1-3. (a) Ke ka baka la’ng mma a kgonthišetša gore morwa wa gagwe yo monyenyane o dula a hlwekile? (b) Ke ka baka la’ng Jehofa a nyaka gore batho ba gagwe ba dule ba hlwekile?

NAGANA ka mma yo lerato a lokišetša mošemanyana wa gagwe go ya sekolong. O kgonthišetša gore o hlapile le gore diaparo tša gagwe di boemong bjo bobotse e bile di hlwekile. Se se dira gore morwa yo a dule a phetše gabotse mmeleng e bile se dira gore ba bangwe ba bone gore batswadi ba gagwe ba mo hlokometše.

² Tatago rena, e lego Jehofa, o nyaka gore re be ba hlwekilego le ba sekilego. (Psalme 18:26) O a tseba gore  bohlweki bo a re hola. E bile ge re hlwekile, re dira gore Jehofa a retwe.—Hesekiele 36:22; bala 1 Petro 2:12.

³ Go hlweka go bolela’ng? Le gona, ke ka baka la’ng bohlweki bo re hola? Ge re dutše re sekaseka dipotšišo tše, re ka bona gore ke kae moo rena ka noši re swanetšego go dira diphetogo.

4, 5. (a) Ke ka baka la’ng re swanetše go dula re hlwekile? (b) Tlholo e bontšha bjang gore Jehofa o rata bohlweki?

⁴ Mohlala wa Jehofa ka boyena o re ruta gore re dule re hlwekile le go ba bao ba sekilego. (Lefitiko 11:44, 45) Ka gona, lebaka le legolo leo re swanetšego go dula re hlwekile ke ka gobane re nyaka go ba “baekiši ba Modimo.”—Baefeso 5:1.

⁵ Tlholo e re ruta kamoo Jehofa a lebelelago bohlweki. Jehofa o dirile gore lefase le kgone go itlhwekiša. (Jeremia 10:12) Nagana ka ditsela tše dintši tšeo ka tšona lefase le itlhwekišago, gaešita le ka morago ga gore batho ba le šilafatše. Ka mohlala, Jehofa o bopile diphedi tše dinyenyane-nyenyane tšeo di bitšwago di-microbe, tšeo di ka bonwago feela ka maekroskoupu. Di-microbe di ja mpholo woo o lego ditšhileng. Se ke selo seo se makatšago. E bile boramahlale ba diriša tše dingwe tša di-microbe tše go thibela ditlamorago tše kotsi tšeo di ka bakwago ke tšhilafalo.—Baroma 1:20.

6, 7. Molao wa Moshe o be o bontšha bjang gore bao ba rapelago Jehofa ba be ba swanetše go dula ba hlwekile?

⁶ Molao woo Jehofa a bego a o file Baisiraele a diriša Moshe o re bontšha kamoo bohlweki bo lego bohlokwa ka gona. Ka mohlala, Baisiraele ba be ba swanetše go hlweka mmeleng e le gore Jehofa a amogele borapedi bja  bona. Letšatšing la Poelano, moperisita yo a phagamego o be a swanetše go hlapa gabedi. (Lefitiko 16:4, 23, 24) Le gona, pele baperisita ba bangwe ba ka dira dihlabelo, ba be ba swanetše go hlapa matsogo le maoto. (Ekisodo 30:17-21; 2 Dikoronika 4:6) Maemong a mangwe, kotlo ya go se latele molao wa bohlweki e be e le lehu.—Lefitiko 15:31; Numeri 19:17-20.

⁷ Go thwe’ng ka lehono? Re ka ithuta mo gontši mabapi le ditekanyetšo tša Jehofa Molaong wa Moshe. (Maleaki 3:6) Molao woo o be o bontšha gabotse gore barapedi ba Jehofa ba be ba swanetše go dula ba hlwekile. Melao ya Jehofa ga se ya fetoga. Lehono, o sa dutše a letetše gore barapedi ba gagwe ba hlweke.—Jakobo 1:27.

8. Re ka dira’ng gore Jehofa a re lebelele re hlwekile?

⁸ Go ya ka Jehofa, go hlweka ga se go no dula re hlwekišitše mebele ya rena, diaparo tša rena le magae a rena. Eupša go bolela go tlogela go dira dilo tše mpe. Seo se akaretša le tsela yeo re hlankelago Jehofa ka yona, boitshwaro bja rena le dikgopolo tša rena. E le gore Jehofa a re bone re hlwekile re swanetše go hlweka le go seka dilong ka moka.

9, 10. Go hlankela Jehofa ka tsela e hlwekilego go bolela’ng?

