Ka 1999, phuthego yeo e dirišago polelo ya diatla kua Kobe, Japane, e ile ya kwa ka monna wa sefoa yo a bitšwago Hirofumi. Ge ngwanabo rena yo mongwe a be a leka go etela Hirofumi, mmago Hirofumi o ile a gana ngwanabo rena a mmona. Ngwanabo rena yo o ile a ya ga bo-Hirofumi leboelela a kgopela mmagwe gore a mo dumelele go mmona, gomme mafelelong a tla le yena  mojako. O be a na le meriri e metelele ya mahlafarara le ditedu tše ditelele tša go hlafa. O be a bonagala eka ke motho yo a bego a dula a nnoši sehlakahlakeng seo batho ba hudugilego go sona nywageng e makgolo e fetilego. Ge o mo lebelela, o be o ka se re o a phela. Hirofumi e be e se sefoa feela, eupša gape e be e le sefofu. Ngwanabo rena o ile a šala a ahlame eupša a swara diatla tša Hirofumi gomme a bolela le yena ka polelo ya diatla. Hirofumi o be a sa tsebe go araba. O be a sa tšwe ka ntlong e bile a se a ka a bolela le batho ga e sa le a foufala nywageng e lesome e fetilego ge a be a na le nywaga e 31.

Ngwanabo rena o ile a boela go yena ka morago ga matšatši a mabedi. Mmago Hirofumi o ile a makala ka ge a be a ipoditše gore ngwanabo rena e tla ba gona a laetše ka morago ga gore a bone seemo sa morwa wa gagwe. Le lona lebakeng le ngwanabo rena o ile a mo kgopela go boledišana le Hirofumi, ka gona mmagwe a mo tliša mojako. Ka morago ga gore ngwanabo rena a boele ga bo-Hirofumi kgwedi ka moka eupša a sa kgone go boledišana le yena, mmagwe o ile a botša ngwanabo rena gore a se hlwe a itshwenya ka go tla. Lega go le bjalo, ngwanabo rena o ile a fo tla. O ile a tla a swere dikuku gomme a dira sohle se a ka se kgonago go ba bontšha gore o be a tshwenyegile ka bona. Ka morago ga dikgwedi tše dingwe tše pedi ge go sa direge selo, ngwanabo rena o ile a nagana gore o itapišetša lefeela.

Ngwanabo rena o ile a ipotša gore o boela la mafelelo. Pele a ka tsena ntlong ya ga bo-Hirofumi, o ile a rapela Jehofa gore a mo thuše go bona ge e ba a swanetše go hlwa a sa boela. Ge a fihla ntlong yeo, o ile a swara diatla tša Hirofumi gomme a mmotša ka polelo ya diatla gore go na le Modimo yo a bitšwago Jehofa yo a mo hlokometšego a le legodimong  le yoo a kwešišago mohlako wa gagwe go feta motho le ge e le ofe. O ile a mmotša le gore Jehofa o tshwenyegile ka yena gomme o nyaka go mo ntšha mohlakong woo. Leo ke le lengwe la mabaka a gore Dihlatse tša Jehofa di mo etele. Mathomong Hirofumi o be a sa arabele; eupša mo lekgeng le o ile a swara seatla sa ngwanabo rena ka go tia gomme a rothiša megokgo. A kgomilwe ke se, ngwanabo rena le yena o ile a lla. Thuto ya Beibele e ile ya thongwa.

Ka morago ga gore Hirofumi a ithute Beibele ka nywaga e 11, o ile a thoma go ya dibokeng phuthegong ya mo a dulago go e na le gore a sepele monabo o motelele go ya phuthegong ya polelo ya diatla yeo a bego a kopanela le yona mathomong. Ga go le o tee wa bana babo rena phuthegong yeo yo a bego a kgona polelo ya diatla, eupša dikgweding tše 18 tše di latetšego, bana babo rena le dikgaetšedi ba 22 ba phuthegong  ye ba ile ba ithuta polelo ya diatla gore ba kgone go thuša Hirofumi. Ka January 2012, Hirofumi o ile a nea polelo ya gagwe ya mathomo Sekolong sa Bodiredi sa Pušo ya Modimo yeo e bego e fetolelwa. Ka October wona ngwageng woo, o ile a ba mogoeledi yo a sa kolobetšwago.

