1. Jesu o be a tshwenyegile ka eng bošegong bja pele ga ge a ka bolawa?

E BE e le bošegong bja pele ga ge Jesu a ka bolawa. O be a tseba gore o kgauswi le go tlogela barutiwa ba gagwe gomme o be a tshwenyegile ka bokamoso bja bona. O ile a ba botša gore: ‘Ga le karolo ya lefase.’ (Johane 15:19) Ka morago, o ile a rapela Tatagwe mabapi le barutiwa ba gagwe, a re: “Bona ga se karolo ya lefase go etša ge nna ke se karolo ya lefase.” (Johane 17:15, 16) Jesu o be a era gore’ng?

2. “Lefase” leo Jesu a bego a bolela ka lona ke’ng?

² Mo ge go bolelwa ka “lefase,” go bolelwa ka batho bao ba sa hlankelego Modimo bao ba bušwago ke Sathane. (Johane 14:30; Baefeso 2:2; Jakobo 4:4; 1 Johane 5:19) Re ka dira’ng gore ‘re se be karolo ya lefase’? Kgaolong ye, re tlo bolela ka ditsela tše mmalwa tša go dira seo: Re dula re botegela Mmušo wa Modimo ka go se tšee karolo dipolotiking. Re gana moya wa lefase. Re apara ka bothakga le go ikgabiša gabotse, e bile ga re rate tšhelete ka mo go feteletšego. Re apara ditlhamo tšeo Modimo a re neago tšona.—Bala Tlhaloso 16.

3. Jesu o be a lebelela dipolotiki bjang?

³ Ge Jesu a be a le mo lefaseng, o ile a bona gore batho ba be ba na le mathata a mantši le gore ba be ba phela bophelo bjo boima. O be a tloga a tshwenyegile ka bona e bile a nyaka go ba thuša. Na o ile a ba moetapele wa dipolotiki? Aowa. O be a tseba gore seo batho ba bego ba tloga ba se hloka e be e le Mmušo wa Modimo. Jesu e be e tlo ba Kgoši ya Mmušo woo, gomme o be a bolela kudu ka wona. (Daniele 7:13, 14; Luka 4:43; 17:20, 21) Jesu o be a sa tsenatsenane le ditaba tša dipolotiki e bile o be a sa tšee karolo go tšona. Ge Jesu a be a le pele ga Mmuši wa Moroma e lego Pontio Pilato, o itše: “Mmušo wa ka ga se karolo ya lefase le.” (Johane 18:36) Barutiwa ba gagwe le bona ba be ba sa tšee karolo dipolotiking. Puku ya “On the Road to Civilization,” e boletše gore Bakriste ba lekgolong la pele la mengwaga “ba be ba sa be le maemo a itšego dipolotiking.” Lehono, Bakriste ba therešo ga ba tšee karolo dipolotiking. Re thekga Mmušo wa Modimo ka mo go feletšego e bile ga re tšee karolo ditabeng tša dipolotiki tša lefase le.—Mateo 24:14.

4. Bakriste ba therešo ba thekga bjang Mmušo wa Modimo?

⁴ Batseta ba emela mmušo wa bona ba le nageng e nngwe, ka gona, ga ba tsenatsenane le ditaba tša dipolotiki tša nageng yeo. Go bjalo le ka Bakriste ba tloditšwego bao ba nago le kholofelo ya go buša le Kriste legodimong. Paulo o ile a ba ngwalela gore: “Re batseta bao ba emetšego Kriste legato.” (2 Bakorinthe 5:20) Batlotšwa ba emela Mmušo wa Modimo. Ga ba tsenatsenane le ditaba tša dipolotiki le tša mebušo ya lefase le. (Bafilipi 3:20) Go e na le moo, batlotšwa ba thušitše batho ba  dimilione go ithuta ka Mmušo wa Modimo. Bakriste ba “dinku tše dingwe” bao ba nago le kholofelo ya go tlo phela ka mo go sa felego lefaseng le lefsa la Modimo, ba thekga batlotšwa. Le bona ba dula ba sa tšee karolo dipolotiking. (Johane 10:16; Mateo 25:31-40) Ruri ga go na Mokriste wa therešo yo a ka tsenatsenanago le dipolotiki.—Bala Jesaya 2:2-4.

