1, 2. Saulo o be a ikemišeditše go dira’ng kua Damaseko?

 BASEPEDI bao ba tshwenyegilego ba kgauswi le go fihla Damaseko, moo ba ikemišeditšego go dira selo se itšego se sešoro. Ba tla ntšha ka kgang barutiwa ba Jesu bao ba hloilwego ka dintlong tša bona, ba ba tleme, ba ba goboše ke moka ba ba gogele Jerusalema gore ba otlwe ke kgoro ya Sanhedrine.

² Moetapele wa sehlopha seo yo a bitšwago Saulo, o šetše a na le molato wa madi ka diatleng tša gagwe. a O be a sa tšwa go bogela ka go amogela ge batho bao ba fišegelago thoko bao a bego a dirišana le bona ba be ba bolaya Stefano yoo e lego morutiwa yo a ineetšego wa Jesu ka go mo kgatla ka maswika. (Dit. 7:57–8:1) A se a kgotsofalela go tlaiša balatedi ba Jesu bao ba dulago Jerusalema, Saulo o ile a ba bjalo ka serumola seo se ikemišeditšego go phatlalatša dikgabo tša tlaišo. O nyaka go fediša sehlotswana seo se tenago seo se tsebjago e le “Tsela.”—Dit. 9:1, 2; bona lepokisi leo le rego, “ Matla a Saulo Kua Damaseko” go letlakala 61.

3, 4. (a) Saulo o ile a diragalelwa ke eng (b) Ke dipotšišo dife tšeo re tlago go di ahlaahla?

³ Gateetee Saulo o aparelwa ke seetša seo se phadimago kudu. Batho bao a sepelago le bona ba bona seetša seo eupša ga ba bolele selo ka baka la letšhogo. Saulo o wela fase ge a otlwa ka bofofu. A sa kgone go bona, Saulo o kwa lentšu le etšwa legodimong le re: “Saulo, Saulo, o ntlhomaretše’ng?” A maketše, Saulo a botšiša a re: “Ke wena mang, Morena?” Karabo yeo Saulo a ilego a e hwetša e swanetše go ba e ile ya mo tšhoša le go feta, e bile ya gore: “Ke nna Jesu yo o mo hlomerego.”—Dit. 9:3-5; 22:9.

⁴ Re ka ithuta’ng mantšung a mathomo ao Jesu a a boditšego Saulo? Re ka holwa bjang ke go ahlaahla ditiragalo tšeo di dikologilego go sokologa ga Saulo? Le gona ke dithuto dife tšeo re ka di hwetšago tseleng yeo ka yona phuthego e ilego ya diriša nako ya khutšo yeo e bilego gona ka morago ga go sokologa ga Saulo?

5, 6. Re ka ithuta’ng mantšung ao Jesu a a boditšego Saulo?

⁵ Ge Jesu a be a emiša Saulo tseleng ya go ya Damaseko, ga se A ka a mmotšiša  gore: “Ke ka baka la’ng o hlomere barutiwa ba ka?” Go etša ge go bontšhitšwe ka mo godimo, o ile a re: “O ntlhomaretše’ng?” (Dit. 9:4) Ee, Jesu o kgongwa ka go lebanya ke diteko tšeo balatedi ba gagwe ba lebeletšanago le tšona.—Mat. 25:34-40, 45.

⁶ Ge e ba o gatelelwa ka baka la go dumela go Kriste, kgonthišega gore bobedi Jehofa le Jesu ba tseba ka boemo bja gago. (Mat. 10:22, 28-31) Ga bjale, teko yeo e ka fo se tlošwe. Gopola gore Jesu o ile a lebelela ge Saulo a be a tšea karolo ge Stefano a be a bolawa, le gona o bone Saulo a goga barutiwa ba botegago ka dintlong tša bona kua Jerusalema. (Dit. 8:3) Go sa šetšwe seo, Jesu ga se a ka a tsena ditaba gare ka yona nako yeo. Lega go le bjalo, Jehofa a diriša Kriste o ile a nea Stefano le barutiwa ba bangwe matla ao ba bego ba a nyaka gore ba dule ba botega.

7. Ke’ng seo o swanetšego go se dira e le gore o kgotlelele tlaišo?

⁷ Le wena o ka kgotlelela tlaišo ge e ba o dira se se latelago: (1) Ikemišetše go dula o botega go sa šetšwe seo se diregago. (2) Kgopela thušo ya Jehofa. (Bafil. 4:6, 7) (3) Tlogelela tefetšo ka diatleng tša Jehofa. (Baroma 12:17-21) (4) Bota gore Jehofa o tla go nea matla a go kgotlelela go fihlela a bona e le mo go swanetšego go tloša teko.—Bafil. 4:12, 13.

