1, 2. Ke mantšu afe ao Jehofa ka boyena a ilego a a bolela a theeditšwe ke ba bararo ba baapostola ba Jesu, gona ba ile ba arabela bjang?

GE E ba Jehofa Modimo ka boyena a be a ka go laela gore o dire selo se itšego, o be o tla arabela bjang? Go sa šetšwe gore ke selo sefe seo a tla bego a go laetše gore o se dire, na o be o ka se se dire ntle le go dikadika? Ga go pelaelo gore o be o tla dira bjalo!

² Nako e itšego ka morago ga Paseka ya 32 C.E., ba bararo ba baapostola ba Jesu e lego Petro, Jakobo le Johane, ba bile le phihlelo e bjalo. (Bala Mateo 17:1-5.) Ge ba be ba bokane le Mong wa bona “thabeng e telele,” ba ile ba bona pono ya ge Jesu e tla be e le Kgoši ya letago legodimong. Pono ye e be e bonagala e le ya kgonthe moo Petro a ilego a leka go tšea karolo go yona. Ge Petro a sa dutše a bolela, leru le ile la ba aparetša. Ke moka yena le bao a bego a na le bona ba ile ba kwa selo seo batho ba sego kae feela ba bilego le tokelo ya go se kwa, ba ile ba kwa lentšu la Jehofa. Ka morago ga go kgonthišetša gore Jesu ke Morwa wa gagwe, Jehofa o ile a bolela ka go lebanya gore: “Le mo theetšeng.” Baapostola ba ile ba kwa taelo ye yeo e tšwago go Modimo. Ba ile ba theetša seo Jesu a bego a ba ruta sona gomme ba kgothaletša ba bangwe gore ba dire se se swanago.—Dit. 3:19-23; 4:18-20.

3. Ke ka baka la’ng Jehofa a nyaka gore re theetše Morwa wa gagwe, gomme ke taba efe e lego mo gobotse gore re e ahlaahle?

³ Mantšu ao a rego “le mo theetšeng,” a begilwe ka Beibeleng gore a re hole. (Baroma 15:4) Ka baka la’ng? Ka gobane Jesu ke mmoleledi wa Jehofa le gona ka mehla ge a be a ruta, o be a bolela seo Tatagwe a bego a nyaka gore re se tsebe. (Joh. 1:1, 14) Ka ge Jesu a boletše kudu ka Mmušo wa Modimo go feta taba le ge e le efe, e lego mmušo wa Mesia wa legodimong wo o bopšago ke Kriste Jesu le babušigotee le yena ba 144 000, ke mo gobotse gore re ahlaahle ka kelohloko taba ye ya bohlokwa. (Kut. 5:9, 10; 14:1-3; 20:6) Lega go le bjalo, sa pele anke re ahlaahleng lebaka leo Jesu a boletšego kudu gakaakaa ka Mmušo wa Modimo.

4. Jesu o bontšhitše bjang gore o rata Mmušo wa Modimo go tšwa pelong?

⁴ Jesu o rata Mmušo wa Modimo go tšwa pelong. Ke ka baka la’ng re ka re’alo? Ka gobane seo re se bolelago se bontšha seo se lego ka dipelong tša rena, e bile se utolla seo se tlogago se le bohlokwa go rena. Jesu ka boyena o itše: “Molomo o bolela go tšwa go se se tletšego pelong.” (Mat. 12:34) Jesu o be a bolela ka  Mmušo wa Modimo nako e nngwe le e nngwe ge a be a hwetša sebaka sa go dira bjalo. Ka Diebangeding tše nne go bolelwa ka Mmušo wo ka makga a ka godimo ga a 100 gomme a mantši a ona ke mantšung ao a boletšwego ke Jesu. O ile a dira gore Mmušo e be sehlogo sa boboledi bja gagwe ge a be a re: “Le metseng e mengwe ke swanetše go bolela ditaba tše dibotse tša Mmušo wa Modimo, gobane ke sona se ke se rometšwego.” (Luka 4:43) Gaešita le ka morago ga tsogo ya gagwe, Jesu o ile a tšwela pele a bolela ka Mmušo go barutiwa ba gagwe. (Dit. 1:3) Ga go na pelaelo gore Jesu o be a rata Mmušo wa Modimo go tšwa pelong, e lego seo se ilego sa mo tutueletša go bolela ka wona.