Floren, e lego ngwanabo rena wa mmulamadibogo yo a dulago Philippines, o swara palogare ya dithuto tša Beibele tše 25, tšeo bontši bja tšona a di swarago le bahlapetši. Gantši banna ba ba šoma mašego—ba bangwe bošego ka moka. Ka gona, Floren o swanetše go fetofetoga le maemo. O ya moo bahlapetši bao ba šomago gona gomme a ithuta le bona ka nako ya go khutša goba ka dinako tše dingwe tšeo di sa šitišanego le mošomo wa bona. Dithuto tše dingwe tša Beibele o di swara magareng ga iri ya bošupa le ya lesometee bošego gomme tše dingwe o di swara magareng ga iri ya bohlano le ya senyane mesong. Ka dinako tše dingwe o rulaganya go tla ge ba le kgauswi le go tšhaiša gomme go tsena ba bangwe. Ka go re’alo, a ka kgona go ithuta le mohlapetši yo a lego kgauswi le go tsena mošomong, ke moka ka morago a ithute le yo a sa tšwago go tšhaiša. Floren o re: “Ka go ba le dithuto tše dintši ka tsela ye tša Beibele, ke hweditše lethabo leo ke sa kago ka ba le lona.” Gona bjale ba bangwe ba bahlapetši bao ba tla dibokeng Holong ya Mmušo. E bile yo mongwe wa barutwana ba Beibele ba Floren o kolobeditšwe gomme ke mmulamadibogo wa ka mehla.

Ka letšatši le lengwe ge dikgaetšedi tša rena tše pedi tša kua Armenia di le tšhemong pula e ena, di ile tša kopana le mma yo mongwe le morwedi wa gagwe seterateng gomme tša ba sepedišetša pampišana. Dikgaetšedi tše di ile tša šala di ahlame ge mma yo yoo leina la gagwe e lego Marusya, a di botša gore yena le morwedi wa gagwe e lego Yeva ba be ba eme  moo puleng ka diiri tše pedi ba re mohlomongwe ba ka bona Dihlatse tša Jehofa. Ka baka la’ng? Kgaetšedi ya Marusya e be e ithutile therešo kgolegong go bana babo rena bao ba bego ba golegetšwe boemagare bja bona bja Bokriste. Marusya o be a ipoditše gore kgaetšedi ya gagwe e be e tla boa kgolegong e le motho yo šoro le wa lerabele. Go e na le moo, o ile a boa e le motho yo bonolo le yo a hlaphogetšwego monaganong. Ge kgaetšedi ya Marusya e dutše e kopanela le Dihlatse, e ile ya dira diphetogo tše di oketšegilego tše dibotse. Eupša Marusya le morwedi wa gagwe ba ile ba makala ka gobane Dihlatse tša Jehofa motseng woo di be di senywa maina dikuranteng le mananeong a thelebišene. Yeva o ile a kgotsa ka gore: ‘Malome o fetogile. Bjale go re’ng Dihlatse tša Jehofa di bolelwa gampe?’ Ka ge a be a nyaka go tseba lebaka, o ile a botša mmagwe gore: “Re ka se tsoge re tsebile ka batho ba ntle le gore re eme ka maoto. A re tšwe gona bjale re yo nyaka Dihlatse tša Jehofa gore re tle re kgone go bo pata.” Ke sona seo ba ilego ba se dira letšatšing leo ba kopanego le dikgaetšedi tša rena. Ka morago ga matšatši a mabedi, mma yoo le morwedi wa gagwe ba ile ba thoma go swarelwa thuto ya Beibele. Ba ile ba thoma go tla dibokeng gomme ba šetše ba dirile tšwelopele moo e lego gore gona bjale ke bagoeledi ba sa kolobetšwago.

Kua Adana, Turkey, mosadi yo a bego a na le mathata a magolo go akaretša le a lapa, yoo gape a ilego a nagana ka go ipolaya, o ile a hwetša dimakasine tša rena tše pedi mojakong wa ntlo ya gagwe. Go bonagala di topilwe ke bana ba itšego motseng woo gomme ba fihla ba di bea mojako wa ntlo ya gagwe, ba nagana gore ke tša gagwe. Mosadi yoo o ile a kgahlwa kudu ke diphihlelo tša ka dimakasineng tšeo gomme a duma eka bophelo bja gagwe bo ka fetoga ka tsela e swanago. O ile a founela nomoro ya mogala yeo e bego e ngwadilwe go o mongwe wa dimakasine tšeo gomme a arabja ke  kgaetšedi wa mmulamadibogo yo a dulago kgauswi le moo. Thuto ya Beibele e ile ya thongwa. Mosadi yoo o ile a kgahlwa kudu ke seo a bego a ithuta sona gomme a re o nyaka go ya dibokeng. Ge di phuthuloga, o ile a hwetša gore ntlo ya gagwe e kgauswi le Holo ya Mmušo. Gateetee o ile a thoma go tla dibokeng gomme le lehono o sa dira bjalo.

