1, 2. Ke mohlolo ofe wo Petro le Johane ba ilego ba o dira kgauswi le mojako wa tempele?

 LETŠATŠI leo le dikelago le phadimela lešaba. Bajuda bao ba ineetšego le barutiwa ba Kriste ba tsena moagong wa tempele. Go se go ye kae e tla ba e le ‘nako ya thapelo.’ a (Dit. 2:46; 3:1) Petro le Johane ba phatša gare ga lešaba ba lebile mojakong wa tempele wo o bitšwago, Botse. Gare ga lešata le modumo wa maoto ao a gogwago, go na le mokgopedi yo a lego nywageng ya magareng yo a belegwego e le segole, yoo a bego a kgopela dimpho tšeo di bego di newa badiidi.—Dit. 3:2; 4:22.

² Ge Petro le Johane ba dutše ba batamela, mokgopedi yoo o boeletša mantšu ao a hlwago a a bolela ge a kgopela tšhelete. Baapostola bao ba ema, e le ge ba bona monna yo yoo a nago le kholofelo. Petro a re: “Silifera le gauta ga ke natšo eupša seo ke nago le sona ke seo ke go neago sona, ke re: Ka leina la Jesu Kriste wa Monatsaretha, sepela!” Bona ka leihlo la kgopolo lešaba leo le maketšego ge Petro a swara ka seatla monna yoo yo a golofetšego gomme ka lekga la mathomo bophelong bja gagwe, a ema ka go otlologa! (Dit. 3:6, 7) Na o ka kgona go bona monna yoo a itebelela dinao tša gagwe tšeo di fodilego gomme a gata dikgato tša pele ka go se kgodišege? Ga go makatše ge a thoma go taboga le go tumiša Modimo ka go hlaboša.

3. Ke mpho efe e kgolo kudu yeo monna yo e kilego ya ba segole le lešaba ba bego ba ka e amogela?

³ Lešaba leo le maketšego le kitimela go Petro le Johane mathuding a dikokwane a Solomone. Lefelong le, leo Jesu a kilego a ema go lona gomme a ruta, Petro o tsebiša lešaba ka bohlokwa bja kgonthe bja seo se bego se sa tšwa go direga. (Joh. 10:23) O nea lešaba gotee le monna yo e kilego ya ba segole mpho e bohlokwa kudu go phala silifera goba gauta. Mpho yeo e akaretša seo se fetago go phela gabotse gape mmeleng. Ke sebaka sa gore ba itshole le sa gore dibe tša bona di lebalelwe ke moka e be balatedi ba “Moemedi yo Mogolo wa bophelo” yo a kgethilwego ke Jehofa e lego Jesu Kriste.—Dit. 3:15.

4. (a) Ka morago ga gore monna yo mongwe a fodišwe ka mohlolo, balaodi ba ile ba leka go dira’ng? (b)Re tlo araba dipotšišo dife tše pedi?

⁴ A letšatši le le kgahlišago gakaakaang! Motho yo mongwe o fodišitšwe mmeleng  gomme ga bjale o kgona go sepela. Batho ba ba oketšegilego ba dikete ba be ba neilwe sebaka sa go fodišwa moyeng e le gore ba ka sepela ka mo go swanetšego Modimo. (Bakol. 1:9, 10) Go oketša moo, ditiragalo tša letšatšing leo e ile ya ba mathomomayo a go se kwane magareng ga balatedi bao ba botegago ba Kriste le balaodi bao ba bego ba tla leka go ba thibela go phetha taelo ya Jesu ya gore ba tsebatše molaetša wa Mmušo. (Dit. 1:8) Re ka ithuta’ng boemong bja kgopolo le mekgweng yeo e ilego ya dirišwa ke Petro le Johane, e lego “batho ba sa rutegago le ba tlwaelegilego,” ge ba be ba nea lešaba bohlatse? b (Dit. 4:13) Le gona, re ka ekiša bjang tsela yeo bona le barutiwa ba bangwe ba ilego ba arabela ka yona ge ba be ba lebeletšane le kganetšo?