8, 9. Ananiase o swanetše go ba a ile a ikwa bjang ka kabelo ya gagwe?

⁸ Ka morago ga gore a arabe potšišo ya Saulo ya gore, “Ke wena mang, Morena?” Jesu o ile a re go yena: “Ema o tsene motseng gomme o tla botšwa seo o swanetšego go se dira.” (Dit. 9:6) Saulo yo a foufetšego o ile a išwa moo a bego a dula gona kua Damaseko, moo a ilego a ikona dijo e bile a rapela ka matšatši a mararo. Kgabagareng, Jesu o ile a bolela ka Saulo go morutiwa wa motseng woo, e lego monna yo a bitšwago Ananiase, yoo a bego a “bolelwa gabotse ke Bajuda ka moka” bao ba bego ba dula Damaseko.—Dit. 22:12.

⁹ Akanya ka maikwelo a hlakahlakanego ao Ananiase a swanetšego go ba a bile le ona! Šefa Hlogo ya phuthego, e lego Jesu Kriste yo a tsošitšwego, o be a bolela le yena ka go lebanya, a mo kgetha gore a dire kabelo e kgethegilego. A tokelo e kaakaang, eupša e be e le kabelo e kgolo kudu! Ge a be a botšwa gore o  swanetše go bolela le Saulo, Ananiase o ile a arabela ka gore: “Morena, ke kwele go ba bantši ka monna yo mabapi le dilo tše dintši tše mpe tše a di dirilego bakgethwa ba gago Jerusalema. Bjale o hweditše matla go baperisita ba bagolo gore a golege bohle bao ba bitšago leina la gago.”—Dit. 9:13, 14.

10. Re ithuta’ng ka Jesu tseleng yeo ka yona a ilego a dirišana le Ananiase?

¹⁰ Jesu ga se a ka a kgalemela Ananiase ka go ntšha maikwelo a gagwe a go tshwenyega. Lega go le bjalo, Jesu o ile a mo nea tlhahlo e kwagalago. Le gona Jesu o ile a mo nea seriti ka go mmotša lebaka leo ka lona a bego a nyaka gore a dire modiro wo o sa tlwaelegago. Jesu o ile a bolela ka Saulo gore: “Monna yoo ke sebjana se ke se kgethilego gore se iše leina la ka ditšhabeng gotee le go dikgoši le go bana ba Isiraele. Gobane ke tla mmontšha ka go lebanya dilo  tše dintši tšeo a swanetšego go tlaišega ka tšona ka baka la leina la ka.” (Dit. 9:15, 16) Gateetee Ananiase o ile a theetša Jesu. O ile a hwetša Saulo wa motlaiši gomme a re go yena: “Saulo ngwanešo, Morena Jesu yo a iponagaditšego go wena tseleng yeo o tlilego ka yona, o nthomile gore o boele o bone gomme o tlatšwe moya o mokgethwa.”—Dit. 9:17.

11, 12. Re ithuta’ng ditiragalong tšeo di akaretšago Jesu, Ananiase le Saulo?

¹¹ Re kwešiša dintlha tše mmalwa gabotse go tšwa ditiragalong tšeo di akaretšago Jesu, Ananiase le Saulo. Ka mohlala, re kwešiša gore Jesu ka mafolofolo o etelela pele modiro wa boboledi, go etša ge a holofeditše gore o tla dira bjalo. (Mateo 28:20) Gaešita le ge lehono a sa bolele le batho ka go lebanya, Jesu o etelela pele modiro wa boboledi ka go diriša mohlanka yo a botegago yoo ga bjale a mmeilego go hlokomela ba ntlo ya gagwe. (Mat. 24:45-47) Ka tlase ga tlhahlo ya Sehlopha se Bušago, bagoeledi le babulamadibogo ba romelwa gore ba yo tsoma batho bao ba nyakago go tseba ka mo go oketšegilego ka Kriste. Go etša ge go bontšhitšwe kgaolong e fetilego, ba bantši ba batho ba bjalo ba ile ba rapelela tlhahlo ya Modimo ke moka ba etelwa ke Dihlatse tša Jehofa.—Dit. 9:11.

