1-3. (a) Beibele e bontšha therešo efe yeo e sa phemegego? (b) Re ka kgetha bjang bagwera bao ba tlago go re tutueletša go dira se sebotse?

KA TSELA e itšego, batho ba swana le sepontšhe; ba tlwaetše go monya selo le ge e le sefe seo se ba dikologilego. Go bonolo kudu gore re amogele mekgwa, ditekanyetšo gotee le dika tša bao re gweranago le bona gaešita le ge re sa lemoge.

² Beibele e bolela therešo e sa phemegego ge e re: “Yo a sepelago le ba bohlale o tla hlalefa, eupša yo a gweranago le ditlaela o tla tshereana.” (Diema 13:20) Seema se ga se bolele ka go fo ikopanya le motho. Polelwana e rego “sepelago le” e šišinya gore go na le segwera se se tšwelago pele. * Puku e nngwe ya ditšhupetšo ya Beibele ge e bolela ka temana ye e re: “Go sepela le motho go bolela gore o a mo rata e bile o batamelane le yena.” Na ga o dumele gore re fela re ekiša bao re ba ratago? Ke therešo gore ka ge re kgongwa maikwelong ke bao re ba ratago, ba ka ba le tutuetšo e matla go rena​—e ka ba e kgahlišago goba e sa kgahlišego.

³ E le gore re dule leratong la Modimo, go bohlokwa gore re nyake bagwera bao ba tlago go re tutueletša go dira se lokilego. Re ka dira se bjang? Ge re bolela se ka tsela e bonolo, re ka dira se ka go rata bao ba ratwago ke Modimo, re dire bagwera ba gagwe gore e be bagwera ba rena. Akanya ka se. Re  be re ka kgetha bagwera bafe ba bakaone ntle le bao ba nago le dika tšeo Jehofa a di nyakago go bagwera ba gagwe? Ka gona, anke re hlahlobeng mohuta wa batho bao ba ratwago ke Modimo. Ge re kwešiša gabotse kamoo Jehofa a bonago dilo ka gona tabeng ye, re tla kgona go kgetha bagwera bao ba nago le tutuetšo e botse go rena.

4. Ke ka baka la’ng Jehofa a na le tshwanelo ya go kgetha bagwera ba gagwe, le gona ke ka baka la’ng Jehofa a ile a bitša Aborahama gore ke “mogwera wa ka”?

⁴ Ge go tliwa tabeng ya go ba le bagwera, Jehofa ke yoo a kgethago kudu. Na ga a na tshwanelo ya go dira seo? Go ba gona, ke Mmuši Morena wa legohle, gomme go gwerana le yena ke tokelo e di phalago tšohle. Ka gona, ke bomang bao a ba kgethago gore e be bagwera ba gagwe? Jehofa o batamela bao ba mmotago le bao ba mo dumelago ka mo go feletšego. Ka mohlala, ela hloko mopatriareka Aborahama, e lego monna yo a tsebjago ka go ba le tumelo e tiilego. Go thata go akanya ka teko e kgolo ya tumelo go tatago motho go feta ya gore a kgopelwe gore a neele morwa wa gagwe e le sehlabelo. * Lega go le bjalo, go Aborahama “go bile bjalo ka ge eka o gafile Isaka” a na le tumelo e tletšego ya “gore Modimo o be a tla kgona go mo tsoša gaešita le bahung.” (Baheberu 11:17-19) Ka ge Aborahama a ile a bontšha tumelo e bjalo le go kwa, Jehofa ka lerato o ile a mmitša gore ke “mogwera wa ka.”​—Jesaya 41:8; Jakobo 2:21-23.

5. Jehofa o lebelela bjang bao ba mo kwago ka potego?

⁵ Jehofa o tšeela godimo go kwa ka potego. O rata bao ba ikemišeditšego go mmotegela go feta selo le ge e le sefe. (Bala 2 Samuele 22:26) Ka ge re bone go Kgaolo 1 ya puku ye, Jehofa  o kgahlwa ke bao ba kgethago go mo kwa ka go rata. Diema 3:32 e re: “O gwerana kgauswi le baloki.” Bao ba fihlelelago dinyakwa tša Modimo ka potego ba hwetša taletšo e botho e tšwago go Jehofa ya gore: E ka ba baeng “tenteng” ya gagwe​—ba amogelwa gore ba mo rapele e bile ba tliše dithapelo go yena ka bolokologi.​—Psalme 15:1-5.