5. Re ithuta’ng tseleng yeo ka yona Petro a ilego a bolela le lešaba?

⁵ Petro le Johane ba ile ba ema ka pele ga lešaba, ba dutše ba tseba gore ba bangwe gare ga lona ba be ba sa tšwa go goeletša ka bogale gore Jesu a bolawe. (Mar. 15:8-15; Dit. 3:13-15) Akanya ka sebete seo Petro a ilego a se bontšha ge a be a bolela ka go se boife gore monna yoo wa segole o fodišitšwe ka leina la Jesu. Petro ga se a ka a bebofatša therešo yeo. O ile a sola lešaba leo ka go lebanya gore le be le ikarabela ka lehu la Kriste. Eupša Petro ga se a ka a dula a galefetše batho bao, ka gobane ba be ba “dirile ka go se tsebe.” (Dit. 3:17) O ile a bolela le bona ka tsela e bontšhago gore ke Bajudagotee le yena gomme a lebiša tlhokomelo dibopegong tše di kgahlišago tša molaetša wa Mmušo. Ge ba be ba ka itshola gomme ba bontšha tumelo go Kriste, ba be ba tla tlelwa ke “mehla ya tapologo” yeo e tšwago go Jehofa. (Dit. 3:19) Le rena re swanetše go ba le sebete le go bolela ka go lebanya ge re tsebatša kahlolo ya Modimo yeo e tlago. Le gona, ga se ra swanela go ba bogale goba go ahlola batho ba bangwe. Go e na le moo, re lebelela bao re bolelago le bona e le bana babo rena ba ka moso gomme go swana le Petro, re lebiša tlhokomelo dibopegong tše di kgahlišago tša molaetša wa Mmušo.

6. Petro le Johane ba ile ba bontšha bjang boikokobetšo le boipoetšo?

⁶ Baapostola e be e le batho bao ba ipoeditšego. Ga se ba ka ba ipetha sehuba ka mohlolo woo ba o dirilego. Petro o ile a botša lešaba leo gore: “Ke ka baka la’ng le re lebeletše bjalo ka ge eka ke ka matla a rena ka noši goba boineelo go Modimo ge re dirile gore a sepele?” (Dit. 3:12) Petro le baapostola ba bangwe ba be ba tseba gore botse le ge e le bofe bjo ba bego ba kgona go bo dira bodireding bja bona e be e le ka baka la matla a Modimo, e sego a bona. Ka baka leo, ka boipoetšo ba ile ba iša theto ka moka ya dilo tšeo ba bego ba kgona go di dira go Jehofa le Jesu.

7, 8. (a) Ke mpho efe yeo re ka e neago batho? (b) Kholofetšo ya “tsošološo ya dilo ka moka” e phethagala bjang lehono?

⁷ Re swanetše go bontšha boipoetšo bjo bo swanago ge re le modirong wa go bolela ka Mmušo. Ke therešo gore moya wa Modimo ga o nee Bakriste ba mehleng yeno matla a go fodiša batho ka mohlolo. Lega go le bjalo, re ka thuša batho gore ba be le tumelo go Modimo le Kriste le go amogela mpho e swanago le yeo Petro a e neilego batho, e lego sebaka sa gore ba lebalelwe dibe le go lapološwa ke Jehofa.  Ngwaga le ngwaga, batho ba dikete tše makgolo ba amogela thušo ye ke moka ya ba barutiwa ba Kriste bao ba kolobeditšwego.

⁸ Ruri re phela nakong ya “tsošološo ya dilo ka moka” yeo Petro a boletšego ka yona. E le go phethagala ga lentšu leo “Modimo a [le] boletšego ka molomo wa baporofeta ba gagwe ba bakgethwa ba mehleng ya bogologolo,” Mmušo o ile wa hlongwa legodimong ka ngwaga wa 1914. (Dit. 3:21; Ps. 110:1-3; Dan. 4:16, 17) Ka moragonyana ga moo, Kriste o ile a thoma go okamela modiro wa go tsošološwa ga borapedi bja therešo mo lefaseng. Ka baka la seo, batho ba dimilione ba tlišitšwe paradeiseng ya moya, ya ba balata ba Mmušo wa Modimo. Ba apotše semelo sa kgale seo se senyegilego ke moka ba “[apara] semelo se sefsa seo se bopilwego go ya ka thato ya Modimo.” (Baef. 4:22-24) Go swana le go fodišwa ga mokgopedi wa segole, modiro wo o mogolo o phethwa ka moya wa Modimo, e sego ka maiteko a motho. Go etša Petro, re swanetše go diriša Lentšu la Modimo ka sebete le ka tsela e atlegago bakeng sa go ruta batho ba bangwe. Katlego le ge e le efe yeo re ka bago le yona ge re thuša batho gore e be barutiwa ba Kriste e fihlelelwa ka matla a Modimo, e sego a rena.

