Eupja ke ka baka la’ng Sathane le batemona ba šoma ka thata gakaakaa bakeng sa go fora batho? Ke ka gobane ba nyaka gore re ba tlatše borabeleng bja bona. Ba nyaka gore re ba rapele. Ba nyaka gore re dumele maaka a bona gomme re dire dilo tšeo Jehofa a sa di ratego. Mekgwa e mentši ya ye e akaretša meetlo e tswalanago le bahu.

Lehu la motho yo a ratwago ke phihlelo e bohloko kudu maikwelong, gomme ke ga tlhago le mo go swanetšego go bontšha go nyama. Ka morago ga lehu la mogwera wa gagwe Latsaro, Jesu ‘o ile a tšwa megokgo.’—Johane 11:35.

Go na le meetlo e mentši yeo e tswalanago le lehu, gomme ye e fapana kudu lefaseng ka moka. E mentši ga e ganetšane le melao ya motheo ya Beibele. Lega go le bjalo, mekgwa e mengwe e theilwe kgopolong ya gore bahu ba a phela le gore ba kgona go bona ba ba phelago. Moletelo, go hlokofala ka mo go se nago mellwane le meletlo e megolo ya tša poloko, ka moka ga tšona ke tšeo di theilwego poifong ya go nyamiša meoya ya bahu. Eupja ka gobane go bahu “xo se se tsebyaxo,” bao ba dirago dilo tše bjalo ba  tšwetša pele maaka a Sathane.—Mmoledi 9:5.

Meetlo e mengwe goba ditirelo di rotoga tumelong ya gore bahu ba nyaka thušo go ba phelago le gore ba tla gobatša ba phelago ge e ba ba sa latšwe. Mafaseng a mangwe meletlo le dihlabelo di dirwa mo e ka bago matšatši a 40 goba ngwaga ka morago ga lehu la motho. Se go naganwa gore se thuša motho yo a hwilego go ‘fetela’ lefelong la moya. Mokgwa o mongwe o tlwaetšwego ke go nea bahu dijo le dino.

Dilo tše di fošagetše ka gobane di tšwetša pele maaka a Sathane ka bahu. Na Jehofa o tla amogela go kgokagana ga rena ka tsela lege e le efe le mekgwa ye yeo e theilwego dithutong tša batemona? Le gatee!—2 Ba-Korinthe 6:14-18.

Bahlanka ba Modimo wa therešo ga ba kopanele ka tsela lege e le efe mekgweng yeo e thekgago maaka a Sathane. Go e na le moo, ka lerato ba lebiša maiteko a bona go thušeng le go homotšeng bao ba phelago. Ba tseba  gore ge feela motho a hlokofetše, ke Jehofa feela yo a ka thušago motho yoo.—Jobo 14:14, 15.

Batho ba bangwe ba ikopanya le batemona ka go lebanya goba ka go diriša didirišwa tšeo e lego batho. Se se bitšwa bonoge. Voodoo, boloi, maleatlana, bodupe le go botšiša selo bahung ka moka ke dibopego tša bonoge.

Beibele e nyatša dilo tše, e re: “Xo wêna xo se kê xwa hwetšwa . . . e a diraxo tša bonoxê le tša maphalô, le e a upaxo ka meupô le boloi. Xo se kê xwa hwetšwa wa malôpô, le e a botšišaxo badimo, le xe e le sedupê, le e a nyakaxo selô bahung, ka xobane ba ba diraxo tše byalo, Morêna ó bôna e le makxapa.”—Doiteronomio 18:10-12.

Ke ka baka la’ng Jehofa a re lemoša ka matla gakaakaa malebana le mekgwa ye?

Jehofa o re lemoša malebana le dibopego ka moka tša bonoge bakeng  sa boiketlo bja rena ka noši. O rata batho ba gagwe le go ba hlokomela, gomme o tseba gore bao ba dirišanago le batemona ba swanetše go tlaišega.

Motho o mongwe yo bjalo e be e le Nilda, yo e bego e le senoge kua Brazil. Batemona ba ile ba mo dira gore a phele bošuleng. O a laodiša: “Meoya . . . e be e ntshwere, e ntaola. Ke be ke phela ka go tloga boemong bja go tšea gabotse le go idibala, gomme ka išwa bookelong ka baka la mathata a monagano. Batemona ba ile ba ntlaiša kudu moo dikwi tša-ka di ilego tša tshwenywa. Ke ile ka diriša diokobatši gomme ka thoma go nwa le go kgoga ka mehla. Se se ile sa tšwela pele ka nywaga e mentši.”

Ge nako e dutše e e-ya, ka thušo ya Jehofa le Dihlatse tša gagwe mo lefaseng, Nilda o ile a kgona go lokologa tutuetšong ya batemona gomme mo nakong ye o phela bophelo bjo bo nago le morero le bjo bo kgahlišago. O re: “Ke kgothaletša bohle gore le ka mohla, le ka motsotswana ba se ke ba dirišana le meoya [e mebe].”