5. Ke ka baka la’ng Bakriste ba sa ye ntweng?

⁵ Bakriste ba therešo ba tšea badumedigotee le bona e le ba gabo bona, e bile ke batee go sa šetšwe gore ba tšwa nageng efe goba ba goletše maemong afe. (1 Bakorinthe 1:10) Ge e ba re ka ya ntweng, re tla be re eya go lwa le lapa la gabo rena, e lego badumedi gotee le rena bao Jesu a re laetšego gore re ba rate. (Johane 13:34, 35; 1 Johane 3:10-12) Go feta moo, Jesu o boditše barutiwa ba gagwe gore ba rate manaba a bona.—Mateo 5:44; 26:52.

6. Bahlanka ba Jehofa bao ba ineetšego ba lebelela bjang mebušo?

 ⁶ Ka ge re le Bakriste ga re tšee karolo dipolotiking, re šoma ka thata gore re be badudi ba ba lokilego. Ka mohlala, re hlompha babuši ka go kwa melao ya bona le go patela metšhelo. Eupša re dula re kgonthišetša gore re fa ‘Modimo tša Modimo.’ (Mareka 12:17; Baroma 13:1-7; 1 Bakorinthe 6:19, 20) Dilo “tša Modimo” di akaretša go mo rata, go mo kwa le go mo hlankela. Re ikemišeditše go lahlegelwa le ke maphelo a rena go e na le gore re se kwe Jehofa.—Luka 4:8; 10:27; bala Ditiro 5:29; Baroma 14:8.

7, 8. “Moya wa lefase” ke’ng, gomme o dira gore batho ba itshware bjang?

⁷ Go se be karolo ya lefase go bolela gore ga re dumelele “moya wa lefase” o re laola. Moya wo ke tsela ya go nagana goba ya go dira dilo yeo e tutuetšwago ke Sathane, gomme moya woo o laola bao ba sa hlankelego Jehofa. Eupša Bakriste ba ganetša moya woo. Bjalo ka ge Paulo a boletše, “ga se ra amogela moya wa lefase, eupša re amogetše moya o tšwago go Modimo.”—1 Bakorinthe 2:12; Baefeso 2:2, 3; bala Tlhaloso 17.

⁸ Moya wa lefase o dira gore batho ba ipone ba le bohlokwa kudu go feta ba bangwe, ba ikgogomoše e bile ba se kwe. Moya woo o ba dira gore ba nagane gore ga se ba swanela go kwa Modimo. Sathane o nyaka gore batho ba dire seo ba se nyakago ntle le go nagana ka ditlamorago. O nyaka gore batho ba nagane gore “kganyogo ya nama le kganyogo ya mahlo” ke tšona dilo tša bohlokwa kudu bophelong. (1 Johane 2:16; 1 Timotheo 6:9, 10) Diabolo o leka ka gohle go lahletša bahlanka ba  Jehofa le go leka go dira gore ba nagane go swana le yena.—Johane 8:44; Ditiro 13:10; 1 Johane 3:8.

9. Moya wa lefase o ka re fetela bjang?

⁹ Moya wa lefase o gohle go swana le moya wo re o hemago. Ge e ba re sa leke ka thata go o ganetša, o tlo re fetela. (Bala Diema 4:23.) O ka thoma ka ditsela tše di ka bonalago di se na bothata, tše bjalo ka go itesa o laolwa ke dikgopolo tša batho bao ba sa hlankelego Jehofa. (Diema 13:20; 1 Bakorinthe 15:33) Goba o ka re fetela ka dilo tše bjalo ka go bogela diswantšho tša batho bao ba sa aparago, go theetša bahlanogi goba o ka re fetela ka dipapadi tša go phadišana.—Bala Tlhaloso 18.

