Dauda wa Sierra Leone o laodiša ka gore, “Ke goletše motsaneng wa profenseng ya ka leboa. Ka nako e nngwe ge ke be ke sa le mošemane, lapa lešo le lapa le lengwe a ile a bakišana naga. Bobedi a be a bolela gore naga ke ya ona. Bakeng sa go rarolla taba, ngaka e ile ya bitšwa. E ile ya nea monna o mongwe seipone, ka morago ya mo khupetša ka lešela le lešweu. Kapejana monna yo a khupeditšwego ka lešela o ile a thoma go thothomela le go tšwa kudumela. Ge a dutše a lebeletše ka seiponeng, o ile a goeletša ka gore: ‘Ke bona mokgalabje a e-⁠tla! O apere dikobo tše dišweu. Ke yo motelele, o na le moriri o mošweu gomme o sepela a khukhame go se nene.’

“O be a hlalosa Rakgolo! Ke moka o ile a thoma go ba bjalo ka ge eka o hlakane hlogo gomme a goa ka gore: ‘Ge e ba le sa dumele seo ke se bolelago, gona e-⁠tlang le iponele ka noši!’ Ka ge go be go ka letelwa, ga go le o tee wa rena yo a bego a e-⁠na le sebete sa go dira seo! Ngaka e ile ya mo dira gore a fole matswalo ka go mo gaša ka motswako wa maleatlana wa matlakala le meetse, wo e bego e o swere ka morufsi.

“A bolela ka monna wa seiponeng, ‘Rakgolo’ o itše naga e be e le ya lapa la gešo. O ile a botša makgolo gore o swanetše go šoma mobung woo ka ntle le go tshwenyega. Lapa le lengwe leo le ile la amogela phetho yeo. Kgang e ile ya rarollwa.”

 Diphihlelo tše bjalo ke tšeo di tlwaelegilego Afrika Bodikela. Mo, go swana le dikarolong tše dingwe tša lefase, batho ba dimilione tše dintši ba dumela gore batho ba ba hwilego ba fetela lefaseng la moya, moo ba kgonago go bona le go tutuetša maphelo a batho ba lego mo lefaseng. Na tumelo ye ke ya therešo? Na bahu ruri ba a phela? Ge e ba go se bjalo, ke bomang bao ba ipolelago gore ke meoya ya bahu? Go tseba dikarabo tše nepagetšego tša dipotšišo tše ke gabohlokwa kudu. Ke taba ya lehu le bophelo.