5-7. (a) Re tseba bjang gore Jehofa o rata Mmušo wa gagwe kudu? Bontšha. (b) Re ka bontšha bjang gore re rata Mmušo wa Modimo ka dipelo tša rena ka moka?

⁵ Jehofa le yena o rata Mmušo wo kudu. Re tseba seo bjang? Gopola gore Jehofa o ile a romela Morwa wa gagwe yo a tswetšwego a nnoši lefaseng, le gore selo se sengwe le se sengwe seo Morwa wa gagwe a bego a se bolela le go se ruta se be se etšwa go yena. (Joh. 7:16; 12:49, 50) Le gona dilo ka moka tšeo di begilwego ka Diebangeding tše nne mabapi le bophelo bja Jesu le bodiredi bja gagwe di tšwa go yena. Anke o nagane go se nene ka seo se bolelwago ke se.

⁶ A re re o tsenya dinepe tša lapa la geno ka alepamong. Go na le dinepe tše dintši tšeo o ka di tsenyago kamoo alepamong, eupša di ka se lekane ka moka. O tla dira’ng? O tla kgetha feela tšeo o tlago go di tsenya. Ka tsela e swanago, Diebangedi di swana le alepamo yeo e re bontšhago gore ge e le gabotse Jesu ke mang. Jehofa ga se a budulela bangwadi ba Diebangedi go ngwala dilo ka moka tšeo Jesu a di boletšego le go di dira ge a be a le mo lefaseng. (Joh. 20:30; 21:25) Go e na le moo, moya wa Jehofa o ile wa ba hlahla gore ba ngwale mantšu le ditiro tša Jesu tšeo di re thušago go kwešiša morero wa bodiredi bja gagwe le seo se lego bohlokwa kudu go Jehofa. (2 Tim. 3:16, 17; 2 Pet. 1:21) Ka ge Diebangedi di tletše ka dithuto tša Jesu tša mabapi le Mmušo wa Modimo, re ka phetha ka gore Jehofa o rata Mmušo wo kudu. Nagana feela—Jehofa o nyaka gore re tsebe ka Mmušo wa gagwe!

⁷ Yo mongwe le yo mongwe wa rena o swanetše go ipotšiša gore: ‘Na ke rata Mmušo wa Modimo ka pelo ka moka?’ Ge e ba go le bjalo, re tla theetša ntle le go dikadika seo Jesu a se boletšego le go se ruta ka Mmušo wo—bohlokwa bja wona, le gore o tla tla bjang le gona neng.

8. Jesu o boletše bjang ka boripana ka bohlokwa bja Mmušo wa Modimo?

⁸ Nagana ka thapelo ya mohlala. Jesu o dirišitše mantšu a bonolo eupša e le a matla go bolela ka boripana bohlokwa bja Mmušo wa Modimo, a bontšha seo o tlago go se phetha. Thapelo yeo e na le dikgopelo tše šupago. Tše tharo tša mathomo di mabapi le merero ya Jehofa, e lego go kgethagatšwa ga leina la gagwe, go tla ga Mmušo wa gagwe le go direga ga thato ya gagwe mo lefaseng bjalo ka ge e direga legodimong. (Bala Mateo 6:9, 10.) Dikgopelo tšeo tše tharo di a tswalana. Jehofa o tla diriša  Mmušo wa Mesia go kgethagatša leina la gagwe le go phetha thato ya gagwe.

9, 10. (a) Mmušo wa Modimo o tla dira’ng ge o etla? (b) Ke kholofetšo efe ya ka Beibeleng yeo o fagahletšego go e bona e phethagala?

