1, 2. (a) Re swanetše go latela tlhahlo ya mang? (b) Ke dipotšišo dife tšeo re tlago go di araba kgaolong ye?

GE O be o sa le ngwana, go ka direga gore batswadi ba gago ba be ba fela ba go kgopela gore o dire selo seo o bego o sa nyake go se dira. O be o rata batswadi ba gago e bile o tseba gore o swanetše go ba kwa. Lega go le bjalo, go ka direga gore o be o fela o sa nyake go ba kwa.

² Re a tseba gore Jehofa, yena Tatago rena, o a re rata. O a re hlokomela e bile o kgonthišetša gore re na le selo se sengwe le se sengwe seo re se hlokago e le gore re thabele bophelo. O a re hlahla gore re atlege. Ka dinako tše dingwe, o diriša batho ba bangwe go re hlahla. Re swanetše go hlompha bolaodi bja Jehofa. (Diema 24:21) Eupša ke ka baka la’ng ka dinako tše dingwe go le thata go amogela tlhahlo? Ke ka baka la’ng Jehofa a re kgopela gore re latele tlhahlo? Le gona re bontšha bjang gore re hlompha bolaodi bja gagwe?—Bala Tlhaloso 9.

3, 4. (a) Go tlile bjang gore batho ba be le sebe? (b) Ke ka baka la’ng go ka ba thata go latela tlhahlo ya batho ba bangwe?

³ Ka ge re belegwe re le batho ba sebe, re na le mokgwa  wa go se kwe. Se se thomile ka morago ga gore Adama le Efa ba dire sebe. Le ge Jehofa a ba bopile ba se na sebe, ba ile ba ba le sebe ka morago ga gore ba gane go hlompha bolaodi bja gagwe. Go tloga ka nako yeo, batho ka moka ba ile ba belegwa ba na le sebe. Sebe seo dira gore go be thata go amogela tlhahlo ya Jehofa le ya batho ba bangwe. Lebaka le lengwe ke gore batho bao Jehofa a ba dirišago go re nea tlhahlo le bona ba belegwe ba na le sebe.—Genesi 2:15-17; 3:1-7; Psalme 51:5; Baroma 5:12.

⁴ Ka ge re na le sebe, re na le go fela re ikgogomoša. Boikgogomošo bo dira gore go latela tlhahlo go be thata. Ka mohlala, Isiraeleng ya bogologolo, Jehofa o ile a kgetha Moshe gore a etelele batho ba Gagwe pele. Monna yo a bitšwago Kora, yo a bego a hlanketše Jehofa ka mengwaga e mentši, o ile a ikgogomoša gomme a se hlomphe Moshe. Le ge Moshe o be a etelela pele batho ba Modimo, o be a sa ikgogomoše. Ge e le gabotse, o be a hlaloswa e le monna yo a ikokobeditšego kudu yo a bego a phela ka nako yeo. Eupša Kora o be a sa nyake go latela tlhahlo ya Moshe. O ile a ba a dira gore batho ba bantši ba mo thuše go lwa le Moshe. Go ile gwa direga’ng ka Kora le batho bao ba bego ba mo thekga? Jehofa o ile a ba fediša. (Numeri 12:3; 16:1-3, 31-35) Ka Beibeleng re kwa ka mehlala ya batho ba bantši yeo e re rutago gore boikgogomošo bo kotsi.—2 Dikoronika 26:16-21; bala Tlhaloso 10.

