1, 2. (a) Bakriste ba kua Judea ba ile ba welwa ke masetlapelo afe? (b) Bakriste ba kua Judea ba ile ba bontšhwa lerato bjang?

E BE e le mo e ka bago ka 46 C.E., gomme naga ya Judea e aparetšwe ke tlala e šoro. Barutiwa ba Kriste ba Bajuda nageng ye ba be ba sa kgone go reka gaešita le dijo tše dinyenyane ka ge di bitša kudu. Ba be ba bolawa ke tlala o šoro. Lega go le bjalo, ba be ba le kgauswi le go bona tlhokomelo ya Jehofa e lerato yeo go se nago morutiwa le ge e le ofe wa Kriste yo a kilego a e bona. Go ile gwa direga’ng?

² Ka ge ba be ba kwešitšwe bohloko ke masetlapelo ao a wetšego Bakriste ba Bajuda kua Jerusalema le Judea, Bakriste ba Bajuda le ba Bantle kua Antiokia ya Siria, ba ile ba kgoboketša meneelo ya go thuša badumedigotee le bona. Ke moka ba ile ba kgetha bana babo rena ba babedi bao ba botegago gare ga bona, e lego Baranaba le Saulo, gore ba iše tirelo yeo ya thušo go bagolo ba phuthego kua Jerusalema. (Bala Ditiro 11:27-30; 12:25.) Akanya kamoo bana babo rena bao ba diilago kua Judea ba swanetšego go ba ba ile ba ikwa ka gona ka lerato leo bana babo bona ba Antiokia ba ba bontšhitšego lona!

3. (a) Batho ba Modimo ba mehleng yeno ba latela bjang mohlala wa Bakriste ba lekgolong la pele la nywaga ba kua Antiokia? Nea mohlala. (Bona le lepokisi le le rego, “ Modiro wa Pele o Mogolo wa Tlhakodišo wo re Kilego ra o Dira Mehleng Yeno.”) (b) Re tlo ahlaahla dipotšišo dife kgaolong ye?

³ Tiragalo ye ya lekgolong la pele la nywaga C.E., ke tiragalo ya mathomo ka Mangwalong ya gore Bakriste ba nageng e šele ba romele thušo go Bakristegotee le bona ba nageng e nngwe. Lehono re latela mohlala woo o beilwego ke bana babo rena ba Antiokia. Ge re ekwa gore bana babo rena tikologong e itšego ba wetšwe ke masetlapelo goba mathata, re a ba thuša. * E le gore o kwešiše kamoo modiro wa rena wa tlhakodišo o tswalanago le mediro ya Mmušo wa Modimo, anke re ahlaahleng dipotšišo tše di latelago tše tharo tša mabapi le modiro wa tlhakodišo: Ke ka baka la’ng re lebelela modiro wa tlhakodišo e le tirelo e kgethwa? Morero wa modiro wa rena wa tlhakodišo ke ofe? Re holega bjang modirong wo?

4. Ke’ng seo Paulo a ilego a se botša Bakorinthe ka bodiredi bja Bokriste?

⁴ Lengwalong la bobedi leo a le ngwaletšego Bakorinthe, Paulo o hlalositše gore bodiredi bja Bakriste bo gabedi. Gaešita le ge lengwalo la Paulo le be le eya go Bakriste ba tloditšwego, mantšu a gagwe a šoma le go “dinku tše dingwe” tša Kriste lehono. (Joh. 10:16) Karolo ya pele ya bodiredi bja rena ke “bodiredi bja poelano,” e lego go bolela ga rena ditaba tša Mmušo le go dira  barutiwa. (2 Bakor. 5:18-20; 1 Tim. 2:3-6) Karolo ya bobedi ke thušo yeo re e neago badumedigotee le rena. Paulo o boletše ka go lebanya ka ‘bodiredi bja go thuša bakgethwa.’ (2 Bakor. 8:4) Dipolelwana tšeo Paulo a di dirišitšego e lego “bodiredi bja poelano” le ‘bodiredi bja go thuša bakgethwa,’ ka moka ga tšona ke phetolelo ya sebopego sa lentšu la Segerika la di·a·ko·niʹa. Ke ka baka la’ng seo se le bohlokwa?

