1, 2. Jehofa o ikwa bjang ge a bona re leka ka gohle go botega?

NAGANA ka taba ye: Mošemane o tšwa sekolong gomme ge a le tseleng o topa sekhwama seo se tletšego tšhelete. O nagana gore o tla dira’ng? A ka tšea tšhelete yeo. Eupša go e na le moo, o bušetša sepatšhe seo go mong wa sona. Ge mmago mošemane yoo a ekwa seo morwa wa gagwe a se dirilego, o ikgantšha ka yena.

² Batswadi ba bantši ba a thaba ge bana ba bona ba botega. Tatago rena wa legodimong e lego Jehofa, ke “Modimo wa therešo,” gomme o a thaba ge re botega. (Psalme 31:5) Ka ge re nyaka go mo thabiša, re “itshwara ka go botega dilong tšohle.” (Baheberu 13:18) Ga bjale a re boleleng ka dikarolo tše tharo tšeo go tšona go botega go ka bago thatanyana. Ka morago ga moo, re tla bolela ka mehola ya go botega.

3-5. (a) Re tla ba re iphora ge re ka nagana’ng? (b) Ke’ng seo se tlago go re thuša gore re bone seo re lego sona ka gare?

³ Ge re nyaka gore batho ba bangwe ba re tshepe, re swanetše go tshepagala. Eupša ga se ka mehla go lego bonolo go botega goba go tshepega. Lekgolong la pele  la mengwaga, bana babo rena ba phuthegong ya Laoditsea ba be ba ipotša gore ba kgahliša Modimo mola go be go se bjalo. (Kutollo 3:17) Le rena re ka ipotša gore re dira dilo gabotse mola go se bjalo.

⁴ Morutiwa Jakobo o itše: “Ge e ba motho a ipotša gore o rapela Modimo ka tsela ya kgonthe eupša a sa laole leleme la gagwe bjalo ka ge eka ke ka tomo, gona o fora pelo ya gagwe gomme borapedi bja gagwe ke bja lefeela.” (Jakobo 1:26) Re tla ba re iphora ge re ka nagana gore ge feela re hlankela Modimo, o tla no re amogela le ge re sa bolele le batho ba bangwe gabotse, re ba swara makgwakgwa goba re bolela maaka. Re ka thušwa ke’ng gore re se ke ra iphora?

⁵ Ge re itebelela seiponeng, re kgona go bona feela ponagalo ya rena ya ka ntle. Eupša ge re bala Beibele, re kgona go bona seo re lego sona ka gare. Beibele e ka re thuša go tseba dilo tšeo re kgonago go di dira le mafokodi a rena. E re thuša go bona gore re ka dira diphetogo kae tseleng yeo re naganago ka yona, yeo re dirago dilo ka yona le tseleng yeo re bolelago ka yona. (Bala Jakobo 1:23-25.) Eupša ge re ka ipotša gore ga re na mafokodi, re ka se kgone go dira diphetogo. Ka gona, re swanetše go dumelela Beibele gore e re thuše go bona seo re lego sona ka gare. (Dillo tša Jeremia 3:40; Hagai 1:5) Thapelo le yona e re thuša go tseba seo re lego sona. Ge re rapela, re ka kgopela Jehofa gore a re hlahlobe le go re thuša go bona mafokodi a rena e le gore re kgone go a lokiša. (Psalme 139:23, 24) Beibele e re “motho wa moradia o šišimiša Jehofa, eupša Modimo o gwerana kgauswi le baloki.”—Diema 3:32.

6. Ke ka baka la’ng banyalani ba swanetše go botegelana?

⁶ Go bohlokwa kudu gore re botege ka lapeng. Ge banyalani ba ntšhetšana sa mafahleng, ba ikwa ba šireletšegile e bile ba ka tshepana le go feta. Go se botege lenyalong go ka direga ka ditsela tše dintši. Ka mohlala, motho yo a lego lenyalong a ka thoma go bapala le ba bangwe ka lerato, a bogela diswantšho tša batho bao ba sa aparago goba a ratana le motho yo mongwe ka sephiring. Mopsalme yo mongwe o itše: “Ga se ka dula le batho ba maaka; ga ke tsene mo go nago le bao ba utago seo ba lego sona.” (Psalme 26:4) Ge o sa botegele motho yo o nyalanego le yena gaešita le ka dilo tšeo o di naganago, lenyalo la lena le tla senyega.

