1, 2. Ke ka baka la’ng o rata Jehofa Modimo?

NA O rata Modimo? Mohlomongwe o mo rata kudu moo e lego gore o šetše o ineetše go yena. Mohlomongwe o tšea Jehofa e le Mogwera wa gago yo mogolo. Eupša Jehofa o go ratile pele wena o ka mo rata. Ka Beibeleng re bala gore: “Re na le lerato gobane o re ratile pele.”—1 Johane 4:19.

² Nagana ka dilo tšeo Jehofa a re diretšego tšona go bontšha gore o a re rata. O re neile legae le lebotse e lego lefase le dilo ka moka tšeo re di hlokago e le gore re ipshine ka bophelo. (Mateo 5:43-48; Kutollo 4:11) O nyaka gore re be bagwera ba gagwe, le gona o dirile gore re kgone go ithuta ka yena. Ge re bala Beibele, re theetša Jehofa. Le gona ge re rapela, o theetša dithapelo tša rena. (Psalme 65:2) O diriša moya o mokgethwa go re hlahla le go tiiša tumelo ya rena. (Luka 11:13) O ile a ba a romela Morwa wa gagwe yo a mo ratago kudu gore a re phološe sebeng le lehung.—Bala Johane 3:16; Baroma 5:8.

3. Re ka dira’ng gore re dule re le bagwera ba babotse ba Jehofa?

³ Nagana ganyenyane ka yo mongwe wa bagwera ba gago yo mogolo yoo a dulago a na le wena dinakong  tše dibotse le tša mathata. Go nyakega maiteko gore segwera sa mohuta woo se dule se tiile. Ka mo go swanago, le rena re swanetše go šoma ka thata gore segwera sa rena le Jehofa se dule se tiile, ka ge e le Mogwera wa rena yo mogolo. Re ka ba bagwera ba gagwe ka mo go sa felego. Ke ka baka leo Beibele e re botšago gore: “Le duleng leratong la Modimo.” (Juda 21) Re ka dira seo bjang? Beibele e araba ka gore: “Se ke seo lerato la Modimo le se bolelago, gore re boloke ditaelo tša gagwe gomme ditaelo tša gagwe ga di boima.”—1 Johane 5:3.

4, 5. (a) Beibele e ra gore’ng ge e re “lerato la Modimo”? (b) Go tlile bjang gore o thome go rata Jehofa?

⁴ Beibele e ra gore’ng ge e re “lerato la Modimo”? Ga e bolele ka lerato leo Modimo a re bontšhago lona, eupša e bolela ka lerato leo rena re mmontšhago lona. Na o sa gopola ge o be o thoma go rata Jehofa?

⁵ Gopola kamoo o ilego wa ikwa ka gona ge o be o ithuta gore Jehofa o nyaka gore o tle o phele ka mo go sa felego lefaseng le lefsa. O ile wa ithuta ka dilo ka moka tšeo a di dirilego gore go tle go be le lefase le lefsa, gomme wa bona gore Jehofa o re neile mpho e bohlokwa kudu ge a be a romela Morwa wa gagwe yo a mo ratago kudu gore a tle mo lefaseng. (Mateo 20:28; Johane 8:29; Baroma 5:12, 18) Ge o be o ithuta kamoo Jehofa a go ratago ka gona, seo se ile sa go kgoma pelo gomme sa go dira gore o mo rate kudu.—Bala 1 Johane 4:9, 10.

6. (a) Go rata motho yo mongwe go akaretša’ng? (b) Go rata ga gago Jehofa go go hlohleleditše go dira’ng?

⁶ Tsela yeo o bego o ikwa ka yona ge o be o thoma go rata Jehofa, e be e no ba mathomomayo. Ka mohlala, ge  o rata motho ga o no mmotša feela gore: “Ke a go rata.” Lerato le dira gore re nyake go direla mogwera wa rena dilo tšeo di tlago go mo thabiša. Ka mo go swanago, go rata ga gago Jehofa go dirile gore o phele ka tsela yeo e tlago go mo thabiša. Ge lerato leo le dutše le gola, go ka direga gore o ile wa ineela go yena gomme ka morago wa kolobetšwa. Ge o be o ineela go Jehofa, o ile wa mo tshepiša gore o tla mo hlankela ka mo go sa felego. (Bala Baroma 14:7, 8.) O ka phelela bjang tshepišo yeo?

7. Ge e ba re rata Jehofa re tlo dira’ng? Tše dingwe tša ditaelo tša gagwe ke dife?

⁷ Ka ge re rata Jehofa, “re [boloka] ditaelo tša gagwe.” Re di boloka bjang? Ka go mo kwa. Ka Beibeleng, re ithuta ka tsela yeo Jehofa a nyakago re phela ka yona. Ka mohlala, Beibele e re botša gore go utswa, go tagwa, go bolela maaka, go ba le thobalano le motho yo o sego wa nyalana le yena, goba go rapela motho le ge e le ofe goba selo le ge e le sefe ka ntle le Jehofa, ke sebe.—1 Bakorinthe 5:11; 6:18; 10:14; Baefeso 4:28; Bakolose 3:9.