¹² Ka boikokobetšo Ananiase o ile a amogela kabelo yeo gomme a šegofatšwa. Na o kwa taelo ya gore o nee bohlatse bjo bo tletšego gaešita le ge kabelo yeo e go dira gore o ikwe o na le letšhogonyana? Go ba bangwe, go ya ka ntlo le ntlo le go bolela le batho bao ba sa ba tsebego go a ba tšhoša. Ba bangwe ba thatafalelwa ke go botša batho ditaba tše dibotse mafelong a bona a kgwebo, ditarateng, ka mogala le go ba ngwalela mangwalo. Ananiase o ile a fenya poifo ya gagwe gomme a ba le tokelo ya go thuša Saulo gore a amogele moya o mokgethwa. b Ananiase o ile a atlega ka gobane o ile a bota Jesu le gona o ile a lebelela Saulo e le ngwanabo. Re ka fenya dilo tšeo re di boifago ge e ba ka go swana le Ananiase re bota gore Jesu o etelela pele modiro wa boboledi, re kwela batho bohloko e bile re lebelela gaešita le batho bao ba boifišago kudu e le bana babo rena ba ka moso.—Mat. 9:36.

13, 14. Ge e ba o ithuta Beibele eupša o se wa tšwa o kolobetšwa, o ka ithuta’ng mohlaleng wa Saulo?

¹³ Saulo o ile a gata mogato gateetee mabapi le seo a ithutilego sona. Ka morago ga ge a fodišitšwe, o ile a kolobetšwa ke moka a thoma go gwerana kgauswi le barutiwa ba kua Damaseko. Eupša o ile a dira seo se fetago seo. “Gateetee a bolela ka Jesu ka sinagogeng, gore Yo ke Morwa wa Modimo.”—Dit. 9:20.

 ¹⁴ Ge e ba o ithuta Beibele eupša o se wa tšwa o kolobetšwa, na o tla ba bjalo ka Saulo gomme wa gata mogato mabapi le seo o ithutago sona? Ke therešo gore Saulo o ile a bona mohlolo wo o dirilwego ke Kriste, gomme ka ntle le pelaelo se se thušitše go mo tutueletša gore a gate mogato. Eupša ba bangwe le bona ba ile ba bona mehlolo yeo e ilego ya dirwa ke Jesu. Ka mohlala, sehlopha se sengwe sa Bafarisei se ile sa bogela ge a be a fodiša monna wa seatla se se omeletšego, le gona ba bantši ba Bajuda ba be ba tseba gore Jesu o ile a tsoša Latsaro bahung. Lega go le bjalo, ba bantši ba bona ba ile ba dula ba se na kgahlego e bile ba ganetša Jesu. (Mar. 3:1-6; Joh. 12:9, 10) Ka go se swane le bona, Saulo o ile a fetoga. Ke ka baka la’ng Saulo a ile a arabela mola ba bangwe ba paletšwe ke go dira bjalo? Ke ka gobane o be a boifa Modimo go feta batho le gona o ile a leboga ka mo go tseneletšego kgaugelo yeo Kriste a mmontšhitšego yona. (Bafil. 3:8) Ge e ba le wena o arabela ka tsela e swanago, ga go na selo seo se tla go thibelago go bolela ditaba tše dibotse le go swanelegela go kolobetšwa.

15, 16. Saulo o ile a dira’ng disinagogeng, le gona Bajuda ba kua Damaseko ba ile ba arabela bjang?

¹⁵ Na o ka kgona go bona ka leihlo la kgopolo go makala, go kgopišega le pefelo tšeo di swanetšego go ba di ile tša wela mašaba a batho ge Saulo a be a thoma go bolela ka Jesu disinagogeng? Ba ile ba botšiša gore: “Na yo ga se monna yo a šuhlilego bao ba lego Jerusalema bao ba bitšago leina le?” (Dit. 9:21) Ge a be a hlalosa lebaka leo ka lona a fetošitšego boemo bja gagwe bja kgopolo mabapi le Jesu, Saulo o ile a “hlatsela ka mo go kwagalago gore Jesu ke yena Kriste.” (Dit. 9:22) Eupša ga se batho ka moka bao ba kgodišago ke mabaka a kwagalago. A ka se fetoše tsela ya go nagana ya batho bao ba phegelelago go phela go ya ka setšo goba batho bao dipelo tša bona di tletšego boikgantšho. Lega go le bjalo, Saulo ga se a ka a lahlela toulo.

¹⁶ Mengwaga e meraro ka morago, Bajuda ba kua Damaseko ba be ba sa dutše ba ganetša Saulo. Mafelelong ba ile ba nyaka go mmolaya. (Dit. 9:23; 2 Bakor. 11:32, 33; Bagal. 1:13-18) Ge leano leo le tsebilwe, Saulo o ile a kgetha tsela e bohlale gomme a tloga motseng ka go dumela gore batho ba bangwe ba mo theoše ka lešoba leo le lego morakong wa motse ba mo tsentše ka sešegong. Luka o hlalosa bao ba ilego ba thuša Saulo go tšhaba bošegong bjoo e le “barutiwa ba gagwe [Saulo].” (Dit. 9:25) Go bonagala mantšu a a šupa gore bonyenyane ba bangwe ba bao ba ilego ba kwa Saulo a bolela kua Damaseko ba ile ba arabela boboleding bja gagwe ke moka ya ba balatedi ba Kriste.