⁹ Mmušo wa Modimo o tla tla bjang? Ge re rapela gore “Mmušo wa gago a o tle,” re kgopela gore Mmušo wo o gate mogato kapejana. Ge Mmušo wo o etla, o tla buša lefase ka moka. O tla fediša tshepedišo ya gona bjale e kgopo ya dilo, go akaretša le mebušo ka moka ya batho gomme wa tliša lefase le lefsa la go loka. (Dan. 2:44; 2 Pet. 3:13) Ke moka, ka tlase ga Mmušo woo, lefase ka moka e tla ba paradeise. (Luka 23:43) Bao ba lego ka kgopolong ya Modimo ba tla tsošwa bahung gomme ba kopana gape le baratiwa ba bona. (Joh. 5:28, 29) Batho bao ba kwago ba tla phethagala ke moka ba thabela go phela ka mo go sa felego. (Kut. 21:3-5) Mafelelong, lefaseng go tla swana le legodimong, gwa direga thato ya Jehofa Modimo! Na ga o fagahlele go bona dikholofetšo tšeo tša ka Beibeleng di phethagala? Gopola gore nako e nngwe le e nngwe ge o rapelela gore Mmušo wa Modimo o tle, o rapelela gore dikholofetšo tšeo tše di kgahlišago di phethagale.

¹⁰ Go molaleng gore Mmušo wa Modimo ga se wa tšwa o ‘etla’ go tlo phethagatša thapelo ya Jesu ya mohlala. Go ba gona, mebušo ya batho e sa dutše e buša gomme lefase le lefsa la go loka ga se la tšwa le eba gona. Eupša go na le ditaba tše dibotse. Mmušo wa Modimo o šetše o thomile go buša legodimong, bjalo ka ge re tlo ahlaahla seo kgaolong e latelago. Ga bjale anke re ahlaahleng seo Jesu a se boletšego mabapi le gore Mmušo wo o be o tla thoma neng go buša legodimong le gore o tla tla neng lefaseng.

11. Jesu o bontšhitše’ng mabapi le go thoma go buša ga Mmušo wa Modimo?

¹¹ Jesu o bontšhitše gore Mmušo wa Modimo o be o ka se thome go buša lekgolong la pele la nywaga C.E., go sa šetšwe seo ba bangwe ba barutiwa ba gagwe ba bego ba se letetše. (Dit. 1:6) Ela hloko seo a se boletšego diswantšhong tše pedi tšeo di sa fetanego ka nywaga e mebedi.

12. Seswantšho sa korong le mefoka se bontšha bjang gore Mmušo wa Modimo ga se wa thoma go buša lekgolong la pele la nywaga C.E.?

¹² Seswantšho sa korong le mefoka. (Bala Mateo 13:24-30.) Ka morago ga go anega seswantšho se, mohlomongwe seruthwaneng sa 31 C.E., Jesu o ile a se hlalosetša barutiwa ba gagwe. (Mat. 13:36-43) Moko wa seswantšho se le tlhaloso ya sona še: Ka morago ga gore baapostola ba hwe, Diabolo o be a tla bjala mefoka (Bakriste ba mankekišane) gare ga korong (“barwa ba Mmušo” goba Bakriste bao ba tloditšwego). Korong le mefoka di be di tla leswa gore di gole gotee nakong ya go bjala yeo e bego e tla tšwela pele go fihlela lebakeng la puno, e lego “bofelo bja tshepedišo ya dilo.” Ge lebaka la puno le thomile, mefoka e be e tla kgobelwa, ke moka ka morago ga moo korong ya kgoboketšwa. Ka gona seswantšho se se bontšha gore Mmušo wa Modimo o be o tla thoma go buša ka morago ga ge nako ya go bjala e fetile, e sego lekgolong la pele la nywaga C.E. Ge nako e dutše e eya, nako ya go bjala e ile ya feta gomme lebaka la puno la thoma ka 1914.