10. Re ka ganetša bjang moya wa lefase?

¹⁰ Re ka phema bjang go laolwa ke moya wa lefase? Re swanetše go dula re gwerane le Jehofa le go dumelela bohlale bja gagwe bo re hlahla. Re swanetše go dula re mo kgopela moya wa gagwe o mokgethwa ka thapelo le go dula re swaregile tirelong ya gagwe. Jehofa o na le matla go feta batho ka moka. Re kgodišegile gore a ka kgona go re thuša go lwantšha moya wa lefase.—1 Johane 4:4.

11. Moya wa lefase o dira gore batho ba apare bjang?

¹¹ Re bontšha gore ga re karolo ya lefase ka tsela yeo re aparago ka yona le go itokiša. Batho ba bantši lefaseng ba apara ka tsela ya go nyaka go bonwa, ya go dira gore batho ba bangwe ba be le dikgopolo tše di tšwelego tseleng, ya go bontšha gore ba nyaka go ipuša setšhabeng goba ba apara ka tsela ya go bontšha gore ba na le tšhelete e ntši. Batho ba bangwe ga ba na taba le gore ba bogega bjang. Ba ka kgetha go dula ba hlakahlakane goba ba le ditšhila. Re ka se ke ra dumelela mokgwa le  ge e le ofe wa lefase le o laola tsela yeo re aparago ka yona le go itokiša.

12, 13. Ke melao efe ya motheo yeo e swanetšego go re thuša ge re kgetha diaparo?

¹² Ka ge re le bahlanka ba Jehofa, re nyaka go dula re apere ka tsela ya bothakga, ya go hlweka le yeo e swanelago maemo ao re tla bego re le go ona. Re apara “ka go se solege le ka go hlaphogelwa ga monagano,” e le gore re bontšhe gore re “ineetše go Modimo.”—1 Timotheo 2:9, 10; Juda 21.

 ¹³ Tsela yeo re aparago ka yona e ka dira gore batho ba bangwe ba rete Jehofa le batho ba gagwe. Re nyaka go dira ‘dilo tšohle gore re tagafatše Modimo.’ (1 Bakorinthe 10:31) Go apara ka bothakga go akaretša go hlompha maikwelo a batho ba bangwe le tsela yeo ba lebelelago dilo ka yona. Ka gona, ge re kgetha diaparo goba tsela yeo re nyakago go bogega ka yona, re swanetše go gopola gore seo se kgoma batho ba bangwe.—1 Bakorinthe 4:9; 2 Bakorinthe 6:3, 4; 7:1.

14. Ke dipotšišo dife tšeo re swanetšego go ipotšiša tšona ge re kgetha diaparo tša go ya dibokeng goba tšhemong?

¹⁴ Re apara bjang ge re eya dibokeng goba tšhemong? Na re apara ka tsela ya go nyaka go bonwa? Na diaparo tša gago di dira gore ba bangwe ba tšhabe go go lebelela? Na re ipotša gore tsela yeo re aparago ka yona ga se taba ya motho yo mongwe? (Bafilipi 4:5; 1 Petro 5:6) Ke therešo gore ka tlhago re nyaka go bogega gabotse, eupša dika tša Bokriste ke tšona di tla dirago gore re bogege gabotse. Dika tšeo ke tšeo Jehofa a di bonago ge a re lebelela. Di bontšha seo re lego sona ka gare, e lego ‘motho wa sephiring wa pelo yo e lego wa bohlokwa bjo bogolo mahlong a Modimo.’—1 Petro 3:3, 4.

