Ka October 2012 batho ba ile ba laletšwa go tlo iponela histori ya Dihlatse tša Jehofa kua Brooklyn, New York. Histori yeo e mabapi le mathata le dikotsi tšeo di ilego tša wela bao ba bego ba ikemišeditše go phela ka tsela ya Bokriste yeo e rutilwego ke Jesu.

Bekeng ya pele feela, baeng ba ka godimo ga 4 200 le ditho tša lapa la Bethele ba ile ba tšama ba fepa mahlo. Naomi, e lego Hlatse yeo e dulago kgauswi le moo, o ile a bogela histori ya rena gateetee ge dikgoro di se na go bulwa. O itše: “Tšhate yeo e bontšhago tatelano ya ditiragalo e nthušitše go kwešiša nako yeo dilo tše itšego di diragetšego ka yona le lebaka la go direga ga tšona. Ke ithutile mo gontši ka mokgatlo wa rena le histori ya wona ya mehleng yeno.”

 Histori yeo e thoma mehleng ya Bokriste ka 33 C.E. go fihla lehono. Diswantšho tšeo tša histori di rulagantšwe ka dikarolo tše nne. Karolo e nngwe le e nngwe e na le sehlogo se se theilwego Lengwalong gomme e rolwa ke bidio e kopana ya Seisemane yeo o ka kgethago gore e tšweletše mantšu a seo se bolelwago botlaseng bja sekirini ka leleme le ge e le lefe la a šupago.

Sehlogo sa karolo ya mathomo se tšerwe mantšung a Jesu ao a lego go Johane 3:19, ao a rego: “Batho ba Ratile Leswiswi.” Beibele e boletše e sa le pele gore ka morago ga lehu la baapostola, batho ba kgopo ba ‘tla tsoga gomme ba bolela dilo tše di kgopamego.’ (Dit. 20:30) Bao ba ilego ba gana dithuto tša batho bao ba ile ba tlaišwa o šoro.

Go fapana le moo, karolo e latelago yeo e rego “Seetša a se Bonege,” yeo e theilwego go 2 Bakorinthe 4:6, e bontšha histori ya go thoma mafelelong a bo-1800 ge barutwana ba botegago ba Beibele ba be ba thoma go ithuta Mangwalo lefsa. Ba ile  ba lahla dithuto tša kgale tše di bego di sa thewa Beibeleng gomme ka sebete ba tsebatša ditherešo tše di bonegago bjalo ka seetša. Karolo ye e hlalosa ge ba be ba sa thoma go gola tsebong le go oketšega ka palo pele ga Ntwa ya Pele ya Lefase.

Karolong e latelago go na le phapoši yeo go yona go hlaloswago selo sa bohlokwa seo le lehono Dihlatse tša Jehofa di sa dutšego di se thabela. Ka 1914, Barutwana ba Beibele (bjalo ka ge Dihlatse tša Jehofa di be di tsebja bjalo ka nako yeo) di ile tša thoma go bontšha batho filimi ya “Photo-Drama of Creation.” Batho ba dimilione ba ile ba bogela filimi ye ya moswananoši, yeo e bego e kopantše dinepe le diswantšho tše di sepelago tšeo di bego di sepedišana le modumo. Tše dingwe tša dilo tšeo baeng ba di bonago phapošing ye ke diswantšho tša kgale, bidio e kopana yeo e bego e rola filimi ye le diselaete tša mebalabala tša ka godimo ga tše 500.

Go tlaiša ga Sathane balatedi ba Kriste mo go hlalositšwego  go Kutollo 12:17, ke sehlogo sa karolo ya boraro yeo e rego, “Drakone ya Galefa.” Karolong ye go bolelwa kudu ka Bakriste bao ba sa kago ba tšea lehlakore nakong ya ntwa. Se se tlogago se dira gore karolo ye e kgome pelo ke dibidio tše kopana tšeo di bontšhago kamoo bao ba bego ba gana go dira dilo tše itšego ka baka la matswalo ba bego ba tlaišwa ka gona, go etša Remigio Cuminetti wa kua Italy, yo a ilego a gana go apara yunifomo ya mašole goba go lwa Ntweng ya Pele ya Lefase. Bidio e nngwe e bolela ka Alois Moser wa kua Austria. O ile a gana go bolela gore “Heil Hitler,” gomme ka baka la seo a rakwa mošomong ke moka mafelelong a lahlelwa kampeng ya tshwenyo ya Dachau. E bile karolong ye go na le sele ya maitirelo ya leswiswi yeo e bontšhago seo Dihlatse tša Jehofa di ilego tša lebeletšana le sona ge di be di golegilwe ka baka la tumelo ya tšona kua Gerika, Japane, Poland, nageng yeo e bego e le Yugoslavia le dinageng tše dingwe.

Karolo ya mafelelo ya sehlogo se se rego, “Ditaba tše Dibotse go Ditšhaba Tšohle,” seo se theilwego go Kutollo 14:6, e ahlaahla modiro wa Dihlatse tša Jehofa wa mehleng yeno. Karolong ye go na le diswantšho mabotong tšeo di bontšhago koketšego yeo e diregago ka lebelo, modiro o sa kgaotšego wa boboledi le lerato la borwarre. Pele baeng ba tloga lefelong le la histori, ba ka ya mafelwaneng a itšego gomme ba bona moago wo o bego o bitšwa Ntlo ya Beibele le wa Taberenakele ya Brooklyn, e lego meago yeo e ilego ya dirišwa ke Dihlatse tša Jehofa nywaga ya ka godimo ga e 100 e fetilego.

Lefelo leo o ka bonago histori ye ya rena le kua 25 Columbia Heights, Brooklyn, New York. Le bulwa go tloga ka Mošupologo go fihla ka Labohlano, go thoma ka 8:00 a.m. go fihla ka 5:00 p.m. e bile go tsenwa mahala. Ge e ba o le New York City, ke ka baka la’ng o sa iphe nako ya go tlo iponela ka noši?