⁹ Go hlankela Modimo ka tsela e hlwekilego. Re ka se tšee karolo bodumeding bja maaka ka tsela le ge e le efe. Ge Baisiraele ba be ba le bothopša kua Babilona, ba be ba phela le batho bao ba bego ba sa rapele Modimo wa therešo. Jesaya o porofetile gore Baisiraele ba be ba tlo boela gae Isiraele gore ba yo hlankela Jehofa gape ka tsela e hlwekilego. Jehofa o ba boditše gore: “Tšwang moo, le se kgwathe selo sa go se hlweke; tšwang go yona, ipolokeng  le hlwekile.” Baisiraele ba be ba sa swanela go tswakanya borapedi bja bona le dithuto tša maaka, mekgwa goba meetlo ya bodumedi bja maaka ya kua Babilona.—Jesaya 52:11.

¹⁰ Bakriste ba therešo le bona lehono ba phema bodumedi bja maaka. (Bala 1 Bakorinthe 10:21.) Lefaseng ka moka, ditšo tše dintši tšeo di tlwaelegilego, meetlo le ditumelo di theilwe dithutong tša bodumedi bja maaka. Ka mohlala, ditšong tše dintši batho ba dumela gore ka gare ga rena go na le selo seo se tšwelago pele se phela ge re hwile, gomme meetlo e mentši e theilwe tumelong yeo. (Mmoledi 9:5, 6, 10) Bakriste ba swanetše go phema meetlo yeo. Ditho tša malapa a rena di ka re gapeletša gore re dumele e mengwe ya meetlo yeo. Eupša ga re tlogele seo re se dumelago gaešita le ge ba re gapeletša, ka gobane re nyaka gore Jehofa a re lebelele re hlwekile.—Ditiro 5:29.

11. Go hlweka boitshwarong go bolela’ng?

¹¹ Boitshwaro bjo bo hlwekilego. E le gore Jehofa a re lebelele re sekile, re swanetše go phema mohuta le ge e le ofe wa thobalano e gobogilego. (Bala Baefeso 5:5.) Ka Beibeleng, Jehofa o re botša gore re ‘tšhabe bootswa.’ O hlalositše seo ka tsela e kwagalago gore bao ba gobogilego gomme ba sa itshole “ba ka se je bohwa bja Mmušo wa Modimo.”—1 Bakorinthe 6:9, 10, 18; bala Tlhaloso 22.

12, 13. Ke ka baka la’ng re swanetše go nagana dilo tšeo di hlwekilego?

¹² Dula o nagana ka dilo tše di hlwekilego. Gantši motho o feleletša a dira seo a se naganago. (Mateo 5:28; 15:18, 19) Go nagana ka dilo tše di hlwekilego go tla re thuša gore re dire dilo ka tsela e hlwekilego. Ke therešo gore ga se ra phethagala, ka gona re tlo fela re nagana dilo tšeo di fošagetšego. Ge dikgopolo tšeo di tšwelela, re swanetše  go di ganetša di sa tloga fase. Ge re sa di ganetše, dilo tšeo di tla šilafatša pelo ya rena. Re ka thoma go nyaka go dira dilo tšeo re dulago re nagana ka tšona. Go e na le moo, re swanetše go dula re nagana ka dilo tšeo di hlwekilego. (Bala Bafilipi 4:8.) Ka gona, re phema dilo tše bjalo ka boithabišo bjo bo sa hlwekago goba bja bošoro. Re kgetha ka šedi dilo tšeo re di balago, tšeo re di bogelago le tšeo re bolelago ka tšona.—Psalme 19:8, 9.

¹³ E le gore re dule leratong la Modimo, re swanetše go hlankela Jehofa ka tsela yeo a e nyakago gomme boitshwaro bja rena le dikgopolo tša rena e be tše di hlwekilego. Le gona Jehofa o nyaka gore re hlweke mmeleng.

14. Ke ka baka la’ng go le bohlokwa gore re dule re hlwekile?

¹⁴ Ge re dula re hlapile e bile re hlwekiša le moo re dulago gona, go tla holega rena le bao ba lego kgauswi le rena. Re tlo ikwa re phetše gabotse e bile ba bangwe ba tla thabela go ba le rena. Eupša go na le lebaka la bohlokwa kudu leo le dirago gore re dule re hlwekile mmeleng. Go dula ga rena re hlwekile go dira gore Jehofa a retwe. Nagana ka se: Ge o bona ngwana yo a dulago a le ditšhila, seo se ka dira gore o nagane gampe ka batswadi ba gagwe. Ka tsela e swanago, le batho ba ka nagana gampe ka Jehofa ge e ba re sa itlhokomele e bile re dula re sa hlweka. Paulo o itše: “Ka tsela le ge e le efe ga re nee lebaka la go kgopša, gore bodiredi bja rena bo se ke bja solwa; eupša re ipolelela ka ditsela tšohle re le badiredi ba Modimo.”—2 Bakorinthe 6:3, 4.

