1-3. (a) Ke ka baka la’ng mma a kgonthišetša gore ngwana wa gagwe o bogega gabotse le go hlweka? (b) Ke ka baka la’ng Jehofa a nyaka gore barapedi ba gagwe e be ba hlwekilego, le gona ke’ng seo se re tutueletšago gore re nyake go dula re hlwekile?

MMA o lokišetša mošemanyana wa gagwe go tšea leeto. O kgonthiša gore mošemanyana o hlapile le go bona gore diaparo tša gagwe di a bogega e bile di hlwekile. Mma o tseba gore bohlweki ke bja bohlokwa bophelong bja mošemanyana yoo. E bile o tseba gore tsela yeo morwa wa gagwe a bogegago ka yona e ka dira gore batswadi ba gagwe ba retwe goba ba nyatšwe.

² Tatago r​ena wa legodimong Jehofa, o nyaka gore bahlanka ba gagwe e be ba hlwekilego. Lentšu la gagwe le re: “Go yo a dulago a hlwekile o tla dula o hlwekile.” * (Psalme 18:26) Jehofa o  a re rata; o tseba gore go dula ga rena re hlwekile go tla re hola kudu. E bile o letetše gore ka ge re le Dihlatse tša gagwe re mo emele gabotse. Ka kgonthe, ponagalo ya rena ya bohlweki le boitshwaro bja rena bjo bobotse di tla tlišetša Jehofa le leina la gagwe le lekgethwa letago, e sego thogako.​—Hesekiele 36:22; bala 1 Petro 2:12.

³ Go tseba gore Modimo o rata batho bao ba hlwekilego go re tutueletša gore re dule re hlwekile. Re nyaka gore tsela ya rena ya bophelo e mo godiše ka gobane re mo rata. Re bile re nyaka go dula leratong la gagwe. Ka gona, anke re hlahlobeng lebaka leo go nyakegago gore re dule re hlwekile, seo se akaretšwago ke go ba yo a hlwekilego le kamoo re ka dulago re hlwekile. Go itlhahloba mo go bjalo go ka re thuša gore re bone ge e ba go na le moo re swanetšego go kaonefatša gona.

4, 5. (a) Lebaka la bohlokwa la gore re be bao ba hlwekilego ke lefe? (b) Bohlweki bja Jehofa bo bonagala bjang tlholong ya gagwe e bonagalago?

⁴ Tsela e nngwe yeo Jehofa a re etelelago pele ka yona ke ka mohlala wo a re beelago wona. Ke ka lebaka leo Lentšu la gagwe le re kgothaletšago gore re be “baekiši ba Modimo.” (Baefeso 5:1) Lebaka la bohlokwa la gore re dule re hlwekile ke le: Jehofa, yena Modimo yo re mo rapelago, o hlwekile, o sekile e bile ke yo mokgethwa dibopegong ka moka.​—Bala Lefitiko 11:44, 45.

⁵ Go hlweka ga Jehofa, go swana le dika le ditsela tša gagwe tše dintši kudu, go bonagala tlholong ya gagwe yeo re e bonago. (Baroma 1:20) Lefase le be le hlametšwe go ba legae la batho leo le hlwekilego. Jehofa o dirile gore go be le medikologo ya tswalano ya diphedi yeo e hlwekišago moya woo re o hemago le meetse. Diphedi tše dingwe tše dinyenyane kudu di fetoša ditšhila gore e be dilo tšeo di sego kotsi. Borathutamahlale ba ile ba diriša tše dingwe tša diphedi tše tše dinyenyane tšeo di swerwego ke tlala gore di hlwekiše moo oli e tšhologetšego gona le go hlwekiša tšhilafalo yeo e bakilwego ke go ba ga batho le boithati le megabaru. Ga go pelaelo gore bohlweki  ke selo sa bohlokwa go “Modiri wa lefase.” (Jeremia 10:12) Le rena re swanetše go bo lebelela e le bja bohlokwa.

6, 7. Molao wa Moshe o ile wa gatelela bjang gore bohlweki bo be bo nyakega go bao ba bego ba rapela Jehofa?