6. Re ka bontšha bjang gore re rata Jesu, le gona Jehofa o ikwa bjang ka bao ba ratago Morwa wa gagwe?

⁶ Jehofa o rata bao ba ratago Jesu, e lego Morwa wa gagwe yo a tswetšwego a nnoši. Jesu o itše: “Ge e ba motho le ge e le ofe a nthata, o tla boloka lentšu la ka gomme Tate o tla mo rata, le gona re tla tla go yena ra dula le yena.” (Johane 14:23) Re ka bontšha bjang gore re rata Jesu? Ka ntle le pelaelo, ke ka go boloka ditaelo tša gagwe, go akaretša le thomo ya go bolela ditaba tše dibotse le go dira barutiwa. (Mateo 28:19, 20; Johane 14:15, 21) Le gona, re bontšha gore re rata Jesu ge re ‘latela dikgato tša gagwe kgauswi’ ka go mo ekiša ka go bolela le ka ditiro kamoo go ka kgonegago re le batho bao ba sa phethagalago. (1 Petro 2:21) Pelo ya Jehofa e kgongwa ke maiteko ao a dirwago ke bao ba ratago Morwa wa gagwe e bile ba tutueletšega gore ba latele dikgato tša Kriste.

7. Ke ka baka la’ng go le bohlale go ba le bagwera bao e lego bagwera ba Jehofa?

⁷ Tumelo, potego, go kwa gotee le go rata Jesu le ditsela tša gagwe​—dilo tšeo di gare ga dika tšeo Jehofa a di letetšego go bagwera ba Gagwe. Yo mongwe le yo mongwe wa rena o swanetše go ipotšiša gore: ‘Na dika le ditsela tše bjalo di gona go bagwera ba ka ba kgauswi? Na ke dirile gore bagwera ba Jehofa e be bagwera ba ka?’ Ke gabohlale go dira bjalo. Batho bao ba hlagolelago dika tša Modimo e bile ba bolela ditaba tše dibotse tša Mmušo ka mafolofolo ba ka ba le mafelelo a mabotse go rena, ba re tutueletša go phelela boikemišetšo bja rena bja go kgahla Modimo.​—Bona lepokisi le rego:  “Mogwera yo a Lokilego ke Ofe?”.

8. Ke’ng seo se go kgahlago ka segwera sa (a) Naomi le Ruthe? (b) bafsa ba bararo ba Baheberu? (c) Paulo le Timotheo?

⁸ Mangwalo a hupere mehlala e mentši ya bao ba ilego ba holega ka go kgetha bagwera ba babotse. O ka bala ka segwera sa Naomi le ngwetši ya gagwe Ruthe, le sa Baheberu ba bararo bao ba ilego ba bopa tlemo e tiilego ya segwera kua Babilona gotee le sa Paulo le Timotheo. (Ruthe 1:16; Daniele 3:17, 18; 1 Bakorinthe 4:17; Bafilipi 2:20-22) Lega go le bjalo, anke re ele hloko mohlala o mongwe o kgahlišago: segwera magareng ga Dafida le Jonathane.

9, 10. Motheo wa segwera sa Dafida le Jonathane e be e le ofe?

⁹ Beibele e bolela gore ka morago ga gore Dafida a bolaye Goliata, “moya wa Jonathane wa thoma go kwana le moya wa Dafida gomme Jonathane a rata Dafida go etša ge a ithata.” (1 Samuele 18:1) Ka gona, se e bile mathomo a segwera se matla seo go sa šetšwe go fetana ga bona kgole ka nywaga, se ilego sa tšwela pele go fihlela ge Jonathane a bolawa ntweng. * (2 Samuele 1:26) Motheo wa tlemo yeo e tiilego e be e le ofe magareng ga bagwera ba ba babedi?