13. Jesu o ile a bontšha bjang gore o be a ka se bewe go ba Kgoši Mesia gateetee ka morago ga ge a boetše legodimong?

 ¹³ Seswantšho sa dimina. (Bala Luka 19:11-13.) Jesu o boletše seswantšho se ka 33 C.E. ge a be a le tseleng ya go ya Jerusalema ka lekga la mafelelo. Ba bangwe ba batheetši ba gagwe ba be ba nagana gore o tla hloma Mmušo wa gagwe gateetee ge ba fihla Jerusalema. E le gore a phošolle kgopolo yeo le go bontšha gore Mmušo woo o be o sa le kgole le go thoma go buša, Jesu o ile a ipapiša le “motho yo mongwe wa go tswalelwa bogošing” yoo a ilego a swanelwa ke go ya “nageng ya kgole go yo tšea matla a bogoši.” * Go Jesu, ‘naga ya kgole’ e be e le legodimong, moo Tatagwe a bego a tla mo nea matla a go ba Kgoši. Eupša Jesu o be a tseba gore o be a ka se bewe gore e be Kgoši Mesia gateetee ka morago ga ge a boetše legodimong. Go e na le moo, o be a tla dula ka letsogong le letona la Modimo gomme a leta go fihla go etla nako e beilwego. Go leta moo go ile gwa tšea nywagakgolo e mentši.—Ps. 110:1, 2; Mat. 22:43, 44; Baheb. 10:12, 13.

14. (a) Jesu o ile a araba bjang potšišo yeo ba bane ba baapostola ba gagwe ba ilego ba mmotšiša yona? (b) Go phethagala ga boporofeta bja Jesu go re botša’ng ka go ba gona ga gagwe le ka Mmušo?

¹⁴ Matšatši a sego kae pele Jesu a ka bolawa, ba bane ba baapostola ba gagwe ba ile ba mmotšiša gore: “Pontšho ya go ba gona ga gago le ya bofelo bja tshepedišo ya dilo e tla ba eng?” (Mat. 24:3; Mar. 13:4) Jesu o ile a ba araba ka go bolela boporofeta bjo bo tseneletšego bjoo bo begilwego go Mateo kgaolo 24 le 25. Jesu o boletše ka ditiragalo tše di fapafapanego tšeo di bego di tla direga lefaseng ka bophara tšeo e bego e tla ba pontšho ya mehla yeo e bitšwago “go ba gona” ga gagwe. Go thoma ga go ba gona ga gagwe go be go tla direga ka nako e tee le go  hlongwa ga Mmušo legodimong; gomme go fela ga go ba gona ga gagwe gwa direga ka nako e tee le go tla ga Mmušo woo. Re na le bohlatse bjo bo feletšego bja gore boporofeta bja Jesu bo be bo dutše bo phethagala ga e sa le go tloga ka 1914. * Ka baka leo, ngwageng woo go ba gona ga gagwe go ile gwa thoma gomme le Mmušo wa hlongwa.

15, 16. Polelwana e rego “moloko wo,” e šupa go bomang?

¹⁵ Bjale Mmušo wa Modimo o tla tla neng? Jesu ga se a bolela nako ya maleba yeo se se bego se tla direga ka yona. (Mat. 24:36) Eupša o boletše selo se itšego seo se swanetšego go re kgonthišetša gore Mmušo wo o kgauswi kudu. Jesu o boletše gore Mmušo wo o tla tla ka morago ga ge “moloko wo” o bone go phethagala ga pontšho ya boporofeta bja gagwe. (Bala Mateo 24:32-34.) Polelwana e rego “moloko wo,” e šupa go bomang? Anke re lebeledišišeng mantšu a a Jesu.

¹⁶ “Moloko wo.” Na Jesu o be a bolela ka batho bao e sego balatedi ba gagwe? Aowa. Nagana ka batho bao a bego a bolela le bona. Jesu o boletše boporofeta bjo ge a be a na le baapostola ba gagwe ba sego kae bao ba ilego “ba tla go yena thopeng.” (Mat. 24:3) Go se go ye kae, baapostola ba be ba tla tlotšwa ka moya o mokgethwa. Le gona ela hloko taba e dikologilego ditemana tše. Pele Jesu a ka bolela ka “moloko wo,” o itše: “Bjale ithuteng taba ye ka go swantšha ka mogo: Gateetee feela ge lekalana la wona e eba le lenanana gomme le hloga matlakala, le tseba gore selemo se batametše. Ka mo go swanago, ge le bona dilo tše ka moka, le tsebe gore Morwa wa motho o kgauswi mejakong.” Balatedi ba Jesu bao ba tloditšwego—e sego batho bao e sego balatedi ba gagwe—ba be ba tla bona dilo tšeo a di boletšego e sa le pele gomme ba lemoga seo di se bolelago, gore Jesu “o kgauswi mejakong.” Ka baka leo, ge Jesu a be a bolela ka “moloko wo,” o be a šupa go balatedi ba gagwe bao ba tloditšwego.