17. (a) Batho ba arabela ka ditsela dife therešong ya Beibele? (b) Re swanetše go tšwela pele re dira’ng, gona ka baka la’ng?

¹⁷ Ge o be o thoma go botša ba lapa leno, bagwera le ba bangwe ka dilo tše dibotse tšeo o bego o ithuta tšona, mohlomongwe o be o letetše gore motho yo mongwe le yo mongwe a amogele therešo ya Beibele ka ge e kwagala. Ba bangwe ba ka ba ba ile ba dira bjalo, mola ba bantši ba se ba dira bjalo. Ke therešo gore ditho tša lapa leno di ka ba di ile tša go swara bjalo ka lenaba. (Mat. 10:32-38) Lega go le bjalo, ge e ba o tšwela pele go kaonefatša bokgoni bja gago bja go nea mabaka ka Mangwalo, le gona ge e ba o kgomarela boitshwaro bja  Bokriste, mafelelong gaešita le bao ba go ganetšago ba ka fetoša dipelo tša bona.—Dit. 17:2; 1 Pet. 2:12; 3:1, 2, 7.

18, 19. (a) Mafelelo e bile afe ge Baranaba a boleletše Saulo? (b) Re ka ekiša bjang Baranaba le Saulo?

¹⁸ Ge Saulo a fihla Jerusalema, ka mo go kwagalago barutiwa ga se ba ka ba mo dumela ge a be a re ga bjale ke morutiwa. Lega go le bjalo, ge Baranaba a be a ba kgonthišeditše gore ruri Saulo ke morutiwa, baapostola ba ile ba mo amogela ke moka a dula le bona ka lebakanyana. (Dit. 9:26-28) Saulo o be a le šedi, eupša o be a sa hlabišwe dihlong ke ditaba tše dibotse. (Baroma 1:16) Ka sebete o ile a bolela ditaba tše dibotse kua Jerusalema, lona lefelong leo a kilego a hlohleletša tlaišo e šoro go barutiwa ba Jesu Kriste. Seo se ilego sa makatša Bajuda ba kua Jerusalema ke ge ba lemoga gore moetapele wa bona bjale o fetogile gomme bjale ba be ba nyaka go mmolaya. Pego e re: “Ge bana babo rena ba lemoga se, ba theošetša [Saulo] Kesarea gomme ba mo romela Tareso.” (Dit. 9:30) Saulo o ile a latela tlhahlo ya Jesu yeo e tlilego ka phuthego. Bobedi Saulo le phuthego ba ile ba holega.

¹⁹ Ela hloko gore Baranaba o ile a gata mogato wa pele wa go thuša Saulo. Ka ntle le pelaelo tiro ye e botho e ile ya thuša go tšweletša segwera se borutho seo se bilego gona magareng ga bahlanka ba bao ba fišegago ba Jehofa. Na ka go swana le Baranaba o ithaopela go thuša bao ba sa tšwago go thoma go kopanela ka phuthegong, o šoma le bona tirelong ya tšhemo le go ba thuša go tšwela pele moyeng? O tla putswa kudu ge e ba o dira bjalo. Ge e ba o sa tšwa go ba mogoeledi wa ditaba tše dibotse, na ka go swana le Saulo o amogela thušo yeo o e newago? Ka go šoma le bagoeledi bao ba nago le phihlelo, o tla kaonefatša bokgoni bja gago bodireding, lethabo la gago le tla oketšega le gona o tla ba le bagwera ba bophelo ka moka.

20, 21. Ke bjang bahlanka ba Modimo ba nakong e fetilego le ba mehleng yeno ba ilego ba diriša ka botlalo ‘mabaka a khutšo’?

