1, 2. Re ka dira’ng gore re tiiše segwera sa rena le Jehofa?

KA MOKA ga rena re nyaka go phela gabotse mmeleng. Ka gona re leka go ja dijo tše di fepago mebele ya rena, re itšhidulla ka mehla e bile re hlokomela mebele ya rena. Gaešita le ge go dira dilo tše go se bonolo, mafelelo e ba a mabotse gomme seo sa dira gore re thabe. Ka gona, ga re fele matla. Eupša re swanetše go phela gabotse mmeleng ka kgopolo e nngwe.

² Gaešita le ge re gatile kgato e botse ya gore re ithute ka Jehofa, re swanetše go dula re tiiša segwera sa rena le yena. Ge Juda a be a kgothaletša Bakriste gore ba “[dule] leratong la Modimo,” o ile a bontšha kamoo ba ka dirago seo ka gona. O itše: “Ikageng tumelong ya lena e kgethwakgethwa.” (Juda 20, 21) Bjale re ka dira’ng gore re be le tumelo e tiilego gomme re dule leratong la Modimo?

3-5. (a) Sathane o nyaka gore o ikwe bjang ka melao ya Jehofa? (b) O ikwa bjang ka melao le melao ya motheo ya Jehofa?

³ Kgodišega gore ge o ekwa melao ya Jehofa o tla holega. Sathane o nyaka gore o dumele gore go phela ka melao ya Jehofa go boima, le gore o tlo thaba kudu ge o ka  ikgethela gore se se lokilego ke sefe, le gore se sebe ke sefe. Sathane o be a dutše a leka gore batho ba dumele maaka ao ga e sa le go tloga tšhemong ya Edene. (Genesi 3:1-6) Le lehono o sa dutše a leka ka thata gore batho ba dumele maaka ao.

⁴ Na Sathane o bolela nnete? Na melao ya Jehofa e a re gatelela? Aowa. Ka mohlala, a re re o sepela phakeng e botse kudu. Ge o dutše o sepela o bona terata e teleletelele yeo e šireleditšego lefelo le itšego. Mohlomongwe o ka ipotšiša gore: ‘Ke ka baka la’ng ba thibile ka terata mo?’ Ge o dutše o ipotšiša, o kwa tau e rora ka kua ga terata. Ga bjale o ikwa bjang ka terata yeo? O a thaba ka gobane e go šireleditše gore tau e se go rathaganye! Melao ya Jehofa e swana le terata yeo gomme Sathane o swana le tau yeo. Lentšu la Modimo le re lemoša ka gore: “Dulang le hlaphogetšwe, le phakgame. Lenaba la lena Diabolo o sepelasepela go swana le tau e rorago, a nyaka yo a kago go mo metša.”—1 Petro 5:8.

⁵ Jehofa o nyaka gore re be le bophelo bjo bobotse kudu. Ga a nyake gore Sathane a re fore. Ke ka baka leo a re filego melao le melao ya motheo gore e re šireletše le go re thabiša. (Baefeso 6:11) Jakobo o ngwadile gore: “Yo a lebeledišišago molaong o phethagetšego wo e lego wa tokologo gomme a o phegelela, . . . o tla thabišwa ke go o dira.”—Jakobo 1:25.

6. Re tseba bjang gore melao ya Jehofa e hola rena?

⁶ Ge re phela ka melao ya Jehofa, re phela bophelo bjo bobotse gomme segwera sa rena le yena se tia le go feta. Ka mohlala, re a holega ge re mo rapela ka mehla. (Mateo 6:5-8; 1 Bathesalonika 5:17) Re a thaba ge re ekwa taelo ya gagwe ya gore re be gona dibokeng ka mehla le go kgothatšana le bana babo rena. Le gona re a thaba ge re  eya tšhemong ka mehla. (Mateo 28:19, 20; Bagalatia 6:2; Baheberu 10:24, 25) Ge re naganišiša kamoo dilo tše di dirilego gore re be le tumelo e tiilego, re kgodišega le go feta gore melao ya Jehofa e hola rena.

