Sathane le batemona e bile ba sehlogo le ba kotsi ka mehla. Mehleng ya pele Sathane o ile a bolaya diruiwa le bahlanka ba Jobo yo a botegago. Ka morago, o ile a bolaya bana ba lesome ba Jobo ka go dira gore “ledimo le lexolo” le senye ngwako wo ba bego ba le ka go wona. Ka morago ga moo Sathane o ile a otla Jobo ka “dišô tše di hlôhlônaxo xo tloxa lenaong xo fihla phoxong.”—Jobo 1:7-19; 2:7.

Mehleng ya Jesu, batemona ba ile ba dira batho ba bangwe dimuma le difofu. (Mateo 9:32, 33; 12:22) Ba ile ba tlaiša monna o mongwe gomme ba mo dira gore a ikgatle ka mafsika. (Mareka 5:5) Gape ba ile ba dira gore mošemane o mongwe a goeletše, a itahlele fase, ba mo “utla-utla.”—Luka 9:42.

Lehono, Sathane le batemona ke ba bolayago kudu go feta lege e le neng. Ge e le gabotse, ditiro tša bona tše mpe di oketšegile ga e sa le go tloga ge ba ntšhitšwe legodimong. Dipego tšeo di tšwago go dikologa lefase  di hlatsela go ba ga bona ba sehlogo. Ba otla batho ba bangwe ka bolwetši. Ba bangwe ba ba tlaiša bošego, ba ba hlokiša boroko goba ba dira gore ba lore dilo tše di tšhošago. Ba bangwe ba ba goboša ka botona le botshadi. Ba bangwe gape ba ba dira gore ba gafe, ba bolaye goba ba ipolaye.

Lintina yo a dulago Suriname, o laodiša gore motemona goba moya o mobe, o bolaile ditho tše 16 tša lapa la gabo gomme wa mo tlaiša mmeleng le monaganong ka nywaga e 18. Ka phihlelo ya kgodu e tšwago lerotseng, o bolela gore batemona “ba thabela go hlokofatša bahlaselwa ba bona bao ba sa ratego go iša lehung.”

Eupja Jehofa o kgona go šireletša bahlanka ba gagwe ditlhaselong tša Sathane.—Diema 18:10.