7, 8. O ka diriša bjang Beibele go ruta bana ba gago bohlokwa bja go botega?

 ⁷ Bana le bona ba swanetše go tseba gore go botega go bohlokwa. Batswadi ba swanetše go diriša Beibele go ruta bana ba bona go botega. Beibele e re botša ka batho ba babe bao ba bego ba sa botege, ba bjalo ka Akane, yoo a ilego a ba lehodu; Gehasi, yoo a ilego a bolela maaka e le gore a hwetše tšhelete, le Judase, yoo a ilego a utswa tšhelete gomme ka morago a rekiša Jesu ka ditsekana tše masometharo tša silifera.—Joshua 6:17-19; 7:11-25; 2 Dikgoši 5:14-16, 20-27; Mateo 26:14, 15; Johane 12:6.

⁸ Le gona, Beibele e re botša ka batho bao ba bego ba tshepega, ba go swana le Jakobo yoo a ilego a botša barwa ba gagwe gore ba bušetše tšhelete yeo ba bego ba e hweditše ka mekotleng ya bona. E re botša le ka Jefeta le morwedi wa gagwe, bao ba ilego ba dira seo ba bego ba se tshepišitše Modimo. E bile e re botša ka Jesu, yoo a ilego a tshepega gaešita le maemong a thata. (Genesi 43:12; Baahlodi 11:30-40; Johane 18:3-11) Mehlala ye e ka thuša bana go kwešiša gore go botega go bohlokwa.

9. Bana ba tla holega bjang ge batswadi ba bona ba botega?

⁹ Batswadi ba ka ithuta molaong wo o bohlokwa wa motheo wo o rego: “Lega go le bjalo, na wena o rutago yo mongwe, ga o ithute? Wena yo a bolelago gore: ‘O se ke wa utswa,’ na o a utswa?” (Baroma 2:21) Bana ba a bona ge batswadi ba sa dire seo ba se bolelago. Bana ba rena ba tlo gakanega ge re ka ba botša gore ba botege mola rena re sa botege. Ge bana ba ka lemoga gore batswadi ba bona ba bolela maaka, gaešita le dilong tše dinyenyane, ba tlo ba ekiša. (Bala Luka 16:10.) Eupša ge bana ba bona gore batswadi ba bona ba a botega, seo se tla ba thuša gore le bona e tle e be batswadi bao ba botegago.—Diema 22:6; Baefeso 6:4.

10. Re ka bontšha bjang gore re a botega ge re swere magang le bana babo rena?

¹⁰ Re swanetšego go botegela bana babo rena le dikgaetšedi ba Bakriste. Go bonolo gore ge re itshwaretše magang re feleletše re seba ba bangwe, gaešita le go ba thomeletša. Go ka direga gore re phatlalatša maaka ge re botša ba bangwe mabarebare. Ka gona re swanetše go ‘ela melomo ya rena hloko.’ (Diema 10:19) Go botega ga go bolele gore re swanetše go bolela selo se sengwe le se sengwe seo re se naganago, seo re se tsebago goba seo re se kwelego. Gaešita le ge seo re nyakago go se bolela e le nnete, go ka no ba go sa hlokagale gore re se bolele. (1 Bathesalonika 4:11) Batho ba bangwe ga ba bolele le batho gabotse, gomme ba ikemelela ka gore: “Ke no ba ke bolela nnete.” Eupša ka ge rena re le bahlanka ba Jehofa, ka mehla re nyaka gore mantšu a rena e be a kgahlišago le a botho.—Bala Bakolose 4:6.