Bam, yo e bego e le lephodisa e bile a tsena kereke kua Nepal, o ile a kopana le banyalani bao e lego babulamadibogo ba kgethegilego seterateng a le mošomong. O ile a kgahlwa kudu ke gore ba be ba araba dipotšišo tša gagwe ka moka ba diriša Beibele. Bam o ile a dumela go swarelwa thuto ya Beibele, gomme go se go ye kae a thoma go tla dibokeng. Ge a dutše a ithuta, letswalo le ile la thoma go mo tshwenya ka baka la mošomo wa gagwe wa bophodisa, ka gona a kgopela ba bagolo gore ba mo nee mošomo wa ka ofising woo o bego o ka se nyake gore a sware sethunya. Ba bagolo ba ile ba dumela. Lega go le bjalo, ka morago ga gore Bam a be gona kopanong ya selete, o ile a tlogela bophodisa ka mo go feletšego ka baka la letswalo.

Mosadi wa Bam o ile a se thabišwe ke phetho yeo, ka gobane ge motho e le lephodisa o hlompšha kudu setšhabeng, o gola tšhelete ya go bonala, o na le ditokelo tše itšego e bile tšhelete ya phenšene le yona e a tsebalega. Ka gona mosadi wa gagwe o ile a leka go mo fetoša monagano ka go mmotša gore: “Ge o ka se tlogele bophodisa, ke tla ithuta Beibele le Dihlatse.” Ge leano leo le foloditše, o ile a hlalefetša molaodi wa maphodisa gore a lahlele Bam kgolegong, a nagana gore Bam o tla fetoša monagano. Bam o ile a lokollwa kgolegong ka morago ga matšatši a lesome, eupša o be a sa ikemišeditše go tsoma mošomo o mongwe ntle le wa bophodisa. O ile a šoma go iša batho mo ba ratago ka paesekele, e lego mošomo wa diiri tše dintši letšatšing le le fišago. Go sa šetšwe  mathata ao, o be a thabile. O ile a dira tšwelopele moyeng gomme ya ba mogoeledi. Ge nako e dutše e eya, mosadi wa gagwe o ile a se sa mo ganetša. Ka ge bana babo rena le dikgaetšedi ba be ba swara mosadi wa gagwe gabotse, o ile a thoma go ithuta Beibele. Bam o tšwela pele go hlokomela lapa la gagwe, e bile o dira tšhelete e ntši ka mošomo wo wa dipaesekele go feta wa bophodisa. O kolobeditšwe kopanong ka February 2013, gomme gona bjale mosadi wa gagwe le morwa wa bona ba ya dibokeng le yena.

Myeong-hee, e lego kgaetšedi ya kua Korea, o tshwenya ke leoto ka ge a ile a hwa lehlakore ge a be a na le nywaga e mebedi. O lapa ka pela gomme ka dinako tše dingwe o fo wa. Go oketša moo, o fela a hlaselwa ke bolwetši bja go tšhoga le go tlaišwa ke ditlamorago tša dihlare tše a di nwago. Myeong-hee o thatafalelwa ke go hema, le gona letšhogo le go tshwenyega di mmakela dihlabi. Go sa šetšwe mathata a, Myeong-hee o be a nyaka go ba mmulamadibogo wa go thuša gomme o ile a bo tšea mo e nyakilego go ba kgwedi e nngwe le e nngwe nywageng e mebedi e fetilego. O leboga Jehofa ge a ile a mo nea matla a go phetha bodiredi bja gagwe.

Agnes, e lego moromiwa wa kua Indonesia, o be a fela a nea bohlatse go mosadi yo e bego e le moimana. Mosadi yo o be a rekiša merogo mmarakeng wa motseng wa gabo. O be a thabela go bala dimakasine tša rena e bile a rata go ba le dipoledišano tša Beibele ge a sa swarega kudu. Ka letšatši le lengwe Agnes o ile a etela mosadi yoo moo mmarakeng, eupša a se mo hwetše. Monna wa gagwe o ile a botša Agnes gore mosadi wa gagwe ke motswetši. Agnes o ile a phetha ka go  mo etela. O ile a ya a swere Puku ya ka ya Ditaba tša Beibele e le mpho. Mosadi yoo o ile a makatšwa ke gore Agnes o iphile nako ya go tlo bona yena le leseana la gagwe, eupša a makala le go feta ge Agnes a be a mo nea mpho. Mosadi yo o ile a phutholla puku yeo, a e lebelela a sa kgolwe mahlo a gagwe, ke moka a re: “Puku ye o e hweditše kae? Ke be ke dutše ke tsomana le yona ka nywaga e 30! Ke tsene mabenkeleng ka moka a dipuku ke nyakana le yona, ka botšiša le batho. Ga go le o tee yo a bego a na le yona, ba be ba sa e tsebe, e bile e phala dipuku ka moka.” Taba ke gore ge mosadi yo e be e sa le ngwana o be a e bala kudu, ka gobane malome wa gagwe o be a na le yona. Mosadi yo o boetše o bala puku ye, e bile morwedi wa gagwe yo mogolo le yena o rata go e bala. Bobedi bja bona ba ile ba thoma go swarelwa thuto ya Beibele.