5. Batho ba bangwe ba ile ba diriša bjang matla a bona gampe?

⁵ Mohlomongwe o ka ba o kwele polelwana ye e rego, “Ge o nyaka go bona gore motho o bjang, mo fe matla a go laola.” Ga e sa le go tloga kgale batho ba diriša matla a bona gampe. (Bala Mmoledi 8:9.) Ka mohlala, Saulo e be e le monna wa go loka le yo a ikokobeditšego ge Jehofa  a be a mo kgetha gore e be kgoši ya Isiraele. Eupša o ile a dumelela boikgogomošo le mona di gola gomme seo sa dira gore a tlaiše Dafida, monna yo a bego a se na molato. (1 Samuele 9:20, 21; 10:20-22; 18:7-11) Ka morago, Dafida o ile a ba kgoši. O ile a ba e nngwe ya dikgoši tše kaonekaone Isiraeleng. Lega go le bjalo, ge nako e dutše e eya, Dafida le yena o ile a diriša matla a gagwe gampe. O ile a robala le Batseba, e lego mosadi wa Uria, gomme a leka go uta sebe seo ka go romela Uria ntweng gore a yo bolawa.—2 Samuele 11:1-17.

6, 7. (a) Go rata Jehofa go re hlohleletša go dira’ng? (b) Ke’ng seo se tlago go re thuša go kwa Jehofa gaešita le ge go le thata?

⁶ Re hlompha tlhahlo yeo e tšwago go Jehofa ka baka la gore re a mo rata. Ka ge re rata Jehofa go feta selo le ge e le sefe, re nyaka go mo thabiša. (Bala Diema 27:11; Mareka 12:29, 30.) Ga e sa le go tloga tšhemong ya Edene, Sathane o be a dutše a nyaka gore batho ba belaele tsela yeo Jehofa a laolago dilo ka yona. Diabolo o nyaka gore re nagane gore Jehofa ga a na tshwanelo ya go re botša seo re swanetšego go se dira. Eupša re a tseba gore o bolela maaka. Re dumelelana le mantšu a ka Beibeleng ao a rego: “Wena Jehofa Modimo wa rena o swanelwa ke go amogela letago, kgodišo le matla, gobane o bopile dilo ka moka.”—Kutollo 4:11.

⁷ Ge o be o sa le ngwana, go ka direga gore batswadi ba gago ba ile ba go ruta gore o ba kwe, gaešita le ge o be o sa nyake. Ka tsela e swanago, ka ge re le bahlanka ba Jehofa, go ka fela go e ba le dinako tšeo go sego bonolo go kwa Jehofa. Eupša ka ge re rata Jehofa e bile re mo  hlompha, re dira sohle seo re se kgonago gore re mo kwe. Jesu o re beetše mohlala tabeng ye. O ile a kwa Jehofa gaešita le ge go be go le thata. Ke ka baka leo a ilego a botša Tatagwe gore: “Go se phethege thato ya ka eupša go phethege ya gago.”—Luka 22:42; bala Tlhaloso 11.

8. Ditsela tše dingwe tšeo Jehofa a re hlahlago ka tšona ke dife? (Bala lepokisi le le rego, “ Theetša Keletšo.”)

⁸ Lehono, Jehofa o re hlahla ka ditsela tše di fapafapanego. Ka mohlala, o re file Beibele. Go oketša moo, o re file bagolo ka phuthegong. Ge re ekwa batho bao Jehofa a ba kgethilego gore ba re hlahle, re bontšha gore re hlompha bolaodi bja gagwe. Ge e ba re gana thušo ya bona, ge e le gabotse, re tla ba re gana Jehofa. Ge Baisiraele ba be ba gana Moshe, Jehofa ga se a ka a tšeela taba yeo fase, o ile a bona go le bjalo ka ge eka ba gana yena.—Numeri 14:26, 27; bala Tlhaloso 12.