15, 16. Re swanetše go dira’ng e le gore re dule re hlwekile?

¹⁵ Mebele ya rena le diaparo tša rena. Re swanetše go dula re hlwekile mmeleng. Ka mohlala, re hlapa letšatši le lengwe le lengwe ge go kgonega. Re hlapa matsogo ka  meetse le sesepe, kudukudu pele re apea goba re eja le ka morago ga go ya ntlwaneng ya boithomelo goba go swara selo sa ditšhila. Go hlapa matsogo go ka bonala go sa re selo, eupša go bohlokwa e le gore re se ke ra phatlalatša ditwatši le malwetši. Go ka ba gwa phološa maphelo a rena. Ge e ba re se na ntlwana ya boithomelo goba tshepedišo ya kelelatšhila (sewerage), re sa dutše re ka diriša mekgwa e mengwe e šireletšegilego ya go lahla mantle. Baisiraele ba bogologolo ba be ba se na tshepedišo ya kelelatšhila, ka gona, ba be ba epela mantle a bona kgole le magae a batho le kgole le moo go gewago meetse.—Doiteronomio 23:12, 13.

¹⁶ Ga go nyakege gore diaparo tša rena e be tša maemo, tša go tura goba tša fešene. Eupša go no nyakega gore e be tše di hlwekilego le tša bothakga. (Bala 1 Timotheo 2:9,  10.) Ka mehla re nyaka gore ponagalo ya rena e godiše Jehofa.—Tito 2:10.

17. Ke ka baka la’ng re nyaka go dula re hlwekišitše magae a rena le moo re phelago gona?

¹⁷ Magae a rena le moo re lego gona. Re dula re hlwekišitše magae a rena go sa šetšwe gore re dula kae. Re dula re kgonthišetša gore dikoloi, dithuthuthu le dipaesekele tša rena goba mohuta le ge e le ofe wa senamelwa seo re se dirišago se hlwekile, kudukudu ge e ba re se dirišetša go ya dibokeng goba tšhemong. Ge re boledišana le batho ka Beibele, re ba botša gore paradeise e tlo ba e hlwekilego. (Luka 23:43; Kutollo 11:18) Ge e ba re hlwekiša magae a rena le moo re lego gona, seo se bontšha gore re itokišeletša go tlo phela lefaseng le lefsa leo le hlwekilego.

18. Ke ka baka la’ng re swanetše go dula re hlwekišitše mafelo a rena a borapedi?

¹⁸ Mafelo a rena a borapedi. Re bontšha gore re tšea bohlweki bo le bohlokwa ka go dira gore moo re kopanelago gona go dule go hlwekile, e ka ba e le Holong ya Mmušo goba lefelong leo re swarelago dikopano go lona. Ge batho ba thoma go tla Holong ya Mmušo, gantši ba lemoga kamoo e hlwekilego ka gona. Se se godiša Jehofa. Ka ge re le ditho tša phuthego, ka moka re na le sebaka sa go hlwekiša Holo ya rena ya Mmušo le go dira gore e dule e le boemong bjo bobotse.—2 Dikoronika 34:10.

19. Ke dilo dife tšeo re swanetšego go di phema?

¹⁹ Le ge Beibele e sa bolele ka mekgwa ka moka e mebe yeo re swanetšego go e phema, e re nea melao ya motheo yeo e re thušago go kwešiša kamoo Jehofa a  ikwago ka gona ka mekgwa yeo. Jehofa ga a nyake gore re kgoge, re nwe bjala kudu goba re diriše dihlaretagi gampe. Re tlo phema go dira dilo tše ge e ba re le bagwera ba Modimo. Ka baka la’ng? Ka gobane re hlompha bophelo. Mekgwa yeo e ka dira gore re hwe ka pela, ya re lwatša le go gobatša bao re phelago le bona. Batho ba bantši ba leka go tlogela mekgwa ye e mebe e le gore ba phele gabotse mmeleng. Eupša rena re tlogela mekgwa yeo ka gobane re rata Jehofa, e bile re nyaka go ba bagwera gagwe. Kgarebe e nngwe e itše: “Ka thušo ya Jehofa, ke hlwekišitše bophelo bja ka le go tlogela mekgwa yeo ke bego ke sa kgone go e tlogela. . . . Ke nagana gore ke be nka se kgone go dira diphetogo tše ka bonna.” Anke re ithuteng ka melao ya motheo e mehlano ya Beibele yeo e ka thušago motho go kgaotša mekgwa e gobatšago.