11, 12. (a) Ke ka baka la’ng motho yo a dirilego sebe a se a swanela go fihla sebe sa gagwe? (b) Ge mogwera wa gago a ka dira sebe se segolo, ke’ng seo o sa swanelago go se nagana? (c) Re ka bontšha bjang gore re botegela mokgatlo wa Jehofa?

¹¹ Jehofa o neile bagolo boikarabelo bja go thuša ditho tša phuthego. Bagolo ba tla kgona go re thuša ge feela re botega e bile re sa ba fihlele selo. Ke ka baka la’ng re re’alo? A re re o a lwala gomme o ya ngakeng gore e go thuše. Na o ka e utela tše dingwe tša dilo tšeo di go tshwenyago? Ge o ka dira bjalo, ngaka e ka se kgone go go thuša. Ka tsela e swanago, ge re ka dira sebe se segolo, ga se ra swanela go se fihla. Go e na le moo, re swanetše go ya go bagolo gomme re ba botše dilo ka moka tšeo re di dirilego. (Psalme 12:2; Ditiro 5:1-11)  Bjale, nagana ka boemo bjo bongwe ke bjo: A re re mogwera wa gago o dirile sebe se segolo. (Lefitiko 5:1) Na o tla re “motho yo ke mogwera wa ka, ka gona nka se botše motho seo a se dirilego”? Goba na o tla gopola gore Jehofa o file bagolo boikarabelo bja go nea mogwera wa gago thušo yeo a e hlokago gore a lokiše segwera sa gagwe le yena?—Baheberu 13:17; Jakobo 5:14, 15.

¹² Le gona, re swanetše go botegela mokgatlo wa Jehofa ge re tlatša difomo, go swana le ge re tlatša pego ya tirelo ya tšhemo. Le gona re swanetše go botega ge re tlatša fomo ya bobulamadibogo goba ya tirelo le ge e le efe.—Bala Diema 6:16-19.

13. Re ka bontšha bjang gore re botegela Bakristegotee le rena ditabeng tša kgwebo?

¹³ Bana babo rena le dikgaetšedi ga se ba swanela go kopanya kgwebo le dilo tša Modimo. Ka mohlala, ga re dire dilo tša kgwebo ge re le dibokeng goba re le tšhemong. E bile ga re rope bana babo rena le dikgaetšedi dilong tša kgwebo. Ge o hirile bana babo rena le dikgaetšedi, o swanetše go ba patela ka nako, o ba patele tšhelete yeo le kwanego ka yona e bile o ba nee dilo tšeo molao o letetšego gore bahiri ba di nee bašomi ba bona. Dilo tšeo di ka akaretša go lefelela mošomi inšorense ya tša maphelo goba go mo patela ge a eya maikhutšong. (1 Timotheo 5:18; Jakobo 5:1-4) Le gona ge e ba o hirilwe ke Hlatsegotee le wena, o se ke wa letela gore e go sware eka o morongwa. (Baefeso 6:5-8) Dira mošomo wo o laetšwego go o dira, e bile o šome diiri tšeo le kwanego ka tšona.—2 Bathesalonika 3:10.

14. Bakriste ba swanetše go dira eng pele ba tsenela kgwebo?

¹⁴ Go thwe’ng ge e ba o dira kgwebo le ngwaneno  goba kgaetšedi? Se se ka akaretša go adima tšhelete goba go e bea gore e tswale. Maemong a mohuta wo, re swanetše go diriša molao wa motheo wa Beibele wo o rego: Ngwalang dilo ka moka fase! Ge moporofeta Jeremia a be a reka tšhemo, o ile a ngwala mangwalo a mabedi a bohlatse, ke moka a saeniša dihlatse lengwalo letee gomme a bea mangwalo ao gabotse gore e tle e be bohlatse bja gore o rekile tšhemo yeo. (Jeremia 32:9-12; bala le Genesi 23:16-20.) Ba bangwe ba nagana gore ge ba ngwala fase, seo se ka ra gore ga ba tshepe bana babo bona. Eupša therešo ke gore go ngwala fase go ka thibela mathata a mantši le dintwa. Le ditabeng tša kgwebo, dula o gopola gore khutšo ya phuthego e bohlokwa go feta tirišano le ge e le efe ya kgwebo.—1 Bakorinthe 6:1-8; bala Tlhaloso 30.

