1-3. (a) Re ithuta’ng go Diema 13:20? (b) Ke ka baka la’ng re swanetše go kgetha bagwera ba rena ka bohlale?

NA O kile wa bona ka tsela yeo ngwana a lebelelago batswadi ba gagwe ge ba dira dilo? Gaešita le pele a ka bolela, o šetša dilo ka moka tšeo a di bonago le tšeo a di kwago. Ge a dutše a gola, o thoma go ekiša dilo tšeo batswadi ba gagwe ba di dirago. Ga go makatše ge batho ba bagolo le bona ba thoma go nagana le go dira dilo go swana le batho bao ba fetšago nako e ntši ba na le bona.

² Go Diema 13:20, re ithuta gore: “Yo a sepelago le ba bohlale o tla hlalefa.” Go ya ka lengwalo le, ‘go sepela le’ motho yo mongwe, go bolela gore o kgetha go fetša nako le motho yoo. Se ga se bolele feela go no ba kgauswi le yena. Seithuti se sengwe sa Beibele se boletše gore go sepela le motho yo mongwe go akaretša go mo rata le go ikwa o le kgauswi kudu le yena. Gantši re dira dilo go swana le batho bao re fetšago nako e ntši re na le bona, kudukudu ge re ikwa re le kgauswi kudu le bona.

³ Bagwera ba rena ba ka dira gore re dire dilo tše dibotse goba tše mpe. Diema 13:20 e tšwela pele ka gore: “Yo a gweranago le ditlaela o tla tshereana.” Ka Seheberu, go ‘gwerana le motho yo mongwe’ go ka bolela “go  tlwaelana” le motho yoo, e lego seo se bolelago gore o mogwera wa gagwe. (Diema 22:24; Baahlodi 14:20) Bagwera bao ba ratago Modimo ba tla re kgothaletša go dula re mmotegela. E le gore re kgone go kgetha bagwera ba rena gabotse, anke re boleleng ka mohuta wa batho bao Jehofa a gweranago le bona.

4. (a) Ke ka baka la’ng go ba mogwera wa Modimo e le tšhegofatšo e kgolo kudu? (b) Ke ka baka la’ng Jehofa a ile a bitša Aborahama gore ke ‘mogwera wa gagwe’?

⁴ Jehofa, e lego Mmuši wa legodimo le lefase, o re nea sebaka sa gore re be bagwera ba gagwe. Yeo ke tokelo e kgolo kudu. Jehofa o kgetha bagwera ba gagwe ka bohlale. O gwerana le bao ba mo ratago le bao ba dumelago go yena. Nagana ka Aborahama. O be a ikemišeditše go dira selo se sengwe le se sengwe seo Jehofa a mo kgopelago sona. Aborahama o ile a bontšha gantši gore o botegela Modimo le gore o a mo kwa. O be a ikemišeditše le go dira sehlabelo ka Isaka. Aborahama o be a na le tumelo ya gore ‘Modimo o be a tla kgona go tsoša Isaka gaešita le bahung.’ (Baheberu 11:17-19; Genesi 22:1, 2, 9-13) Aborahama o be a botegela Jehofa e bile o be a mo kwa, ke ka baka leo Jehofa a ilego a mmitša ‘mogwera wa gagwe.’—Jesaya 41:8; Jakobo 2:21-23.

5. Jehofa o gwerana le batho ba mohuta mang?

⁵ Jehofa o lebelela bagwera ba gagwe ba le bohlokwa. Bagwera ba gagwe ba tshwenyega ka gore ba dule ba mmotegela go feta selo le ge e le sefe. (Bala 2 Samuele 22:26.) Ba a mmotegela le go mo kwa ka gobane ba a mo rata. Beibele e re Modimo “o gwerana kgauswi le baloki,” e lego batho bao ba mo kwago. (Diema 3:32) Jehofa o laletša bagwera ba gagwe gore e be baeng “tenteng” ya  gagwe. O ba laletša gore ba mo hlankele le go mo rapela nako e nngwe le e nngwe.—Psalme 15:1-5.