8, 9. Re ka tseba bjang seo Jehofa a nyakago re se dira ge e ba go se na molao o lebanyago wa ka Beibeleng, woo o re botšago seo re swanetšego go se dira? Nea mohlala.

⁸ E le gore re kgahliše Jehofa ga se ra swanela go fo kwa ditaelo tša gagwe feela. Ga se a re ngwalela melao e mentši ya kamoo re swanetšego go phela ka gona. Ka gona go tla ba le dinako tšeo go ka se bego le molao o lebanyago wa ka Beibeleng wo o re botšago seo re swanetšego go se dira. Re ka dira bjang diphetho tše dibotse dinakong tšeo? (Baefeso 5:17) Ka Beibeleng re hwetša melao ya motheo. Melao ye ke ditherešo tše bohlokwa tšeo di re thušago go bona tsela yeo Jehofa a lebelelago  dilo ka yona. Le gona ge re dutše re ithuta Beibele, re kgona go tseba Jehofa a le bjalo ka Tate. Re ithuta kamoo a lebelelago dilo ka gona, le gore ke dilo dife tšeo a di ratago le tšeo a di hloilego.—Bala Psalme 97:10; Diema 6:16-19; bala Tlhaloso 1.

⁹ Ka mohlala, re ka thušwa ke’ng go kgetha seo re swanetšego go se lebelela thelebišeneng goba inthaneteng? Jehofa ga a re botše ka go lebanya seo re swanetšego go se dira. Eupša melao ya motheo e re thuša go dira diphetho tše dibotse. Dilo tše dintši tša go ithabiša le go itloša bodutu mehleng ye di tletše ka bošoro le thobalano. Ka Beibeleng, Jehofa o re botša gore “o hloile le ge e le mang yo a ratago bošoro,” e bile o re botša gore “o tla ahlola diotswa.” (Psalme 11:5; Baheberu 13:4) Melao ye ya motheo e ka re thuša bjang gore re dire diphetho tše dibotse? Gateetee ge re tseba gore Jehofa o hloile selo se itšego goba o se lebelela se se sa hlweka, re swanetše go se se dire.

10, 11. Ke ka baka la’ng re ekwa Jehofa?

¹⁰ Ke ka baka la’ng re ekwa Jehofa? Ga re kwe Jehofa ka gobane re tšhaba gore o tlo re otla ge re sa mo kwe goba mohlomongwe re tšhaba go welwa ke mathata ao a tlišwago ke go dira diphetho tše mpe. (Bagalatia 6:7) Re mo kwa ka gobane re mo rata. Go swana le ge bana ba nyaka go thabiša tatago bona, le rena re nyaka go thabiša Tatago rena wa legodimong. Ruri ga go na selo seo se thabišago kudu bophelong go feta go tseba gore re thabiša Jehofa!—Psalme 5:12; Diema 12:2; bala Tlhaloso 2.

¹¹ Ga re kwe Jehofa ge feela go le bonolo goba ge re gapeletšega go mo kwa. Le gona ga re ikgethele gore ke  melao efe ya gagwe yeo re nyakago go ekwa goba yeo re sa nyakego go ekwa. (Doiteronomio 12:32) Go e na le moo, re kwa melao ya gagwe ka moka, go swana le ge mopsalme a ile a bolela gore: “Ke tla rata ditaelo tša gago.” (Psalme 119:47; Baroma 6:17) Re nyaka go swana le Noa yo a ilego a bontšha gore o rata Jehofa ka go dira dilo ka moka tšeo a mo laetšego tšona. Beibele e re Noa “a dira tšona tšeo.” (Genesi 6:22) Na le wena o nyaka gore Jehofa a bolele se se swanago ka wena?

12. Re ka thabiša Jehofa bjang?

¹² Jehofa o ikwa bjang ge re mo kwa? Re ‘thabiša pelo ya gagwe.’ (Diema 11:20; 27:11) E no nagana ka taba ye! Re dira gore Mmopi wa legodimo le lefase a thabe ge re mo kwa. Eupša le ka mohla Jehofa ga a re gapeletše gore re mo kwe. Go e na le moo, o re neile tokologo ya go ikgethela. Se se ra gore re ka ikgethela go dira se se nepagetšego goba se se fošagetšego. Jehofa o nyaka gore re dire diphetho tše dibotse ka gobane re mo rata e le gore re phele bophelo bjo bobotse.—Doiteronomio 30:15, 16, 19, 20; bala Tlhaloso 3.

13, 14. Re tseba bjang gore ditaelo tša Modimo ga di boima? Nea mohlala.

