekgolong la pele la nywaga. Paulo le ba bangwe ba ile ba bjala le go nošetša, “eupša Modimo o tšwetše pele a godiša.” (1 Bakor. 3:5, 6) Dipego tša ka pukung ya Ditiro di re nea bohlatse bja kgolo e bjalo ka baka la ge Jehofa a šegofatša modiro wa go nea bohlatse. Ka mohlala, “lentšu la Modimo [le ile] la tšwela pele le gola gomme palo ya barutiwa ya tšwela pele e ata kudu Jerusalema.” (Dit. 6:7) Ge modiro wa go nea bohlatse o phatlalala, “phuthego go la Judea ka moka, Galilea le Samaria ya tsena lebakeng la khutšo, e agwa; ge e dutše e sepela ka go boifa Jehofa [ka tlhompho] le ka go homotšwa ke moya o mokgethwa, ya tšwela pele e ata.”—Dit. 9:31.

¹⁷ Kua Siria ya Antiokia, Bajuda le batho bao ba bolelago Segerika ba ile ba kwa therešo go dihlatse tšeo di nago le sebete. Pego e re: “Go feta moo, letsogo la Jehofa le be le na le bona [dihlatse tšeo] gomme palo e kgolo yeo e bego e fetogile badumedi ya retologela go Morena.” (Dit. 11:21) Mabapi le tšwelopele e oketšegilego motseng woo, re bala gore: “Lentšu la Jehofa la tšwela pele le gola e bile le phatlalala.” (Dit. 12:24) Le gona ka modiro wa go nea bohlatse wa Paulo le ba bangwe gare ga ba ditšhaba, “lentšu la Jehofa la tšwela pele le gola ka tsela e matla e bile le fenya.”—Dit. 19:20.

18, 19. (a) Ke ka baka la’ng re tseba gore “letsogo la Jehofa” le na le rena? (b) Nea mohlala wo o bontšhago gore Jehofa o thekga batho ba gagwe.

¹⁸ Ga go na pelaelo gore le rena “letsogo la Jehofa” le na le rena lehono. Ke ka baka leo batho ba bantši ba fetogago badumedi gomme ba bontšha boineelo bja bona go Modimo ka go kolobetšwa. Go feta moo, ke feela ka thušo ya Modimo le tšhegofatšo ya gagwe moo re kgonago go kgotlelela kganetšo e šoro—ka dinako tše dingwe, tlaišo e sehlogo—gomme ra dira bodiredi bja rena ka katlego, go etša ge Paulo le Bakriste ba bangwe ba lekgolong la pele la nywaga ba ile ba dira. (Dit. 14:19-21) Jehofa Modimo o tla dula a re thuša. “Matsogo a gagwe a neng le neng” ka mehla a re thekga ditekong tša rena ka moka. (Doit. 33:27) Le gona anke re gopoleng gore ka baka la leina la gagwe le legolo, Jehofa ga a ke a lahla batho ba gagwe.—1 Sam. 12:22; Ps 94:14.

 ¹⁹ Ka mohlala: Ka baka la ge ngwanabo rena Harald Abt a ile a dula a nea bohlatse, Manazi a ile a mo romela kampeng ya tshwenyo ya Sachsenhausen nakong ya Ntwa ya II ya Lefase. Ka May 1942, Magestapo a ile a ya legaeng la mosadi wa gagwe Elsa, a tšea ngwanenyana wa bona yo monyenyane ke moka a golega Elsa. O ile a išwa dikampeng tše di fapafapanego. Kgaetšedi Abt o re: “Nywaga yeo ke e feditšego ke le dikampeng tša tshwenyo Jeremane e nthutile thuto ya bohlokwa kudu. Ke ithutile gore moya wa Jehofa o ka go matlafatša kudu ge o lebeletšane le teko e kgolo! Pele nka golegwa, ke be ke ile ka bala lengwalo la kgaetšedi yo mongwe yo a boletšego gore ge motho a lebeletšane le teko e šoro, moya wa Jehofa o mo thuša go dula a išitše maswafo fase. Ke be ke nagana gore o feteletša dilo. Eupša ge ke be ke lebeletšane le diteko, ke ile ka bona gore seo a se boletšego e be e le therešo. Seo a se boletšego se tloga se direga ka yona tsela yeo. Go thata go nagana ka seo ge e ba o se wa ka wa ba boemong bjoo. Lega go le bjalo, seo se ile sa ntiragalela e le ka kgonthe.”

20. Paulo o ile a dira’ng ge a be a golegilwe ka ntlong, gona se se ka kgothatša bjang ba bangwe ba bana babo rena le dikgaetšedi?

²⁰ Puku ya Ditiro e phetha Paulo a ‘bolela ka mmušo wa Modimo’ ka phišego. (Dit. 28:31) Ka baka la ge a be a golegilwe ka ntlong, o be a se a lokologa go nea bohlatse ka ntlo le ntlo Roma. Lega go le bjalo, o ile a tšwela pele a nea bohlatse go bohle bao ba bego ba etla go yena. Lehono, ba bangwe ba bana babo rena le dikgaetšedi bao ba rategago ga ba kgone go tšwa ka ntlong, mohlomongwe ga ba kgone le go fologa malaong, goba ka baka la botšofadi, bolwetši goba bokoka ba dula magaeng ao go hlokomelwago batšofadi le dikoka. Lega go le bjalo, lerato la bona la go rata Modimo le kganyogo ya bona ya go nea bohlatse di dula di le matla. Re a ba rapelela le gona re ka kgopela Tatago rena wa legodimong gore a ba kopanye le batho bao ba kganyogago go ithuta ka yena le ka merero ya gagwe e kgahlišago.

21. Ke ka baka la’ng re swanetše go nea bohlatse ka maikwelo a go akgofa?

²¹ Ba bantši ba rena re kgona go tšea karolo bodireding bja ntlo le ntlo le dibopegong tše dingwe tša modiro wa go dira barutiwa. Ka gona anke ka moka ga rena re direng sohle seo re ka se kgonago go phetha tema ya rena ya go ba bagoeledi ba Mmušo, re tšee karolo go neeng bohlatse “go fihla karolong ya kgole ya lefase.” Modiro wo o swanetše go dirwa ka maikwelo a go akgofa, ka gobane “pontšho” ya go ba gona ga Kriste e bonagala gabotse. (Mat. 24:3-14) Re swanetše go diriša nako ya rena gabotse. Gona bjale re na le “mo gontši mo [re ka] go dirago modirong wa Morena.”—1 Bakor. 15:58.

22. Re swanetše go ikemišetša go dira’ng ge re sa letetše letšatši la Jehofa?

²² Ge re sa letetše “go [tla ga] letšatši le legolo le le boifišago la Jehofa,” anke re ikemišetšeng go tšwela pele re nea bohlatse ka sebete le ka potego. (Joele 2:31) Re sa dutše re tlo hwetša batho ba bantši bao ba swanago le Baberea bao ba ilego ba “[amogela] lentšu ka go le fišegela kudu monaganong.” (Dit. 17:10, 11) Ge e le gabotse, anke re neeng bohlatse go fihlela re ekwa mantšu ao a rego: “O dirile gabotse mohlanka yo botse le yo a botegago!” (Mat. 25:23) Ge e ba lehono re phetha ka phišego karolo ya rena modirong wa go dira barutiwa le gona re botegela Jehofa, ruri re tla thaba go ya go ile gore re ile ra ba le tokelo e kgolo ya “go nea bohlatse bjo bo tletšego” ka Mmušo wa Modimo!