⁶ Lebaka le lengwe la gore re be ba hlwekilego ke gore Jehofa, e lego Mmuši wa rena wa Legohle, o nyaka gore barapedi ba gagwe e be ba hlwekilego. Ka tlase ga Molao wo Jehofa a ilego a o nea Baisiraele, bohlweki le borapedi di be di sepedišana kudu. Molao o be o re ka Letšatši la Poelano, moperisita yo a phagamego o be a swanetše go hlapa mmele gabedi. (Lefitiko 16:4, 23, 24) Baperisita ba be ba swanetše go hlapa diatla le dinao pele ba nea Jehofa dihlabelo. (Ekisodo 30:17-21; 2 Koronika 4:6) Molao o ile wa bolela ka mehuta e ka bago e 70 ya go se hlweke mmeleng le go šilafaleng ditabeng tša borapedi. Ge feela a le boemong bja go se hlweke, Moisiraele o be a ka se be le karolo borapeding​—ge a be a ka ba le karolo a le boemong bja go se hlweke o be a ka bolawa. (Lefitiko 15:31) Motho le ge e le ofe yo a ka ganago mokgwa wo o bego o dirišwa wa go itshekiša, go akaretša go hlapa mmele le go hlatswa diaparo tša gagwe, o be a swanetše gore a “bolawe setšhabeng.”​—Numeri 19:17-20.

⁷ Gaešita le ge re se ka tlase ga Molao wa Moshe, se se re nea temogo ge e le kamoo Modimo a naganago ka gona ka ditaba. Go molaleng gore Molao o ile wa gatelela gore bohlweki bo be bo nyakega go bao ba bego ba rapela Modimo. Jehofa ga se a fetoga. (Maleaki 3:6) A ka se amogele borapedi bja rena ntle le ge e le “bjo bo hlwekilego le bjo bo sa šilafalago.” (Jakobo 1:27) Ka gona go nyakega gore re tsebe seo a se letetšego go rena tabeng ye.

8. Ke dibopego dife tšeo Jehofa a letetšego gore re dule re hlwekile go tšona?

⁸ Ka Beibeleng, kgopolo ya go ba yo a hlwekilego ga e šupe feela tabeng ya go ba yo a hlwekilego mmeleng. Go ba yo a hlwekilego pele ga mahlo a Modimo go akaretša dibopego ka moka tša bophelo bja rena. Jehofa o letetše gore re dule re  hlwekile dibopegong tše nne tša motheo​—e lego moyeng, boitshwarong, monaganong le mmeleng. Anke re hlahlobeng seo se akaretšwago ke se sengwe le se sengwe sa dibopego tše.

9, 10. Go ba yo a hlwekilego moyeng go bolela’ng, le gona ke’ng seo Bakriste ba therešo ba se phemago?

⁹ Go hlweka moyeng. Ge re bolela se gabonolo, go dula o hlwekile moyeng go bolela go se tswakanye borapedi bja therešo le bja maaka. Ge Baisiraele ba be ba tloga Babilona ba boela Jerusalema, ba be ba swanetše go kwa kgothatšo ye e buduletšwego: “Tšwang moo, le se kgwathe selo sa go se hlweke . . . ipolokeng le hlwekile.” (Jesaya 52:11) Morero o mogolo wa Baisiraele wa go boela gae e be e le gore ba yo tsošološa borapedi bja Jehofa. Borapedi bjoo bo be bo swanetše go ba bjo bo hlwekilego​—e sego bjo bo šilafaditšwego ke dithuto le ge e le dife tšeo di hlomphollago Modimo, mekgwa le metlwae ya bodumedi bja Babilona.

¹⁰ Lehono, le rena ka ge re le Bakriste ba therešo re swanetše go ba šedi gore re se ke ra šilafatšwa ke borapedi bja maaka. (Bala 1 Bakorinthe 10:21) Go nyakega gore re be ba šedi kudu tabeng ye, ka gobane tutuetšo ya bodumedi bja maaka e atile. Dinageng tše dintši, metlwae, mekgwa, mediro le ditirelo tše dintši, di sepedišana le dithuto tša borapedi bja maaka, go etša kgopolo ya gore go na le selo se sengwe ka gare ga motho seo se phologago lehu. (Mmoledi 9:5, 6, 10) Bakriste ba therešo ba phema metlwae yeo e akaretšago ditumelo tša bodumedi bja maaka. * Re ka se dumelele gore kgateletšo e tšwago bathong ba bangwe e dire gore re kwanantšhe ditekanyetšo tša Beibele tša borapedi bjo bo hlwekilego.—Ditiro 5:29.

11. Go se hlweke boitshwarong go akaretša’ng, le gona ke ka baka la’ng e le gabohlokwa gore re dule re hlwekile tabeng ye?