17. Ke’ng seo se bolelwago ke lentšu “moloko” le polelwana e rego “dilo tše ka moka”?

¹⁷ “O ka se fete le ka mohla go fihla ge dilo tše ka moka di direga.” Mantšu a a tla phethagala bjang? Gore re kgone go araba potšišo ye, re swanetše go tseba dilo tše tše pedi: seo se bolelwago ke “moloko” le “dilo tše ka moka.” Lentšu “moloko” gantši le šupa go batho ba nywaga e sa lekanego bao ba phetšego ka nako e itšego mehleng e swanago. Moloko ga se o motelele kudu, le gona go na le mo o felelago gona. (Ek. 1:6) Polelwana e rego “dilo tše ka moka” e akaretša ditiragalo ka moka tšeo di boletšwego e sa le pele tšeo di diregago nakong ya go ba gona ga Jesu, go tloga ge nako yeo e thoma ka 1914 go fihlela ge e fela ka “masetlapelo a magolo.”—Mat. 24:21.

18, 19. Re swanetše go kwešiša bjang mantšu a Jesu a mabapi le “moloko wo,” gona re ka phetha ka go re’ng?

¹⁸ Ka gona, re swanetše go kwešiša bjang mantšu a Jesu a mabapi le “moloko wo”? Moloko wo o bopša ke dihlopha tše pedi tša batlotšwa bao ba phetšego ka nako e itšego mehleng e swanago—sehlopha sa pele ke sa batlotšwa bao ba bonego mathomo a go phethagala ga pontšho ya boporofeta bja Jesu ka 1914, gomme sehlopha sa bobedi ke sa batlotšwa bao ba phetšego ka nako e itšego le batlotšwa ba sehlopha sa pele. Se se kgothatšago  ke gore ba bangwe ba batlotšwa bao ba lego sehlopheng sa bobedi ba tla phela go fihlela ba bona mathomo a masetlapelo ao a tlago. Dihlopha tše ka bobedi di bopa moloko o tee ka gobane di phetše ka nako e itšego mehleng e swanago e le Bakriste ba tloditšwego. *

¹⁹ Re ka phetha ka go re’ng? Re a tseba gore pontšho ya go ba gona ga Jesu a le matleng a Mmušo e bonagala gabotse lefaseng ka bophara. Le gona re kgona go bona gore batlotšwa bao ba sa dutšego ba phela e bile e le karolo ya “moloko wo” ba tšofetše; lega go le bjalo, ba ka se hwe ka moka ga bona pele masetlapelo a magolo a thoma. Ka baka leo, re ka phetha ka gore go šetše nako e nyenyane kudu gore Mmušo wa Modimo o tle gomme o buše lefase ka moka! Ruri e tla ba mo go thabišago kudu go bona thapelo yeo Jesu a re rutilego yona e phethagala yeo e rego: “Mmušo wa gago a o tle”!

20. Ke thuto efe ya bohlokwa yeo e tlago go ahlaahlwa kgatišong ye, gona go tlo ahlaahlwa’ng kgaolong e latelago?

²⁰ Anke le ka mohla re se ke ra lebala mantšu ao Jehofa ka boyena a a boletšego a le legodimong ka Morwa wa gagwe, ao a rego: “Le mo theetšeng.” Ka ge re le Bakriste ba therešo, re ikemišeditše go kwa taelo yeo. Re rata go tseba selo se sengwe le se sengwe seo Jesu a se boletšego le go se ruta ka Mmušo wa Modimo. Kgatišong ye re tlo ahlaahla thuto ya bohlokwa ya mabapi le seo Mmušo wo o šetšego o se dirile le seo o sa tlago go se dira nakong e tlago. Kgaolo e latelago e tla ahlaahla ditiragalo tša bohlokwa tšeo di diragetšego nakong ya go tswalwa ga Mmušo wa Modimo legodimong.