Sathane le batemona ba gagwe ba ka se ke ba fora batho ka nako e telele. Jehofa o šetše a ba lahletše ka ntle ga legodimo. (Kutollo 12:9) Nakong e tlago e lego kgaufsi, Modimo o tla gata mogato gape malebana le Sathane le batemona ba gagwe. Ponong e tšwago go Modimo, moapostola Johane o itše: “Ka bôna Morongwa à fofa lexodimong á swere sekxonyu sa Sekoti, a swere le kêtanê e kxolo ka seatla. A swara Nôxa-kxolo, Nôxa yela ya mehleng, e lexo yêna Diabolo le Sathane, a e tlêma xore e fetšê nywaxa e sekete è tlemilwe. A e lahlêla Sekoting, a e kxonyeletša moo, a tiiša ka seká sa leswaô, xore e se hlwê e aroša dithšaba, xo bê xo fetê nywaxa e sekete.” (Kutollo 20:1-3) Ka morago Diabolo le batemona ba gagwe ba tla fedišetšwa ruri.—Kutollo 20:10.

Batho ba babe mo lefaseng le bona ba tla fedišwa.—Psalme 37:9, 10; Luka 13:5.

Ka morago ga ge Sathane le batemona ba gagwe ba tlošitšwe tseleng, Jehofa o tla tliša ditšhegofatšo tše dintši go batho. O tla gopola gore bahu ga ba phele, ga ba gona. Jesu o ile a swantšha lehu le boroko—boroko bjo bogolo bjo bo se nago ditoro. (Johane 11:11-14) O dirile seo ka gobane a be a tseba gore nako e be e tla tla yeo ka yona bao ba robetšego lehung ba bego ba tla tsošetšwa bophelong. O itše: “Xo tla lebaka leo bohle ba lexo mabitleng . . . ba [tlago go] tšwa.”—Johane 5:28, 29; bapiša le Ditiro 24:15.

Ba tla bušetšwa bophelong gona mo lefaseng. Go e na le ditsebišo tša gore batho ba hwile, dipego tše thabišago di tla bolela ka bao ba bušeditšwego bophelong! E tla ba lethabo le lekaakang go amogela bao ba ratwago ge ba boa mabitleng!