5. Ke ka baka la’ng go le bohlokwa gore Paulo o biditše modiro wa tlhakodišo gore ke bodiredi?

⁵ Ka go diriša lentšu le le swanago la Segerika medirong ye e mebedi, Paulo o bontšhitše gore modiro wa tlhakodišo o fo swana le mediro e mengwe yeo e dirwago ka phuthegong ya Bokriste. Pejana o itše: “Go na le bodiredi bjo bo fapafapanego, fela go na le Morena o tee; le gona go na le ditiro tše di fapafapanego, . . . Eupša . . . ka moka di dirwa ke moya o tee.” (1 Bakor. 12:4-6, 11) Ge e le gabotse, Paulo o tswalantše mediro e fapafapanego ka phuthegong le “tirelo e kgethwa.” * (Baroma 12:1, 6-8) Ka gona ga go makatše ge a ile a bona go swanetše gore a diriše e nngwe ya nako ya gagwe go “hlankela bakgethwa.”—Baroma 15:25, 26.

6. (a) Go etša ge Paulo a hlalositše, ke ka baka la’ng modiro wa tlhakodišo e le karolo ya borapedi bja rena? (b) Hlalosa kamoo lehono modiro wa rena wa tlhakodišo o rulaganywago ka gona lefaseng ka bophara. (Bona lepokisi le le rego, “ Ge go Eba le Kotsi ya Tlhago!” go letlakala 214.)

⁶ Paulo o ile a thuša Bakorinthe go bona lebaka leo modiro wa tlhakodišo e bego e le karolo ya bodiredi bja bona le borapedi bja bona go Jehofa. Ekwa lebaka la gagwe. O itše: Bakriste bao ba kgathago tema modirong wa tlhakodišo ba dira bjalo ka gobane ba ‘ikokobeletša ditaba tše dibotse mabapi le Kriste.’ (2 Bakor. 9:13) Ka go re’alo, Bakriste ba thuša badumedigotee le bona ka ge ba nyaka go phela ka go dumelelana le dithuto tša Kriste. Go etša ge Paulo a boletše, thušo e lerato yeo ba e neago bana babo bona ke pontšho ya “botho bjo bogolo bja Modimo bjo bo fetišišago.” (2 Bakor. 9:14; 1 Pet. 4:10) Ka go re’alo, ge Morokami wa December 1, 1975, o be o bolela ka go thuša bana babo rena, e lego seo se akaretšago modiro wa tlhakodišo, o boletše gabotse gore: “Le ka mohla ga se ra swanela go belaela gore Jehofa Modimo le Morwa wa gagwe Jesu Kriste ba thekga tirelo ye ya bohlokwa.” Ee, modiro wa tlhakodišo ke karolo ya bohlokwa ya tirelo e kgethwa.—Baroma 12:1, 7; 2 Bakor. 8:7; Baheb. 13:16.

7, 8. Morero o mogolo wa modiro wa rena wa tlhakodišo ke ofe? Hlalosa.

⁷ Morero wa modiro wa rena wa tlhakodišo ke ofe? Paulo o arabile potšišo yeo lengwalong la gagwe la bobedi leo le yago go Bakorinthe. (Bala 2 Bakorinthe 9:11-15.) Ditemaneng tše, Paulo o bontšha merero e megolo e meraro, goba dipakane tšeo re di fihlelelago ge re tšea karolo ‘bodireding bja tirelo ya go hlankela bohle,’ e lego modiro wa tlhakodišo. Anke re e ahlaahleng ka go latelana.

⁸ Sa pele, modiro wa rena wa tlhakodišo o godiša Jehofa. Hlokomela kamoo Paulo a dirago gore bana babo ba nagane ka Jehofa Modimo ditemaneng tše hlano lengwalong leo go boletšwego ka lona ka mo godimo. Moapostola yo o ba gopotša ka “seo se dirago gore re leboge Modimo” le ka “dipontšho tše dintši tša go leboga Modimo.” (Temana 11 le 12) O bolela kamoo  modiro wa tlhakodišo o dirago gore Bakriste ba ‘tagafatše Modimo’ le go reta “botho bjo bogolo bja Modimo bjo bo fetišišago.” (Temana 13 le 14) Le gona Paulo o phetha tlhaloso ya gagwe ya mabapi le modiro wa tlhakodišo ka go bolela gore: “A go lebogwe Modimo.”—Temana 15; 1 Pet. 4:11.

