MANTŠU a latelago a bitšwa gore ke matseno a tumilego kudu a kilego a ngwalwa. “Mathomong Modimo ó hlodile lexodimo le lefase.” (Genesi 1:1) Ka lefoko le le bonolo le leo le nago le matla, Beibele e re tsebiša Motho wa bohlokwa ka Mangwalong a Makgethwa ka moka—Modimo yo matla ohle, Jehofa. Temana ya pele ya Beibele e utolla gore Modimo ke Mmopi wa legohle le legolo leo le bonagalago gotee le polanete yeo re dulago go yona. Ditemana tšeo di latelago di hlalosa gore ka nako e telele e latetšego, yeo ka tsela ya seswantšhetšo e bitšwago matšatši, Modimo o ile a re lokišeletša lefase gomme a bopa dilo ka moka tše kgahlišago tšeo di lego gona.

Tlholo e phagamego kudu gare ga dilo ka moka tšeo Modimo a di hlodilego lefaseng ke motho. Motho ke sebopiwa seo se bopilwego ka seswantšho sa Modimo seo se kgonago go bonagatša dika tša Jehofa tše bjalo ka lerato le bohlale. Modimo o bopile motho ka lerole la mmu. Modimo o ile a mo rea leina la Adama gomme a mmea paradeiseng—tšhemong ya Edene. Modimo ka boyena o ile a lema tšhemo yeo gomme a e tlatša ka dihlare tše dibotse tšeo di enywago dienywa.

Modimo o ile a bona go le bohlokwa gore motho a be le molekane. A diriša e nngwe ya dikgopo tša Adama, Modimo o ile a dira mosadi gomme a mo tliša go monna gore e be mosadi wa gagwe yoo ka morago a ilego a mo rea leina la Efa. A thabile, Adama o ile a thoma go reta a re: “Byalo xomme šó, e lexo lešapô la mašapô a-ka, le nama ya nama ya-ka.” Modimo o ile a re: “Ka baka leo monna ó tlo tloxêla tata’xwê le mma’xwê, a xomarêla mosadi wa xaxwe; xomme ba tlo ba nama e tee.”—Genesi 2:22-24; 3:20.

Modimo o ile a nea Adama le Efa ditaelo tše pedi. Ya pele, o ile a ba laela gore ba leme legae la bona e lego lefase le go le hlokomela gomme mafelelong ba le tlatše ka bana ba bona. Ya bobedi, o ile a ba botša gore ba se ke ba ja dienywa tša sehlare se tee feela tšhemong yeo e kgolo, e lego “sehlare sa xo tseba botse le bobe.” (Genesi 2:17) Ge e ba ba be ba ka se mo kwe, ba be ba tlo hwa. Ka ditaelo tšeo, Modimo o ile a nea monna le mosadi sebaka sa gore ba bontšhe gore ba mo amogela bjalo ka Mmuši wa bona. Le gona, go kwa ga bona go be go tla bontšha gore ba a mo rata le gore ba na le tebogo. Ba be ba e-na le mabaka ka moka a go amogela pušo ya gagwe e botho. Go be go se na selo seo se hlaelago bathong bao ba phethagetšego. Beibele e re botša gore: “Modimo a lebêlêla tšohle tše a di dirilexo, a bôna e le tše botse kudu.”—Genesi 1:31.

—E theilwe go Genesi dikgaolo 1 le 2.