¹⁰ Dafida le Jonathane ba be ba tlemagantšwe ke lerato la bona la go rata Modimo le kganyogo ya bona e tiilego ya go dula ba mmotegela. Banna ba ba babedi ba be ba kopantšwe ke kganyogo ya bona ya go kgahliša Modimo. Yo mongwe le yo mongwe wa bona o ile a bontšha dika tšeo di bego di ratwa ke yo mongwe. Ga go pelaelo gore Jonathane o ile a kgahlwa ke sebete le phišego ya lesogana leo ka ntle le poifo le ilego la emela leina la Jehofa. Dafida ka ntle le pelaelo o ile a hlompha monna yo yoo a bego a godile e lego Jonathane, yoo a ilego a thekga ditokišetšo tša Jehofa ka potego le yoo ka noši a etišitšego pele dikgahlego tša Dafida go e na le tša  gagwe. Ka mohlala, ela hloko seo se ilego sa direga ge Dafida a be a gateletšegile, nakong yeo a phetšego e le motšhabi lešokeng e le ge a tšhaba kgalefo ya Kgoši e kgopo Saulo, e lego tatago Jonathane. Pontšhong yeo e kgahlišago ya potego, Jonathane o ile a gata mogato wa pele gomme “a ya go Dafida . . . e le gore a yo matlafatša kholofelo ya Dafida go Modimo.” (1 Samuele 23:16) Akanya kamoo Dafida a ka  bago a ile a ikwa ka gona ge mogwera wa gagwe yo a mo ratago a etla e bile a mo kgothatša! *

11. O ithuta’ng ka segwera mohlaleng wa Jonathane le Dafida?

¹¹ Ke’ng seo re ithutago sona mohlaleng wa Jonathane le Dafida? Go feta tšohle, re bona gore selo se bohlokwa kudu go bagwera ke go ba le dipakane tše swanago tša moya. Ge re batamelana le bao ba nago le ditumelo tše swanago le tša rena, ditekanyetšo tše swanago le tša rena le kganyogo ya rena ya go dula re botegela Modimo, gona re ka kgothatšana  ka dikgopolo, ra kgothatšana maikwelong gotee le ka diphihlelo tšeo di agago le tšeo di re matlafatšago. (Bala Baroma 1:11, 12) Re hwetša bagwera ba bjalo ba tiilego moyeng magareng ga barapedigotee le rena. Lega go le bjalo, na se se bolela gore motho yo mongwe le yo mongwe yo a tlago dibokeng Holong ya Mmušo ke mogwera yo a lokilego? Ga go bjalo le gatee.

12, 13. (a) Ke ka baka la’ng re swanetše go kgetha bagwera ka bohlale gaešita le magareng ga Bakristegotee le rena? (b) Ke tlhohlo efe yeo diphuthego tša lekgolong la pele la nywaga di ilego tša lebeletšana le yona, e lego yeo e ilego ya tutuetša Paulo gore a nee ditemošo dife tše matla?

¹² Gaešita le ka phuthegong, re swanetše go kgetha bagwera ba rena ka bohlale gore ba re thuše go gola moyeng. Na se se swanetše go re makatša? Ga go bjalo. Bakriste ba bangwe ka phuthegong ba ka tšea nako e telele gore ba gole moyeng, go etša ge dienywa tše dingwe di ka tšea nako e telele gore di butšwe. Ka baka leo, phuthegong e nngwe le e nngwe, re hwetša Bakriste bao ba sa lekanego ka boemo bja bona bja go gola moyeng. (Baheberu 5:12–6:3) Go ba gona, re bontšha go se fele pelo le lerato go ba sa tšwago go thoma go kopanela goba ba fokolago, ka ge re nyaka go ba thuša go gola moyeng.​—Baroma 14:1; 15:1.

¹³ Nako le nako, go ka ba le boemo ka phuthegong bjo bo nyakago gore re hlokomele batho bao re gweranago le bona. Batho ba bangwe ba ka itshwara ka tsela e belaetšago. Ba bangwe ba ka ba le moya wa go sola goba wa go belaela. Diphuthego tša lekgolong la pele la nywaga C.E., di ile tša lebeletšana le tlhohlo e swanago. Gaešita le ge bontši bja ditho tša tšona di be di botega, tše dingwe tša tšona di be di sa itshware ka tsela e swanetšego. Ka ge ba bangwe phuthegong ya Korinthe ba se ba ka ba kgomarela dithuto tše itšego tša Bokriste, moapostola Paulo o ile a lemoša phuthego  ka gore: “Le se ke la timetšwa. Ditlwaelano tše mpe di senya mekgwa e holago.” (1 Bakorinthe 15:12, 33) Paulo o lemošitše Timotheo gore gaešita le magareng ga Bakristegotee le yena, go ka ba le ba bangwe bao ba sa itshwarego ka go hlomphega. Timotheo o ile a botšwa gore a se tlwaelane le batho ba bjalo, e se be bagwera ba gagwe ba kgauswi.​—Bala 2 Timotheo 2:20-22.