6. Re ka bontšha bjang gore re rata Jesu?

⁶ Jesu o itše: “Ge e ba motho le ge e le ofe a nthata, o tla boloka lentšu la ka gomme Tate o tla mo rata.” (Johane 14:23) Ka gona, e le gore re be bagwera ba Jehofa, re swanetše gore re rate Jesu gomme re dire seo a re rutago sona. Ka mohlala, re kwa ditaelo tšeo Jesu a re laetšego tšona tša gore re dire batho barutiwa. (Mateo 28:19, 20; Johane 14:15, 21) Ka ge re rata Jesu, re “[latela] dikgato tša gagwe kgauswi.” (1 Petro 2:21) Jehofa o a thaba ge a bona re leka ka matla go ekiša Morwa wa gagwe, e ka ba ka seo re se bolelago goba seo re se dirago.

7. Ke ka baka la’ng re swanetše go netefatša gore re gwerana le batho bao e lego bagwera ba Jehofa?

⁷ Bagwera ba Jehofa, ba a tshepega, ba a kwa e bile ba rata Morwa wa gagwe. Na o kgetha bagwera bao Jehofa a ba ratago? Ge e ba bagwera ba gago ba ekiša Jesu e bile ba swaregile ka go ruta ba bangwe ka Mmušo wa Modimo, ba ka go thuša gore o be motho yo mo kaone le go dula o botegela Jehofa.

8. Ke’ng seo o se ratago ka segwera sa Ruthe le Naomi?

⁸ Ka Beibeleng, re ka ithuta ka batho ba bantši bao e bego e le bagwera. Ka mohlala re ka ithuta ka Ruthe le mmatswale wa gagwe Naomi. Basadi ba, ba be ba etšwa dinageng tše di sa swanego le ditšong tše di sa swanego, e bile Naomi o be a feta Ruthe ka mengwaga e mentši. Eupša e ile ya ba bagwera ba bagolo ka baka la gore ka moka ga bona ba be ba rata Jehofa. Ge Naomi a be a nyaka go tloga nageng ya Moaba gore a boele Isiraele, ‘Ruthe, o ile a mo kgomarela.’ O ile a re go Naomi: “Batho  ba geno e tla ba ba gešo, gomme Modimo wa gago ya ba Modimo wa ka.” (Ruthe 1:14, 16) Ruthe o be a kwela Naomi bohloko. Ge ba fihla kua Isiraele, Ruthe o ile a šoma ka thata gore a hlokomele mogwera wa gagwe. Naomi o be a rata Ruthe kudu gomme a mo nea keletšo e botse. Ruthe o ile a mo theetša, ka go re’alo, bobedi bja bona ba ile ba šegofatšwa kudu.—Ruthe 3:6.

9. Ke’ng seo se go kgahlago ka segwera sa Dafida le Jonathane?

⁹ Bagwera ba bangwe bao ba bego ba botegela Jehofa ke Dafida le Jonathane. Jonathane o be a feta Dafida ka mengwaga ye e nyakilego go ba e 30 e bile e be e tla ba kgoši e latelago ya Isiraele. (1 Samuele 17:33; 31:2; 2 Samuele 5:4) Eupša, ge a be a ekwa gore Jehofa o kgethile Dafida gore e be kgoši, ga se a ka a mo jela mona goba a phadišana le yena. Go e na le moo, Jonathane o ile a dira sohle seo a ka se kgonago go thekga Dafida. Ka mohlala, ge Dafida a be a le mathateng, Jonathane o ile a ya go yena “e le gore a yo matlafatša kholofelo ya Dafida go Modimo.” O ile a ba a bea bophelo bja gagwe kotsing e le gore a thuše Dafida. (1 Samuele 23:16, 17) Dafida le yena o be a botegela mogwera wa gagwe. O ile a tshepiša Jonathane gore o tlo hlokomela lapa la gabo, gomme o ile a phetha tshepišo yeo gaešita le ka morago ga ge Jonathane a hwile.—1 Samuele 18:1; 20:15-17, 30-34; 2 Samuele 9:1-7.

