Go bohle bao ba ratago Jehofa Modimo le Lentšu la gagwe, Beibele:

Jesu o itše: “Le tla tseba therešo gomme therešo e tla le lokolla.” (Johane 8:32) Nagana kamoo o ilego wa ikwa ka gona ge o be o hwetša ditherešo! Go be go thabiša go tseba gore gaešita le ge re phela lefaseng le, leo tletšego ka maaka, re sa dutše re ka ithuta therešo.—2 Timotheo 3:1.

Jehofa Modimo o nyaka gore re tsebe therešo. Le gona ka ge re rata batho, re nyaka go ba botša ka yona. Eupša go hlankela Modimo go akaretša dilo tše dintši. Re swanetše go dira sohle seo re ka se kgonago gore re phele ka melao ya Jehofa ka gobane re hlompha kudu melao ya motheo ya Gagwe. Jesu o hlalositše tsela e nngwe e bohlokwa yeo re ka bontšhago Modimo gore re a mo rata. O itše: “Ge e ba le boloka ditaelo tša ka, le tla dula leratong la ka go etša ge ke bolokile ditaelo tša Tate gomme ke dula leratong la gagwe.”—Johane 15:10.

Jesu o rata Tatagwe kudu, le gona o dira dilo ka moka tšeo Tatagwe a mo kgopelago gore a di dire. Ge e ba re ekiša Jesu ka tsela yeo re phelago ka yona, Jehofa o tla re rata e bile re tlo thaba e le ka kgonthe. Go etša ge Jesu a boletše, “Ge e ba le tseba dilo tše, le a thaba ge e ba le di dira.”—Johane 13:17.

Re holofela gore puku ye e tla go thuša gore o phele ka therešo yeo e lego ka Beibeleng le go go thuša gore o be mogwera wa Modimo. Re rapelela gore lerato la gago go Jehofa le gole gomme o dule “leratong la Modimo . . . ka tebelelo ya bophelo bjo bo sa felego.”—Juda 21.