9. Lerato le ka re thuša bjang go latela tlhahlo?

⁹ Ge re hlompha bolaodi, re bontšha le gore re rata bana babo rena le dikgaetšedi. Nagana ka taba ye: Ge go hlagile kotsi ya tlhago, gantši sehlopha sa go hlakodiša batho se šoma gotee gore se phološe batho ba bantši ka mo go ka kgonegago. E le gore sehlopha se šome gabotse, go swanetše go ba le motho yo a se rulaganyago e bile motho yo mongwe le yo mongwe sehlopheng seo o swanetše go latela tlhahlo. Eupša go thwe’ng ge e ba motho yo mongwe a sa latele tlhahlo gomme a no dira seo a se ratago? Le ge a ka ba a ikemišeditše go dira se sebotse, go gana ga gagwe go latela tlhahlo go ka bakela batho bao ba lego sehlopheng mathata, mohlomongwe gwa ba gwa dira gore ba gobale kudu. Ka mo go swanago, ge e ba re sa latele tlhahlo ya Jehofa le ya bao a ba filego matla a go laola, seo se ka gobatša batho ba bangwe. Eupša ge re ekwa Jehofa, re bontšha gore re rata bana babo rena, e bile re hlompha  tsela yeo a dirago dilo ka yona.—1 Bakorinthe 12:14, 25, 26.

10, 11. Ga bjale re tlo ithuta ka’ng?

¹⁰ Selo le ge e le sefe seo Jehofa a re kgopelago gore re se dire, se hola rena. Ge re hlompha bao ba nago le matla a taolo ka lapeng, ka phuthegong le ge re dirišana le baemedi ba mmušo, seo se tlo hola batho ka moka.—Doiteronomio 5:16; Baroma 13:4; Baefeso 6:2, 3; Baheberu 13:17.

¹¹ Ge re kwešiša gore ke ka baka la’ng Jehofa a nyaka gore re hlomphe batho ba bangwe, re tlo kgona go ba hlompha. Ka gona, anke re kweng ka maemo a mararo bophelong ao re ka bontšhago tlhompho go ona.

12. Monna a ka dira’ng go bontšha gore o hlompha bolaodi?

¹² Jehofa ke yena a thomilego lapa e bile o file motho  yo mongwe le yo mongwe boikarabelo ka lapeng. Ge motho yo mongwe le yo mongwe a kwešiša seo Jehofa a se letetšego go yena, lapa ka moka le tlo šoma gabotse gomme la holega. (1 Bakorinthe 14:33) Jehofa o dirile gore monna e be hlogo ya lapa. Se se bolela gore Jehofa o letetše gore monna a hlokomele mosadi wa gagwe le bana le go ba hlahla ka lerato. Ka gona, o tlo ikarabela go Jehofa ka tsela yeo a ba hlokomelago ka yona. Monna wa Mokriste o botho, e bile o rata lapa la gagwe le go le swara ka tsela yeo Jesu a swarago phuthego ka yona. Ge monna a dira bjalo o bontšha gore o hlompha Jehofa.—Baefeso 5:23; bala Tlhaloso 13.

13. Mosadi a ka dira’ng go bontšha gore o hlompha bolaodi?

¹³ Mosadi wa Mokriste le yena o na le karolo e bohlokwa le e hlomphegago. O thekga monna wa gagwe ka ge a šoma ka thata gore e be hlogo e botse ya lapa. Yena gotee  le monna wa gagwe ba na le boikarabelo bja go ruta bana ba bona. Tsela e nngwe yeo a rutago bana ba gagwe gore ba be le tlhompho ke ka go ba beela mohlala. (Diema 1:8) O hlompha monna wa gagwe e bile o thekga diphetho tša monna wa gagwe. Le ge a sa dumelelane le monna wa gagwe ka selo se itšego, o bolela se a se naganago ka tlhompho. Ge mosadi yo e lego Hlatse ya Jehofa a nyalane le monna yo e sego Hlatse ya Jehofa, o ba le mathata ao a sa swanego le a ba bangwe. Eupša ge e ba a mo rata le go mo hlompha, mohlomongwe seo se ka dira gore ka letšatši le lengwe, monna wa gagwe a nyake go ithuta ka Jehofa le go mo hlankela.—Bala 1 Petro 3:1.