10. O ithuta’ng go segwera sa masogana a mararo a Baheberu?

¹⁰ Shaderaka, Meshaka le Abedinego ke bagwera ba bararo ba Baheberu bao ba ilego ba išwa kgole le gagabo bona e sa le bana. Le ge ba be ba le kgole le gagabo bona, ba ile ba thušana gore ba dule ba botegela Jehofa. Ka morago ge ba gotše, tumelo ya bona e ile ya lekwa ge Kgoši Nebukadinetsara a be a ba laela gore ba rapele seswantšho  sa gagwe sa gauta. Shaderaka, Meshaka le Abedinego ba ile ba gana go rapela seswantšho seo gomme ba botša kgoši gore: “Ga re hlankele medimo ya gago, le seswantšho sa gauta seo o se hlomilego re ka se se rapele.” Ge tumelo ya bona e be e lekwa, bagwera ba ba bararo ba ile ba dula ba botegela Modimo wa bona.—Daniele 1:1-17; 3:12, 16-28.

11. Re tseba bjang gore Paulo le Timotheo e be e le bagwera ba bagolo?

¹¹ Ge moapostola Paulo a be a kopana le lesogana leo le bitšwago Timotheo, o ile a bona gore Timotheo o be a rata Jehofa kudu le gore o be a hlokomela phuthego. Ka gona, Paulo o ile a tlwaetša Timotheo gore a thuše bana babo le dikgaetšedi ba mafelong a fapafapanego. (Ditiro 16:1-8; 17:10-14) Timotheo o be a šoma ka thata moo Paulo a ilego a bolela gore: “[Timotheo] o ile a hlankela le nna go tšwetšeng pele ditaba tše dibotse.” Paulo o be a tseba gore Timotheo o be a tla “hlokomela e le ka kgonthe” bana babo le dikgaetšedi. Ge ba dutše ba hlankela Jehofa gotee, Paulo le Timotheo e ile ya ba bagwera ba bagolo.—Bafilipi 2:20-22; 1 Bakorinthe 4:17.

12, 13. (a) Ke ka baka la’ng re swanetše go ba šedi ge re kgetha bagwera gaešita le ka phuthegong? (b) Ke ka baka la’ng moapostola Paulo a ile a nea temošo yeo e lego go 1 Bakorinthe 15:33?

¹² Ka phuthegong, re ka ithuta se sengwe go bana babo rena le dikgaetšedi gomme ra thušana gore re dule re botegela Jehofa. (Bala Baroma 1:11, 12.) Eupša, gaešita le ka phuthegong, re swanetše go ba šedi ge re kgetha bagwera. Re na le bana babo rena le dikgaetšedi ba bantši bao ba tšwago ditšong tše dintši, le bao ba godišitšwego ka tsela e sa swanego le ya rena. Ba bangwe ba sa  tšwa go thoma go kopanela le Dihlatse tša Jehofa, mola ba bangwe ba na le mengwaga e mentši ba hlankela Jehofa. Go tšea nako gore tswalano ya motho le Jehofa e gole, go no swana le ge go tšea nako gore seenywa se butšwe. Ka gona, ga se ra swanela go felelana dipelo eupša re swanetše go ratana gomme re dule re kgetha bagwera ba rena ka bohlale.—Baroma 14:1; 15:1; Baheberu 5:12–6:3.

¹³ Ka dinako tše dingwe ka phuthegong go ka ba le boemo bjo re bego re sa bo letela, bjoo bo ka nyakago gore re be šedi kudu. Mohlomongwe e ka ba boemo bjo  ngwanabo rena goba kgaetšedi a dirago dilo tšeo Beibele e rego di fošagetše. Goba mohlomongwe, motho yo mongwe ka phuthegong a ka thoma go swayaswaya diphošo e lego mokgwa wo o ka senyago phuthego. Eupša seo ga se re makatše, ka baka la gore gaešita le lekgolong la pele la mengwaga, go be go na le mathata ka diphuthegong. Ge e le gabotse, moapostola Paulo o ile a lemoša Bakriste ba mehleng ya gagwe a re: “Le se ke la timetšwa. Ditlwaelano tše mpe di senya mekgwa e holago.” (1 Bakorinthe 15:12, 33) Le gona, Paulo o ile a lemoša Timotheo gore a be šedi ge a kgetha batho bao a bego a nyaka gore e be bagwera ba gagwe ba bagolo. Le rena re swanetše go dira bjalo.—Bala 2 Timotheo 2:20-22.