9. Modiro wa tlhakodišo o ka fetoša menagano ya batho bjang? Nea mohlala.

⁹ Go swana le Paulo, bahlanka ba Modimo lehono ba lebelela modiro wa tlhakodišo e le sebaka sa gore ba tagafatše Jehofa le go kgabiša dithuto tša gagwe. (1 Bakor. 10:31; Tito 2:10) Ge e le gabotse, modiro wa rena wa tlhakodišo gantši o thuša batho bao ba bego ba re lebelela gampe gore ba thome go ba le pono e botse ka Jehofa le Dihlatse tša gagwe. Ka mohlala: Mosadi yo mongwe yo a dulago tikologong yeo e ilego ya senywa ke ledimo le matla o be a pharile leswao mojakong wa ntlo ya gagwe leo le rego: “Ge e ba le le Dihlatse tša Jehofa—Le se ke la Kokota.” Ke moka ka letšatši le lengwe o ile a bona bašomi ba tlhakodišo ba lokiša ntlo yeo e sentšwego ke ledimo ka mošola wa seterata. O ile a fetša matšatši a mantši a bogetše bašomi ba bao ba nago le bogwera, ke moka a ya moo go yo botšiša gore ke bona bomang. Ka morago ga go kwa gore baithaopi bao ke Dihlatse tša Jehofa, o ile a kgahlega kudu gomme a re: “Ke be ke le tšea gampe.” Go ile gwa direga’ng? O ile a tloša leswao leo a bego a le pharile mojakong wa ntlo ya gagwe.

10, 11. (a) Ke mehlala efe yeo e bontšhago gore re kgona go phetha morero wa bobedi wa modiro wa rena wa tlhakodišo? (b) Ke kgatišo efe yeo e thušago bašomi ba tlhakodišo? (Bona lepokisi le le rego, “ Poroutšha Yeo e Thušago Bašomi ba Tlhakodišo.”)

¹⁰ Sa bobedi, re “aba ka boati dinyakwa” tša badumedigotee le rena. (2 Bakor. 9:12a) Re akgofela go thuša bana babo rena le dikgaetšedi ka dinyakwa tša nama le go ba homotša ge ba tlaišega. Ka baka la’ng? Ka gobane ditho tša phuthego ya Bokriste ke “mmele o tee,” le gona “ge e ba setho setee se tlaišega, ditho tše dingwe ka moka di tlaišega le sona.” (1 Bakor. 12:20, 26) Ka go re’alo, lerato la rena la borwarre le kwelobohloko di tutuetša bana babo rena le dikgaetšedi ba bantši go tlogela seo ba ka bago ba swaregile ka sona, ba kgoboketše dilo tšeo di nyakegago gomme ba kitimele ditikologong tšeo di wetšwego ke masetlapelo gore ba yo thuša badumedigotee le bona. (Jak. 2:15, 16) Ka mohlala, ka morago ga gore Japane e welwe ke tsunami ka 2011, ofisi ya lekala ya kua United States e ile ya ngwalela Dikomiti tša Meago tša Tikologo tša United States gomme ya botšiša ge e ba “bana babo rena ba sego kae bao ba nago le bokgoni” ba ka kgona go yo thuša go tsošološa Diholo tša Mmušo kua Japane. Bana babo rena ba ile ba arabela bjang? Ka morago ga dibeke tše sego kae feela, mo e ka bago bana babo rena le dikgaetšedi ba 600 ba ile ba ithaopela go yo thuša—ba dumela go itefelela ditshenyagalelo tša go ya Japane! Ofisi ya lekala la United States e itše: “Re ile ra thabišwa kudu ke karabelo ya bana babo rena.” Ge ngwanabo rena yo a itšego kua Japane a be a botšiša mošomi yo mongwe wa tlhakodišo yo a tšwago nageng e šele lebaka leo a ithaopetšego go tlo ba thuša, o ile a botšwa gore: “Bana babo rena ba Japane ke karolo ya ‘mmele wa rena.’ Ge ba ekwa bohloko, le rena re kwa bohloko.” Ka baka la lerato la bona la boikgafo, ka dinako tše dingwe bašomi ba tlhakodišo ba ile ba bea le maphelo a bona kotsing gore ba thuše badumedigotee le bona. *—1 Joh. 3:16.

 ¹¹ Batho bao e sego Dihlatse le bona ba ile ba bolela gabotse kudu ka modiro wa rena wa tlhakodišo. Ka mohlala, ka morago ga gore go direge kotsi ya tlhago seleteng sa Arkansas, U.S.A., ka 2013, kuranta e nngwe e ile ya bolela ka lebelo leo baithaopi ba Dihlatse ba ilego ba arabela ka lona ka gore: “Dihlatse tša Jehofa di rulaganya baithaopi ba tšona ba tlhakodišo ka bokgwari bjo bogolo.” Ee, go etša ge moapostola Paulo a boletše, re “aba ka boati” dinyakwa tša bana babo rena bao ba hlokago thušo.

12-14. (a) Ke ka baka la’ng go le bohlokwa kudu gore re phethe morero wa boraro wa modiro wa rena wa tlhakodišo? (b) Ke diphihlelo dife tšeo di gatelelago bohlokwa bja go dula re swaregile ka mediro ya moya?