14. Bana ba ka dira’ng go bontšha gore ba hlompha bolaodi?

¹⁴ Bana ba bohlokwa go Jehofa, le gona ba tloga ba hloka go šireletšwa le go hlahlwa. Ge bana ba ekwa batswadi ba bona, ba a ba thabiša. Se bohlokwa le go feta ke gore ge ba ekwa batswadi ba bona ba bontšha gore ba hlompha Jehofa gomme seo se a mo thabiša. (Diema 10:1) Malapeng a mantši, bana ba godišwa ke motswadi o tee. Seo se ka ba thata go motswadi le go bana. Eupša ge bana ba ekwa motswadi yoo e bile ba mo thekga, bophelo bja lapa e tla ba bjo bo thabišago kudu. Ga go na batho bao ba sa dirego diphošo ka lapeng, go sa šetšwe gore maemo a lapa leo ke afe. Eupša lapa le lengwe le le lengwe, le ka thaba ge yo mongwe le yo mongwe ka lapeng a latela tlhahlo ya Jehofa. Se se dira gore Jehofa a retwe, yena yo a thomilego lapa.—Baefeso 3:14, 15.

15. Re ka bontšha bjang gore re hlompha bolaodi ka phuthegong?

¹⁵ Jehofa o re hlahla a diriša phuthego ya Bokriste, e bile o file Jesu matla a go e laola. (Bakolose 1:18) Jesu le  yena o file “mohlanka yo a botegago le wa temogo” boikarabelo bja go ruta batho ba Modimo. (Mateo 24:45-47) Lehono, “mohlanka yo a botegago le wa temogo” ke Sehlopha se Bušago. Sehlopha se Bušago se re nea dijo tša moya tšeo re di hlokago ka nako e swanetšego gomme seo se re thuša gore re dule re na le tumelo e tiilego. Bagolo, bahlanka ba bodiredi le balebeledi ba tikologo ba thekga diphuthego lefaseng ka moka, le gona Sehlopha se Bušago se ba nea tlhahlo. Bana babo rena ba ka moka, ba na le boikarabelo bja go re hlokomela. Ba ikarabela go Jehofa ka tsela yeo ba phethago boikarabelo bja bona. Ka gona, ge re hlompha banna ba, re hlompha Jehofa.—Bala 1 Bathesalonika 5:12; Baheberu 13:17; bala Tlhaloso 14.

16. Ke ka baka la’ng re ka re bagolo le bahlanka ba bodiredi ba kgethwa ka moya o mokgethwa?

¹⁶ Bagolo le bahlanka ba bodiredi ba thuša ditho tša phuthego gore di dule di tiile tumelong le go dula di na le botee. Ke therešo gore banna ba ba belegwe ba na le sebe go no swana le rena. Potšišo ke gore, ba kgethwa bjang? Bana babo rena ba, ba swanetše go fihlelela ditshwanelego tše di hwetšwago ka Beibeleng. (1 Timotheo 3:1-7, 12; Tito 1:5-9) Jehofa o ile a diriša moya wa gagwe o mokgethwa go thuša bangwadi ba Beibele gore ba hlalose ditshwanelego tšeo. Bagolo ba kgopela Jehofa gore a ba nee moya wa gagwe o mokgethwa ge ba boledišana ka ngwanabo rena yo a ka kgethwago gore e be mogolo goba mohlanka wa bodiredi. Go molaleng gore diphuthego di hlahlwa ke Jesu le Jehofa. (Ditiro 20:28) Banna bao ba kgethwago gore ba re thekge le go re hlokomela ke dimpho tše di tšwago go Modimo.—Baefeso 4:8.