7, 8. Ke ka baka la’ng re sa swanela go tšhoga gore re ka tla ra welwa ke mathata nakong e tlago?

⁷ Mohlomongwe re ka tšhoga gore nakong e tlago re ka ba le mathata a magolo gomme ra se sa botegela Modimo. Ge e ba o ka ikwa ka tsela yeo, gopola mantšu a Jehofa ao a rego: “Nna, Jehofa, ke Modimo wa lena, Yo a le rutago gore le holege, Yo a le sepedišago tseleng yeo le swanetšego go sepela ka yona. Ge feela le be le ka ela hloko ditaelo tša ka, gona khutšo ya lena e be e tla etša noka gomme go loka ga lena gwa etša maphoto a lewatle.”—Jesaya 48:17, 18.

 ⁸ Ge re ekwa Jehofa, khutšo ya rena e tla etša noka yeo e dulago e na le meetse. Go loka ga rena go tla etša maphoto a lewatle ao a dulago a le gona. Go sa šetšwe gore re diragalelwa ke eng bophelong re ka dula re botegela Jehofa! Beibele e re: “Lahlela maima a gago go Jehofa, gomme yena o tla go thekga. Le ka mohla a ka se dumelele gore moloki a šišinyege.”—Psalme 55:22.

9, 10. Motho yo a godilego moyeng ke wa mohuta mang?

⁹ Ge o dutše o tiiša segwera sa gago le Jehofa o tlo ‘phegelela kgolong’ goba go gola moyeng. (Baheberu 6:1) Go gola moyeng go bolela’ng?

¹⁰ Ga se gore motho o ba Mokriste yo a gotšego moyeng feela ka gobane a gotše ka mengwaga. E le gore motho a gole moyeng, o swanetše gore e be Mogwera wa Jehofa yo mogolo gomme a leke go dira dilo ka tsela yeo Jehofa a di dirago ka yona. (Johane 4:23) Paulo o ngwadile gore: ‘Bao ba dumelelanago le nama ba bea menagano ya bona dilong tša nama, eupša bao ba dumelelanago le moya ba bea menagano ya bona dilong tša moya.’ (Baroma 8:5) Motho yo a gotšego moyeng ga a tshwenyege kudu ka maipshino a lefase le dilo tša maemo. Go e na le moo, o tshwenyegile kudu ka go hlankela Jehofa le go dira diphetho tše dibotse bophelong. (Diema 27:11: bala Jakobo 1:2, 3.) Ga a nyake gore go be le selo seo se mo dirišago dilo tše mpe. Motho yo a gotšego moyeng o tseba seo se lokilego gomme o dula a ikemišeditše go se dira.

11, 12. (a) Ke’ng seo Paulo a se boletšego ka ‘matla a go hlatha’ a Mokriste? (b) Go tia moyeng go swana bjang le go ba ramabelo?

¹¹ Go ba motho wa moya go nyaka gore re šome ka thata. Moapostola Paulo o ngwadile gore: “Dijo tše di  tiilego ke tša batho ba ba godilego moyeng, bao ba tlwaeditšego matla a bona a go hlatha ka go a diriša, e le gore ba kgethologanye se se nepagetšego le se se fošagetšego.” (Baheberu 5:14) Lentšu “tlwaeditšego” le ka re gopotša ka ramabelo yo a itlwaetšago go kitima.

¹² Ge re bona ramabelo a kitima ka lebelo papading, re a tseba gore go mo tšere nako gore a itlwaetše. Ga se a belegwa e le ramabelo. Ka mohlala, ngwana ga a belegwe a kgona go šomiša matsogo a gagwe le maoto. Eupša ge nako e dutše e eya, o ithuta go swara dilo le go sepela. Le gona ge a gola gomme a itlwaetša go kitima, a ka ba ramabelo. Ka mo go swanago, go tšea nako gore re itlwaetše go ba Bakriste bao ba gotšego moyeng.