¹² Sa boraro, re thuša bao ba kgomilwego ke masetlapelo gore ba boele ba tšee karolo medirong ya moya. Ke ka baka la’ng se se le bohlokwa? Paulo o boletše gore bao ba amogelago thušo ya tlhakodišo ba tla tutueletšega go bontšha “dipontšho tše dintši tša go leboga Modimo.” (2 Bakor. 9:12b) Tsela e kaonekaone ya gore bao ba kgomilwego ke masetlapelo ba leboge Jehofa ke ka gore ba boele ba tšee karolo medirong ya moya ka pela ka mo go ka kgonegago. (Bafil. 1:10) Morokami o mongwe o ile wa bolela ka 1945 gore: “Paulo o ile a dumela gore . . . go kgoboketšwe meneelo ka gobane e be e dira gore . . . bana babo rena ba badiidi ba thušwe ka dinyakwa tša nama gomme ka go re’alo ba kgone go tšea karolo ka mafolofolo le ka lethabo modirong wa Jehofa wa boboledi.” Woo e sa dutše e le morero wa rena. Ge bana babo rena bao ba wetšwego ke masetlapelo ba boela ba swarega bodireding, ga ba matlafatše feela baagišani ba bona bao ba lego mathateng, eupša le bona ba a imatlafatša.—Bala 2 Bakorinthe 1:3, 4.

¹³ Ekwa seo se boletšwego ke bana babo rena bao ba ilego ba thušwa modirong wa tlhakodišo, ba thomološa go ya tšhemong gomme ba matlafatšwa ke seo. Ngwanabo rena yo mongwe o itše: “E bile tšhegofatšo e kgolo kudu gore lapa la ka le swarege tšhemong. Seo se ile sa re thuša gore re lebale ganyenyane ka mathata a rena ka gobane re be re homotša batho ba bangwe.” Kgaetšedi yo mongwe o itše: “Go swarega medirong ya moya go ile gwa nthuša gore ke se dulele go nagana ka seo se diragetšego. Go ile gwa nkhomotša kudu.” Kgaetšedi yo mongwe le yena o itše: “Gaešita le ge dilo tše dintši di be di se matleng a rena, go tšea karolo bodireding go ile gwa thuša lapa la ka. Go boledišana le ba bangwe ka kholofelo ya rena ya lefase le lefsa go ile gwa re gopotša gore Modimo o tlo dira gore dilo ka moka e be tše mpsha.”

¹⁴ Go ba gona dibokeng ke modiro o mongwe wa moya woo badumedigotee le rena bao ba wetšwego ke masetlapelo ba swanetšego go o thomološa ka pela ka mo go ka kgonegago. Nagana ka phihlelo ya Kiyoko, e lego kgaetšedi yoo ka nako yeo a bego a le nywageng ya mafelelong a bo-50. Ka morago ga gore a lobe dilo ka moka nakong ya tsunami ntle le diaparo tšeo a bego a di apere le dieta, o ile a ipotšiša gore o tla leba kae. Ke moka mogolo yo mongwe o ile a mmotša gore ba tlo swara diboka tša Bokriste ka koloing ya gagwe. Kiyoko o re: “Nna, mogolo yoo le mosadi wa gagwe gotee le kgaetšedi yo mongwe re ile ra swara diboka ka koloing. Le ge diboka tšeo di se tša tšea nako e telele, eupša ka mohlolo ke ile ka lebala mašuana ao a bakilwego ke tsunami. Ke  ile ka ba le khutšo ya monagano. Diboka tšeo di ile tša mpontšha bohlokwa bja diboka tša Bokriste.” Kgaetšedi yo mongwe o ile a bolela ka diboka tšeo a ilego a ba go tšona ka morago ga masetlapelo a itšego gore: “Di ile tša nthuša go tšwela pele ke kgotlelela!—Baroma 1:11, 12; 12:12.

15, 16. (a) Bakriste ba kua Korinthe le ditikologong tše dingwe ba be ba tla thabela mehola efe ge ba tšea karolo modirong wa tlhakodišo? (b) Re holega bjang ka tsela e swanago modirong wa tlhakodišo?

¹⁵ Ge Paulo a be a bolela ka modiro wa tlhakodišo, o ile a botša Bakorinthe le ka mehola yeo bona le Bakriste ba bangwe ba bego ba tla e thabela ge ba tšea karolo go wona. O itše: “Ba le lopela go Modimo e bile ba [Bakriste ba Bajuda kua Jerusalema bao ba neilwego thušo] bolela gore ba a le rata ka baka la botho bjo bogolo bja Modimo bjo bo fetišišago go lena.” (2 Bakor. 9:14) Ee, go fa ka seatla se se bulegilego ga Bakorinthe go be go tla tutuetša Bakriste ba Bajuda go rapelela bana babo bona ba kua Korinthe, go akaretša le Bantle, le go ba rata kudu.