9-11. (a) Baetapele ba Bajuda ba ile ba arabela bjang molaetšeng wa Petro le Johane? (b) Baapostola ba ile ba ikemišetša go dira’ng?

⁹ Lešaba le ile la thabišwa kudu ke seo Petro a se boletšego, go goeletša le go taboga ga monna yo e kilego ya ba segole. Moetapele wa tempele yo a bego a kgethilwe go hlapetša lefelo la tempele gotee le baperisita ba bagolo ba ile ba arabela go seo ka gore ba kitimele go yo nyakišiša. Go bonagala banna ba e be e le Basadutsei, e lego sehlotswana sa bahumi le seo se bego se na le tutuetšo e matla ya bopolitiki seo se bego se dira khutšo le Baroma, seo se bego se gana molao wo o bego o fo bolelwa ka molomo woo o bego o ratwa kudu ke Bafarisei e bile ba kwera tumelo ya gore go na le tsogo. c Ruri ba ile ba selekega kudu ge ba be ba hwetša Petro le Johane tempeleng ba ruta ka sebete gore Jesu o tsošitšwe bahung!

¹⁰ Baganetši ba bao ba bego ba galefile ba ile ba lahlela Petro le Johane kgolegong gomme letšatšing le le latelago ba ba tliša pele ga kgorokgolo ya Bajuda. Go ya ka pono ya babuši ba bao ba bego ba nagana gore ba phagame kudu, Petro le Johane e be e le “batho ba sa rutegago le ba tlwaelegilego” bao ba bego ba se na tshwanelo ya go ruta tempeleng. Ga se ba ka ba ithuta sekolong le ge e le sefe se se tumilego sa bodumedi. Lega go le bjalo, go bolela ga bona ka go lebanya le ka kgodišego go ile gwa makatša kgoro yeo. Ke ka baka la’ng Petro le Johane ba be ba atlega kudu ka tsela ye? Lebaka le lengwe e be e le gore ba be “ba kile ba ba le Jesu.” (Dit. 4:13) Mong wa bona o be a ruta ka matla a magolo, e sego bjalo ka bamangwalo.—Mat. 7:28, 29.

¹¹ Kgoro yeo e ile ya laela baapostola gore ba kgaotše go dira boboledi. Setšhabeng seo, ditaelo tša kgoro di be di le matla kudu. Dibekeng tše sego kae pejana, ge Jesu a be a le kgorong yona yeo, ditho tša yona di ile tša tsebatša gore “o lebanwe ke lehu.” (Mat. 26:59-66) Lega go le bjalo, Petro le Johane ga se ba ka ba boifa. Ba  eme pele ga banna ba ba bahumi, ba dirutegi le bao ba nago le tutuetšo, Petro le Johane ba ile ba bolela ka sebete eupša ba bontšha tlhompho, ba re: “Ge e ba go lokile mahlong a Modimo go theetša lena go e na le Modimo, ikahloleleng. Eupša ge e le rena re ka se ke ra tlogela go bolela ka dilo tše re di bonego le tše re di kwelego.”—Dit. 4:19, 20.

12. Ke’ng seo se ka re thušago go ba le sebete le kgodišego?

¹² Na o kgona go bontšha sebete se se swanago? O ikwa bjang ge o hwetša sebaka sa go nea bohlatse go bahumi, dirutegi goba batho bao ba nago le tutuetšo setšhabeng sa geno? Go thwe’ng ge e ba ditho tša lapa leno, bao o tsenago le bona sekolo goba bašomigotee le wena ba go kwera ka baka la ditumelo tša gago? Na o a boifa? Ge e ba go le bjalo, o ka kgona go fenya maikwelo a bjalo. Ge Jesu a be a le mo lefaseng, o ile a ruta baapostola ba gagwe kamoo ba ka emelago ditumelo tša bona ka kgodišego le ka tlhompho. (Mat. 10:11-18) Ka morago ga tsogo ya gagwe, Jesu o ile a holofetša barutiwa ba gagwe gore o be a tla tšwela pele a na le bona “matšatši ka moka go fihla bofelong bja tshepedišo ya dilo.” (Mat. 28:20) Ka tlase ga tlhahlo ya Jesu, “mohlanka yo a botegago le wa temogo” o re ruta kamoo re ka emelago ditumelo tša rena ka gona. (Mat. 24:45-47; 1 Petro 3:15) Se se dirwa ka tlhahlo yeo e hwetšwago dibokeng tša phuthego, tše bjalo ka, seboka sa Bophelo bja Rena le Bodiredi bja Bokriste le ka dikgatišo tše di theilwego Beibeleng, tše bjalo ka dihlogo tša “Dipotšišo tša Beibele di a Arabja” tšeo di hwetšwago wepesaeteng ya jw.org/nso. Na o diriša ditokišetšo tše ka botlalo? Ge e ba o dira bjalo, sebete sa gago le kgodišego di tla oketšega. Le gona, go etša baapostola, o ka se dumelele selo le ge e le sefe se go dira gore o kgaotše go bolela ka ditherešo tše di kgahlišago tša Beibele tšeo o di bonego le go di kwa.