13. Re ka thušwa ke’ng gore re nagane go swana le Jehofa?

¹³ Pukung ye, re ithutile kamoo re ka naganago go swana le Jehofa le kamoo re ka lebelelago dilo go swana le yena. Re ithutile kamoo re ka hlomphago melao ya Jehofa le go e rata. Ge re dira diphetho, re swanetše go ipotšiša gore: ‘Ke melao efe goba melao efe ya motheo ya Beibele yeo e ka nthušago boemong bjo? Nka e diriša bjang? Jehofa o be a ka nyaka ke dira’ng boemong bjo?’—Bala Diema 3:5, 6; Jakobo 1:5.

14. Re swanetše go dira’ng ge e ba re nyaka go tiiša tumelo ya rena?

¹⁴ Re swanetše go dula re tiiša tumelo ya rena. Go no swana le ge go ja dijo tša phepo go dira gore mebele ya rena e tie, le go ithuta ka Jehofa go tiiša tumelo ya rena. Ge re thoma go ithuta Beibele, re ithuta ditherešo tše bohlokwa ka Jehofa le melao ya gagwe. Eupša ge nako e dutše e eya re swanetše go kwešiša dithuto tše di tseneletšego tša Beibele. Se ke sona seo Paulo a se boletšego ge a be a re: “Dijo tše di tiilego ke tša batho ba ba godilego moyeng.” Ge re diriša seo re ithutago sona, re ba le bohlale.  Beibele e re: “Bohlale ke selo se segolo.”—Diema 4:5-7; 1 Petro 2:2.

15. Go rata Jehofa le bana babo rena le dikgaetšedi go bohlokwa gakaaka’ng?

¹⁵ Motho a ka ba a phetše gabotse mmeleng, eupša e le gore a dule a le ka tsela yeo, o swanetše go tšwela pele a itlhokomela. Ka mo go swanago, motho yo a gotšego moyeng o a tseba gore o swanetše go šoma ka thata gore a dule a na le segwera se se tiilego le Jehofa. Paulo o re gopotša gore: “Dulang le itekola go bona ge e ba le sa le tumelong, dulang le itlhatsela seo lena ka noši le lego sona.” (2 Bakorinthe 13:5) Eupša ga se gore go ba le tumelo e tiilego go lekane. Re swanetše go tšwela pele re rata Jehofa le bana babo rena. Paulo o itše: “Ge e ba ke na le . . . tsebo . . . ge e ba ke na le tumelo yohle gore ke šuthiše dithaba, eupša ke se na lerato, gona ga ke selo.”—1 Bakorinthe 13:1-3.

16. Sathane o nyaka gore re ikwe bjang?

¹⁶ Sathane o nyaka gore re dumele gore re ka se tsoge re kgahlišitše Jehofa. O nyaka gore re nyame le go ikwa eka mathata a rena a ka se tsoge a fedile. Ga a nyake gore re dumele gore bana babo rena ba a re rata, le gona ga a nyake gore re thabe. (Baefeso 2:2) Sathane o a tseba gore ge re nagana dilo tše di fošagetšego, seo se ka re gobatša, sa ba sa senya segwera sa rena le Jehofa. Eupša Jehofa o re neile selo seo se ka re thušago go phema dikgopolo tše di fošagetšego. O re neile kholofelo.

17. Ke ka baka la’ng kholofelo e le bohlokwa?

¹⁷ Go 1 Bathesalonika 5:8, Beibele e swantšha tumelo ya rena le kefa yeo e šireletšago hlogo ya lešole ntweng,  e e bitša “kholofelo ya phološo.” Kholofelo yeo re nago le yona dilong tšeo Jehofa a re holofeditšego tšona, e ka šireletša menagano ya rena gomme ya re thuša gore re se ke ra nagana dilo tšeo di sa kgahlego Modimo.

18, 19. Kholofelo yeo Jesu a bego a na le yona e ile ya mo thuša bjang?

