1-3. (a) Batho ba bantši ba ikwa bjang ka mešomo ya bona? (b) Kgaolong ye re tlo araba dipotšišo dife?

LEFASENG ka moka batho ba šoma ka thata gore ba itlhokomele le go hlokomela malapa a bona. Ba bantši ga ba rate mešomo ya bona e bile ba no ya mošomong ka gobane ba gapeletšega. Ge e ba le wena o ikwa ka tsela yeo, o ka dira’ng gore o thabele mošomo wa gago?

² Jehofa o re botša gore: “Motho yo mongwe le yo mongwe a je le go nwa gomme a thabele tše botse tša boitapišo bja gagwe ka moka. Ke mpho ya Modimo.” (Mmoledi 3:13) Jehofa o re bopile re e na le kganyogo ya go nyaka go šoma. O nyaka gore re thabele seo re se dirago.—Bala Mmoledi 2:24; 5:18.

³ Ka gona, re ka thušwa ke eng gore re thabele mošomo wa rena? Bakriste ba swanetše go phema mešomo ya mohuta mang? Re ka dira’ng gore mešomo ya rena e se re šitiše go hlankela Jehofa? Le gona, ke mošomo ofe o bohlokwa kudu wo re ka o dirago?

4, 5. Jehofa o lebelela mošomo bjang?

⁴ Jehofa o rata go šoma. Genesi 1:1 e re: “Mathomong Modimo o hlodile magodimo le lefase.” Ge Modimo a fetša go bopa lefase le dilo ka moka tše di lego go lona,  o ile a bolela gore tlholo ya gagwe ke e ‘botse kudu.’ (Genesi 1:31) Mmopi wa rena o be a kgotsofaditšwe ke seo a se dirilego.—1 Timotheo 1:11.

⁵ Jehofa ga se a ka a tlogela go šoma. Jesu o itše: “Tate o tšwetše pele a šoma go fihla mo nakong ye.” (Johane 5:17) Le ge re sa tsebe dilo ka moka tše di kgahlišago tšeo Modimo a bego a dutše a di dira, fela re tseba tše dingwe tša tšona. O be a dutše a kgetha bao ba tlago go buša le Morwa gagwe, Jesu Kriste, gore e be karolo ya Mmušo wa gagwe. (2 Bakorinthe 5:17) Le gona, ka mehla Jehofa o hlahla batho le go ba hlokomela. Ka baka la mošomo wa go ruta ka Beibele wo o dirwago lefaseng ka moka, batho ba dimilione ba ithuta ka Jehofa gomme ba ba le kholofelo ya go tlo phela ka mo go sa felego Paradeiseng mo lefaseng.—Johane 6:44; Baroma 6:23.

6, 7. Jesu e be e le mošomi wa mohuta mang?

⁶ Jesu le yena o rata go šoma, go swana le Tatagwe. Pele Jesu a ka tla lefaseng e be e le “mošomi yo a nago le bokgoni,” a thuša Modimo go bopa dilo ka moka tšeo di lego legodimong le lefaseng. (Diema 8:22-31; Bakolose 1:15-17) Jesu o ile a tšwela pele a šoma ka thata ge a be a le mo lefaseng. Ge e be e sa le lesogana o ile a ithuta go ba mmetli yo a nago le bokgoni, mohlomongwe o be a betla dilo le go aga dintlo. Jesu o ile a ba le bokgoni kudu moo a ilego a feleletša a tsebja e le “mmetli.”—Mareka 6:3.

⁷ Eupša mošomo wa Jesu wa bohlokwa kudu mo lefaseng e be e le go bolela ditaba tše dibotse le go ruta batho ka Jehofa. O be a swanetše go phetha mošomo woo ka mengwaga e meraro le seripa, ka gona o be a šoma ka thata go tloga mesong go fihla mantšiboa. (Luka 21:37, 38; Johane 3:2) Jesu o ile a sepela dikhilomithara tše  makgolo ditseleng tša marole, a botša batho ba bantši ditaba tše dibotse.—Luka 8:1.

