Kgatišo ye ya Mangwalo ao a ka re Thušago Bophelong e tla go nolofaletša go hwetša mangwalo le dipego tša ka Beibeleng tšeo di ka go thušago go lebeletšana le mathata a bophelo. Le gona e tlo go thuša go hwetša ditemana tša maleba tšeo di tlago go go thuša go kgothatša ba bangwe le go ba thuša go dira diphetho tšeo di kgahlišago Jehofa. Kgetha sehlogo se se go kgahlago. Sehlogo se sengwe le se sengwe se na le dipotšišo le ditlhaloso tše dikopana tša ditemana tša Beibele. (Bona lepokisi leo le rego “ Kamoo o ka Dirišago Kgatišo ye.”) O tlo hwetša Mangwalo ao o a hlokago ao a tlago go go nea keletšo, a go hlahla le go go homotša. Le gona o tlo hwetša le dintlha tše bohlokwa tša ka Beibeleng tšeo o ka di dirišago go kgothatša ba bangwe, go ba thuša go rarolla mathata a bona le go ba eletša.

Ke nnete gore sehlogong se sengwe le se sengwe seo se lego ka gare ga kgatišo ye, ga se gwa bontšhwa mangwalo ka moka ao a bolelago ka sehlogo seo. Eupša kgatišo ye e ka go thuša kudu ge o thoma go dira nyakišišo. (Die 2:​1-6) E le gore o ithute ka mo go oketšegilego ka mangwalo ao a lego ka mo kgatišong ye, bala le ditemana tšeo di sepedišanago le mangwalo ao ka Beibeleng ya Phetolelo ya Lefase le Leswa ya Mangwalo a Makgethwa. O ka diriša le Tlhahlo ya go Dira Nyakišišo ya Dihlatse tša Jehofa goba Watch Tower Publications Index go kwešiša temana e itšego ka mo go oketšegilego. Gore o be le kwešišo e nepagetšego ya seo Beibele e se rutago, diriša dikgatišo tšeo di sa tšwago go lokollwa tšeo di hlalosago temana yeo o balago ka yona.

Eka kgatišo ye ya Mangwalo ao a ka re Thušago Bophelong e ka go thuša go hwetša bohlale, tsebo le kwešišo tšeo di lego ka Mangwalong a Makgethwa. Ge o dutše o diriša kgatišo ye, o tla kgodišega le go feta gore “lentšu la Modimo le a phela e bile ke le matla.”—Heb 4:12.