Beibele e re Sathane ke “motimetši wa lefase ka moka la batho.” (Kutollo 12:9) Sathane le batemona ba gagwe ga ba nyake gore re dumele Lentšu la Modimo, Beibele. Ba leka go dira gore batho ba dumele gore bahu ba phela felo go gongwe lefelong la moya. Anke re boneng kamoo ba dirago seo ka gona.

Madumedi a mantši a ruta gore motho o mongwe le o mongwe o na le moya wo o fetelago lefelong la moya ka morago ga lehu la mmele wa nama. Ba bolela gore mmele o a hwa eupja moya wona ga o hwe. Go feta moo, ba bolela gore moya o ka se ke wa hwa, gore ke wo o sa hwego.

Eupja Lentšu la Modimo ga le rute seo. Beibele e bontšha gore moya (soul) ke motho, e sego selo se itšego ka gare ga motho. Ka mohlala, ge e hlalosa go bopja ga Adama, Beibele e re: “Morêna Modimo a na a bopa motho, lerole la mmu; mo dinkong tša xaxwe a budulêla môya wa bophelô, motho a napa a ba môya [“soul,” “NW”] o phelaxo.” (Genesi 2:7) Ka gona Adama ga se a newa moya; e be e le moya.

 Diphoofolo le tšona di bitšwa meoya.—Genesi 1:20, 21, 24, 30, NW.

• Ka ge lentšu la Beibele la “moya [soul]” le bolela motho ka boyena, gona ga se gwa swanela go re makatša go tseba gore meoya e ka hwa le gore e bile e a hwa. Mangwalo a re:

  “Moya o senyago ona o tlo hwa.”—Hesekiele 18:4, PK.

• “Gomme Simisone a tšwela pele ka gore: ‘Anke moya wa-ka o hwe le ba-Filisita.’”—Baahlodi 16:30, NW.

• “Na ke mo go swanetšego ka sabatha go dira tiro e botse goba tiro e mpe, go phološa goba go bolaya moya?”—Mareka 3:4, NW.

Mangwalo a mangwe a bontšha gore meoya e ka fedišwa (Genesi 17:14, NW), ya bolawa ka tšhoša (Jošua 10:37, NW), ya kgangwa (Jobo 7:15, PK), le go nwela (Jona 2:5, PK). Ka gona moya o a hwa.

Ge o ka bala Beibele go tloga mathomong go ya mafelelong, le ka mohla o ka se ke wa hwetša polelwana e rego “moya o sa hwego.” Moya (soul) wa motho ga se moya (spirit). Thuto ya moya o sa hwego ga se thuto ya Beibele.  Ke thuto ya Sathane le batemona ba gagwe. Jehofa o hloile maaka ka moka a bodumedi.—Diema 6:16-19; 1 Timotheo 4:1, 2.

Tsela e nngwe yeo Sathane a timetšago batho ka yona ke ka dinoge. Senoge ke motho yo a kgonago go amogela melaetša ka go lebanya go tšwa lefaseng la moya. Batho ba bantši kudu, go akaretša le dinoge ka botšona, ba nagana gore melaetša ye e tšwa go meoya ya bahu. Eupja bjalo ka ge re šetše re bone go tšwa Beibeleng, se ga se kgonege.—Mmoledi 9:5, 6, 10.

Melaetša ye e tšwa go bomang? Go batemona ka bobona! Batemona ba kgona go šetša motho ge a sa phela; ba tseba kamoo motho a bego a bolela ka gona, kamoo a bego a bogega ka gona, seo a se dirilego le seo a bego a se tseba. Ka gona go bonolo go bona go ekiša batho bao ba hwilego.—1 Samuele 28:3-19.

Tsela e nngwe yeo ka yona Sathane a godišago maaka mabapi le batho ba ba hwilego ke ka dinonwane. Dinonwane tše bjalo gantši di aroša batho therešong ya Beibele.—2 Timotheo 4:4.

Mo Afrika go na le dinonwane  tše dintši ka batho bao ba ilego ba bonwa ba phela ka morago ga ge ba hwile. Ka tlwaelo, dipono tše bjalo di bonwa kgole kudu le moo motho a bego a phela gona. Eupja ipotšiše: ‘Na go bonala go e na le tlhaloganyo gore ge e ba motho a be a e-na le matla a go boa bahung, o be a tla boela lefelong leo le lego kgole le lapa la gabo le bagwera?’