¹¹ Go hlweka boitshwarong. Go dula re hlwekile boitshwarong go akaretša go phema mohuta le ge e le ofe wa boitshwaro bjo bo gobogilego. (Bala Baefeso 5:5) Go bohlokwa gore re dule re hlwekile boitshwarong. Bjalo ka ge re tla bona kgaolong e latelago ya puku ye, re swanetše gore re ‘tšhabe bootswa,’ e le gore  re dule leratong la Modimo. Diotswa tšeo di sa itsholego di ka “se je bohwa bja mmušo wa Modimo.” (1 Bakorinthe 6:9, 10, 18) Mahlong a Modimo, batho ba bjalo ba gare ga bao “ba ferošago dibete.” Ge e ba ba palelwa ke go dula ba hlwekile boitshwarong, “kabelo ya bona e tla ba . . . lehu la bobedi.”​—Kutollo 21:8.

12, 13. Ke go sepedišana gofe mo go lego gona magareng ga dikgopolo le mediro, le gona re ka dira’ng gore re dule re hlwekile boitshwarong?

¹² Go hlweka monaganong. Dikgopolo di lebiša medirong. Ge e ba re dumelela megopolo e fošagetšego gore e nwelele menaganong le dipelong tša rena, kgauswinyane re tla dira ditiro tše sa hlwekago. (Mateo 5:28; 15:18-20) Eupša ge e ba re tlatša menagano ya rena ka dikgopolo tšeo di sekilego le tše di hlwekilego, re tla tutueletšega go dula re hlwekile boitshwarong. (Bala Bafilipi 4:8) Re ka boloka bjang menagano ya rena e hlwekile? Le lengwe la mabaka ke gore re nyaka go phema boithabišo le ge e le bofe bjo bo ka šilafatšago tsela ya rena ya go nagana. * Go tlaleletša go seo, re ka tlatša menagano ya rena ka dikgopolo tšeo di hlwekilego ka go ithuta Lentšu la Modimo ka mehla.​—Psalme 19:8, 9.

¹³ E le gore re dule leratong la Modimo, go bohlokwa gore re dule re hlwekile moyeng, boitshwarong le monaganong. Dibopego tše tša bohlweki di ahlaahlwa ka botlalo dikgaolong tše dingwe tša puku ye. Anke mo re hlahlobeng sebopego sa bone​—go hlweka mmeleng.

14. Ke ka baka la’ng go hlweka mmeleng e se taba feela ya motho ka boyena?

¹⁴ Go dula re hlwekile mmeleng go akaretša go boloka mmele wa rena le mo re dulago gona go hlwekile. Na go hlweka mo go bjalo ke taba ya motho ka boyena mo e lego gore ga se ya swanela go tshwenya motho yo mongwe? Seo se ka se be bjalo go barapedi ba Jehofa. Ka ge go šetše go boletšwe, go hlweka ga  rena mmeleng go kgoma Jehofa e se ka baka la ge seo se hola rena eupša ke ka gobane re mo emela. Anke o nagane ka papišo yeo e dirišitšwego mathomong a kgaolo ye. Na go bona ngwana yoo ka mehla a lego ditšhila goba yo a sa bogegego gabotse ga go dire gore o ipotšiše dipotšišo ka batswadi ba gagwe? Re ka se nyake gore ponagalo ya rena goba tsela ya rena ya bophelo le ge e le efe e goboše Tatago rena wa legodimong goba go dira gore molaetša wo re o bolelago o bolelwe gampe. Lentšu la Modimo le re: “Ka tsela le ge e le efe ga re nee lebaka la go kgopša, gore bodiredi bja rena bo se ke bja solwa; eupša re ipolelela ka ditsela tšohle re le badiredi ba Modimo.” (2 Bakorinthe 6:3, 4) Ka gona, ke bjang re ka dulago re hlwekile mmeleng?

15, 16. Mekgwa e mebotse ya go hlweka mmeleng e akaretša’ng, gomme moaparo wa rena o swanetše go ba boemong bofe?

¹⁵ Go hlweka ga rena mmeleng le ponagalo ya rena. Gaešita le ge ditšo le maemo a bophelo di fapana go ya ka dinaga, ka kakaretšo re ka hwetša sesepa le meetse a lekanego gore re  hlape ka mehla le go kgonthišetša gore rena le bana ba rena re hlwekile. Mekgwa e mebotse ya go hlweka ga rena mmeleng e akaretša go hlapa matsogo ka sesepa le meetse pele re eja goba re swara dijo, ka morago ga gore re boe ntlwaneng le ka morago ga gore re hlapiše ngwana goba go mo apeša leleiri. Go hlapa matsogo ka sesepa le meetse go ka thibela bolwetši gaešita le go phološa maphelo. Go ka thibela go ata ga ditwatši tše kotsi le dipaketheria, ka go re’alo gwa thuša batho gore ba se swarwe ke malwetši a letšhollo. Dinageng tšeo dintlo tša gona di se nago tshepedišo ya kelelatšhila, mohlomongwe mantle a ka tšheletšwa ka mmu, go etša ge go be go dirwa Isiraeleng ya bogologolo.​—Doiteronomio 23:12, 13.

