1, 2. O tutuetšwa ke’ng gore o rate Jehofa Modimo?

NA O rata Modimo? Ge e ba o šetše o neetše bophelo bja gago go Jehofa Modimo, go molaleng gore karabo ya gago ke ee e kwagalago​—e bile se ke seo se swanetšego! Ruri ke ga tlhago gore re rate Jehofa. Ge re rata Modimo re tloga re arabela leratong leo a re ratago ka lona. Beibele e bea taba ka tsela ye: “Ge e le rena, re na le lerato gobane [Jehofa] o re ratile pele.”​—1 Johane 4:19.

² Jehofa o ile a gata mogato wa pele wa go re rata. O re neile legae le lebotse, e lego lefase. O hlokomela dinyakwa tša rena tša nama gotee le tša dilo tše di bonagalago. (Mateo 5:43-48) Sa bohlokwa kudu, o hlokomela dinyakwa tša rena tša moya. O re nea Lentšu la gagwe, Beibele. Go oketša moo, o re laletša gore re mo rapele e bile o re holofetša gore o tla re kwa le go re nea moya wa gagwe o mokgethwa gore o re thuše. (Psalme 65:2; Luka 11:13) Godimo ga tšohle, o rometše Morwa wa gagwe yo a rategago kudu gore e be Molopolodi wa rena e le gore re ka phološwa sebeng le lehung. Ruri Jehofa o re bontšhitše lerato le legolo!​—Bala Johane 3:16; Baroma 5:8.

3. (a) Go nyakega’ng go rena gore re dule leratong la Modimo? (b) Ke potšišo efe e bohlokwa yeo re nyakago go e ela hloko, gomme karabo ya yona e ka hwetšwa kae?

³ Jehofa o nyaka gore re holwe ka mo go sa felego ke  lerato la gagwe. Lega go le bjalo, taba ya ge e ba re tla holega goba go se bjalo, e ithekgile ka rena. Lentšu la Modimo le re kgothaletša gore: “Le duleng leratong la Modimo . . . ka tebelelo ya bophelo bjo bo sa felego.” (Juda 21) Polelwana e rego “le duleng” e bontšha gore go nyakega gore re gate mogato e le gore re dule leratong la Modimo. Re swanetše go arabela leratong la gagwe ka ditsela tše lebanyago. Ka gona, potšišo e bohlokwa yeo e nyakago gore re e ele hloko še: ‘Nka bontšha bjang lerato la ka go Modimo?’ Karabo e hwetšwa mantšung a buduletšwego a moapostola Johane a rego: “Se ke seo lerato la Modimo le se bolelago, gore re boloke ditaelo tša gagwe gomme ditaelo tša gagwe ga di boima.” (1 Johane 5:3) Re swanetše go hlahloba ka kelohloko seo mantšu ao a se bolelago,  ka ge re nyaka go bontšha Modimo wa rena gore re tloga re mo rata.

4, 5. (a) Polelwana e rego “lerato la Modimo” e bolela’ng? (b) Hlalosa kamoo lerato la go rata Jehofa le ilego la thoma go gola pelong ya gago.

⁴ “Lerato la Modimo”​—ke’ng seo moapostola Johane a bego a se naganne ge a be a ngwala mantšu ao? Polelwana ye ga e bolele ka lerato leo Modimo a re ratago ka lona, eupša e bolela ka lerato leo rena re mo ratago ka lona. Na o sa gopola nakong ya ge lerato la Jehofa le be le thoma go gola pelong ya gago?

⁵ Akanya ka nakwana ge o be o thoma go ithuta therešo ka Jehofa le merero ya gagwe gomme o thoma go ba le tumelo. O ile wa kwešiša gore gaešita le ge o belegwe o le modiradibe yo a arogantšwego le Modimo, Jehofa a diriša Kriste o ile a go bulela tsela ya gore o tle o fihlelele phethego yeo Adama a ilego a e lahla gomme o tle o hwetše bophelo bjo bo sa felego. (Mateo 20:28; Baroma 5:12, 18) O ile wa thoma go lemoga bogolo bja sehlabelo seo Jehofa a ilego a se dira ge a be a roma Morwa wa gagwe yo a mo ratago kudu gore a go hwele. Pelo ya gago e ile ya tutueletšega gomme wa thoma go ikwa o rata Modimo yo a go bontšhitšego lerato le bjalo le legolo.​—Bala 1 Johane 4:9, 10.