14. Re ka diriša bjang molao wa motheo wo o hwetšwago ditemošong tša Paulo tša mabapi le go dira segwera?

¹⁴ Re ka diriša bjang molao wa motheo wo o hwetšwago ditemošong tša Paulo? Ka go phema go gwerana kgauswi le motho le ge e le ofe​—ka gare goba ka ntle ga phuthego—​yo a ka bago le tutuetšo e senyago. (2 Bathesalonika 3:6, 7, 14) Re swanetše go šireletša tswalano ya rena le Jehofa. Gopola gore go swana le sepontšhe, re monya mekgwa le ditsela tša bagwera ba rena ba kgauswi. Go etša ge re ka se ine sepontšhe ka binikeng gomme ra letela gore se tlale ka meetse, ka gona re ka se gwerane le bao ba nago le tutuetšo e mpe gomme ra letela go monya se se holago.​—1 Bakorinthe 5:6.

15. O ka dira’ng gore o hwetše bagwera bao ba tiilego moyeng ka phuthegong?

¹⁵ Ke mo go thabišago gore kgonagalo ya go hwetša bagwera ba ba lokilego magareng ga barapedigotee le rena ke e kgolo e le ruri. (Psalme 133:1) O ka hwetša bjang bagwera bao ba godilego moyeng ka phuthegong? Ge o dutše o hlagolela dika tša Modimo le ditsela tša gagwe, ga go pelaelo gore ba bangwe bao ba nago le tšona ba tla batamela go wena. Ka nako e swanago, go tla nyakega gore o gate megato e mengwe e holago e le gore o be le bagwera ba bafsa. (Bona lepokisi le rego: “ Kamoo re Ilego ra Dira Bagwera ba ba Lokilego.”) Kgetha feela bao ba bontšhago dika tšeo o nyakago go di bontšha. Ekwa keletšo ya Beibele ya gore “le katološeng lerato,” o gwerane le badumedigotee le wena go sa šetšwe morafo, setšhaba goba setšo sa bona. (2 Bakorinthe 6:13; Bala 1 Petro 2:17) O se ke wa gwerana feela le bao ba lekanago le wena ka nywaga. Gopola gore Jonathane  o be a feta Dafida kudu. Batho ba bantši bao ba godilego ba ka humiša segwera sa gago le bona ka phihlelo e ntši le bohlale.

16, 17. Ge e ba morapedigotee le rena a re kgopiša ka tsela e itšego, ke ka baka la’ng re sa swanela go ngala phuthego?

¹⁶ Ka ge go na le batho ba dimelo le ditlogo tše fapafapanego ka phuthegong, mathata a ka rotoga nako le nako. Modumedigotee le rena a ka bolela goba a dira selo se itšego seo se ka kwešago maikwelo a rena bohloko. (Diema 12:18) Ka dinako tše dingwe mathata a ka tsošwa ke diphapano, go se kwešišane goba go se bone dilo ka leihlo le tee. Na re ka kgopišwa ke mathata a bjalo gomme ra ngala phuthego? Re ka se dire bjalo ge e ba re rata Jehofa e le ka kgonthe e bile re rata bao a ba ratago.

 ¹⁷ Ka ge e le Mmopi le Moneibophelo wa rena, Jehofa o swanelwa ke lerato la rena le boineelo bjo bo feletšego bja rena. (Kutollo 4:11) Go oketša moo, re swanetše go thekga ka potego phuthego yeo a ratago go e diriša. (Baheberu 13:17) Ka gona, ge e ba morapedigotee le rena a re kgopiša goba a re nyamiša ka tsela e itšego, re ka se ngale phuthego e le go bontšha gore ga se ra thaba. Go dira seo go tla re hola ka eng? Ga se ra kgopišwa ke Jehofa. Lerato la rena go Jehofa le ka mohla le ka se re dumelele gore re mo furalele!​—Bala Psalme 119:165.