¹⁶ Diaparo tša rena le tšona di swanetše go hlatswiwa ka mehla e le gore di hlweke le go bogega. Ga go nyakege gore diaparo tša Mokriste e be tše bitšago tšhelete e ntši goba tše di lego fešeneng, eupša e swanetše go ba tša bothakga, tše hlwekilego le tšeo di sa solegego. (Bala 1 Timotheo 2:9, 10) Go sa šetšwe mo re lego gona, re nyaka gore ponagalo ya rena e “kgabiše thuto ya Mophološi wa rena, Modimo.”​—Tito 2:10.

17. Ke ka baka la’ng magae a rena le tikologo ya ona a swanetše go ba ao a hlwekilego le a bogegago?

¹⁷ Magae a rena le tikologo ya ona. Magae a rena a ka no ba e se a mabotse kudu goba a mabonwa, eupša e swanetše go ba ao a hlwekilego le a bogegago ka mo go ka kgonegago. Ka mo go swanago, ge e ba re diriša koloi go ya dibokeng le bodireding bja tšhemo, re swanetše go dira seo re ka se kgonago gore e hlweke ka gare le ka ntle. Anke re se ke ra lebala gore magae ao a hlwekilego le tikologo ya ona a nea bohlatse. Ge e le gabotse, re ruta batho gore Jehofa ke Modimo yo a hlwekilego, gore o tlo “senya bao ba senyago lefase,” le gore kgauswinyane Mmušo wa gagwe o tlo fetola legae la rena la lefase gore e be Paradeise. (Kutollo 11:18; Luka 23:43) Ruri re nyaka gore ponagalo ya magae a rena le phahlo ya rena di bontšhe ba bangwe gore le gona bjale re kgomaretše mekgwa e hlwekilego yeo e tlago go amogelega lefaseng le lefsa leo le tlago.

18. Re ka bontšha bjang gore re hlompha Holo ya rena ya Mmušo?

¹⁸ Lefelo la rena la borapedi. Lerato la rena la go rata Jehofa le  re tutueletša go hlompha Holo ya rena ya Mmušo, e lego lefelo la borapedi bja therešo lefelong la gabo rena. Ge batho bao ba sa tšwago go kopanela ba etla holong yeo, re nyaka gore ba kgahlwe ke mafelo a borapedi ao re kopanelago go ona. E le gore holo e dule e bogega le go kgahliša, go nyakega gore e hlokomelwe le go hlwekišwa ka mehla. Re hlompha Holo ya rena ya Mmušo ka go dira sohle seo re ka se kgonago gore e be boemong bjo bobotse. Ke tokelo go diriša nako ya rena ka go rata go thuša nakong ya go hlwekiša, “go lokiša le go tsošološa” mafelo a rena a borapedi. (2 Dikoronika 34:10) Melao ya motheo e swanago e šoma le ge re kopana Holong ya Kopano goba lefelong le lengwe leo le dirišetšwago dikopano tše dinyenyane goba tše dikgolo.

19. Re swanetše go phema eng e le gore re dule re hlwekile mmeleng, le gona Beibele e re thuša bjang tabeng ye?

¹⁹ E le gore re dule re hlwekile mmeleng, re swanetše go phema mekgwa le ditiro tše di šilafatšago, go etša go kgoga, go dirišwa gampe ga dinotagi, le go lemalela dilo tša kalafo ka morero o fošagetšego goba tšeo di gobatšago monagano. Beibele ga e bolele ka go lebanya ka mekgwa ka moka yeo e sa hlwekago le yeo e šišimišago le ditiro tšeo di atilego lehono, eupša e na le melao ya motheo yeo e dirago gore re kgone go kwešiša kamoo Jehofa a swanetšego go ba a ikwa ka gona ka dilo tšeo. Ka ge re tseba pono ya Jehofa ka ditaba tšeo, lerato la rena la go mo rata le re tutueletša gore re latele tsela yeo a e amogelago. Anke re hlahlobeng melao e mehlano ya motheo ya Mangwalo.

20, 21. Jehofa o nyaka gore re lokologe mekgweng ya mohuta ofe, gomme re na le mabaka afe a go dira seo?