8, 9. Ke ka baka la’ng Jesu a be a thabela mošomo wa gagwe?

⁸ Jesu o be a tšea go dira mošomo wa Modimo go swana le go ja. Mošomo wo o be o mo fa matla. Matšatši a mangwe, Jesu o be a šoma ka thata moo a bego a se na le nako ya go ja. (Johane 4:31-38) O be a diriša sebaka se sengwe le sengwe seo a bego a se hwetša go thuša batho gore ba ithute ka Tatagwe. Ke ka baka leo a ilego a botša Jehofa gore: “Ke go tagafaditše lefaseng ka go phetha modiro wo o nneilego wona gore ke o dire.”—Johane 17:4.

⁹ Go molaleng gore Jehofa le Jesu ba šoma ka thata, le gona ba thabišwa ke mošomo wa bona e bile o a ba kgotsofatša. Re nyaka go ba “baekiši ba Modimo,” e bile re nyaka go ‘latela dikgato tša Jesu kgauswi.’ (Baefeso 5:1; 1 Petro 2:21) Ke ka baka leo re lekago go šoma ka thata dilong ka moka.

10, 11. Ke’ng seo se ka re thušago go lebelela mošomo wa rena ka tsela e botse?

¹⁰ Ka ge re le bahlanka ba Jehofa, re šoma ka thata gore re itlhokomele le go hlokomela malapa a rena. Re nyaka go thabišwa ke mošomo wa rena, eupša seo se ka no se be bonolo. Ka gona, re ka dira’ng ge e ba re sa thabele mošomo wa rena?

¹¹ Lebelela mošomo ka tsela e botse. Re ka no se kgone go fetola mošomo wa rena, eupša re ka fetola tsela yeo re o lebelelago ka yona. Go tseba seo Jehofa a se  letetšego go rena go ka re thuša. Ka mohlala: Jehofa o letetše gore hlogo ya lapa e leke ka thata go hlokomela dinyakwa tša lapa. Ge e le gabotse Beibele e re, yo a sa hlokomelego lapa la gagwe “ke yo mobe go feta motho yo a se nago tumelo.” (1 Timotheo 5:8) Ge e ba o le hlogo ya lapa, o swanetše go šoma ka thata gore o hlokomele lapa la gago. Go sa šetšwe gore o rata mošomo wa gago goba ga o o rate, o a tseba gore ge o hlokomela lapa la gago o kgahla Jehofa.

12. Go šoma ka thata le go tshepega go re hola bjang?

¹² Šoma ka thata o be o botege. Se se ka dira gore go be bonolo gore o thabele mošomo wa gago. (Diema 12:24; 22:29) Le gona, mohiri wa gago o tlo go tshepa. Bahiri ba rata bašomi bao ba tshepegago ka gobane ba ka se utswe tšhelete, dilo tša mošomo goba nako ya mošomo. (Baefeso 4:28) Sa bohlokwa le go feta ke gore Jehofa o a go bona ge o šoma ka thata le ge o botega. O ka ba “le letswalo le botegago” ka gobane o tla be o tseba gore o thabiša Modimo.—Baheberu 13:18; Bakolose 3:22-24.

13. Go tshepega mošomong go ka ba le mafelelo afe?

¹³ Tseba gore tsela yeo o itshwarago ka yona mošomong e ka dira gore Jehofa a retwe. Le ke lebaka le lengwe la go dira gore re thabele mošomo wa rena. (Tito 2:9, 10) Mohlala wa gago o mobotse o ka dira gore mošomigotee le wena a nyake go ithuta Beibele.—Bala Diema 27:11; 1 Petro 2:12.

14-16. Ke’ng seo re swanetšego go nagana ka sona ge re kgetha mošomo?

