Kamoo o ka Dirišago Kgatišo ye

E le gore o hwetše sehlogo, o ka se nyaka go ya ka tatelano ya dihlogo goba o ka se nyaka ka tlase ga dikarolo. Kgatišo ya Mangwalo ao a ka re Thušago Bophelong e arotšwe ka dikarolo tše šupa, e lego: Boitshwaro, Bophelo bja Letšatši le Letšatši, Dika tša Rena, Lapa, Mathata, Phuthego le Segwera sa Rena le Jehofa. O ka hwetša sehlogo seo o se nyakago ka tlase ga e nngwe ya dikarolo tše. O tlo hwetša dikarolo le dihlogo tša tšona matlakaleng ao a latelago. Eupša ge e ba o sa tsebe gore sehlogo seo o se nyakago se wela ka tlase ga karolo efe, se lebelele go Dihlogo ka Moka gore o se hwetše.

Ka tlase ga sehlogo se sengwe le se sengwe o tlo hwetša dihlogwana tšeo di ngwadilwego ka mongwalo o mokoto. Tše dingwe tša tšona ke dipotšišo gomme tše dingwe ga se dipotšišo. Ge o dutše o bala mangwalo ao a ngwadilwego ka mongwalo o mokoto ao a tšwelelago ka tlase ga sehlogwana, naganišiša kamoo a thekgago taba yeo go bolelwago ka yona goba a arabago potšišo yeo e botšišitšwego.

 Ka dinako tše dingwe, o tlo hwetša sehlogo se arotšwe ka dikarolwana go go thuša gore o hwetše taba yeo o e nyakago kapejana.

Ka dinako tše dingwe, o tlo hwetša ditemana tše di oketšegilego moo go ngwadilwego gore “Bona le.” Ditemana tše di re fa ditaba tše dingwe tšeo di sepedišanago le sehlogo.

Dihlogong tše dintšhi o tlo hwetša le karolwana ye e rego “Mehlala ya batho ba ka Beibeleng yeo e ka go thušago.” Ka tlase ga karolwana yeo, o tlo hwetša lefoko leo le hlalosago ntlha e bohlokwa ya mangwalo ao a bontšhitšwego moo. Lefoko leo le tlo go thuša go tseba seo o ka naganišišago ka sona ge o bala ditemana tšeo di lego moo.