17. Ka dinako tše dingwe, kgaetšedi o swanetše go dira’ng go bontšha gore o hlompha bolaodi?

 ¹⁷ Ka dinako tše dingwe o ka hwetša gore ka phuthegong ga go na bagolo goba bahlanka ba bodiredi bao ba ka dirago kabelo e itšego. Gantši bana babo rena bao ba kolobeditšwego ba ka thuša, eupša ge e ba go se na ngwanabo rena yo a kolobeditšwego, gona kgaetšedi a ka swanelwa ke go phetha kabelo yeo ka tlwaelo e phethwago ke ngwanabo rena yo a kolobeditšwego. Ge e ba kgaetšedi a swanetše go phetha kabelo yeo, gona o swanetše go rwala se sengwe hlogong, e ka ba sekhafo, tuku goba kefa. (1 Bakorinthe 11:3-10) Ge a dira bjalo, o bontšha gore o hlompha thulaganyo ya Jehofa ya bohlogo ka lapeng le ka phuthegong.—Bala Tlhaloso 15.

18, 19. (a) Re ithuta’ng go Baroma 13:1-7? (b) Re bontšha bjang gore re hlompha mebušo?

¹⁸ Lehono, Jehofa o dumeletše baemedi ba mmušo gore ba laole batho gomme re swanetše go ba hlompha. Baemedi bao, ba rulaganya gore dinaga goba ditikologo di šome gabotse e bile ba nea badudi ditirelo tše di nyakegago. Bakriste ba kwa taelo yeo e lego go Baroma 13:1-7. (Bala.) Re hlompha “balaodi ba bagolo” e bile re kwa melao ya naga goba ya tikologo yeo re dulago go yona. Melao yeo e ka ama malapa a rena, dikgwebo goba dilo tšeo re nago le tšona. Ka mohlala, re patela lekgetho gomme ra nea baemedi ba mmušo tsebišo ka moka yeo ba e nyakago. Eupša re swanetše go dira’ng ge e ba mmušo o re kgopela go dira selo seo Beibele e se ganago? Moapostola Petro o itše: “Modimo ke mmuši yo re swanetšego go mo kwa go e na le go kwa batho.”—Ditiro 5:28, 29.

 ¹⁹ Ge e ba re swanetše go bolela le moemedi yo a itšego wa mmušo, mohlomongwe moahlodi goba lephodisa, ka mehla re swanetše go bolela le bona ka tlhompho. Bana le bafsa ba Bakriste ba hlompha barutiši ba bona le batho ba bangwe bao ba šomago sekolong seo ba tsenago go sona. Mešomong ya rena, re hlompha bengmešomo ba rena gaešita le ge batho bao re šomago le bona ba sa ba hlomphe. Ge re dira bjalo, re ekiša moapostola Paulo, yo a bego a hlompha baemedi ba mmušo le ge ka dinako tše dingwe go be go le thata go dira bjalo. (Ditiro 26:2, 25) Le ge batho ba bangwe ba sa re sware gabotse, re dula re ba hlompha.—Bala Baroma 12:17, 18; 1 Petro 3:15.

20, 21. Ke dilo dife tše dibotse tšeo di ka diregago ge re hlompha batho ba bangwe?

²⁰ Lefaseng ka moka, batho ba tšwela pele ba nyatša batho ba bangwe. Eupša ga go bjalo ka bahlanka ba Jehofa. Re ikemišeditše go hlompha motho yo mongwe le yo mongwe. Re latela tlhahlo ya moapostola Petro yeo e rego: “Godišang batho ba mehuta ka moka.” (1 Petro 2:17) Ge re hlompha batho ba bangwe, batho bao ba bona seo. Jesu o boletše gore: “Seetša sa lena a se bonege pele ga batho, e le gore ba bone mediro ya lena e mebotse gomme ba nee Tatago lena . . . letago.”—Mateo 5:16.

²¹ Ge re hlompha bolaodi ka lapeng, ka phuthegong le maemong a mangwe bophelong, mohlala wa rena o mobotse o ka dira gore batho ba bangwe ba nyake go ithuta ka Jehofa. Le gona ge re hlompha batho ba bangwe re bontšha gore re hlompha Jehofa ka boyena. Ge re dira bjalo, re thabiša Jehofa e bile re mmotšha gore re a mo rata.