13, 14. Ge e ba re lebeletšane le kganetšo re swanetše go dira’ng, gona ka baka la’ng?

¹³ Gateetee ka morago ga gore Petro le Johane ba lokollwe kgolegong, ba ile ba bokana gotee le phuthego ka moka. Ba ile “ba hlatlošetša mantšu a bona go Modimo” ba le gotee gomme ba rapelela go ba le sebete sa go tšwela pele ba bolela ditaba tše dibotse. (Dit. 4:24) Petro o be a tseba gabotse gore ke bošilo gore motho a ithekge ka matla a gagwe ka noši ge a leka go dira thato ya Modimo. Dibekeng tše  sego kae pejana, o kile a botša Jesu ka go ipota gore: “Gaešita le ge ba bangwe ka moka ba ka kgopša ka nakwana, nna nka se kgopše le ka mohla!” Lega go le bjalo, go etša ge Jesu a be a boletše e sa le pele, kapejana Petro o ile a ineela go boifeng batho gomme a latola mogwera yoo e bilego e le morutiši wa gagwe. Eupša Petro o ile a ithuta phošong ya gagwe.—Mat. 26:33, 34, 69-75.

¹⁴ Boikemišetšo bo nnoši bo ka se go thuše ka selo ge o dutše o phetha thomo ya gago ya go nea bohlatse ka Kriste. Ge baganetši ba leka go senya tumelo ya gago goba ba leka go go dira gore o kgaotše go bolela ditaba tše dibotse, latela mohlala wa Petro le Johane. Rapela Jehofa gore a go nee matla. Tsoma thušo ya phuthego. Botša bagolo le ba bangwe bao ba godilego tsebong ka mathata ao o lebeletšanego le ona. Dithapelo tša ba bangwe e ka ba thekgo e matla kudu.—Baef. 6:18; Jak. 5:16.

15. Ke ka baka la’ng bao ba kilego ba kgaotša go dira boboledi ka nakwana ba sa swanela go nyama?

¹⁵ Ge e ba o kile wa ineela kgateletšegong gomme wa kgaotša go dira boboledi ka nakwana, o se ke wa nyama. Gopola gore baapostola ka moka ba kile ba kgaotša go dira boboledi ka nakwana ka morago ga lehu la Jesu eupša go se go ye kae ba ile ba ba mafolofolo gape. (Mat. 26:56; 28:10, 16-20) Go e na le go dumelela diphošo tša nakong e fetilego gore di go nyamiše, na o ka ithuta go phihlelo yeo gomme wa diriša seo o ithutilego sona go matlafatša ba bangwe?

16, 17. Re ka ithuta’ng thapelong ya balatedi ba Kriste kua Jerusalema?

¹⁶ Ke’ng seo re swanetšego go se rapelela ge bao ba lego maemong a bolaodi ba re gatelela? Hle, ela hloko gore barutiwa ga se ba ka ba kgopela gore ba efošwe go lebeletšana le diteko. Ba ile ba gopola gabotse mantšu a Jesu ao a rego: “Ge e ba ba ntlhomere, le lena ba tla le hlomara.” (Joh. 15:20) Go e na le moo, barutiwa ba bao ba botegago ba ile ba kgopela Jehofa gore a ‘theetše’ ditšhošetšo tša baganetši bao. (Dit. 4:29) Barutiwa ba ba ile ba bona gabotse seo se bego se akaretšwa, ba ile ba lemoga gore tlaišo yeo ba bego ba lebeletšane le yona ge e le gabotse e be e le go phethagala ga boporofeta. Go etša ge Jesu a ba rutile go rapela, ba be ba tseba gore thato ya Modimo e be e tla ‘direga mo lefaseng’ go sa šetšwe seo babuši bao e fo bago batho feela ba ka se bolelago.—Mat. 6:9, 10.