6. Lerato la kgonthe le bontšhwa bjang, gomme lerato la Modimo le ile la go tutueletša gore o dire’ng?

⁶ Lega go le bjalo, maikwelo ao e be e le feela mathomo a lerato la kgonthe go Jehofa. Lerato ga se maikwelo feela; e bile ga se taba ya mantšu feela. Lerato la kgonthe go Modimo le akaretša se se fetago go fo bolela gore: “ Ke rata Jehofa.” Go swana le tumelo, lerato la kgonthe le bontšhwa ka ditiro. (Jakobo 2:26) Ka go lebanya, lerato le ipontšha ka mediro e kgahlišago mothong yo a ratwago. Ka gona, ge lerato la Jehofa le be le thoma go mela ka pelong ya gago, o ile wa tutueletšega go phela ka tsela yeo e kgahlišago Tatago wa  legodimong. Na o Hlatse e kolobeditšwego? Ge e ba go le bjalo, lerato le leo le tseneletšego le boineelo go Jehofa di ile tša go dira gore o fihlelele phetho e bohlokwa kudu bophelong bja gago. O ile wa ineela go Jehofa gore o dire thato ya gagwe, ke moka wa bontšha boineelo bja gago ka gore o kolobetšwe. (Bala Baroma 14:7, 8) Go phethagatša kholofetšo ye e kgolo go Jehofa go akaretša selo se se latelago seo moapostola Johane a se bolelago.

7. Tše dingwe tša ditaelo tša Modimo ke dife, gomme go di latela go akaretša eng?

⁷ Johane o hlalosa seo se bolelwago ke lerato la Modimo ge a re: “Re boloke ditaelo tša gagwe.” Ditaelo tša Modimo ke dife? Jehofa o re nea ditaelo tše dintši tše di lebanyago ka Lentšu la gagwe, Beibele. Ka mohlala, o gana dilo tše bjalo ka botagwa, bootswa, borapedi bja medimo ya diswantšho, go utswa le go bolela maaka. (1 Bakorinthe 5:11; 6:18; 10:14; Baefeso 4:28; Bakolose 3:9) Go kwa ditaelo tša Modimo go akaretša go phela ka go dumelelana le ditekanyetšo tše di kwagalago tša Beibele tša boitshwaro.

8, 9. Re ka tseba bjang seo se thabišago Jehofa gaešita le maemong ao go se nago molao o lebanyago wa Beibele? Nea mohlala.

⁸ Lega go le bjalo, e le gore re kgahliše Jehofa, re swanetše go dira se se fetago go kwa ditaelo tša gagwe tše di lebanyago. Jehofa ga a re imetše ka melao yeo e laolago mosepelo o mongwe le o mongwe wa bophelo bja rena bja letšatši le letšatši. Ka baka leo, letšatšing le lengwe le le lengwe re ka kopana le maemo a mantši ao go sego ditaelo tša ona tša go lebanya tše tšwago Beibeleng. Maemong a bjalo, re ka tseba bjang seo se tlago go thabiša Jehofa? Beibele e na le maswao a bonagalago gabotse a tsela yeo Modimo a naganago dilo ka yona. Ge re dutše re ithuta Beibele, re bona seo Jehofa a se ratago le seo a se hloilego. (Bala Psalme 97:10; Diema 6:16-19) Re thoma go lemoga mekgwa le ditiro tšeo a di tšeelago godimo. Ge re dutše re ithuta ka semelo sa Jehofa le ditsela tša gagwe, ke gona  moo re tlago go dumelela tsela ya gagwe ya go nagana gore e hlahle diphetho tša rena e be e tutuetše seo re se dirago. Ka gona, gaešita le maemong ao go se nago molao o lebanyago wa Beibele, gantši re ka hlatha “seo thato ya Jehofa e lego sona.”​—Baefeso 5:17.

⁹ Ka mohlala, Beibele ga e na taelo e lebanyago ya go re botša gore re se bogele difilimi goba mananeo a thelebišene ao a bontšhago bošoro goba boitshwaro bjo bo gobogilego bja tša botona le botshadi. Eupša na re tloga re nyaka molao o lebanyago wa gore re se bogele dilo tše bjalo? Re tseba kamoo Jehofa a ikwago ka gona ka ditaba tše bjalo. Lentšu la gagwe le re botša gabotse gore: “Moya wa [Jehofa] o hloile le ge e le mang yo a ratago bošoro.” (Psalme 11:5) Le gona le re: “Modimo o tla ahlola diotswa le dihlotlolo.” (Baheberu 13:4) Ka go naganišiša ka mantšu ao a buduletšwego, re ka hlatha gabotse seo e lego thato ya Jehofa. Ka baka leo re kgetha go se ithabiše ka go bogela dilo tše di gobogilego tšeo di bontšhago mekgwa yeo Modimo wa rena a e hloilego. Re a tseba gore Jehofa o a thaba ge re phema kgobogo ya boitshwaro yeo lefase le le lekago go e fetišetša bathong e le bjalo ka ge eka ga se boithabišo bjo kotsi. *

10, 11. Ke ka baka la’ng re kgetha go kwa Jehofa, gomme re mo kwa ka tsela efe?

