O BONA morutwana wa gago wa Beibele a thabile ka ge a kwešiša seo se bolelwago ke lengwalo leo le sa tšwago go le bala. O bolela a sa kgolwe gore: “Na o ra gore Beibele e ruta gore re ka phela ka mo go sa felego Paradeiseng—gona mo lefaseng?” Motho yo o sepelago le yena tšhemong o a myemyela ke moka o botšiša morutwana wa Beibele gore: “Ke’ng seo o sa tšwago go se bala ka Beibeleng?” Morutwana wa Beibele o šišinya hlogo a sa kgolwe, ke moka o re: “Ke makatšwa ke gore ga se ka ka ka rutwa taba ye!” O thoma go gopola gore o boletše mantšu ao a nyakilego a swana le a dibeke tše sego kae tše di fetilego ge a be a ithuta ka lekga la mathomo gore leina la Modimo ke Jehofa.

Na o kile wa ba le phihlelo e swanago le ye? Batho ba bantši ba Modimo ba bile le yona. Go na le dilo tše mmalwa tšeo di ka re gopotšago gabotse ka mpho ye ya bohlokwa yeo re e neilwego—go tseba therešo! Anke o eme go se nene gomme o ipotšiše gore: O hweditše bjang mpho ye? Karolong ye re tlo ahlaahla potšišo yeo. Tsela yeo batho ba Modimo ba bego ba thušwa go kwešiša dilo tša moya ganyenyane-ganyenyane ke bohlatse bjo bo lego molaleng bja gore Mmušo wa Modimo ke wa kgonthe. Ka nywaga e lekgolo, Kgoši ya Mmušo wo, e lego Jesu Kriste, e be e dutše e kgonthišetša gore batho ba Modimo ba rutwa therešo.