¹⁷ E le gore ba dire thato ya Modimo, barutiwa ba ile ba rapela Jehofa ka gore: “[Dumelela] bahlanka ba gago go tšwela pele ba bolela lentšu la gago ka sebete ka moka.” Jehofa o ile a arabela bjang gateetee? “Lefelo leo ba bego ba bokane go lona la šišinyega; ka moka ba tlala moya o  mokgethwa ba bolela lentšu la Modimo ka sebete.” (Dit. 4:29-31) Ga go na selo seo se ka thibelago go phethagala ga thato ya Modimo. (Jes. 55:11) Go sa šetšwe gore go thata gakaakaang goba gore moganetši o matla gakaakaang, ge e ba re hlatlošetša mantšu a rena go Modimo ka thapelo, re ka kgodišega gore o tla re nea matla a go tšwela pele re bolela lentšu la gagwe ka sebete.

18. Ditho tša phuthego ya Jerusalema di ile tša direlana eng?

¹⁸ Go se go ye kae, phuthego yeo e bego e sa tšwa go thewa kua Jerusalema e ile ya oketšega ka ditho tše mafolofolo tše di fetago tše 5 000. d Go sa šetšwe ditlogo tša bona tše di sa swanego, barutiwa ba e be e le “ba pelo e tee le moya o tee.” E be e le batee monaganong o swanago le tseleng e swanago ya go nagana. (Dit. 4:32; 1 Bakor. 1:10) Barutiwa ba ba ile ba dira se se fetago go fo rapela Jehofa gore a šegofatše maiteko a bona. Ba ile ba thekgana moyeng gomme ba thekgana le ka dilo tše di bonagalago ge go be go nyakega. (1 Joh. 3:16-18) Ka mohlala, morutiwa Josefa yoo baapostola ba bego ba mmitša Baranaba, o ile a rekiša naga ya gagwe gomme ka go hloka boithati a neela ka tšhelete yeo ka moka bakeng sa go thuša batho bao ba bego ba etšwa dinageng tša kgole ba tlile go tlo dula Jerusalema ka nako e teletšana e le gore ba tle ba ithute ka mo go oketšegilego ka tumelo ya bona e mpsha.

19. Ke ka baka la’ng Jehofa a ile a bolaya Ananiase le Safira?

¹⁹ Banyalani ba bangwe e lego Ananiase le Safira le bona ba ile ba rekiša thoto ya bona gomme ba ntšha moneelo. Ba ile ba dira eka ba neetše ka tšhelete yeo ka moka; eupša ba ile ba “boloka e nngwe ya tšhelete ya theko . . . ka sephiring.” (Dit. 5:2) Jehofa o ile a bolaya banyalani ba, e sego ka gobane tšhelete yeo ba neetšego ka yona e be e se ya lekana, eupša ka gobane maikemišetšo a bona a go nea e be e le a mabe e bile ba be ba bontšha bofora. Ba “forile Modimo, e sego batho.” (Dit. 5:4) Go swana le baikaketši bao Jesu a ilego a ba sola, Ananiase le Safira ba be ba tshwenyegile kudu ka go nyaka go retwa ke batho go e na le go amogelwa ke Modimo.—Mat. 6:1-3.

20. Re ithuta dithuto dife mabapi le go nea Jehofa?

²⁰ Ka go swana le moya wa go nea ka go rata woo barutiwa bao ba botegago ba lekgolong la pele la mengwaga ba bego ba na le wona kua Jerusalema, Dihlatse tše dimilione tša mehleng yeno di thekga modiro wa boboledi wa lefase ka bophara ka go ntšha meneelo ya boithatelo. Ga go na yo a gapeletšwago go nea nako ya gagwe goba tšhelete ya gagwe go thekga modiro wo. Ruri Jehofa ga a nyake gore re mo hlankele ka go se rate goba ka go gapeletšwa. (2 Bakor. 9:7) Ge re nea, Jehofa o thabišwa ke maikemišetšo ao re neago ka ona, e sego gore re neela ka bokae. (Mar. 12:41-44) Le ka mohla ga re nyake go swana le Ananiase le Safira, ra dumelela gore tirelo ya rena go Modimo e tutuetšwe ke go nyaka go ikhola goba go nyaka go retwa ke batho. Go e na le moo, go swana le Petro, Johane le Baranaba, eka ka mehla tirelo ya rena go Jehofa e ka tutuetšwa ke go rata Modimo le moagišani e le ka kgonthe.—Mat. 22:37-40.