Mogoeledi wa Mmušo yo a Rategago:

Jesu o iponagatša pele ga gago. Ge a le kgauswi le go rotogela legodimong, o re: “Le tla amogela matla ge moya o mokgethwa o fihla godimo ga lena gomme le tla ba dihlatse tša ka Jerusalema, Judea ka moka le Samaria le go fihla karolong ya kgole ya lefase.” (Dit. 1:8) O be o tla arabela bjang?

Mohlomongwe o be o tla ikwa o imelwa ke bogolo bja kabelo yeo. O ka ipotšiša gore: ‘Go tla kgonega bjang gore rena re le sehlopha se senyenyane sa barutiwa re nee bohlatse “go fihla karolong ya kgole ya lefase”?’ O ka gopola temošo yeo Jesu a ilego a e nea bošegong bja pele ga lehu la gagwe yeo e rego: “Mohlanka ga a fete mong wa gagwe. Ge e ba ba ntlhomere, le lena ba tla le hlomara; ge e ba ba bolokile lentšu la ka, le la lena ba tla le boloka. Eupša ba tla le dira dilo tše ka moka ka baka la leina la ka, gobane ga ba tsebe yo a nthomilego.” (Joh. 15:20, 21) Ge o naganišiša ka mantšu ao, mohlomongwe o ka ipotšiša gore: ‘Nka kgona bjang go nea bohlatse bjo bo tletšego ke lebeletšane le kganetšo le tlaišo?’

Lehono re lebeletšane le dipotšišo tše di swanago. Modiro wa rena wo re o neilwego re le Dihlatse tša Jehofa le wona o nyaka gore re nee bohlatse bjo bo tletšego “go fihla karolong ya kgole ya lefase” go “batho ba ditšhaba ka moka.” (Mat. 28:19, 20) Modiro wo o ka phethwa bjang, kudukudu go nagannwe ka tlaišo yeo e boletšwego e sa le pele?

Puku ya Ditiro tša Baapostola e re nea pego e kgahlišago ya kamoo baapostola le Bakristegotee le bona ba lekgolong la pele la nywaga C.E. ba ilego ba kgona go phetha kabelo ya bona ka thušo ya Jehofa. Kgatišo yeo ga bjale o e balago e reretšwe go go thuša go hlahloba pego yeo le go ikwa o thabišwa ke ditiragalo tše di kgahlišago tšeo di begilwego ka go yona. O tla makatšwa ke go bona dilo tše dintši tšeo di swanago magareng ga bahlanka ba Modimo ba lekgolong la pele la nywaga le batho ba gagwe lehono. O tla bona gore dilo tše tšeo di swanago ga di mabapi le modiro wo re o dirago feela eupša gape di mabapi le tsela yeo re rulagantšwego ka yona bakeng sa go o phetha. Ruri go naganišiša ka dilo tše tšeo di swanago go tla matlafatša tumelo ya gago ya gore Jehofa Modimo o tšwela pele go hlahla karolo ya lefaseng ya mokgatlo wa gagwe.

Re holofela le go rapela gore go ahlaahla puku ya Ditiro go tla matlafatša kgodišego ya gago ya gore Jehofa o tla go thuša le gore matla a moya wa gagwe o mokgethwa a tla go thekga. Ka go re’alo, eka o ka kgothatšega gore o tšwele pele o “nea bohlatse bjo bo tletšego” ka Mmušo wa Modimo le go thuša ba bangwe gore ba sepele tseleng yeo e išago phološong.—Dit. 28:23; 1 Tim. 4:16.