15. Jehofa o ikwa bjang ge batho ba sa botege ditabeng tša kgwebo?

¹⁵ Re swanetše go botegela batho ka moka, go akaretša le bao e sego Dihlatse tša Jehofa. Jehofa o letetše gore re botege. Beibele e re: “Dikala tša bofora di šišimiša Jehofa, eupša sekala sa boima bjo bo feletšego bja leswika se a mo kgahla.” (Diema 11:1; 20:10, 23) Mehleng ya ge Beibele e be e sa ngwalwa, gantši batho ba be ba šomiša dikala dikgwebong tša bona. Eupša borakgwebo ba bangwe ba be ba ropa bareki ka go ba rekišetša dilo tšeo ba bego ba sa dumelelana ka tšona goba ka go ba lefiša tšhelete e ntši. Le lehono, go no swana le mehleng ya ge Beibele e be e sa ngwalwa, batho ba bantši ga ba botege ditabeng tša kgwebo. Go fo swana le ge Jehofa a be a hloile go se botege mehleng yeo, le lehono o sa go hloile.

16, 17. Ke mehuta efe e mengwe ya go se botege yeo re swanetšego go e phema?

 ¹⁶ Ka moka ga rena re kopana le maemo ao a ka dirago gore re se botege, e lego maemo a go swana le ge re nyaka mošomo, re tlatša difomo tša mmušo goba ge re ngwala ditlhahlobo sekolong. Batho ba bantši ba nagana gore ga se phošo go bolela maaka goba go feteletša ditaba. Seo ga se re makatše. Beibele e boletše e sa le pele gore mehleng ye ya bofelo batho e be e tla ba “baithati, barati ba tšhelete, . . . ba go se rate go loka.”—2 Timotheo 3:1-5.

¹⁷ Ka dinako tše dingwe re ka bona eka batho bao ba sa botegego dilo di ba sepelela gabotse. (Psalme 73:1-8) Ngwanabo rena goba kgaetšedi a ka rakwa mošomong, a ropiwa ditšhelete goba a swarwa gampe mošomong feela ka gobane a botega. Eupša go botega go bohlokwa go feta dilo tšeo ka moka. Ka baka la’ng?

18. Ke ka baka la’ng go le bohlokwa gore batho ba re tsebe ka go botega?

¹⁸ Go tsebega ka go botega go bohlokwa kudu, eupša lehono batho ba bantši ga ba botege. Ka gona, ka moka ga rena re swanetše go šoma ka thata gore batho ba re tsebe ka go botega. (Mika 7:2) Ke therešo gore batho ba bangwe ba ka go kwera ba ba ba go bitša setlaela ge o botega. Eupša ba bangwe ba tla go hlompha gomme ba go tshepa. Lefaseng ka moka, Dihlatse tša Jehofa di tsebja ka go botega. Bahiri ba bangwe ba rata go hira Dihlatse tša Jehofa ka gobane ba a tseba gore di tla botega mošomong.  Dihlatse tša Jehofa di ile tša tlogelwa ge bašomi ba bangwe ba be ba rakwa mošomong ka baka la go se botege.

19. Jehofa o ikwa bjang ge o botega?

¹⁹ Go botega dilong tšohle go tla dira gore o be le letswalo le lebotse le khutšo ya monagano. Re ka swana le Paulo, yo a ngwadilego gore: “Re holofela gore re na le letswalo le botegago.” (Baheberu 13:18) Sa bohlokwa le go feta ke gore Tatago rena yo lerato e lego Jehofa, o a go bona ge o botega dilong ka moka e bile o kgahlwa ke seo.—Bala Psalme 15:1, 2; Diema 22:1.