¹⁴ Beibele ga e re botše ka mešomo yeo Bakriste ba swanetšego go e šoma goba yeo ba sa swanelago go e šoma.  Eupša e na le melao ya motheo yeo e ka re thušago go dira diphetho tše dibotse ka mošomo. (Diema 2:6) Re ka ipotšiša dipotšišo tše di latelago re diriša melao ya motheo ya Beibele.

¹⁵ Na mošomo wo o tlo nyaka gore ke dire selo seo Jehofa a rego se fošagetše? Re ithutile ka dilo tšeo Jehofa a di hloilego tše bjalo ka go utswa le go bolela maaka. (Ekisodo 20:4; Ditiro 15:29; Baefeso 4:28; Kutollo 21:8) Ka gona, re ba šedi gomme ra phema mošomo le ge e le  ofe woo o sa dumelelanego le melao ya Jehofa.—Bala 1 Johane 5:3.

¹⁶ Na mošomo wo o thekga dilo tšeo Jehofa a di hloilego? Ka mohlala, go thwe’ng ge e ba o ka hwetša mošomo wa go ba moamogelabaeng kliniking ya go ntšha dimpa? Ga se phošo go ba moamogelabaeng. Eupša o a tseba gore Jehofa o ikwa bjang ka go ntšha mpa. Ka gona, le ge e le gore mošomo wa gago ga se wa go ntšha dimpa, eupša na ga o nagane gore go ya ka Jehofa o thušitše go dira sebe seo?—Ekisodo 21:22-24.

17. Ke’ng seo se ka re thušago go dira diphetho tšeo di kgahlago Modimo ge re kgetha mošomo?

¹⁷ Ge re diriša melao ya motheo ya Beibele, re tlo swana le batho bao go bolelwago ka bona go Baheberu 5:14, “bao ba tlwaeditšego matla a bona a go hlatha ka go a diriša, e le gore ba kgethologanye se se nepagetšego le se se fošagetšego.” Ipotšiše gore: ‘Na ba bangwe ba ka se kgopišege ge e ba nka šoma mošomo wo? Na mošomo wo o tlo dira gore ke tlogele bana ba ka le molekane gore ke ye go šoma nageng e nngwe? Seo se tla ba kgoma bjang?’

18. Ke ka baka la’ng go ka ba thata go hwetša mošomo woo o ka se šitišego borapedi bja rena go Jehofa?

¹⁸ Go ka no se be bonolo gore borapedi bja rena go Jehofa bo tle pele ‘dinakong tše tše di hlobaetšago tšeo go lego thata go lebeletšana le tšona.’ (2 Timotheo 3:1) Go ka ba thata go hwetša mošomo le go swarelela go wona. Re nyaka go hlokomela malapa a rena, eupša re a tseba gore borapedi bja rena bo tla pele. Re ka se dumelele dilo tše di bonagalago e e ba tšona di tlago pele maphelong a rena. (1 Timotheo 6:9, 10) Ka gona re ka ‘kgonthišetša  bjang dilo tše bohlokwa kudu,’ mola ka nako e swanago re hlokomela malapa a rena?—Bafilipi 1:10.

19. Go bota Jehofa go re thuša bjang gore re be le tekatekano tabeng ya mošomo?

¹⁹ Bota Jehofa ka mo go feletšego. (Bala Diema 3:5, 6) Re a tseba gore Modimo o tseba gabotse seo re se hlokago e bile o tloga a tshwenyega ka rena. (Psalme 37:25; 1 Petro 5:7) Lentšu la gagwe le re: “Tsela ya lena ya bophelo a e se be ya go rata tšhelete, ge le dutše le kgotsofetše ka dilo tše di lego gona. Gobane Modimo o itše: ‘Le ka mohla nka se ke ka go tlogela le ge e le go go lahla.’” (Baheberu 13:5) Jehofa ga a nyake gore re dule re belaela ka go nyaka go hlokomela malapa a rena. O bontšhitše gantši gore o kgona go hlokomela batho ba gagwe. (Mateo 6:25-32) Go sa šetšwe gore re šoma mošomo wa mohuta mang, re swanetše go dula re bala Lentšu la Modimo, re bolela ditaba tše dibotse e bile re eba gona dibokeng ka mehla.—Mateo 24:14; Baheberu 10:24, 25.