¹³ Go thwe’ng ge e ba re nagana gore go phela ka melao ya Modimo go boima goba gore melao ya gagwe e tla dira gore re se be le tokologo? Beibele e bolela gabotse gore: “Ditaelo tša gagwe ga di boima.” (1 Johane 5:3) Mangwalong a mangwe lentšu “boima” le šomišwa go hlalosa melao e thata kudu goba go hlalosa batho bao ba lekago go laola ba bangwe le go ba kweša bohloko. (Mateo 23:4; Ditiro 20:29, 30) Beibele ya New English  Translation e re: “Ditaelo tša gagwe ga di re imele.” Ee, ditaelo tša Jehofa ga di “boima,” e lego seo se bolelago gore ga go thata go di latela. Selo se sengwe le se sengwe seo a re kgopelago sona ga se boima.

¹⁴ Ka mohlala, nagana o thuša mogwera wa gago go hudugela ntlong e mpsha. Mogwera yoo wa gago o tsentše dilo tša gagwe ka moka ka mapokising. Mapokisi a mangwe ga a imele mola a mangwe a imela kudu moo go nyakegago batho ba babedi gore ba a kuke. Na mogwera wa gago a ka go kgopela gore o kuke lepokisi leo le imelago kudu o nnoši? Aowa, a ka se go kgopele go dira selo sa mohuta woo! Ka baka la’ng? Ka gobane ga a nyake gore o gobale. Jehofa o swana le mogwera yo bjalo, a ka se tsoge a re kgopetše go dira dilo tše boima kudu. (Doiteronomio 30:11-14) Jehofa o a re kwešiša. O “tseba . . . kamoo re bopegilego ka gona, a gopola gore re lerole.”—Psalme 103:14.

15. Ke ka baka la’ng re ka kgodišega gore ditaelo tša Jehofa di hola rena?

¹⁵ Moshe o ile a botša Baisiraele gore ditaelo tša Jehofa di be di tla ba ‘hola ka mehla’ le gore ge ba ka di kwa ba tla ‘dula ba phela.’ (Doiteronomio 5:28-33; 6:24) Le lehono go sa le bjalo. Selo se sengwe le se sengwe seo Jehofa a re kgopelago go se dira se tla re thuša gore re phele gabotse. (Bala Jesaya 48:17.) Tatago rena e lego Jehofa, ka mehla o tseba dinyakwa tša rena. (Baroma 11:33) Beibele e re botša gore: “Modimo ke lerato.” (1 Johane 4:8) Mantšu a a bontšha gore ge Jehofa a dira selo se sengwe le se sengwe o hlohleletšwa ke lerato.

16. Re tseba bjang gore re ka kgona go kwa Modimo gaešita le ge re le batho ba sebe e bile re phela lefaseng la batho ba babe?

 ¹⁶ Ga se ka mehla go lego bonolo go kwa Modimo. Re phela lefaseng le lebe leo le bušwago ke Diabolo. O leka go dira gore batho ba dire dilo tše mpe. (1 Johane 5:19) Re swanetše go lwa le dikgopolo tše di sa phethagalago le maikwelo a rena ao a sa phethagalago, ka ge di ka dira gore re se kwe Modimo. (Baroma 7:21-25) Eupša tsela yeo re ratago Jehofa ka yona e re hlohleletša go dira seo se nepagetšego. Jehofa o a bona ge re dira maiteko a gore re mo kwe, le gona o re thuša ka go re nea moya wa gagwe o mokgethwa. (1 Samuele 15:22, 23; Ditiro 5:32) Moya o mokgethwa ke wona o re thuša go ba le dika tše dibotse tšeo di re thušago gore re kwe Modimo gabonolo.—Bagalatia 5:22, 23.

17, 18. (a) Re tlo ithuta ka’ng pukung ye? (b) Re tlo ithuta ka’ng kgaolong e latelago?

¹⁷ Pukung ye, re tlo ithuta kamoo re ka phelago ka tsela yeo e thabišago Jehofa. Re tlo ithuta le kamoo re ka dirišago melao ya gagwe ya motheo le melao ya gagwe ya boitshwaro maphelong a rena. Gopola gore Jehofa ga a re gapeletše gore re mo kwe. Ge re kgetha go mo kwa, maphelo a rena a tla kaonefala gomme ra ba le bokamoso bjo bobotse. Se bohlokwa le go feta ke gore go kwa Jehofa go tlo mmontšha gore re mo rata kudu.—Bala Tlhaloso 4.

¹⁸ Jehofa o re neile letswalo go re thuša gore re tsebe se se nepagetšego le se se fošagetšego. Ge e ba re tlwaetša matswalo a rena, re tla kgona go “[boloka] ditaelo tša gagwe.” Ka gona, letswalo ke’ng, gona re ka le tlwaetša bjang? Anke re kweng dikarabo tša dipotšišo tše sehlogong se se latelago.