15. Ke ka baka la’ng Jehofa a sa re botše ka go lebanya gore re apare bjang?

¹⁵ Jehofa ga se a re nea melao ya kamoo re swanetšego go apara ka gona. Go e na le moo, o re neile melao ya motheo ya Beibele yeo e ka re thušago go kgetha moaparo gabotse. (Baheberu 5:14) O nyaka gore diphetho tša rena, go sa šetšwe gore ke tše dikgolo goba ke tše dinyenyane, di bontšhe gore re a mo rata e bile re rata le batho ba bangwe. (Bala Mareka 12:30, 31.) Lefaseng ka moka, batho ba Jehofa ga ba apare ka go swana go ithekgile  ka setšo sa bona le gore ba rata eng. Go apara ga bona ka go se swane go dira gore ba kgahliše.

16. (a) Satane o dira gore batho ba lebelele tšhelete bjang, gona Jesu o rutile’ng mabapi le tšhelete? (b) Re swanetše go ipotšiša dipotšišo dife?

¹⁶ Sathane o nyaka gore batho ba nagane gore tšhelete le dilo tša maemo a godimo di ka dirago gore ba thabe, eupša bahlanka ba Jehofa ba a tseba gore seo ga se nnete. Re tshepa mantšu a Jesu ao a rego: “Gaešita le ge motho a atetšwe ke dilo, fela bophelo bja gagwe ga bo tlišwe ke dilo tše a nago le tšona.” (Luka 12:15) Tšhelete  e ka se dire gore re thabe e le ka kgonthe. E ka se dire gore re be le bagwera ba kgonthe, khutšo ya kgonthe ya monagano goba bophelo bjo bo sa felego. Ke nnete gore re nyaka go ba le dilo tše dibotse e bile re nyaka go thabela bophelo. Eupša Jesu o re rutile gore re tlo thaba ge re na le tswalano e botse le Modimo le ge re etiša pele borapedi bja rena. (Mateo 5:3; 6:22) Ipotšiše gore: ‘Na ke goketšwa ke tsela yeo batho ba lebelelago tšhelete ka yona? Na ke dula ke nagana ka tšhelete le go bolela ka yona?’—Luka 6:45; 21:34-36; 2 Johane 6.

17. Bophelo bja gago bo tlo kaonefala bjang ge o sa lebelele tšhelete go swana le ka tsela yeo batho bao ba sa hlankelego Modimo ba e lebelelago ka yona?

¹⁷ Bophelo bja rena bo tla ba le morero ge e ba re dula re swaregile ka go hlankela Jehofa gomme re sa lebelele tšhelete ka tsela yeo batho bao ba sa hlankelego Modimo ba e lebelelago ka yona. (Mateo 11:29, 30) Re tlo kgotsofala, ra ba le khutšo ya monagano gomme ra thaba. (Mateo 6:31, 32; Baroma 15:13) Re ka se belaele kudu ka dilo tša maemo. (Bala 1 Timotheo 6:9, 10.) Re tlo ba le lethabo leo le tlišwago ke moya wa go fa. (Ditiro 20:35) Tsela yeo re phelago ka yona e tlo dira gore re be le nako e ntši ya go ba le batho bao re ba ratago. E bile seo se tla re dira gore re robale boroko.—Mmoledi 5:12.

18. Ke’ng seo Sathane a lekago go re dira sona?

¹⁸ Sathane o leka ka gohle go senya segwera sa rena le Jehofa, ka gona re swanetše go leka ka thata go se šireletša. Re lwa le “madira a kgopo a moya,” e lego Sathane le batemona ba gagwe. (Baefeso 6:12) Sathane le batemona  ba gagwe ga ba nyake gore re thabe goba gore re tle re phele ka mo go sa felego. (1 Petro 5:8) Manaba a a matla a lwa le rena, eupša re ka a fenya ka thušo ya Jehofa.