²⁰ Ka morago ga go sokologa ga Saulo le go sepela a bolokegile, “phuthego go la Judea ka moka, Galilea le Samaria ya tsena lebakeng la khutšo.” (Dit. 9:31) Barutiwa ba ile ba diriša bjang dinako tše tše di loketšego? (2 Tim. 4:2) Pego e re ba be ba “agwa.” Baapostola le bana babo rena ba bangwe bao ba nago le boikarabelo ba ile ba tiiša tumelo ya barutiwa gomme ba etelela pele ge phuthego “e sepela ka go boifa Jehofa le ka go homotšwa ke moya o mokgethwa.” Ka mohlala, Petro o ile a diriša nako yeo go matlafatša barutiwa motseng wa Lida kua Molaleng wa Sarona. Maiteko a gagwe a ile a dira gore ba bantši ba bao ba bego ba dula tikologong yeo ba retologele “go Morena.” (Dit. 9:32-35) Barutiwa ga se ba ka ba arošwa ke mediro e mengwe eupša ba ile ba ineela go hlokomelaneng le go boleleng ditaba tše dibotse. Mafelelo e bile gore phuthego e ile “ya tšwela pele e ata.”

²¹ Go ya mafelelong a lekgolo la bo-20 la mengwaga, Dihlatse tša Jehofa dinageng tše dintši le tšona ka mo go swanago di ile tša tsena “lebakeng la khutšo.”  Mebušo yeo e ilego ya gatelela batho ba Modimo ka nywagasome gateetee e ile ya wa, gomme dithibelo tše dingwe modirong wa boboledi di ile tša nolofatšwa goba tša tlošwa. Dihlatse tše dikete tše masome di ile tša diriša sebaka seo go bolela ditaba tše dibotse phatlalatša gomme tša ba le mafelelo a mabotse kudu.

22. O ka diriša bjang ka botlalo tokologo yeo o nago le yona?

²² Na o diriša ka bohlale tokologo yeo o nago le yona? Ge e ba o dula nageng yeo e nago le tokologo ya bodumedi, Sathane o tla rata go go leka gore o phegelele mahumo a dilo tše di bonagalago, e sego dikgahlego tša Mmušo. (Mat. 13:22) O se ke wa arošwa. Diriša ka mo holago dinako le ge e le dife tša go ba le khutšo tšeo ga bjale o ka bago o di thabela. Di lebelele e le dibaka tša go nea bohlatse bjo bo tletšego le go aga phuthego. Gopola gore maemo a gago a ka fetoga gateetee.

23, 24. (a) Re ithuta dintlha dife pegong yeo e lego mabapi le Thabitha? (b) Re swanetše go ikemišetša go dira’ng?

²³ Ela hloko seo se ilego sa diragalela morutiwa yo a bitšwago Thabitha goba Dorokase. O be a dula Jopa, e lego motse wo o bego o se kgole le Lida. Kgaetšedi yo yo a botegago o ile a diriša nako ya gagwe le dithoto tša gagwe ka bohlale, o be a tletše “ditiro tše dibotse le dimpho tša kgaugelo.” Lega go le bjalo, gateetee o ile a babja ke moka a hwa. c Lehu la gagwe le ile la kweša barutiwa ba bantši kua Jopa bohloko, kudukudu bahlologadi bao a bego a ba bontšhitše ditiro tše botho. Ge Petro a fihla ntlong yeo go yona setopo sa gagwe se bego se lokišeletšwa go bolokwa, o ile a dira mohlolo wo o sa kago wa dirwa gare ga baapostola ba Jesu Kriste. Petro o ile a rapela ke moka a tsoša Thabitha bahung! Na o ka akanya ka lethabo la bahlologadi bao le barutiwa ba bangwe ge Petro a be a ba biletša gape ka phaphošing yeo ke moka a ba nea Thabitha a phela? Ditiragalo tše di swanetše go ba di ile tša ba matlafatša gakaakaang bakeng sa diteko tše di bego di tlo tla! Ka mo go kwagalago, mohlolo woo o ile wa “tsebja Jopa ka moka gomme ba bantši ba dumela go Morena.”—Dit. 9:36-42.

²⁴ Re ithuta dintlha tše pedi tša bohlokwa pegong ye yeo e kgomago maikwelo ya mabapi le Thabitha. (1) Bophelo ke bjo bokopana. Ka gona, ke gabohlokwa gakaakaang gore re itirele leina le lebotse le Modimo ge re sa dutše re ka kgona go dira bjalo! (Mmo. 7:1) (2) Kholofelo ya tsogo ke ya kgonthe. Jehofa o ile a bona ditiro tše mmalwa tše botho tšeo Thabitha a ilego a di dira ke moka a mo putsa. O tla gopola go šoma ga rena ka thata gomme o tla re  tsoša ge e ba re ka hwa pele ga Haramagedone. (Baheb. 6:10) Ka gona go sa šetšwe gore ga bjale re kgotleletše “dinako tša mathata” goba re thabela ‘lebaka la khutšo,’ anke re kgotleleleng go neeng bohlatse bjo bo tletšego ka Kriste.—2 Tim. 4:2.