¹⁶ Ge Morokami wa December 1, 1945 o be o bolela ka mehola yeo Paulo a boletšego ka yona ya modiro wa tlhakodišo mehleng yeno o itše: “Nagana ka botee bjoo bo feleletšago bo le gona ge batho ba Modimo ba thušana!” Seo ke se bašomi ba tlhakodišo lehono ba se thabelago. Mogolo yo mongwe yo a ilego a thuša nakong ya mafula o itše: “Go kgatha tema modirong wa tlhakodišo go ile gwa dira gore ke ikwe ke le kgauswi le bana bešo go feta le ge e le neng pele.” Kgaetšedi yo mongwe yo a bego a leboga thušo yeo a e neilwego o itše: “Borwarre bja rena ke selo seo re se thabelago kudu gona bjale pele Paradeise e ka fihla.”—Bala Diema 17:17.

17. (a) Mantšu ao a lego go Jesaya 41:13 a phethagala bjang modirong wa tlhakodišo? (b) Nea mehlala yeo e bontšhago kamoo modiro wa tlhakodišo o godišago Jehofa le go matlafatša botee bja rena. (Bona le lepokisi le le rego, “ Baithaopi Bao ba Tšwago Lefaseng ka Bophara ba Tliša Tlhakodišo.”)

 ¹⁷ Ge bašomi ba tlhakodišo ba fihla lefelong la masetlapelo, bana babo rena ba moo ba bona e le ka kgonthe go rereša ga kholofetšo ya Modimo yeo e rego: “Nna Jehofa Modimo wa gago ke go swere ka seatla sa ka sa le letona, Yena yo a rego go wena: ‘O se ke wa boifa. Ke tla go thuša.’” (Jes. 41:13) Ka morago ga go phologa kotsi ya tlhago, kgaetšedi yo mongwe o ile a re: “Ka morago ga go bona tshenyo yeo e bakilwego ke kotsi yeo, ke ile ka felelwa ke kholofelo. Eupša Jehofa o ile a ntshwara ka seatla. Ke hloka mantšu a go hlalosa thušo yeo bana babo rena ba ilego ba nnea yona.” Ka morago ga gore kotsi ya tlhago e senye tikologong ya gabo bona, bagolo ba bangwe ba babedi ba ile ba ngwala lengwalo legatong la phuthego ya gabo bona gore: “Tšhišinyego ye ya lefase e re kwešitše bohloko kudu, eupša re bone Jehofa a re thuša ka bana babo rena. Re be re bala ka modiro wa tlhakodišo dinageng tše dingwe, eupša gona bjale re o bone ka mahlo.”

18. O swanetše go dira’ng ge e ba o nyaka go kgatha tema modirong wa tlhakodišo? (Bona le lepokisi le le rego, “ O Dirile Gore Bophelo bja Gagwe bo be le Morero.”)

¹⁸ Na o ka rata go latswa lethabo leo le tlišwago ke go thuša modirong wa tlhakodišo? Ge e ba go le bjalo, gopola gore gantši bašomi ba tlhakodišo ba kgethwa gare ga bao ba šomago go aga Diholo tša Mmušo. Ka gona botša bagolo ba phuthegong ya geno gore o nyaka go tsenela modiro wa go agwa ga diholo. Mogolo yo mongwe yo e lego mahlwa-a-di-bona modirong wa tlhakodišo o nea kgopotšo e latelago, o re: “Eya lefelong leo le wetšwego ke masetlapelo ge feela Komiti ya Tlhakodišo e go laleditše semmušo gore o ye.” Ka tsela yeo, modiro wa rena wa tlhakodišo o tla sepela ka thulaganyo.

19. Ke’ng seo bašomi ba tlhakodišo ba se dirago go bontšha gore re barutiwa ba Kriste e le ka kgonthe?

¹⁹ Ruri modiro wa tlhakodišo ke tsela e kgethegilego yeo ka yona re kwago taelo ya Kriste ya gore re “ratane.” Ka go bontšhana lerato le bjalo, re bontšha gore re barutiwa ba Kriste e le ka kgonthe. (Joh. 13:34, 35) A tšhegofatšo e kgolo gakaakaang yeo re nago le yona lehono ya go ba le baithaopi ba bantši kudu bao ba tlišetšago Jehofa kgodišo ka go thuša bao ba thekgago Mmušo wa Modimo ka potego!