¹⁰ Lebaka la rena le legolo la gore re kwe ditaelo tša Modimo ke lefe? Ke ka baka la’ng re nyaka go phela letšatši le letšatši ka seo re tsebago gore se dumelelana le tsela ya Modimo ya go nagana? Ga re kgethe tsela yeo feela ka morero wa gore re tšhaba go otlwa goba re tšhaba ditlamorago tše kotsi tšeo di welago bao ba hlokomologago thato ya Modimo. (Bagalatia 6:7) Go e na le moo, re lebelela go kwa Jehofa e le sebaka se sebotsebotse sa go bontšha gore re a mo rata. Go fo swana le ge ngwana a fagahlela go amogelwa ke tatagwe, le  rena re nyaka go amogelwa ke Jehofa. (Psalme 5:12) Ke yena Tatago rena, le gona re a mo rata. Ga go seo se re thabišago goba go re kgotsofatša go feta go tseba gore re phela ka tsela yeo re tlago go “amogelwa ke Jehofa.”​—Diema 12:2.

¹¹ Ka gona, go kwa ga rena ga re go dire ka go gapeletšwa; le gona ga go kgethe goba go ithekga ka maemo. * Ga re ikgethele gore ke ditaelo dife tšeo re tlago go di kwa le tšeo re ka se di kwego, ra kwa ge feela go le bonolo goba ge e ba go dira bjalo go tšweletša ditlhohlo tšeo di sa rego selo goba go se di tšweletše le gatee. Go fapana le seo, re “ba kwago go tšwa pelong.” (Baroma 6:17) Re ikwa ka tsela e swanago le ya mopsalme wa Beibele yo a ngwadilego gore: “Ke tla rata ditaelo tša gago tšeo ke di ratilego.” (Psalme 119:47) Ee, re rata go kwa Jehofa. Re lemoga gore o swanelwa—e bile o nyaka—gore re mo kwe ka mo go feletšego le gona seo se sa ithekga ka maemo. (Doiteronomio 12:32) Re nyaka gore Jehofa a bolele ka rena go swana le kamoo Lentšu la gagwe le bolelago ka Noa. Beibele ge e bolela ka mopatriareka yoo yo a botegago, yena yoo a bontšhitšego gore o rata Modimo ka gore a kwe ka nywagasome e mentši, e re: “Noa a dira tšohle tšeo Modimo a mo laetšego tšona. A dira tšona tšeo.”​—Genesi 6:22.

12. Ke neng moo go kwa ga rena go thabišago pelo ya Jehofa?

¹² Jehofa o ikwa bjang ka go kwa ga rena ka go rata? Lentšu la gagwe le re botša gore ka go dira seo re ‘thabiša pelo ya gagwe.’ (Diema 27:11) Na go kwa ga rena go tloga go thabiša pelo ya Mmuši Morena wa legohle? Ruri e a e thabiša gomme Jehofa o na le lebaka le le kwagalago la gore a thabe! Jehofa o re bopile ka tsela ya gore re kgone go ikgethela. Se se bolela gore re na le tokologo ya go ikgethela; re ka kgetha go kwa Modimo goba ra kgetha go se mo kwe. (Doiteronomio  30:15, 16, 19, 20) Ge e ba re kgetha go kwa Jehofa ka go rata e bile phetho ya rena ya go dira seo e tutuetšwa ke gore dipelo tša rena di tletše ka lerato la go rata Modimo, gona seo se thabiša Tatago rena wa legodimong kudu. (Diema 11:20) Le gona re kgetha tsela yeo e di phalago tšohle ya bophelo.

13, 14. Ke ka baka la’ng go ka bolelwa gore ‘ditaelo tša Modimo ga di boima,’ gomme seo re ka se swantšha bjang?

¹³ Moapostola Johane o re botša selo se sengwe se se kgothatšago kudu ka dinyakwa tša Jehofa ge a re: “Ditaelo tša gagwe ga di boima.” Lentšu la Segerika leo le fetoletšwego e le “boima” go 1 Johane 5:3 le bolela go “imela.” * Beibele e tlwaelegilego ya Sepedi e re: “Melaô ya xaxwe xa se e thata.” Dinyakwa tša Jehofa di a kwagala e bile ga di boima. Batho ba sa phethagalago ba ka se palelwe ke go kwa melao ya gagwe.