20, 21. Ke mekgwa efe yeo Jehofa a nyakago gore re e tlogele?

²⁰ “Ka ge re na le dikholofetšo tše, a re itlhwekišeng ditšhila tšohle tša nama le tša moya, re phethagatša bokgethwa ka go boifa Modimo.” (2 Bakorinthe 7:1) Jehofa o nyaka gore re tlogele mekgwa yeo e ka gobatšago menagano goba mebele ya rena.

²¹ Lebaka le legolo la gore ‘re itlhwekiše ditšhileng tšohle’ le hwetšwa go 2 Bakorinthe 6:17, 18. Jehofa o re: “Le lese go kgwatha selo se se sa hlwekago.” Ke moka o tshepiša gore: “Ke tla le amogela. Ke tla ba tatago lena, lena le tla ba barwa le barwedi ba ka.” Jehofa o tla re rata go swana le ge tate a rata bana ba gagwe, ge e ba re phema selo le ge e le sefe seo se tla dirago gore a re lebelele re se ra hlweka.

22-25. Ke melao efe ya motheo ya Beibele yeo e ka re thušago go phema mekgwa e sa hlwekago?

 ²² “O rate Jehofa Modimo wa gago ka pelo ya gago ka moka, ka moya wa gago ka moka le ka monagano wa gago ka moka.” (Mateo 22:37) Ye ke taelo e bohlokwa go di feta ka moka. (Mateo 22:38) Re swanetše go rata Jehofa ka dipelo tša rena ka moka. Na re ka re re rata Jehofa ka dipelo tša rena ka moka mola re dira dilo tšeo di ka re bolayago goba tša gobatša mabjoko a rena? Aowa, re swanetše go dira sohle seo re ka se kgonago go bontšha gore re hlompha bophelo bjo a re filego bjona.

²³ “[Jehofa] o nea batho ka moka bophelo le mohemo le dilo ka moka.” (Ditiro 17:24, 25) Ge e ba mogwera wa gago a be a ka go fa mpho ya bohlokwa, na o be o tla e lahla goba wa e senya? Aowa. Ka tsela e swanago, bophelo ke mpho e kgahlišago yeo e tšwago go Jehofa. Re tloga re hlompha mpho yeo. Ka gona, re nyaka go phela ka tsela yeo e tla dirago gore Jehofa a retwe.—Psalme 36:9.

²⁴ “O rate moagišani wa gago ka mokgwa wo o ithatago ka wona.” (Mateo 22:39) Mekgwa e sa hlwekago ga e gobatše rena feela. E ka gobatša le batho bao re phelago le bona, bao gantši e lego batho bao re ba ratago kudu. Ka mohlala, motho yo a dulago ka ntlong e tee le motho yo a kgogago, a ka thoma go babja kudu feela ka gobane a hema muši wa motšoko. Ge re tlogela mekgwa e mebe, re bontšha bao re phelago le bona gore re a ba rata.—1 Johane 4:20, 21.

²⁵ “Tšwela pele o ba gopotša gore e be ba ikokobeditšego le ba kwago mebušo le balaodi.” (Tito 3:1) Dinageng tše dintši, molao ga o dumelele batho gore ba be le dihlaretagi tše itšego goba ba di diriše. Ka ge Jehofa a re laela gore re hlomphe babuši, re kwa melao e bjalo.—Baroma 13:1.

26. (a) Re swanetše go dira’ng gore Jehofa a amogele tsela yeo re mo hlankelago ka yona? (b) Ke ka baka la’ng re swanetše go dula re hlwekile pele ga Jehofa?

 ²⁶ Go tšwa go seo re ithutilego sona, re a bona gore go nyakega gore re dire diphetogo gore re be bagwera ba Jehofa. Re swanetše go thoma gona bjale. Ga se ka mehla go lego bonolo go tlogela mekgwa e sa hlwekago, eupša re ka kgona go e tlogela. Jehofa o re tshepiša gore o tla re thuša. O re: “Nna, Jehofa, ke Modimo wa lena, Yo a le rutago gore le holege, Yo a le sepedišago tseleng yeo le swanetšego go sepela ka yona.” (Jesaya 48:17) Re ka kgodišega gore re thabiša Modimo wa rena ge re leka ka gohle gore re dule re hlwekile.