20. Re ka dira’ng gore re phele bophelo bjo bonolo?

²⁰ Dula o le šedi. (Bala Mateo 6:22, 23.) Se se ra gore o swanetše go phela bophelo bjo bonolo e le gore o kgone go hlankela Jehofa. E ka se be gabohlale go dira gore tšhelete, bophelo bja manobonobo goba didirišwa tša morago bjale tša thekinolotši e be dilo tša bohlokwa kudu go rena go feta go ba bagwera ba Modimo. Ka gona, ke eng seo se ka re thušago go etiša dilo tše bohlokwa pele bophelong? Re swanetše go leka ka gohle go phema dikoloto. Ge e le gore o šetše o le dikolotong, lwela go di fokotša goba go di patela. Ge re sa hlokomele, dilo tše di bonagalago di ka re jela nako e ntši le go re fetša matla gomme ra hloka nako ya go rapela, go ithuta le go bolela ditaba tše dibotse. Go e na le go dumelela  dilo tše di bonagalago di hlakahlakanya maphelo a rena, re swanetše go ithuta go kgotsofala ge re na le dilo tše bohlokwa bophelong, e lego “dijo le diaparo.” (1 Timotheo 6:8) Go bohlokwa gore re dule re hlahloba maemo a rena nako le nako e le gore re kgone go hlankela Jehofa ka mo go oketšegilego.

21. Ke ka baka la’ng go le bohlokwa go tseba dilo tšeo di tlago pele bophelong?

²¹ Etiša dilo tša bohlokwa pele. Re swanetše go diriša gabotse nako ya rena, matla le dilo tšeo re nago le tšona  goba mahumo. Ge e ba re sa hlokomele, dilo tšeo di sego bohlokwa, tše bjalo ka thuto e phagamego goba tšhelete di ka re jela nako. Jesu o itše: “Tšwelang pele le tsoma Mmušo pele.” (Mateo 6:33) Dilo tšeo re kgethago go di dira letšatši le letšatši, mekgwa ya rena le dilo tšeo re nyakago go di fihlelela di bontšha seo se tlago pele maphelong a rena.

22, 23. (a) Ke mošomo ofe wa bohlokwa kudu woo re ka o dirago bjalo ka Bakriste? (b) Re ka thušwa ke’ng gore re thabele mošomo wa rena?

²² Mošomo wa rena o bohlokwa kudu ke go hlankela Jehofa le go botša ba bangwe ditaba tše dibotse. (Mateo 24:14; 28:19, 20) Go swana le Jesu, re nyaka go dira sohle seo re ka se kgonago mošomong wo. Ba bangwe ba ithaopetše go yo thuša mo go nyakegago bagoeledi ba Mmušo ba oketšegilego. Ba bangwe ba ithuta leleme le lengwe e le gore ba kgone go botša batho bao ba bolelago leleme leo ditaba tše dibotse. Botšiša bao ba dirilego seo gore ba kgonne bjang. Ba tlo go botša gore ba thabile e bile bophelo bja bona bo na le morero.—Bala Diema 10:22.

²³ Lehono ba bantši ba rena re fetša nako e ntši mešomong e le gore re hlokomele malapa a rena. Jehofa o tseba se e bile o thabela gore re dira sohle seo re ka se kgonago gore re hlokomele malapa a rena. Ka gona, re swanetše go ekiša Jehofa le Jesu ka go šoma ka thata go sa šetšwe gore re šoma mošomo ofe. Le gona, re swanetše go gopola gore mošomo wa rena o bohlokwa kudu ke go hlankela Jehofa le go bolela ditaba tše dibotse tša Mmušo wa Modimo. Se se tla re thabiša e le ka kgonthe.