18. (a) Re ka dira’ng gore re godiše khutšo ka phuthegong? (b) Go kgetha go lebalela ge go na le lebaka le kwagalago la gore re dire bjalo go tliša ditšhegofatšo dife?

¹⁸ Go rata barapedigotee le rena go re tutueletša go godiša khutšo ka phuthegong. Jehofa ga se a letela go phethagala go bao a ba ratago, le rena ga se ra swanela go dira bjalo. Lerato le dira gore re hlokomologe diphošo tše dinyenyane, re gopola gore ka moka ga se ra phethagala e bile re dira diphošo. (Diema 17:9; 1 Petro 4:8) Lerato le re thuša gore re tšwele pele re “lebalelana ka bolokologi.” (Bakolose 3:13) Ga se ka mehla go lego bonolo go diriša keletšo ye. Ge e ba re dumelela maikwelo a fošagetšego go re fenya, re ka dula re kgopišega, mohlomongwe re nagana gore go befelwa ga rena go tlaiša ka tsela e itšego motho yo a re kgopišitšego. Lega go le bjalo, go dula re kgopišegile go a re gobatša. Go kgetha go lebalela ge go na le lebaka le le kwagalago la gore re dire bjalo go tliša ditšhegofatšo tše humilego. (Luka 17:3, 4) Go re nea khutšo ya monagano le ya pelo, go boloka khutšo ka phuthegong e bile go feta moo, go boloka tswalano ya rena le Jehofa.​—Mateo 6:14, 15; Baroma 14:19.

19. Ke maemo afe ao a ka rotogago ao a nyakago gore re kgaotše go gwerana le motho yo mongwe?

¹⁹ Ka dinako tše dingwe, re kgopelwa gore re kgaotše go gwerana le motho yo e bego e le setho sa phuthego. Boemo bjo bo rotošwa ke ge motho yoo ka go se itshole a tshelago  molao wa Modimo gomme a kgaolwa goba ge yo mongwe a lahla tumelo ka go ruta thuto ya maaka goba ka go ikarola phuthegong. Lentšu la Modimo le re botša ka go lebanya gore re “lese go gwerana” le batho ba bjalo. * (Bala 1 Bakorinthe 5:11-13; 2 Johane 9-11) Go ka re thatafalela kudu go phema motho yoo mohlomongwe e kilego ya ba mogwera goba yoo e lego wa leloko. Na re tla gata mogato o tiilego, ka go re’alo re bontšha gore re botegela Jehofa le melao ya gagwe e lokilego go feta selo le ge e le sefe? Gopola gore Jehofa o tšeela godimo potego le go kwa ga rena.

20, 21. (a) Ke ka baka la’ng go kgaola e le tokišetšo e lerato? (b) Ke ka baka la’ng go le bohlokwa gore re kgethe bagwera ba rena ka bohlale?

²⁰ Ruri go kgaolwa ke tokišetšo e lerato e tšwago go Jehofa. Go bjalo bjang? Go raka modiradibe yo a sa itsholego go bontšha gore re rata leina la Jehofa le lekgethwa le sohle seo leina leo le se emelago. (1 Petro 1:15, 16) Go kgaolwa ga motho go boloka phuthego e šireletšegile. Ditho tša yona tše di botegago di šireletšwa tutuetšong e sa lokago ya badiradibe ba ka boomo le go tšwela pele ka borapedi di tseba gore phuthego e šireletšegile lefaseng le le kgopo. (1 Bakorinthe 5:7; Baheberu 12:15, 16) Tayo e matla e bontšha lerato go modiri wa bobe. E ka ba e le sona seo se nyakegago go mo lemoša gore o swanetše go fetoša boemo bja gagwe bja kgopolo le go gata megato e nyakegago gore a boele go Jehofa.​—Baheberu 12:11.

²¹ Re ka se tšhabele therešo ya gore bagwera ba rena ba ka ba le tutuetšo e matla e bile ba ka re fetola. Ka gona, go bohlokwa gore re kgethe bagwera ba rena ka bohlale. Ka go dira gore bagwera ba Jehofa e be bagwera ba rena le ka go rata bao ba ratwago ke Modimo, re tla ba le bagwera ba kaonekaone. Seo re se monyago go bona se tla re thuša gore re phethe boikemišetšo bja rena bja go kgahla Jehofa.