Le gona, na e ka se ke ya ba gore motho yo a bonwago o fo ba a swana le motho yo a hwilego? Ka mohlala, badiredi ba babedi ba Bakriste bao ba bego ba bolela lefelong la magaeng ba ile ba bona mokgalabje yo a bego a ba latela ka diiri tše mmalwa. Ge ba be ba mmotšiša lebaka, ba ile ba lemoga gore monna o be a nagana gore o mongwe wa badiredi e be e le ngwanabo yo a hwilego nywaga e mentši e fetilego. Go ba gona o be a fošitše, eupja o ile a gana go dumela gore o be a fošitše. Akanya kanegelo yeo mokgalabje ka morago a ilego a e botša bagwera ba gagwe le baagišani!

Ka ntle le pelaelo o tseba ka dilo tše di makatšago tšeo batho ba di bonego, ba di kwelego goba ba di lorilego. Diphihlelo tše bjalo tše e sego tša tlhago gantši di tšhoša bao ba bago le  tšona. Marein, yo a dulago Afrika Bodikela, ka mehla o be a e-kwa lentšu la makgolo’agwe yo a hlokofetšego le mmitša bošego. Ka go tšhoga, Marein o be a tla goelela, a tsoša lapa la gabo ka moka. Mafelelong, o ile a hlakana bjaša.

Ka gona ge e ba bahu ba be ba phela e le ka kgonthe, na ke mo go kwagalago gore ba be ba ka tšhoša baratiwa ba bona? Ruri go tloga go se bjalo. Mothopo wa melaetša e bjalo e gobatšago ke batemona.

Eupja go thwe’ng ka melaetša yeo e bonalago e le e holago le e homotšago? Ka mohlala, Gbassay wa Sierra Leone o be a babja. O ile a lora toro yeo go yona tatagwe yo a hlokofetšego a ilego a tšwelela go yena. Tatagwe o ile a mo laela gore a ye sehlareng se itšego, a tšee letlakala la sona, a le tswakanye le meetse, gomme a nwe motswako woo. O be a se a swanela go boledišana le motho pele a dira bjalo. O ile a dira se gomme a fola.

Mosadi o mongwe o boletše gore monna wa gagwe o ile a tšwelela go yena bošegong bjo bongwe ka morago ga ge a hwile. O re monna o be a bogega a le botse gomme a apere diaparo tše dibotse.

Melaetša e bjalo le dipono e bonala e le e lokilego le e holago. Na  e tšwa go Modimo? Aowa, ga e tšwe go yena. Jehofa ke “Modimo wa therešo.” (Psalme 31:5, NW) Le ka mohla a ka se ke a dumela go re radia goba go re fora. Ke batemona feela bao ba dirago seo.

Eupja na go na le batemona ba go loka? Aowa. Gaešita lege ka dinako tše dingwe ba ka bonala e le ba thušago, ka moka ga bona ke ba babe. Nakong ya ge Diabolo a be a bolela le Efa, o ile a bonala e le yo nago le bogwera. (Genesi 3:1) Eupja ke’ng seo se diregilego go Efa ka morago ga ge a mo theeditše gomme a dirile seo a se boletšego? O ile a hwa.

O a tseba gore ga se mo go se gwa tlwaelegago go motho yo mobe gore a be le bogwera go bao a ratago go ba fora le go ba radia. Seema sa se-Afrika se re, “Bo-meno-mašweu ba go bolaya ba sega.” Lentšu la Modimo le re: “Sathane o tšwela pele a iphetoša morongwa wa seetša.”—2 Ba-Korinthe 11:14, NW.

Modimo ga a sa hlwa a ikopanya la batho mo lefaseng ka go diriša ditoro, dipono goba mantšu a tšwago lefaseng la moya. O ba hlahla le go ba laya ka Beibele, yeo e ka dirago gore motho a “kxonišwê xo dira medirô e botse ka moka.”—2 Timotheo 3:17.

Ka gona, ge Jehofa a re lemoša malebana le maano a Diabolo, o dira bjalo ka gobane a re rata. O tseba gore batemona ke manaba a kotsi.