19. Lengwalo la Baefeso 6:14-18 le hlalosa bjang “ditlhamo” tšeo Mokriste a swanetšego go itlhama ka tšona?

¹⁹ Mehleng ya bogologolo, mašole a be a apara ditlhamo tša go itšhireletša ge a be a le ntweng. Ka tsela e swanago, re swanetše go apara “ditlhamo” tšeo Jehofa a re filego tšona. (Baefeso 6:13) Di tlo re šireletša. Re bala ka ditlhamo tšeo lengwalong la Baefeso 6:14-18. Le re: “Ka baka leo, emang le tiile, matheka a lena a tlemilwe ka therešo go etša ka lepanta, le apere sephemelasefega sa toko, gomme dinao tša lena di hlamilwe ka go itokišetša go bolela ditaba tše dibotse tša khutšo. Maemong ka moka, tšeang kotse e kgolo ya tumelo, yeo ka yona le tla kgonago go tima mesebe ka moka e tukago ya yo kgopo. Gape amogelang kefa ya phološo le tšhoša ya moya, ke gore, lentšu la Modimo, mola ka mohuta o mongwe le o mongwe wa thapelo le topo le tšwela pele thapelong mabakeng ohle ka moya.”

20. Re swanetše go dira’ng gore “ditlhamo” di re šireletše?

²⁰ Ge e ba lešole le ka lebala go šireletša karolo e itšego ya mmele wa lona ka tlhamo e itšego, lenaba la lona le tlo le hlasela karolong yona yeo. Ge e ba re nyaka gore “ditlhamo” tša rena di re šireletše, re ka se lebale go apara le ge e ka ba tlhamo e tee. Re swanetše go di apara ka dinako tšohle le go šetša gore di boemong bjo bobotse. Ntwa ya rena e tlo tšwela pele go fihlela lefase la Sathane le fedišwa gomme Sathane le batemona ba gagwe ba fedišitšwe lefaseng. (Kutollo 12:17; 20:1-3) Ka gona, ga se ra swanela go ineela ge e ba re lwantšha dikganyogo  tše di fošagetšego goba mafokodi a itšego!—1 Bakorinthe 9:27.

21. Re ka thušwa ke’ng go lwa le Diabolo?

²¹ Re ka se kgone go lwa le Diabolo ka borena. Eupša ka thušo ya Jehofa re ka kgona go lwa le yena. E le gore re dule re botega, re swanetše go rapela Jehofa, re bale Lentšu la gagwe le go gwerana le bana babo rena le dikgaetšedi. (Baheberu 10:24, 25) Dilo tše di tlo re thuša gore re dule re botegela Modimo le go dula re ikemišeditše go lwela tumelo ya rena.

22, 23. (a) Re ka ipotšiša dipotšišo dife e le gore re bone gore re itokišeditše go lwela tumelo ya rena? (b) Re tlo ithuta ka’ng kgaolong e latelago?

²² Re swanetše go dula re itokišeditše go lwela tumelo ya rena ka dinako ka moka. (Johane 15:19) Maemong a mangwe, Dihlatse tša Jehofa di dira dilo go fapana le batho ba bantši. Ipotšiše gore: ‘Na ke kwešiša lebaka leo re sa dirego dilo tšeo ba bangwe ba di dirago? Na ke dumela gore seo se bolelwago ke Beibele le mohlanka yo a botegago le wa temogo se nepagetše? Na ke ikgantšha ka go ba Hlatse ya Jehofa? (Psalme 34:2; Mateo 10:32, 33) Na nka kgona go hlalosetša ba bangwe ditumelo tša ka?’—Mateo 24:45; Johane 17:17; bala 1 Petro 3:15.

²³ Maemong a mantši, go bonolo go kwešiša seo re swanetšego go se dira e le gore re se be karolo ya lefase. Eupša maemong a mangwe, ga go nape go le bonolo go kwešiša seo. Sathane o leka go re tanya ka ditsela tše di fapafapanego. Tsela e nngwe yeo a e dirišago ke boithabišo le maipshino. Re ka thušwa ke’ng go kgetha boithabišo bja rena gabotse? Re tla ithuta seo kgaolong e latelago.