¹⁸ Kholofelo yeo Jesu a bego a na le yona e ile ya mo dira gore a kgotlelele maemo a thata. Bošegong bja mafelelo ge a be a le mo lefaseng, o ile a lebeletšana le maemo a thata ka go latelana. Yo mongwe wa bagwera ba gagwe o ile a mo eka. Yo mongwe a mo latola. Ba bangwe ba mo tšhabela. E bile batho ba nageng ya gabo ba ile ba mo fetogela gomme ba gapeletša gore a bolawe gasehlogo koteng. Ke’ng seo se ilego sa mo thuša gore a kgotlelele dilo tše? Beibele e araba ka gore: “Ka baka la lethabo leo le bego le beilwe pele ga gagwe o ile a kgotlelela kota  ya tlhokofatšo, a se be le taba le go hlabišwa dihlong gomme a dula ka letsogong la le letona la sedulo sa bogoši sa Modimo.”—Baheberu 12:2.

¹⁹ Jesu o be a tseba gore ge a be a ka botega, seo se be se tla dira gore Tatagwe a tumišwe gomme go bonagale gore Sathane ke Ramaaka. Kholofelo yeo e ile ya dira gore a thabe kudu. O be a tseba gore e se kgale o be a tla kopana le Tatagwe gape legodimong. Kholofelo ye e ile ya mo thuša gore a kgotlelele. Go swana le Jesu, le rena re swanetše go nagana kudu ka kholofelo yeo re nago le yona e sego mathata a rena. E tla re thuša gore re kgotlelele go sa šetšwe seo se ka re diragalelago.

20. O ka thušwa ke’ng gore kholofelo ya gago e se ke ya fela?

²⁰ Jehofa o a go bona ge o bontšha tumelo le ge o kgotlelela. (Jesaya 30:18; bala Maleaki 3:10.) O go holofetša gore “o tla go nea tše pelo ya gago e di kgopelago.”  (Psalme 37:4) Ka gona, dula o nagana ka kholofelo yeo o nago le yona. Sathane o nyaka gore o se sa ba le kholofelo gomme o bone eka ditšhegofatšo tša Jehofa di ka se tsoge di phethagetše. Eupša o se ke wa dumela seo! Ge o bona eka kholofelo ya gago e a fela, kgopela Jehofa gore a go thuše. Gopola mantšu ao a lego go Bafilipi 4:6, 7, ao a rego: “Le se ke la belaela ka selo, eupša dilong tšohle tsebišang Modimo dikgopelo tša lena ka thapelo le ka topo gotee le ka go leboga; ke moka khutšo ya Modimo yeo e fetago kwešišo yohle ya batho e tla diša dipelo tša lena le matla a lena a monagano ka Kriste Jesu.”

21, 22. (a) O na le kholofelo efe ka bokamoso? (b) O ikemišeditše go dira’ng?

²¹ Dula o naganišiša ka dilo tše dibotse tšeo re tlago go di hwetša nakong e tlago. E se kgale, batho ka moka ba tla be ba rapela Jehofa. (Kutollo 7:9, 14) Nagana kamoo bophelo bo tlago go ba ka gona lefaseng le lefsa. E tlo ba bophelo bjo bo thabišago kudu! Sathane, batemona ba gagwe le dilo ka moka tše mpe di tla be di se gona. O ka se sa babja, e bile o ka se sa hwa. Go e na le moo, letšatši le lengwe le le lengwe o tlo tsoga o na le matla e bile o ipshina ka bophelo. Batho ba tlo šoma mmogo gore ba dire lefase paradeise. Batho ka moka ba tlo ba le dijo tše dintši le go phela mo go šireletšegilego. Batho ba ka se be sehlogo goba ba ba šoro, eupša ba tlo ratana e le ka kgonthe. Ge nako e dutše e eya, motho yo mongwe le yo mongwe o tlo thabela “tokologo ya letago ya bana ba Modimo.”—Baroma 8:21.

²² Jehofa o nyaka gore o be Mogwera wa gagwe. Ka gona, dira sohle seo o ka se kgonago gore o kwe Jehofa gomme o dule o le mogwera wa gagwe. Eka ka moka ga rena re ka dula leratong la Modimo ka mo go sa felego!—Juda 21.