14. Bagwera bao re ba kgethago ba ka ama tswalano ya rena le Jehofa bjang?

¹⁴ Re swanetše go šireletša segwera sa rena le Jehofa. Segwera seo ke selo se bohlokwa kudu go rena. Ka gona re phema go gwerana le motho le ge e le ofe yoo a ka dirago gore tumelo ya rena e se sa ba matla goba a senya segwera sa rena le Jehofa. Ka mohlala, na o ka tsenya sepontšhe ka meetseng a ditšhila gomme wa letela gore se boe se na le meetse a hlwekilego? Ka mo go swanago, na o ka ba le bagwera bao ba dirago dilo tše mpe gomme wa letela gore o dire dilo tše dibotse? Re swanetše go kgetha bagwera ba rena ba bagolo ka šedi.—1 Bakorinthe 5:6; 2 Bathesalonika 3:6, 7, 14.

15. O ka dira’ng gore o be le bagwera ba babotse ka phuthegong?

¹⁵ Ka phuthegong, o ka hwetša batho bao ba tlogago ba rata Jehofa. E ka ba bagwera ba gago ba bagolo. (Psalme 133:1) O se ke wa nyaka bagwera feela go dithaka tša gago goba bao ba godišitšwego go swana le wena. Gopola gore Jonathane o be a feta Dafida ka mengwaga  e mentši, le gona Ruthe e be e le yo monyenyane kudu go Naomi. Re nyaka go diriša keletšo ya Beibele yeo e rego: “Le katološeng lerato leo le lego dipelong tša lena.” (2 Bakorinthe 6:13; bala 1 Petro 2:17.) Le gona ge o dutše o ekiša Jehofa, batho ba bantši ba tlo nyaka go ba bagwera ba gago.

16, 17. Ge motho yo mongwe ka phuthegong a re kgopišitše, ke’ng seo re sa swanelago go se dira?

¹⁶ Lapa le lengwe le le lengwe le na le ditho tšeo di sa swanego ka dimelo, dikgopolo le tsela yeo ba dirago dilo ka yona. Le ka phuthegong go no ba bjalo. Ka ge re sa swane ka phuthegong, se se dira gore bophelo bo kgahliše, le gona re rutana dilo tše dintši. Eupša ka ge re sa swane, re ka fela re e ba le diphapano le bana babo rena le dikgaetšedi gomme seo sa dira gore ba re tene. Ka dinako tše dingwe ba ka re kgopiša goba ba re kweša bohloko. (Diema 12:18) Na re swanetše go dumelela mathata a bjalo a re nyamiša goba a re dira gore re tlogele phuthego?

¹⁷ Aowa. Le ge motho yo mongwe a ka re kgopiša ka selo le ge e le sefe, ga se ra swanela go tlogela phuthego. Jehofa ga se yena a re kgopišitšego. O re file bophelo le dilo ka moka gore re phele. Re swanetše go mo rata le go mmotegela. (Kutollo 4:11) Phuthego ke mpho yeo Jehofa a re filego yona yeo e re thušago go dula re tiile tumelong. (Baheberu 13:17) Ga re nyake go gana mpho yeo Jehofa a re neago yona feela ka gobane motho yo mongwe ka phuthegong a re kgopišitše.—Bala Psalme 119:165.

18. (a) Ke’ng seo se ka re thušago gore re phedišane gabotse le bana babo rena le dikgaetšedi? (b) Ke ka baka la’ng re swanetše go lebalela batho ba bangwe?