²⁰ “Ka ge re na le dikholofetšo tše, a re itlhwekišeng ditšhila tšohle tša nama le tša moya, re phethagatša bokgethwa ka go boifa Modimo.” (2 Bakorinthe 7:1) Jehofa o nyaka gore re lokologe mekgweng yeo e šilafatšago mebele ya rena e bile e gobatša meoya ya rena, goba tsela ya rena ya go nagana. Ka gona re swanetše go phema dilo tšeo di lemalelwago tšeo di tsebjago di le kotsi mmeleng le monaganong.

 ²¹ Beibele e re nea lebaka le kwagalago la gore “re itlhwekišeng ditšhila tšohle.” Hlokomela gore 2 Bakorinthe 7:1 e thoma ka gore: “Ka ge re na le dikholofetšo tše.” Ke dikholofetšo dife? Ka ge go boletšwe ditemaneng tša pele ga ye, Jehofa o holofetša gore: “Ke tla le amogela. Ke tla ba tatago lena.” (2 Bakorinthe 6:17, 18) Anke o nagane: Jehofa o go holofetša gore o tla go šireletša le go go rata go etša tate yo a ratago morwa goba morwedi wa gagwe. Eupša Jehofa o tla phethagatša dikholofetšo tše ge feela o phema ditšhila “tša nama le tša moya.” Ka gona, e tla ba ga bošilo kudu go dumelela mokgwa goba tiro le ge e le efe gore di go time tswalano e bjalo ya kgauswi e bohlokwa le Jehofa!

22-25. Ke melao efe ya motheo yeo e ka re thušago go phema mekgwa le ditiro tšeo di sa hlwekago?

²² “O rate Jehofa Modimo wa gago ka pelo ya gago ka moka, ka moya wa gago ka moka le ka monagano wa gago ka moka.” (Mateo 22:37) Jesu o itše taelo ye ke e kgolo go di feta ka moka. (Mateo 22:38) Jehofa o swanelwa ke lerato le bjalo go tšwa go rena. E le gore re mo rate ka pelo ya rena ka moka, moya le monagano, re swanetše go phema mekgwa yeo e ka khutsofatšago bophelo bja rena goba go fokotša bokgoni bja rena bja go nagana bjo Modimo a re neilego bjona.

²³ “[Jehofa] o nea batho ka moka bophelo le mohemo le dilo ka moka.” (Ditiro 17:24, 25) Bophelo ke mpho e tšwago go Modimo. Re rata Monei wa bjona, ka gona re rata go hlompha mpho yeo a re neilego yona. Re phema mekgwa goba ditiro le ge e le dife tšeo di lego kotsi bophelong bja rena, ka gobane re lemoga gore mekgwa e bjalo e hlompholla mpho ya bophelo.​—Psalme 36:9.

²⁴ “O rate moagišani wa gago ka mokgwa wo o ithatago ka wona.” (Mateo 22:39) Mekgwa le ditiro tše sa hlwekago gantši ga di kgome feela yo a di dirago eupša di kgoma le batho ka moka bao ba bago le yena. Ka mohlala, batho bao ba sa kgogego bao ba lego kgauswi le motho yo a kgogago ba a gobala ge ba hema muši wa gagwe. Motho yo a kwešago batho bao a nago le bona bohloko o lwantšhana le molao wa Modimo wa gore re rate baagišani ba rena. E bile ditiro tša gagwe di bontšha gore o bolela maaka ge a re o rata Modimo.​—1 Johane 4:20, 21.

 ²⁵ “[Ebang] ba ikokobeditšego le ba kwago mebušo le balaodi.” (Tito 3:1) Dinageng tše dintši, go ba le dihlaretagi tše itšego goba go di diriša ke go roba molao. Ka ge re le Bakriste ba therešo, ga re be le dihlaretagi tše di sego molaong goba ra di diriša.​—Baroma 13:1.

26. (a) Re swanetše go dira’ng e le gore re dule leratong la Modimo? (b) Ke ka baka la’ng go dula re hlwekile mahlong a Modimo e le tsela e kaone ya bophelo?

²⁶ E le gore re dule re le leratong la Modimo, re swanetše go ipoloka re hlwekile dibopegong ka moka, e sego go tše sego kae. Go ka no se be bonolo go tlogela le go phema mekgwa le ditiro tše šilafetšego, eupša go ka kgonega. * Ruri ye ke tsela e kaone ya bophelo, ka gobane Jehofa ka mehla o re ruta ka morero wa gore re holege. (Bala Jesaya 48:17) Sa bohlokwa kudu, ge re dula re hlwekile re ka kgotsofala ka ge re tla be re tseba gore re emela gabotse Modimo yo re mo ratago, gomme ka go re’alo ra dula leratong la gagwe.