¹⁴ Re ka swantšha se ka tsela ye. Anke re re mogwera wa gago yo mogolo o go kgopela gore o mo thuše go hudugela lefelong le lengwe. Go na le mapokisi a mantši ao a swanetšego go rwalwa. A mangwe a ona a bohwefo moo a ka rwalwago ke motho o tee ka ntle le bothata, eupša a mangwe a a imela gomme go nyakega gore a rwalwe ke batho ba babedi. Mogwera wa gago o kgetha mapokisi ao a nyakago gore o a rwale. Na a ka go kgopela gore o rwale mapokisi ao a tsebago gore o tla palelwa ke go a rwala ka ge a tla go imela? Aowa. A ka se nyake gore o ikgobatše ka gore o leke go a rwala o nnoši. Ka mo go swanago, Modimo wa rena yo a nago le lerato le yo botho ga a re kgopele gore re latele ditaelo tšeo go lego thata kudu gore re di kwe. (Doiteronomio 30:11-14) A ka  se tsoge a re kgopetše go rwala morwalo o bjalo o boima. Jehofa o kwešiša mafokodi a rena, gobane “yena o tseba gabotse kamoo re bopegilego ka gona, a gopola gore re lerole.”​—Psalme 103:14.

15. Ke ka baka la’ng re ka kgodišega gore ditaelo tša Jehofa ke tša go re hola?

¹⁵ Ruri ditaelo tša Jehofa ga di boima; di hola rena kudu. (Bala Jesaya 48:17) Ke ka baka leo Moshe a bego a ka botša Baisiraele ba bogologolo gore: ‘Jehofa o re laetše gore re phethe ditaelo tše ka moka, re boife yena Jehofa Modimo wa rena gore re tle re holege ka mehla, e le gore re dule re phela go etša lehono le.’ (Doiteronomio 6:24) Le rena re ka kgodišega gore ge Jehofa a be a re nea melao ya gagwe, o be a re nyakela tše kaone, e lego bophelo bjo botelele bja ka mo go sa felego. Na ruri Jehofa o be a ka re kgethela selo se se fapanego le seo? Jehofa ke Modimo wa bohlale bjo bogolo. (Baroma 11:33) Ka gona o tseba seo se re swanetšego gakaone. Le gona Jehofa ke mothofatšo wa lerato. (1 Johane 4:8) Lerato, e lego seo a tlogago a le sona, le tutuetša selo se sengwe le se sengwe seo a se bolelago le seo a se dirago. Ke lona motheo wa ditaelo ka moka tšeo a di neago bahlanka ba gagwe.

16. Go sa šetšwe ditutuetšo tša lefase le leo le gobogilego le mekgwa e tlišwago ke go se phethagale, ke ka baka la’ng re ka phegelela tsela ya go kwa?

¹⁶ Se ga se bolele gore go bonolo go kwa Modimo. Re swanetše go lwantšha ditutuetšo tše gobogilego tša lefase le, e lego leo ‘le rapaletšego matleng a yo kgopo.’ (1 Johane 5:19) Le gona re swanetše go lwa le go se phethagale ga rena, e lego moo go dirago gore re nyake go tshela melao ya Modimo. (Baroma 7:21-25) Eupša go rata ga rena Modimo go ka dira gore re fenye. Jehofa o šegofatša bao ba nyakago go hlatsela gore ba a mo rata ka gore ba mo kwe. “Bao ba mo kwago e le mmuši” o ba nea moya wa gagwe o mokgethwa. (Ditiro 5:32) Moya woo o enywa dika tše di kgahlišago ka go rena—dika tše dibotse tšeo di ka re thušago go phegelela tsela ya go kwa.​—Bagalatia 5:22, 23.

17, 18. (a) Re tla hlahloba eng ka pukung ye, gomme re swanetše go gopola eng ge re dutše re dira bjalo? (b) Re tla ahlaahla eng sehlogong se se latelago?

 ¹⁷ Ka pukung ye, re tla ahlaahla melao ya Jehofa ya motheo, ditekanyetšo tša gagwe tša boitshwaro le ditaba tše dingwe tše dintši tšeo di bontšhago seo thato ya gagwe e lego sona. Ge re dutše re di ahlaahla, re swanetše go gopola ditaba tše mmalwa tše di latelago tše bohlokwa. Anke re gopoleng gore Jehofa ga a re gapeletše gore re kwe melao ya gagwe le melao ya gagwe ya motheo; o nyaka gore re mo kwe ka go rata go tšwa dipelong tša rena. Anke re se ke ra lebala gore Jehofa o re kgopela go phela ka tsela yeo e tlago go re tlišetša ditšhegofatšo tše dintši ga bjale gomme ya re lebiša bophelong bjo bo sa felego nakong e tlago. Le gona anke re lemogeng seo se bolelwago ke go kwa ga rena ka pelo ka moka​—gore ke sebaka se sebotse sa gore re bontšhe Jehofa kamoo re tlogago re mo rata ka gona.

¹⁸ Go re thuša gore re hlaole se se nepagetšego go se se fošagetšego, Jehofa ka lerato o re neile letswalo. Lega go le bjalo, gore letswalo la rena le tle le re hlahle gabotse le swanetše go tlwaetšwa, bjalo ka ge sehlogo se se latelago se tla hlalosa seo.