 ¹⁸ Re rata bana babo rena le dikgaetšedi e bile re nyaka go phedišana le bona gabotse. Ka ge Jehofa a tseba gore re na le sebe, ga se a letela gore re se dire diphošo. Ka mo go swanago le rena ga se ra swanela go letela gore bana babo rena ba se dire diphošo. (Diema 17:9; 1 Petro 4:8) Ka moka ga rena re dira diphošo, eupša lerato le tla re thuša go “lebalelana ka bolokologi.” (Bakolose 3:13) Lerato le tla re thibela go tšea taba e nyenyane ra e dira e kgolo. Ke therešo gore ge motho yo mongwe a re kgopišitše, re ka thatafalelwa ke go lebala ka seo a re dirilego sona. Go bonolo gore re galefele motho yo a re kgopišitšego le go mo swara ka pelo. Eupša seo se tla dira gore re se thabe gomme sa re hlafišetša bophelo. Ka lehlakoreng le lengwe, ge re lebalela motho yo a re kgopišitšego, re ka ba le khutšo ya monagano, ka phuthegong gwa ba le botee gomme sa bohlokwa le go feta, ra ba bagwera ba Jehofa.—Mateo 6:14, 15; Luka 17:3, 4; Baroma 14:19.

19. Ke neng moo re swanetšego go kgaotša go gwerana le motho yo a itšego ka phuthegong?

¹⁹ Lapeng leo le thabilego, setho se sengwe le se sengwe se leka ka matla go dira gore ka lapeng go dulwe go thabilwe. Eupša nagana ge yo mongwe ka lapeng a thoma go se sa theetša batswadi ka boomo e bile a ngangabala. Motho yo mongwe le yo mongwe ka lapeng o leka go mo thuša, eupša motho yoo o no gana thušo ka boomo. A ka phetha ka gore a tloge ka gae, goba mohlomongwe hlogo ya lapa ya mo kgopela gore a tšwe ka gae. Le ka phuthegong go ka direga selo sa mohuta woo. Motho  a ka kgetha go tšwela pele a dira dilo tšeo di sa kgahlišego Jehofa le tšeo di senyago phuthego. A ka gana thušo yeo a e newago gomme a bontšha ka ditiro gore ga a sa nyaka go ba setho sa phuthego. A ka kgetha go tlogela phuthego goba a swanelwa ke go kgaolwa. Ge seo se ka direga, Beibele e bolela ka mo go kwagalago gore re “lese go gwerana” le motho yoo. (Bala 1 Bakorinthe 5:11-13; 2 Johane 9-11) Seo se ka ba boima kudu ge e ba motho yoo e le mogwera wa gago goba e le setho sa lapa la geno. Eupša boemong bjo bjalo, re swanetše go botegela Jehofa kudu go feta go botegela motho le ge e le ofe.—Bala Tlhaloso 8.

20, 21. (a) Taba ya go kgaola e bontšha bjang gore Jehofa o a re rata? (b) Ke ka baka la’ng go le bohlokwa gore re kgethe bagwera ka bohlale?

²⁰ Taba ya go kgaola e bontšha gore Jehofa o a re rata. Go kgaola go šireletša phuthego bathong bao ba sa išego felo ka melao ya Jehofa. (1 Bakorinthe 5:7; Baheberu 12:15, 16) Ge re swara batho bao ba kgaotšwego ka tsela yeo Jehofa a nyakago re ba swara ka yona, re bontšha gore re rata Jehofa, leina la gagwe le lekgethwa le melao ya gagwe. (1 Petro 1:15, 16) Go oketša moo, ge motho a kgaolwa, seo se bontšha gore Jehofa o a mo rata. Le gona, tayo ye e bohloko e ka mo thuša gore a bone gore seo a se dirago se fošagetše gomme ya mo tutueletša gore a fetoge. Batho ba bantši bao ba kilego ba kgaolwa, ba ile ba boela go Jehofa gomme phuthego ya ba amogela ka lerato.—Baheberu 12:11.

²¹ Bagwera bao re ba kgethago ba ka re hlohleletša go dira dilo tše dibotse goba tše mpe. Ka gona, go bohlokwa gore re ba kgethe ka šedi. Ge e ba re rata batho bao Jehofa a ba ratago, re tlo dula re na le batho bao ba tlago go re thuša gore re dule re mmotegela.